Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn | OWE WIWE LẸ—LẸDOGBEDEVOMẸ AIHỌN YỌYỌ TỌN

Lomunu lẹ 8:1-39

NUHE E BẸHẸN LẸ

  • Ogbẹ̀ po mẹdekannujẹ po gbọn gbigbọ gblamẹ (1-11)

  • Gbigbọ sọdodovi tọn nọ dekunnu (12-17)

  • Nudida to nukundo mẹdekannujẹ ovi Jiwheyẹwhe tọn lẹ tọn (18-25)

  • ‘Gbigbọ nọ vẹvẹ do ota mítọn mẹ’ (26, 27)

  • Yin dide jẹnukọn gbọn Jiwheyẹwhe dali (28-30)

  • Mí nọ gbawhàn gbọn owanyi na Jiwheyẹwhe gblamẹ (31-39)

8  Enẹwutu, mẹhe tin to kọndopọ mẹ hẹ Klisti Jesu lẹ ma tindo whẹgbledomẹ depope.  Na osẹ́n gbigbọ he nọ namẹ ogbẹ̀ to kọndopọ mẹ hẹ Klisti Jesu lọ tọn ko tún we dote+ sọn osẹ́n ylando tọn po okú tọn po mẹ.  Nuhe Osẹ́n lọ ma penugo nado wà,+ na e yin madogánnọ+ gbọn agbasalan gblamẹ wutu, Jiwheyẹwhe ko wà ẹ, bo do Visunnu etọn titi hlan+ to awusọhia he taidi gbẹtọvi* lẹ tọn mẹ+ nado de ylando sẹ̀. Podọ gbọnmọ dali, e gblewhẹdo ylando to agbasalan mẹ,  na nubiọtomẹsi dodo tọn Osẹ́n lọ tọn nido sọgan yin hinhẹndi to míwlẹ mẹ,+ yèdọ mí mẹhe to zọnlinzin, e ma yin to kọndopọ mẹ hẹ agbasalan, ṣigba to kọndopọ mẹ hẹ gbigbọ.+  Na yé he to gbẹnọ to kọndopọ mẹ hẹ agbasalan nọ ze ayiha yetọn do onú agbasalan tọn lẹ ji,+ ṣigba yé he to gbẹnọ to kọndopọ mẹ hẹ gbigbọ, do onú gbigbọ tọn lẹ ji.+  Na ayiha zizedo agbasalan ji nọ dekọtọn do okú mẹ,+ ṣigba ayiha zizedo gbigbọ ji nọ dekọtọn do ogbẹ̀ po jijọho po mẹ;+  na ayiha zizedo agbasalan ji nọ dekọtọn do okẹ̀n mẹ hẹ Jiwheyẹwhe,+ na e ma nọ yin mẹmẹglọ na osẹ́n Jiwheyẹwhe tọn, mọdopolọ e masọ sọgan wàmọ.  Enẹwutu, mẹhe tin to kọndopọ mẹ hẹ agbasalan ma sọgan hẹn homẹ Jiwheyẹwhe tọn hùn.  Ṣigba, eyin gbigbọ Jiwheyẹwhe tọn nọ nọ̀ mì mẹ nugbonugbo, mìwlẹ tin to kọndopọ mẹ, e ma yin hẹ agbasalan, ṣigba hẹ gbigbọ.+ Ṣigba, eyin mẹdepope ma tindo gbigbọ Klisti tọn, mẹlọ ma yin ewọ tọn. 10  Ṣigba, eyin Klisti tin to kọndopọ mẹ hẹ mì,+ agbasa yin oṣiọ na ylando wutu, ṣigba gbigbọ nọ namẹ ogbẹ̀ na dodowiwa wutu. 11  Todin, eyin gbigbọ mẹlọ he fọ́n Jesu sọn oṣiọ lẹ mẹ tọn nọ nọ̀ mì mẹ, mẹlọ he fọ́n Klisti Jesu sọn oṣiọ lẹ mẹ+ nasọ hẹn agbasa mìtọn he nọ kú gọwá ogbẹ̀+ gbọn gbigbọ etọn he nọ nọ̀ mì mẹ lọ gblamẹ. 