Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn | OWE WIWE LẸ—LẸDOGBEDEVOMẸ AIHỌN YỌYỌ TỌN

Lomunu lẹ 15:1-33

NUHE E BẸHẸN LẸ

  • Mì nọ kẹalọyi ode awetọ taidi Klisti (1-13)

  • Paulu, devizọnwatọ de hlan akọta lẹ (14-21)

  • Fie Paulu jlo na yì lẹ (22-33)

15  Nalete, mí mẹhe yin huhlọnnọ lẹ dona hẹn agbàn madogán mẹhe ma yin huhlọnnọ lẹ tọn,+ e ma yin nado to homẹ mídelẹ tọn hẹn hùn.+  Mì gbọ dopodopo mítọn ni hẹn homẹhun kọmẹnu etọn na dagbe etọn, yèdọ nado jlọ ẹ dote.+  Na Klisti lọsu ma hẹn homẹhun ede,+ ṣigba kẹdẹdile e yin kinkandai do dọmọ: “Vlẹko mẹhe to vivlẹ we kò lẹ tọn ko wá ji e.”+  Na nuhe ko yin kinkandai jẹnukọn lẹpo yin kinkandai na oplọn mítọn,+ na míwlẹ nido sọgan tindo todido gbọn akọndonanu mítọn gblamẹ+ podọ gbọn homẹmimiọn sọn Owe-wiwe lẹ mẹ gblamẹ.+  Todin, na Jiwheyẹwhe he nọ namẹ akọndonanu po homẹmimiọn po ni na mìmẹpo nado tindo pọndohlan dopolọ he Klisti Jesu tindo,  na mìwlẹ nido sọgan dogbepọ*+ do pagigona Jiwheyẹwhe podọ Otọ́ Oklunọ mítọn Jesu Klisti tọn to kọndopọ mẹ.  Enẹwutu, mì nọ kẹalọyi ode awetọ,+ kẹdẹdile Klisti lọsu kẹalọyi mì do,+ na Jiwheyẹwhe nido yin gigopana.  Na yẹn dọna mì dọ Klisti lẹzun lizọnyizọnwatọ mẹhe gboadà lẹ tọn+ nado dohia dọ nugbonọ wẹ Jiwheyẹwhe podọ nado hẹn opagbe lọ lẹ he Ewọ do na tọgbo yetọn lẹ lodo,+  podọ na akọta lẹ nido sọgan pagigona Jiwheyẹwhe na lẹblanu etọn.+ Kẹdẹdile e yin kinkandai do dọmọ: “Enẹ wẹ zọ́n bọ yẹn na nọ pà we to gbangba to akọta lẹ ṣẹnṣẹn, yẹn nasọ nọ jihàn pipà tọn lẹ do pà oyín towe.”+ 10  Podọ e dọ whladopo dogọ dọmọ: “Mì akọta lẹ emi, mì jaya hẹ omẹ etọn lẹ.”+ 11  E sọ vọ́ dọ whladopo dogọ dọmọ: “Mì pà Jehovah,* mì akọta lẹpo emi, podọ mì gbọ gbẹtọ lẹpo ni pà ẹ.”+ 12  Isaia sọ vọ́ dọ whladopo dogọ dọmọ: “Adọ̀ Jẹsse tọn na wá,+ yèdọ mẹhe na fọ́n nado dugán do akọta lẹ ji;+ ewọ mẹ wẹ akọta lẹ na ze todido yetọn do.”+ 13  Na Jiwheyẹwhe he nọ namẹ todido ni yí ayajẹ po jijọho lẹpo po do gọ́ mì mẹ gbọn jidide mìtọn do ewọ go dali, na mì nido sọgan sudeji* to todido mẹ gbọn huhlọn gbigbọ wiwe tọn dali.+ 14  Todin, mẹmẹsunnu lẹ emi, yẹnlọsu tindo nujikudo gando mì go, dọ mìlọsu lẹ ga gọ́ na dagbewà bo yin hinhẹn gọ́ po oyọnẹn lẹpo po bosọ tindo nugopipe nado dotuhomẹna* ode awetọ. 15  Ṣigba, yẹn ko kanwehlan mì to aliho he to tlọlọ taun de mẹ do nuagokun delẹ ji, nado vọ́ nuflin mì, na nukundagbe majẹhẹ he yin nina mi sọn Jiwheyẹwhe dè lọ wutu, 16  na yẹn nido yin devizọnwatọ gbangba tọn de na Klisti Jesu hlan akọta lẹ.