Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn | OWE WIWE LẸ—LẸDOGBEDEVOMẸ AIHỌN YỌYỌ TỌN

Lomunu lẹ 4:1-25

NUHE E BẸHẸN LẸ

  • Ablaham, dodonọ gbọn yise dali (1-12)

    • Ablaham, otọ́ yisenọ lẹpo tọn (11)

  • Gbọn yise dali wẹ opagbe lọ na yin hinhẹndi (13-25)

4  Eyin mọ wẹ, ale tẹwẹ mí sọgan dọ dọ Ablaham he yin tọgbo mítọn to agbasa-liho mọyi?  Di apajlẹ, eyin Ablaham ko yin lilá di dodonọ gbọn azọ́n lẹ dali wẹ, ewọ na ko tindo whẹwhinwhẹ́n nado doawagun, ṣigba ewọ ma sọgan doawagun to Jiwheyẹwhe nukọn.  Na etẹwẹ adà Owe-wiwe tọn lọ dọ? “Ablaham do yise hia to Jehovah* mẹ, bọ e yin hihia hlan ẹn di dodowiwa.”+  Todin, na mẹhe wazọ́n, azọ́nkuẹ etọn ma nọ yin pinpọnhlan di nukundagbe majẹhẹ de gba, ṣigba taidi ahọ́ de.  To alọ devo mẹ, na mẹhe ma nọ wazọ́n ṣigba bo nọ do yise hia to Mẹhe nọ lá mẹhe tindo jijọ-madi-Jiwheyẹwhe di dodonọ mẹ, yise etọn nọ yin pinpọnhlan taidi dodowiwa.+  Kẹdẹdile Davidi lọsu dọho gando ayajẹ he mẹhe Jiwheyẹwhe nọ pọnhlan taidi dodonọ bọ e ma yin gbọn azọ́n lẹ dali nọ tindo go do dọmọ:  “Ayajẹnọ wẹ mẹhe walọ sẹ́nhẹngba tọn yetọn lẹ ko yin jijona yé bọ ylando yetọn lẹ ko yin nuṣinyọndo;*  ayajẹnọ wẹ mẹhe Jehovah* ma na hia ylando etọn dokọna to aliho depope mẹ.”+  To whelọnu lo, be mẹhe gboadà lẹ kẹdẹ wẹ tindo ayajẹ ehe ya, kavi mẹhe ma gboadà lẹ lọsu ga?+ Na mí dọmọ: “Yise Ablaham tọn yin hihia hlan ẹn di dodowiwa.”+ 10  To whelọnu lo, to ninọmẹ tẹlẹ mẹ wẹ e yin hihia hlan ẹn di dodowiwa te? To whenue e ko gboadà wẹ ya, kavi to whenue e ma ko gboadà? E ma ko gboadà to whenẹnu, ṣigba e gbẹ́ yin adàmagbonọ. 11  Ewọ sọ mọ ohia de yí+—enẹ wẹ adàgbigbo—taidi hiadonu* de na dodowiwa gbọn yise he ewọ tindo to whenue e tin to ninọmẹ adàmagbo tọn etọn mẹ dali, na ewọ nido sọgan yin otọ́ mẹhe tindo yise+ to whenue yé tin to adàmagbo mẹ lẹpo tọn, na e nido yin hihia hlan yé di dodowiwa; 12  podọ na ewọ nido yin otọ́ ovi he yè gboadà na lẹ tọn, e ma yin na mẹhe tẹdo adàgbigbo to agbasa-liho go lẹ kẹdẹ gba, ṣigba na mẹhe to zọnlin jijlọ zìn to afọdò yise he otọ́ mítọn Ablaham+ tindo to whenue ewọ tin to ninọmẹ adàmagbo tọn lọ tọn mẹ lẹ ga. 13  Na e ma yin gbọn osẹ́n gblamẹ wẹ Ablaham kavi kúnkan* etọn mọ opagbe lọ yí dọ ewọ na dugu aihọn de tọn te gba,+ ṣigba gbọn dodowiwa na yise wutu dali wẹ.