Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Joẹli 1:1-20

NUHE E BẸHẸN LẸ

  • Azọ̀nylankan wánvú lẹ tọn (1-14)

  • “Azán Jehovah tọn ko sẹpọ” (15-20)

    • Yẹwhegán lọ dawhá ylọ Jehovah (19, 20)

1  Ehe wẹ ohó he Jehovah dọna Joẹli* visunnu Petuẹli tọn:   “Mì sè ehe, mì mẹho lẹ emi, Mì sọ dotoai, mì mẹhe nọ nọ̀ aigba lọ ji lẹpo emi. Be nudepope taidi ehe nkọ ko jọ to ojlẹ mìtọn mẹ pọ́n Kavi to ojlẹ tọgbo mìtọn lẹ tọn mẹ pọ́n wẹ ya?+   Mì pìntàn etọn na visunnu mìtọn lẹ, Bosọ gbọ visunnu mìtọn lẹ ni pìntàn etọn na visunnu yetọn lẹ, Podọ visunnu yetọn lẹ ga ni pìntàn etọn na whẹndo he na bọdego.   Nuhe owẹ̀n nuhẹngbletọ lẹ dupò wẹ owẹ̀n he doawhàn wá lẹ ko dù;+ Nuhe owẹ̀n he doawhàn wá lẹ sọ dupò wẹ owẹ̀n he ma tindo awà lẹ ko dù; Podọ nuhe owẹ̀n he ma tindo awà lẹ dupò wẹ owẹ̀n huvẹtọnọ lẹ ko dù.+   Mì fọ́n sọn amlọn mẹ, mì ahànnumunọ+ lẹ, bo viavi! Mì doavihàn, mì ovẹn nùtọ lẹpo emi, Na ovẹn vivi ko yin yíyí sọn onù na mì.+   Na akọta de ko wá tọ́nawhàn aigba ṣie, yèdọ akọta huhlọnnọ he madosọha.+ Adú etọn lẹ taidi adú kinnikinni de tọn+ bọ aglàn etọn lẹ sọ taidi kinnikinni de tọn.   E ko dù vẹntin ṣie lẹ sudo bo ko diọ ovòtin ṣie lẹ zun atinta, E ko klọ́n gotò etọn petepete bo ko sisẹ́ yé dlan apadopo, Bo ko sọ diọ alà etọn lẹ zun wewe.   Doavihàn kẹdẹdile awhli* he do odẹ́vọ̀ de nọ basi do Na asisunọ yọyọ* jọja whenu etọn tọn.   Avọ́nunina jinukun-lili tọn+ po avọ́nunina nùnù+ po ko doalọte to ohọ̀ Jehovah tọn mẹ; Yẹwhenọ lẹ, lizọnyizọnwatọ Jehovah tọn lẹ to aluẹmẹ. 10  Ogle lẹ ko yin dùdù sudo, aigba to aluẹmẹ;+ Na jinukun lẹ ko yin dùdù sudo, ovẹn yọyọ ko hú pete bọ amì ko vọ̀.+ 11  Glesi lẹ ko jẹflumẹ bọ vẹngle-zọ́nwatọ lẹ doavihàn, Na likun po balekun po wutu; Na jibẹwawhé ko doalọte to glemẹ. 12  Vẹntin ko hú dote, Bọ ovòtin ko yọ́. Atin pomeglanate* tọn, odétin po pọmu-tin po, Yèdọ atin danji tọn lẹpo ko hú dote;+ Na ayajẹ ko diọ zun winyan to gbẹtọ lẹ ṣẹnṣẹn. 13  Mì ze odẹ́vọ̀ do* bo biọ aluẹmẹ,* mì yẹwhenọ lẹ emi; Mì doavihàn, mì mẹhe nọ yilizọn to agbà kọ̀n lẹ.+ Mì mẹhe nọ yilizọn na Jiwheyẹwhe ṣie lẹ emi, mì biọ họmẹ bo dọ́ odẹ́vọ̀ mẹ; Na avọ́nunina jinukun-lili tọn+ po avọ́nunina nùnù+ po ko yin hinhẹn doalọte to ohọ̀ Jiwheyẹwhe mìtọn tọn mẹ. 14  Mì lá* nùbibla de; mì ylọ gbẹtọ lẹ pli na plidopọ vonọtaun de.+ Mì bẹ mẹho lẹ, gọna mẹhe nọ nọ̀ aigba lọ ji lẹpo pli dopọ, Do ohọ̀ Jehovah Jiwheyẹwhe mìtọn tọn mẹ+ bo dawhá hlan Jehovah na alọgọ. 15  Dindọn wẹ azán enẹ na hẹnwa! Na azán Jehovah tọn ko sẹpọ,+ E nasọ wá taidi vasudo de sọn Ganhunupotọ lọ dè! 16  Be núdùdù ma ko yin didesẹ sọn nukọnna mí, Bọ homẹhunhun po ayajẹ po ko yin didesẹ sọn ohọ̀ Jiwheyẹwhe mítọn tọn mẹ ya? 17  Okún* lẹ ko wló to fẹli yetọn lẹ glọ. Agbànhọ lẹ ko jẹvọ́. Zínhọ lẹ ko yin hihọliai, na jinukun lẹ ko hú dote. 18  Kanlin-yìnyìn lẹ lọsu tlẹ to azọ̀nwẹn! Kanlinpa lẹ to fuflupé to bẹwlu mẹ, na kanlindugbo ma tin! Podọ lẹngbọpa lẹ to yaji. 19  Hiẹ wẹ yẹn na dawhá ylọ, Jehovah E;+ Na miyọ́n ko dù kanlindugbo danfafa ji tọn lẹ sudo, Bọ miyọ́n he to jiji de ko fiọ atin danji tọn lẹpo. 20  Gbekanlin lẹ lọsu tlẹ jẹdò towe, Na tọ̀sisa lẹ ko hú Bọ miyọ́n ko dù kanlindugbo danji tọn lẹ sudo.”

Nudọnamẹ Odò Tọn

Zẹẹmẹdo “Jehovah Wẹ Jiwheyẹwhe.”
Kavi “jọja yọnnu.”
Kavi “asu.”
Atin-sinsẹ́n de he nọ tindo sinmẹ taidi vẹẹ bo nọ di pọmu. Pọ́n Zẹm.
To paa mẹ, “Mì blagbajana mìde.”
Kavi “linú akọ́nnu.”
To paa mẹ, “basi klandowiwe na.”
Kavi vlavo, “Ovò sinsẹ́n húhú.”