12  Enẹwutu, to whelọnu lo, mẹmẹsunnu lẹ emi, mí ma to dandannu glọ nado nọgbẹ̀ to kọndopọ mẹ hẹ agbasalan bo wà ojlo etọn lẹ;+ 13  na eyin mì nọ nọgbẹ̀ to kọndopọ mẹ hẹ agbasalan, e họnwun dọ mì na kú; ṣigba eyin mì gbọn gbigbọ dali hù azọ́n agbasalan tọn lẹ,+ mì na nọgbẹ̀.+ 14  Na mẹhe yin anadena gbọn gbigbọ Jiwheyẹwhe tọn dali lẹpo wẹ visunnu Jiwheyẹwhe tọn lẹ na nugbo tọn.+ 15  Na mìwlẹ ma mọ gbigbọ afanumẹ-yinyin tọn he sọ nọ hẹn obu wá yí gba, ṣigba gbigbọ sọdodovi tọn de wẹ mì mọyi, yèdọ gbigbọ he nọ whàn mí nado dawhá dọmọ: “Abba,* Otọ́!”+ 16  Gbigbọ lọ lọsu nọ dekunnu hẹ gbigbọ mítọn+ dọ ovi Jiwheyẹwhe tọn lẹ wẹ mí yin.+ 17  To whenẹnu, eyin ovi lẹ wẹ mí yin, be mí sọ yin gudutọ lẹ ga—na nugbo tọn, gudutọ Jiwheyẹwhe tọn lẹ, ṣigba gudutọgbẹ́ lẹ+ hẹ Klisti—eyin mí jiya dopọ hẹ ẹ,+ na mí nido yin gigopana dopọ hẹ ẹ ga.+ 18  Na yẹn mọdọ yajiji ojlẹ ehe tọn lẹ ma sọ̀ nude eyin yè yí yé jlẹdo gigo he na wá yin didehia to mí mẹ lọ go.+ 19  Na nudida yí nukundido vẹkuvẹku do to tenọpọn awusọhia visunnu Jiwheyẹwhe tọn lẹ tọn.+ 20  Na nudida yin hinhẹn zun mẹmẹglọ na ovọ́,+ e ma yin sọn ojlo etọn titi mẹ, ṣigba gbọn mẹlọ he hẹn ẹn zun mẹmẹglọ gblamẹ, to dodonu todido tọn ji 21  na nudida lọsu na ede nido yin hinhẹn jẹ mẹdekannu+ sọn afanumẹ-yinyin na gbigble mẹ bo tindo mẹdekannujẹ gigonọ he yin ovi Jiwheyẹwhe tọn lẹ tọn. 22  Na mí yọnẹn dọ nudida lẹpo wẹ to hunwẹn dopọ bo tin to awufiẹsa mẹ dopọ kakajẹ din. 23  E ma yin enẹ kẹdẹ, ṣigba mílọsu lẹ ga, he tindo sinsẹ́n tintan lẹ, enẹ wẹ gbigbọ lọ, mọwẹ, mílọsu lẹ to hunwẹn to ohò míde tọn mẹ,+ dile mí to tenọ vẹkuvẹku nado yin sisọdodovi,+ yèdọ nado yin tuntundote sọn agbasa mítọn lẹ mẹ gbọn ofligọ dali. 24  Na mí yin whinwhlẹngán to todido ehe mẹ; ṣigba todido he yin mimọ ma yin todido gba, na to whenue mẹde mọ nude, be e nọ tindo todido na ẹn wẹ? 25  Ṣigba, eyin mí tindo todido+ na nuhe mí ma mọ,+ mí nọ yí akọndonanu do to tenọpọn ẹn vẹkuvẹku.