Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn | OWE WIWE LẸ—LẸDOGBEDEVOMẸ AIHỌN YỌYỌ TỌN

Jakọbu 1:1-27

NUHE E BẸHẸN LẸ

  • Nudọdomẹ lẹ (1)

  • Akọndonanu nọ hẹn ayajẹ wá (2-15)

    • Yise he yin whiwhlepọn (3)

    • Nọ to bibiọ to yise mẹ (5-8)

    • Ojlo nọ hẹn ylando po okú po wá (14, 15)

  • Nunina dagbe lẹpo wá sọn aga (16-18)

  • Nọ sè ohó lọ bo nọ yí i zan (19-25)

    • Mẹhe to ede pọ́n to mẹpọ́nnu mẹ (23, 24)

  • Sinsẹ̀n-bibasi he wé bo ma yin hinhẹnflu (26, 27)

1  Jakọbu,+ afanumẹ Jiwheyẹwhe po Oklunọ Jesu Klisti po tọn, hlan hẹnnu 12 he gbàpe lẹ: Yẹn dọnudo mì!  Mẹmẹsunnu ṣie lẹ emi, mì nọ pọ́n ẹn hlan di ayajẹ nugbonugbo, to whenuena mì pehẹ whlepọn voovo lẹ,+  dile mì yọnẹn do dọ nuhọakuẹ-yinyin yise mìtọn tọn he yin whiwhlepọn ehe, nọ dekọtọn do akọndonanu mẹ.+  Ṣigba, mì gbọ akọndonanu ni wazọ́n etọn dotana, na mìwlẹ nido sọgan sọgbe bosọ pegan mlẹnmlẹn bo ma jẹdò nudepope tọn.+  Enẹwutu, eyin depope to mì mẹ gbọagba nuyọnẹn tọn, gbọ e ni nọ to bibiọ Jiwheyẹwhe zọnmii,+ na ewọ nọ yí alọtútlú do na mẹlẹpo matin whẹgbledomẹ,*+ podọ e na yin nina ẹn.+  Ṣigba, e ni nọ to bibiọ zọnmii to yise mẹ,+ matindo ayihaawe depope,+ na mẹhe tindo ayihaawe tin taidi agbówhẹn ohù tọn he jẹhọn to hinhẹn dánpe bo to yigọyigọ-dona.  Na nugbo tọn, omẹ enẹ ni ma donukun dọ emi na mọ nudepope yí sọn Jehovah* dè blo;  gbẹtọ ayihaawenọ de wẹ ewọ+ bo ma lodo to aliho etọn lẹpo ji.  Ṣigba, gbọ mẹmẹsunnu wamọnọ ni jaya* do zizedaga etọn ji,+ 10  podọ adọkunnọ do hinhẹn whè etọn ji,+ na ewọ na juwayi di vounvoun danji tọn. 11  Na kẹdẹdile owhè nọ zẹ̀ po yozò sinsinyẹn etọn po bo nọ hẹn ogbé yọ́ bọ vounvoun etọn nọ ja kọnyinai podọ whanpẹ gbonu tọn etọn nọ gble do, mọ wẹ adọkunnọ lọsu na kupẹ́ to yanwle etọn lẹ mẹ do niyẹn.+ 12  Ayajẹnọ wẹ mẹlọ he to akọndona whlepọn zọnmii,+ na to whenuena e wá yin alọkẹyi e na mọ jẹgbakun ogbẹ̀ tọn lọ yí,+ he Jehovah* dopagbe etọn na mẹhe zindonukọn nado to wanyina Ẹn lẹ.+ 13  To whenuena mẹde tin to whlepọn glọ, mì dike e dọ dọ: “Jiwheyẹwhe wẹ to whiwhle mi pọ́n” blo. Na Jiwheyẹwhe ma sọgan yin whiwhlepọn po nuylankan lẹ po, mọjanwẹ ewọ lọsu ma nọ whlé mẹdepope pọ́n to aliho enẹ mẹ. 14  Ṣigba, mẹdopodopo nọ yin whiwhlepọn dile e yin dindọn yì bo yin omọ̀ do na* gbọn ojlo edetiti tọn dali.