+ Yẹn to mahẹ tindo to azọ́n wiwe wẹndagbe Jiwheyẹwhe tọn lọ mẹ,+ na akọta ehelẹ nido sọgan yin avọ́nunina he yin alọkẹyi de, ehe ko yin hinhẹn zun wiwe gbọn gbigbọ wiwe dali. 17  Enẹwutu, yẹn tindo whẹwhinwhẹ́n nado jẹaglin to Klisti Jesu mẹ na nuhe gando Jiwheyẹwhe go lẹ. 18  Na yẹn ma na ko dọho gando nudepope go adavo nuhe Klisti ko wà gbọn yẹn gblamẹ lẹ, na akọta lẹ nido yin tonusetọ gbọn ohó po walọ ṣie po dali, 19  gọna huhlọn ohia lẹ po nujiawu* lẹ tọn po,+ po huhlọn gbigbọ Jiwheyẹwhe tọn po, podọ taidi kọdetọn de, yẹn dọyẹwheho wẹndagbe tọn to gigọ́ mẹ gando Klisti go sọn Jelusalẹm podọ lẹdo pé kaka yì Ililikumi.+ 20  Na nugbo tọn, to aliho ehe mẹ, yẹn hẹn ẹn zun yanwle ṣie ma nado lá wẹndagbe lọ to fihe oyín Klisti tọn ko yin hinhẹn zun yinyọnẹn te, na yẹn nikaa do dó dodonu mẹdevo tọn ji; 21  ṣigba kẹdẹdile e ko yin kinkandai do dọmọ: “Mẹhe dè linlin etọn ma ko jẹ lẹ na mọ, podọ mẹhe ma ko sè lẹ na mọnukunnujẹemẹ.”+ 22  Na ehe wutu ga, whlasusu wẹ nude ko nọ glọnalina mi nado wá mì dè. 23  Ṣigba todin, yẹn masọ tindo aigba-denamẹ he ji yẹn ma ko wazọ́n te to lẹdo ehelẹ mẹ ba, bọ yẹn ko to jijlo vẹkuvẹku na owhe susu* nado wá mì dè. 24  Enẹwutu, yẹn tindo todido dọ, whenue n’na to gbejizọnlinzin jei Ẹspaini, n’na mọ mì bọ mìwlẹ na yìn mi jẹ aliji to whenue n’na ko duvivi gbẹdohẹmẹ mìtọn tọn na ojlẹ de godo. 25  Ṣigba todin, yẹn na zingbejizọnlin to madẹnmẹ yì Jelusalẹm nado yilizọn* na omẹ wiwe lẹ.+ 26  Na mẹhe tin to Makedonia po Akaia po lẹ ko hùnhomẹ nado má onú yetọn lẹ gbọn nunina bibasi dali na wamọnọ he tin to omẹ wiwe lẹ ṣẹnṣẹn to Jelusalẹm.+ 27  Na nugbo tọn, homẹhunnu wẹ e yin na yé nado wàmọ, podọ na taun tọn, yé duahọ etọn do omẹ wiwe ehelẹ; na eyin akọta lẹ ko tindo mahẹ to onú gbigbọ tọn yetọn lẹ mẹ, be yelọsu duahọ etọn do yé nado yí onú agbasa tọn yetọn lẹ do yilizọn na yé.+ 28  Enẹwutu, to whenue yẹn na ko dotana ehe bo na ko ze nunina* ehe jo na yé po kọdetọn dagbe po godo, yẹn na dedo Ẹspaini bo na zẹ̀ mì dè to whenue yẹn jei dọ́n. 29  Humọ, yẹn yọnẹn dọ whenue yẹn na wá mì dè yẹn na wá po dona susugege lẹ po sọn Klisti dè. 30  Todin, mẹmẹsunnu lẹ emi, yẹn dotuhomẹna mì gbọn Oklunọ mítọn Jesu Klisti gblamẹ podọ gbọn owanyi he gbigbọ nọ wleawuna lọ gblamẹ, dọ mì ni vánkan hẹ mi to odẹ̀ mẹ hlan Jiwheyẹwhe do ota ṣie mẹ,+ 31  na yẹn nido sọgan yin whinwhlẹn+ sọn alọ mayisenọ lẹ tọn mẹ to Jude, podọ na lizọnyizọn* ṣie do Jelusalẹm tamẹ nido sọgan yin alọkẹyi na omẹ wiwe lẹ,+ 32  na yẹn nido sọgan wá mì dè po ayajẹ po bo yin kọfana dopọ hẹ mì, eyin Jiwheyẹwhe jlo. 33  Na Jiwheyẹwhe he nọ namẹ jijọho ni tin hẹ mìmẹpo.+ Niṣẹ.*

Nudọnamẹ Odò Tọn

To paa mẹ, “yí onù dopo.”
Pọ́n Nud. A5.
Kavi “gọfla.”
Kavi “na anademẹ.”
Kavi “nudabla.”
Kavi vlavo, “delẹ.”
Kavi “gọalọ.”
To paa mẹ, “sinsẹ́n.”
Kavi “alọgọ.”
Kavi “Amẹn” to Glẹkigbe mẹ.