Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn | OWE WIWE LẸ—LẸDOGBEDEVOMẸ AIHỌN YỌYỌ TỌN

Osọhia 14:1-20

NUHE E BẸHẸN LẸ

  • Lẹngbọvu lọ po omẹ 144 000 lẹ po (1-5)

  • Wẹndomẹ sọn angẹli atọ̀n lẹ dè (6-12)

    • Angẹli de to wẹndagbe lá to agahomẹ (6, 7)

  • Ayajẹnọ wẹ mẹhe kú to Klisti mẹ lẹ (13)

  • Jibẹwawhé awe to aigba ji (14-20)

14  Enẹgodo, yẹn mọ, podọ pọ́n! Lẹngbọvu+ lọ ṣite to Osó Ziọni ji,+ gbẹtọ 144 000+ he yè kàn oyín etọn po Otọ́+ etọn tọn po do nukọn na lẹ sọ tin po e po.  N’sè nudidọ de sọn olọn mẹ taidi nudidọ osin susu tọn podọ taidi nudidọ daho hẹviosò tọn; nudidọ he n’sè sọ taidi hànjitọ he to ajalẹn yetọn lẹ hò tọn nkọ.  Yé sọ to ohàn de ji he taidi ohàn yọyọ de,+ to ofìn lọ nukọn podọ to mẹdida ẹnẹ+ lẹ po mẹho lọ lẹ+ po nukọn, mẹdepope masọ penugo nado plọn ohàn enẹ to gigọ́ mẹ adavo gbẹtọ 144 000+ lọ lẹ, he ko yin hihọ̀ sọn aigba ji.  Omẹ ehelẹ wẹ ma ko yí yọnnu do hẹn yede flu; na nugbo tọn, alọji wẹ yé te.+ Omẹ ehelẹ wẹ nọ to hihodo Lẹngbọvu lọ yì fidepope he e yì.+ Yewlẹ wẹ yin hihọ̀+ sọn gbẹtọvi lẹ mẹ taidi sinsẹ́n tintan+ lẹ hlan Jiwheyẹwhe podọ hlan Lẹngbọvu lọ,  podọ oklọ depope ma yin mimọ to onù yetọn mẹ; yé ma tindo oblọ.+  Yẹn sọ mọ angẹli devo to zinzlọn to agahomẹ,* podọ e tindo wẹndagbe madopodo nado lá na mẹhe nọ nọ̀ aigba ji lẹ, yèdọ na akọta lẹpo, hẹnnu lẹpo, ogbè lẹpo podọ gbẹtọ lẹpo.+  E to didọ po ogbè lélé po dọmọ: “Mì dibusi Jiwheyẹwhe bo na gigo e, na ojlẹ whẹdida etọn tọn ko wá,+ enẹwutu mì sẹ̀n Mẹlọ he dá olọn, aigba, ohù+ po asisa osin tọn* lẹ po.”  Angẹli devo, yèdọ awetọ hodo e bo to didọmọ: “E ko họ́! Babilọni Daho+ lọ ko họ́,+ ewọ he hẹn akọta lẹpo nado nù ovẹn ojlo zogbe* fẹnnuwiwa zanhẹmẹ etọn tọn!”*+  Angẹli devo, yèdọ atọ̀ntọ hodo yé bo to didọ po ogbè lélé po dọmọ: “Eyin mẹdepope nọ sẹ̀n gbekanlin lọ+ po boṣiọ etọn po bo mọ ohia de yí do nukọn kavi do alọ etọn go,+ 10  ewọ nasọ nù ovẹn homẹgble Jiwheyẹwhe tọn tọn he akú etọn yin kinkọ̀n do kọfo homẹgble Etọn tọn+ mẹ, podọ yè na yí miyọ́n po whèmi+ po do sayana ẹn to nukun angẹli wiwe lẹ tọn mẹ podọ to nukun Lẹngbọvu lọ tọn mẹ. 11  Azọ̀ yasanamẹ yetọn tọn nasọ to tìtì yiaga kakadoi podọ doidoi,+ bọ mẹhe nọ sẹ̀n gbekanlin lọ po boṣiọ etọn po lẹ, podọ mẹdepope he mọ ohia oyín etọn tọn yí lẹ ma na tindo gbọjẹ depope to okle po ozán po.