+ 15  Enẹgodo, ojlo lọ, to whenuena e ko mọhò, e nọ ji ylando; podọ to godo mẹ, whenue ylando ko yin wiwà pó, e nọ hẹn okú wá.+ 16  Mẹmẹsunnu mẹyiwanna ṣie lẹ emi, mì yin hinhẹn buali blo. 17  Aga wẹ nunina dagbe lẹpo gọna nunina pipé lẹpo nọ wá sọn+ bo nọ jẹte wá sọn Otọ́ hinhọ́n olọn tọn lẹ lọ dè,+ mẹhe ma nọ diọ taidi oyẹ̀ he nọ to adàdiọ.*+ 18  Ojlo etọn wẹ e yin nado hẹn mí wá gbọn ohó nugbo tọn lọ dali,+ na míwlẹ nido lẹzun sinsẹ́n tintan wunmẹ de to nudida etọn lẹ mẹ.+ 19  Mì yọ́n ehe, mẹmẹsunnu mẹyiwanna ṣie lẹ emi: Mẹdopodopo dona nọ yawu nado dotoai, whleawu nado dọho+ bo whleawu nado gblehomẹ,+ 20  na homẹgble gbẹtọ tọn ma nọ hẹn dodowiwa Jiwheyẹwhe tọn di.+ 21  Enẹwutu, mì de dihó lẹpo po ylanwiwa wunmẹ lẹpo po* sẹ̀,+ bo yí walọmimiọn do kẹalọyi dido ohó lọ tọn do mì mẹ, he penugo nado whlẹn mì* gán. 22  Ṣigba, mì lẹzun basitọ ohó lọ tọn lẹ,+ e ma yin sisètọ lẹ kẹdẹ gba, to mìdelẹ kiklọ po linlẹn agọ̀ po mẹ. 23  Na eyin mẹdepope yin sisètọ ohó lọ tọn bo ma yin basitọ,+ omẹ ehe taidi dawe de he to nukunmẹ etọn titi* pọ́n to mẹpọ́nnu de mẹ. 24  Na e pọ́n ede bo tọ́nyi podọ to afọdopolọji e wọn gbẹtọ wunmẹ he e yin. 25  Ṣigba, mẹhe zín nukun do osẹ́n pipé+ he yin mẹdekannujẹ tọn lọ mẹ bo zindonukọn to e mẹ ko lẹzun basitọ azọ́n lọ tọn, e ma yin sisètọ nuwọntọ; ewọ nasọ yin ayajẹnọ to nuhe wà e te mẹ.+ 26  Eyin mẹdepope lẹn to ede mẹ dọ emi yin sinsẹ̀n-basitọ Jiwheyẹwhe tọn* ṣigba bo ma nọ deanana* odẹ́ etọn ganji,+ ahun edetiti tọn klọ wẹ e te, podọ ovọ́ wẹ sinsẹ̀n-bibasi etọn. 27  Wunmẹ sinsẹ̀n-bibasi* tọn he wé bo ma yin hinhẹnflu sọn pọndohlan Jiwheyẹwhe podọ Otọ́ mítọn tọn mẹ wẹ ehe: nado nọ penukundo tọṣiọvi lẹ+ po asuṣiọsi lẹ+ po go to nukunbibia yetọn mẹ,+ podọ nado nọ whlá míde matin dihó sọn aihọn dè.+

Nudọnamẹ Odò Tọn

Kavi “nuṣiwa ṣinṣinyan.”
Pọ́n Nud. A5.
To paa mẹ, “doawagun.”
Pọ́n Nud. A5.
Kavi “yin wiwle taidi gbọn mọ̀donú dali.”
Kavi “mẹhe dè didiọ lilẹpe oyẹ̀ tọn de ma tin te.”
Kavi vlavo, “po ylanwiwa susugege po.”
Kavi “alindọn mìtọn lẹ.”
Kavi “nukunmẹ jọwamọ tọn etọn.”
Kavi “yin sinsẹ̀nnọ.”
Kavi “dogànnuna.”
Kavi “sinsẹ̀n.”