+ 14  Na eyin mẹhe tẹdo osẹ́n go lẹ yin gudutọ lẹ, be yise ko lẹzun ovọ́ podọ opagbe lọ ko yin didesẹ. 15  Nado dọ hójọhó, Osẹ́n lọ wẹ nọ hẹn homẹgble Jiwheyẹwhe tọn wá,+ ṣigba fie osẹ́n ma tin te, mọjanwẹ sẹ́nhẹngba depope ma nọ to finẹ do niyẹn.+ 16  Na ehe wutu, gbọn yise gblamẹ wẹ opagbe lọ do tin, na e nido sọgan tin to kọndopọ mẹ hẹ nukundagbe majẹhẹ,+ na jide nido tin na kúnkan* etọn lẹpo dọ opagbe lọ na yin hinhẹndi,+ e ma yin na mẹhe nọ tẹdo Osẹ́n lọ go lẹ kẹdẹ gba, ṣigba na mẹhe nọ tẹdo yise Ablaham tọn go lẹ ga, yèdọ mẹhe yin otọ́ mímẹpo tọn.+ 17  (Kẹdẹdile e ko yin kinkandai do dọmọ: “Yẹn ko de we di otọ́ akọta susu tọn.”)+ Ehe jọ to nukun Jiwheyẹwhe tọn mẹ, yèdọ mẹhe mẹ ewọ tindo yise te, mẹhe nọ hẹn oṣiọ lẹ gọwá ogbẹ̀ bo nọ ylọ nuhe ma tin lẹ taidi dọ yé tin wẹ nkọ.* 18  Dile dodonu na todido de ma tlẹ tin, ṣogan e tindo yise he sinai do todido ji, dọ ewọ na lẹzun otọ́ akọta susu tọn to kọndopọ mẹ hẹ nuhe ko yin didọ dọmọ: “Mọ wẹ kúnkan* towe na te.”+ 19  Podọ dile etlẹ yindọ e ma gbọjọ to yise mẹ, e pọ́n agbasa ede tọn he ko gọ̀ dogodo todin lọ hlan (na e ko yin nudi owhe 100 mẹvi),+ mọdopolọ e pọ́n vidọ̀ Sala tọn he ko kú* lọ hlan ga.+ 20  Ṣigba, na opagbe Jiwheyẹwhe tọn wutu, e ma gbọn yise matindo dali tindo ayihaawe; ṣigba e lẹzun huhlọnnọ gbọn yise etọn dali bo na gigo Jiwheyẹwhe 21  bosọ tindo nujikudo mlẹnmlẹn dọ nuhe E ko dopagbe etọn, E penugo nado wà ẹ ga.+ 22  Enẹwutu, “e yin hihia hlan ẹn di dodowiwa.”+ 23  Ṣigba, hodidọ lọ “e yin hihia hlan ẹn” ma yin kinkandai na ewọ kẹdẹ gba,+ 24  amọ́ na mílọsu lẹ ga he e na yin hihia hlan, na míwlẹ tindo yise to Ewọ he fọ́n Jesu Oklunọ mítọn sọn oṣiọ lẹ mẹ lọ mẹ.+ 25  Ewọ yin zizejo na sẹ́nmẹjijẹ mítọn lẹ wutu+ bo yin finfọn na míwlẹ nido yin lilá di dodonọ.+

Nudọnamẹ Odò Tọn

Pọ́n Nud. A5.
Kavi “jijona.”
Pọ́n Nud. A5.
Kavi “jidenamẹ; kunnudenu.”
To paa mẹ, “okún.”
To paa mẹ, “okún.”
Kavi vlavo, “nuhe ma tin lẹ wá ogbẹ̀.”
To paa mẹ, “okún.”
Kavi “pọ́n wẹnsinọ-yinyin Sala tọn.”