+ 12  Fihe e biọ akọndonanu to omẹ wiwe lẹ si te die,+ yèdọ mẹhe to gbedide Jiwheyẹwhe tọn lẹ yìn bo tẹdo yise Jesu tọn go gligli lẹ.”+ 13  Yẹn sọ sè ogbè de sọn olọn mẹ dọ, “Kanwe dọmọ: Ayajẹnọ wẹ mẹhe kú to Oklunọ mẹ+ sọn ojlẹ ehe mẹ sọyi lẹ. Gbigbọ lọ dọ, mọwẹ, mì gbọ yé ni gbọjẹ sọn tuklajijẹ yetọn lẹ mẹ, na nuhe yé wà lẹ to hihodo yé to afọdopolọji.”* 14  Enẹgodo n’mọ, podọ pọ́n! aslọ wewe de, mẹde he taidi visunnu gbẹtọ tọn sọ sinai to aslọ lọ ji,+ jẹgbakun sika tọn de sọ to ota na ẹn bọ e tindo agbogọdọẹ didá de to alọ etọn mẹ. 15  Angẹli devo sọ tọ́n sọn fiwiwe tẹmpli lọ tọn mẹ bo yí ogbè lélé do to awhádo hlan mẹlọ he sinai to aslọ lọ ji dọmọ: “Zín agbogọdọẹ towe do e mẹ bo gbẹ̀n, na ojlẹ ko sọ̀ nado gbẹ̀n, na ojì aigba tọn ko bia pete.”+ 16  Mẹlọ he sinai to aslọ lọ ji sọ zín agbogọdọẹ etọn do aigba ji, bọ aigba yin gbingbẹ̀n. 17  Podọ angẹli devo sọ tọ́n sọn fiwiwe tẹmpli lọ he to olọn mẹ tọn mẹ, bọ ewọ lọsu tindo agbogọdọẹ didá de. 18  Angẹli devo sọ tọ́n sọn agbà lọ kọ̀n, bọ ewọ tindo aṣẹ do miyọ́n ji. E sọ yí ogbè lélé do ylọ mẹlọ he tindo agbogọdọẹ didá lọ bo dọmọ: “Zín agbogọdọẹ didá towe do e mẹ bo bẹ ohín ovẹn sinsẹ́n aigba ji tọn lẹ pli, na ovẹn sinsẹ́n lẹ ko bia wutu.”+ 19  Angẹli lọ sọ zín agbogọdọẹ etọn do aigba ji bo bẹ ovẹn sinsẹ́n aigba ji tọn lẹ pli, ewọ sọ dọ̀n ẹn dlan ovẹn-finyọ́ndo daho homẹgble Jiwheyẹwhe tọn tọn mẹ.+ 20  Ovẹn sinsẹ́n lẹ sọ yin finfinyọ́n to gbonu tòdaho lọ tọn, ohùn sọ tọ́njẹgbonu sọn ovẹn-finyọ́ndo lọ mẹ bo yiaga jẹ ogàn he yin dido onù na osọ́ lẹ kọ̀n, yèdọ na nudi kilomẹtlu 300.*

Nudọnamẹ Odò Tọn

Kavi “jiwhé; aga.”
Kavi “asisa.”
Kavi “ovẹn homẹgble.”
Glẹki, pọlnẹia. Pọ́n Zẹm.
Kavi “to yìyì tlọlọ po yé po.”
To paa mẹ, “stade 1600.” Stade dopo sọzẹn hẹ m 185. Pọ́n Nud. B14.