Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Kolosinu lẹ 4:1-18

NUHE E BẸHẸN LẸ

  • Ayinamẹ na ogán lẹ (1)

  • “Mì nọ sinyẹnlin to odẹ̀ mẹ” (2-4)

  • Yí nuyọnẹn do yinuwa hẹ gbonutọ (5, 6)

  • Nudọdomẹ he gbọngodo lẹ (7-18)

4  Mì ogán lẹ emi, mì nọ yinuwa hẹ afanumẹ mìtọn lẹ to aliho dodo tọn he sọgbe mẹ, to yinyọnẹn mẹ dọ mìlọsu tindo Ogán de to olọn mẹ ga.+  Mì nọ sinyẹnlin to odẹ̀ mẹ+ bo nọ gbọṣi nukle to e mẹ po pẹdido po.+  To ojlẹ dopolọ mẹ, mì nọ to dẹ̀ho na mí ga,+ na Jiwheyẹwhe nido sọgan hùnhọ̀n na ohó lọ, na mí nido sọgan lá aṣli wiwe he gando Klisti go lọ, ehe wutu yẹn do tin to gẹdẹ lẹ mẹ,+  podọ na yẹn nido sọgan lá ẹ to aliho he họnwun mẹ dile yẹn dona wà do.  Mì nọ yí nuyọnẹn do to zọnlinzin hẹ mẹhe to gbonu lẹ bo nọ yí whenu mìtọn zan to aliho dagbe hugan mẹ.*+  Mì gbọ ohó mìtọn ni nọ gọ́ na ojọmiọn, na ojẹ̀ ni nọ pé e to whepoponu,+ na mì nido sọgan yọ́n lehe mì na nọ gblọnhona mẹdopodopo do.+  Tikiku,+ mẹmẹsunnu mẹyiwanna ṣie, lizọnyizọnwatọ nugbonọ podọ afanumẹ hatọ to Oklunọ mẹ, na na mì linlin he gando go e lẹpo.  Yẹn to ewọ dohlan mì dè, na mìwlẹ nido yọ́n ninọmẹ mítọn podọ na ewọ nido sọgan miọnhomẹna mì.  Ewọ na wá to pọmẹ hẹ Onesimu,+ yèdọ mẹmẹsunnu nugbonọ podọ mẹyiwanna ṣie, mẹhe wá sọn mì dè; yé na dọ nuhe to jijọ tofi lẹpo na mì. 10  Alistaku,+ gàntọ hatọ ṣie yí nudọdomẹ etọn lẹ hlan mì, podọ Malku,+ hẹnnumẹ Balnaba tọn wàmọ ga, (mẹhe go mìwlẹ mọ anademẹ lẹ yí gando nado yí i+ eyin e wá mì dè), 11  podọ Jesu, mẹhe nọ yin Justu wàmọ ga, omẹ ehelẹ wá sọn mẹhe gboadà lẹ mẹ. Yewlẹ kẹdẹ wẹ yin azọ́nwatọ hatọ ṣie lẹ na Ahọluduta Jiwheyẹwhe tọn, podọ yé ko lẹzun asisa homẹmiọnnamẹ tọn daho* de na mi. 12  Epafla,+ afanumẹ Klisti Jesu tọn de he wá sọn mì dè, yí nudọdomẹ etọn lẹ hlan mì. Whepoponu wẹ ewọ nọ yí vivẹnudido do to dẹ̀ho do ota mìtọn mẹ, na mìwlẹ nido sọgan nọte to pipé* mẹ to godo mẹ bo tindo nujikudo he lodo to ojlo Jiwheyẹwhe tọn lẹpo mẹ. 13  Na yẹn dekunnu gando ewọ go dọ e nọ dovivẹnu tlala do ota mìtọn mẹ podọ do mẹhe to Laodikea po Hielapoli lẹ po tọn mẹ. 14  Luku,+ dotozọ́nwatọ mẹyiwanna lọ yí nudọdomẹ etọn lẹ hlan mì, podọ Dema+ wàmọ ga. 15  Mì yí nudọdomẹ ṣie lẹ na mẹmẹsunnu he to Laodikea lẹ podọ na Nimfa po agun he nọ pli do owhé etọn gbè po.+ 16  Podọ to whenue wekanhlanmẹ ehe na ko yin hihia to ṣẹnṣẹn mìtọn, mì basi tito na e nido yin hihia+ to agun Laodikea tọn mẹ ga podọ na mìwlẹ nisọ hia dehe wá sọn Laodikea ga. 17  Humọ, mì dọna Alkippu+ dọmọ: “Nọ payi lizọnyizọn he hiẹ kẹalọyi to Oklunọ mẹ lọ go, na hiẹ nido hẹn ẹn di.” 18  Nudọdomẹ ṣie die, he yẹn Paulu yí alọ ṣie titi do kàn.+ Mì nọ hẹn gẹdẹ+ ṣie lẹ do ayiha mẹ to whepoponu. Nukundagbe majẹhẹ ni tin hẹ mì.

Nudọnamẹ Odò Tọn

To paa mẹ, “bo nọ fli ojlẹ dide lọ.”
Kavi “alọgọ mẹhẹnlodo tọn.”
Kavi “whínwhiwhè.”