Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn | OWE WIWE LẸ—LẸDOGBEDEVOMẸ AIHỌN YỌYỌ TỌN

Ohàn Sọlomọni tọn 4:1-16

NUHE E BẸHẸN LẸ

  • Lẹngbọhọtọ (1-5)

    • “Mẹyiwanna ṣie, a yọnwhanpẹ” (1)

  • Awhli (6)

  • Lẹngbọhọtọ (7-16a)

    • “Hiẹ ko duto ahun ṣie ji” (9)

  • Awhli (16b)

4  “Pọ́n! Mẹyiwanna ṣie, hiẹ yọnwhanpẹ. Pọ́n! A yọnwhanpẹ. Nukun towe lẹ taidi apoe tọn lẹ to nukunmẹṣinyọnnu towe glọ. Oda towe taidi apó gbọgbọẹ lẹ tọn He to tejẹ sọn osó Giliadi tọn lẹ ji.+   Adú towe lẹ taidi apó lẹngbọ he yè ṣẹṣẹ pà ofún na lẹ tọn He ja sọn fie yè lawu na yé te, Yemẹpo wẹ sọ nọ ji ahoho, Depope to yé mẹ masọ hẹn ovi etọn bu.   Nùflo towe lẹ taidi sekan vẹẹ ṣẹ́ṣẹ́, Ohó towe sọ nọ yọ́nsè. Taidi pomeglanate* he yè zẹ̀ Mọ wẹ alaka* towe lẹ te to nukunmẹṣinyọnnu towe glọ.   Okọ̀ towe+ taidi atọ̀họ̀ Davidi tọn,+ He yè yí zannu pipà lẹ do gbá He ji awọ̀yinu fọtọ́n yin piplado, Yèdọ awọ̀yinu loboto sunnu huhlọnnọ lẹ tọn lẹpo.+   Anọ́ towe awe lẹ taidi otẹgbọẹvu awe, Ahoho otẹgbọẹ de tọn,+ He to núdù to vounvoun lẹ ṣẹnṣẹn.”   “Kakajẹ whenue jẹhọn flẹ́flẹ́ okle tọn* na yìn bọ oyẹ̀ na busẹ, Yẹn na wleali dedo osó zuya tọn ji Podọ yì okọ́ta nuyọnwan gblingblin tọn ji.”+   “Mẹyiwanna ṣie, a yọnwhanpẹ taun,+ Oblọ depope masọ tin to gowe.   Asiyọyọ ṣie, gbọ mí ni yì sọn Lẹbanọni, Gbọ mí ni yì sọn Lẹbanọni.+ Jẹte sọn aga pete Amana* tọn, Sọn aga pete Senili tọn, sọn aga pete Hẹlmọni tọn,+ Sọn odò kinnikinni lẹ tọn mẹ, podọ sọn osó opọ̀ lẹ tọn ji.   Nọviyọnnu ṣie, asiyọyọ ṣie, hiẹ ko duto ahun ṣie ji,+ Eyin hiẹ pọ́n mi dopo tata, podọ eyin n’sọnukunmọ apadewhe kọnú towe tọn, A nọ duto ahun ṣie ji. 10  Nọviyọnnu ṣie, asiyọyọ ṣie, lehe owanyi he a nọ dohia mi dọnmẹdogo do sọ!+ Owanyi he a nọ dohia mi pọnte taun hú ovẹn,+ Owán gblingblin nuyọnwan towe tọn sọ hugan nuwhẹ́nkun depope!+ 11  Asiyọyọ ṣie, owínjá to kùnkùn sọn nùflo towe lẹ mẹ.+ Owín po anọ́sin po tin to odẹ́ towe glọ,+ Podọ owán gblingblin awù towe lẹ tọn taidi owán gblingblin Lẹbanọni tọn. 12  Nọviyọnnu ṣie, asiyọyọ ṣie, hiẹ tin taidi jipa he yin ginglọn de, Mọwẹ, jipa he yin ginglọn de, asisa osin tọn he yin titlẹ́ gbanun-gbanun de. 13  Awusọhia* towe taidi jipa* pomeglanate* tọn Gọna sinsẹ́n dagbe hugan lẹ, alaali po atin owán gblingblinnọ lẹ po, 14  Atin owán gblingblinnọ+ po vounvoun gbémẹ tọn po, gọna ofán owán gblingblinnọ+ po kinamọni+ po, Gọna atin nuyọnwan gblingblin tọn wunmẹ lẹpo, zuya po aloẹsi po,+ Po onú owán gblingblinnọ dagbedagbe lẹpo po.+ 15  Jipa asisa osin tọn de wẹ hiẹ, yèdọ dotọ̀ osin he wé tọn, Podọ osinwhín he to sisà sọn Lẹbanọni.+ 16  Jẹhọn agewaji tọn E, yìn; Jẹhọn hùwaji tọn E, wá. Yìn* do jipa ṣie mẹ. Gbọ owán gblingblin etọn ni gbàpe.” “Gbọ mẹyiwanna ṣie ni wá jipa etọn mẹ Bo dù sinsẹ́n dagbe hugan he tin to e mẹ lẹ.”

Nudọnamẹ Odò Tọn

Atin-sinsẹ́n de he nọ tindo sinmẹ taidi vẹẹ bo nọ di pọmu. Pọ́n Zẹm.
Kavi “topá.”
To paa mẹ, “gbọfufu okle tọn.”
Kavi “Osó He Pannukọn Osó Lẹbanọni Tọn Lẹ.”
Kavi vlavo, “Ayú.”
Kavi “paladisi.”
Atin-sinsẹ́n de he nọ tindo sinmẹ taidi vẹẹ bo nọ di pọmu. Pọ́n Zẹm.
Kavi “Yìn flẹ́flẹ́.”