+ 26  Mọdopolọ, gbigbọ lọ ga nọ gọalọna mí to madogán mítọn mẹ;+ na nuhahun lọ wẹ yindọ mí ma nọ yọ́n nuhe mí na hodẹ̀ na, ṣigba gbigbọ lọsu nọ vẹvẹ do ota mítọn mẹ po hunwinwẹn he ma yin didọtọn lẹ po. 27  Ṣogan, mẹlọ he nọ dindona ahun+ nọ yọ́n lẹndai gbigbọ lọ tọn, na e to vẹvẹ sọgbe hẹ ojlo Jiwheyẹwhe tọn na omẹ wiwe lẹ. 28  Mí yọnẹn dọ Jiwheyẹwhe nọ hẹn azọ́n etọn lẹpo kọngbedopọ na dagbe mẹhe yiwanna Jiwheyẹwhe lẹ tọn, yèdọ mẹlọ lẹ he yin yiylọ sọgbe hẹ lẹndai etọn;+ 29  na mẹhe ewọ na ayidonugo etọn jẹnukọn lẹ wẹ e sọ de jẹnukọn nado hẹn yé sọgbe hẹ apajlẹ Visunnu etọn tọn,+ na e nido sọgan yin plọnji+ to nọvisunnu susu lẹ ṣẹnṣẹn.+ 30  Humọ, mẹhe e de jẹnukọn lẹ+ wẹ mẹlọ lẹ he e ylọ ga;+ podọ mẹhe e ylọ lẹ wẹ mẹlọ lẹ he e lá di dodonọ lẹ ga.+ To godo mẹ, mẹhe e lá di dodonọ lẹ wẹ mẹlọ lẹ he e pagigona ga.+ 31  To whenẹnu, etẹwẹ mí na dọ gando onú ehelẹ go? Eyin Jiwheyẹwhe tin hẹ mí, mẹnu wẹ na jẹagọdo mí?+ 32  To whenuena e yindọ ewọ ma tlẹ whlá Visunnu etọn titi, ṣigba bo ze e jo do ota mímẹpo tọn mẹ,+ be e ma na yí homẹdagbe do na mí nudevo lẹpo dopọ hẹ ẹ ga ya? 33  Mẹnu wẹ na sawhẹdokọna mẹdide Jiwheyẹwhe tọn lẹ?+ Jiwheyẹwhe wẹ Mẹlọ he lá yé di dodonọ.+ 34  Mẹnu wẹ na gblewhẹdo yé? Klisti Jesu wẹ mẹlọ he kú, mọwẹ, humọ ewọ wẹ yin finfọn sọn oṣiọ lẹ mẹ bo tin to adusilọ Jiwheyẹwhe tọn mẹ+ bosọ nọ vẹvẹ do ota mítọn mẹ ga.+ 35  Mẹnu wẹ na klan mí sọn owanyi Klisti tọn go?+ Be nukunbibia kavi ayimajai kavi homẹkẹn kavi huvẹ kavi omẹ́-jijẹ kavi owù kavi ohí na wàmọ wẹ?+ 36  Kẹdẹdile e yin kinkandai do dọmọ: “Na towe tọn wutu wẹ yè to mí hù to whelẹponu, mí ko yin pinpọnhlan taidi lẹngbọ he na yin hùhù.”+ 37  To vogbingbọn mẹ, mí gbawhàn mlẹnmlẹn to onú ehe lẹpo mẹ+ gbọn mẹlọ he yiwanna mí gblamẹ. 38  Na yẹn tindo nujikudo dọ okú kavi ogbẹ̀ kavi angẹli lẹ kavi gandudu lẹ kavi nuhe tin tofi todin lẹ kavi nuhe ja lẹ kavi huhlọn lẹ+ 39  kavi aga kavi odò kavi nudida devo depope ma na penugo nado klan mí sọn owanyi Jiwheyẹwhe tọn he tin to Klisti Jesu Oklunọ mítọn mẹ lọ go.

Nudọnamẹ Odò Tọn

To paa mẹ, “agbasalan ylandonọ.”
Hogbe Alamaikigbe tọn de he zẹẹmẹdo “Otọ́ E.”