Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Osọhia 12:1-17

NUHE E BẸHẸN LẸ

  • Yọnnu lọ, visunnu lọ, dlagọni lọ (1-6)

  • Mikaẹli funawhàn hẹ dlagọni lọ (7-12)

    • Dlagọni lọ yin dindọn dlan aigba (9)

    • Lẹgba yọnẹn dọ ojlẹ gli de wẹ pò (12)

  • Dlagọni lọ dohomẹkẹn yọnnu lọ (13-17)

12  Enẹgodo, ohia ayidego tọn de yin mimọ to olọn mẹ: Yè yí owhè do doaṣọ́na* yọnnu de,+ osun sọ tin to afọ etọn lẹ glọ, podọ jẹgbakun de he yè yí sunwhlẹvu 12 do basi tin to ota na ẹn,  bọ e tin to ohò. E sọ to awhádo jẹgbonu to awuvẹ etọn mẹ podọ to awufiẹsa etọn nado jivi mẹ.  Ohia devo sọ yin mimọ to olọn mẹ. Pọ́n! Dlagọni* daho de he tindo sinmẹ miyọ́nnọ,+ bo tindo ota ṣinawe po azò ao po, jẹgbakun ṣinawe sọ tin to ota na ẹn;  osi etọn sọ dọ̀n mado-atọ̀ntọ sunwhlẹvu+ olọn tọn lẹ, e sọ dlan yé do aigba ji.+ Podọ dlagọni lọ gbọṣi ote to yọnnu+ he jlo na jivi lọ nukọn bọ to whenue e na jivi, ewọ nido sọgan tlẹ́n ovi etọn dù.  Yọnnu lọ sọ ji visunnu de,+ he na yí opò gànyuu tọn+ do dugán do* akọta lẹpo ji. Ovi etọn sọ yin zize po awuyiya po yì Jiwheyẹwhe dè podọ yì ofìn etọn kọ̀n.  Yọnnu lọ sọ họnyi danfafa ji, fihe Jiwheyẹwhe ko wleawu otẹn de tọn dai na ẹn do, podọ fihe yé na na núdùdù i họ̀ azán 1 260 te.+  Awhàn de sọ gbajẹgbonu to olọn mẹ: Mikaẹli*+ po angẹli etọn lẹ po funawhàn hẹ dlagọni lọ, dlagọni lọ po angẹli etọn lẹ po sọ funawhàn  ṣigba yé ma duto e ji,* mọdopolọ otẹn de masọ yin mimọ na yé to olọn mẹ ba.  Enẹwutu, dlagọni daho+ lọ yin dindlan do odò, yèdọ odàn hoho+ lọ, he nọ yin yiylọdọ Lẹgba+ podọ Satani,+ he nọ to aigba fininọ lẹpo klọ;+ ewọ yin dindlan do aigba ji,+ podọ angẹli etọn lẹ yin dindlan do odò po e po. 10  Yẹn sọ sè ogbè lélé de to olọn mẹ dọmọ: “Todin, whlẹngán,+ huhlọn po Ahọluduta Jiwheyẹwhe mítọn tọn+ po ko wá aimẹ gọna aṣẹpipa Klisti etọn tọn, na whẹsadokọnamẹtọ mẹmẹsunnu mítọn lẹ tọn ko yin dindlan do odò, mẹhe nọ to whẹsadokọna yé to okle po ozán po to Jiwheyẹwhe mítọn nukọn!+ 11  Podọ yé gbawhàn etọn+ na ohùn Lẹngbọvu+ lọ tọn wutu podọ na ohó kunnudide tọn yetọn+ wutu, alindọn* yetọn+ masọ vẹna yé etlẹ yin to whenue yé pannukọn okú. 12  Na ehe wutu, mì jaya, mì olọn lẹ po mì mẹhe nọ nọ̀ e mẹ lẹ po! Dindọn na aigba podọ na ohù,+ na Lẹgba ko jẹte wá mì dè po homẹgble daho po, na e yọnẹn dọ whenu gli de wẹ emi tindo wutu.”+ 13  Todin, to whenue dlagọni lọ mọdọ emi ko yin dindlan do aigba ji,+ e dohomẹkẹn yọnnu+ he ji visunnu lọ. 14  Ṣigba, awà awe akùn daho+ lọ tọn lẹ yin nina yọnnu lọ, na ewọ nido sọgan zlọn yì otẹn etọn mẹ to danfafa ji, fihe ewọ na yin núdùdù na te họ̀ ojlẹ dopo, ojlẹ awe po odaa ojlẹ tọn po*+ sọn odàn lọ nukọn.+ 15  Odàn lọ sọ tún osin he taidi tọ̀sisa jẹgbonu sọn onù etọn mẹ jẹgodona yọnnu lọ, na tọ̀sisa lọ nido dọ̀n ẹn yì. 16  Ṣigba, aigba gọalọna yọnnu lọ, aigba sọ kẹnù bo nù tọ̀sisa he dlagọni lọ tún jẹgbonu sọn onù etọn mẹ. 17  Enẹwutu, dlagọni lọ gblehomẹ do yọnnu lọ go bo yì nado funawhàn hẹ kúnkan*+ yọnnu lọ tọn he pò bo to gbedide Jiwheyẹwhe tọn lẹ yìn bosọ yin azọ́ndena nado dekunnu gando Jesu go lẹ.+

Nudọnamẹ Odò Tọn

Kavi “bu do.”
Kavi “Odàn.”
To paa mẹ, “do yìn.”
Zẹẹmẹdo “Mẹnu Wẹ Taidi Jiwheyẹwhe?”
Kavi vlavo, “ṣigba yè gbawhàn ewọ [enẹ wẹ, dlagọni lọ] tọn.”
Kavi “ogbẹ̀.” Pọ́n Zẹm.
Enẹ wẹ, ojlẹ atọ̀n daa.
To paa mẹ, “okún.”