Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn | OWE WIWE LẸ—LẸDOGBEDEVOMẸ AIHỌN YỌYỌ TỌN

Jọṣua 8:1-35

NUHE E BẸHẸN LẸ

  • Jọṣua tọ̀pọwuna Ai (1-13)

  • Yé gbawhàn Ai tọn (14-29)

  • Osẹ́n lọ yin hihia to Osó Ebali ji (30-35)

8  Enẹgodo, Jehovah dọna Jọṣua dọmọ: “A dibu kavi dike ahun towe gbàdo blo.+ Plan sunnu awhànfuntọ lọ lẹpo bo hẹji yì funawhàn hẹ Ai. Pọ́n, yẹn ko jo ahọlu Ai tọn, omẹ etọn lẹ, tòdaho etọn po aigba etọn po do alọ towe mẹ.+  Hiẹ ni wà na Ai po ahọlu etọn po kẹdẹdile hiẹ ko wà na Jẹliko po ahọlu etọn po do,+ ṣigba mì sọgan bẹ ogblànnu etọn lẹ po kanlin-yìnyìn etọn lẹ po. Mì tọ̀pọwu dai do tòdaho lọ godo.”  Enẹwutu, Jọṣua po sunnu awhànfuntọ lọ lẹpo po hẹji yì nado funawhàn hẹ Ai. Jọṣua sọ de awhànfuntọ huhlọnnọ 30 000 bo do yé hlan to zánmẹ.  E degbena yé dọmọ: “Mì pọ́n, mìwlẹ ni tọ̀pọwu dai do tòdaho lọ godo. Mì ma dẹn do tòdaho lọ gbau blo, mìmẹpo nisọ tin to aṣeji.  Yẹn po mẹhe tin to dè e lẹpo po na sẹpọ tòdaho lọ, bọ eyin yé tọ́n ja mí ji kẹdẹdi dai tọn,+ mí na họ̀n to nukọn yetọn.  Eyin yé dómọna mí, mí na dọ̀n yé dẹn do tòdaho lọ, na yé na dọmọ, ‘Hinhọ̀n wẹ yé te to nukọn mítọn kẹdẹdi dai tọn.’+ Míwlẹ nasọ họ̀n to nukọn yetọn.  To whenẹnu, mìwlẹ na fọ́n sọn fie mì tọ̀pọwu dai do, bo na yí tòdaho lọ; Jehovah Jiwheyẹwhe mìtọn nasọ jo e do alọ mìtọn mẹ.  Tlolo he mì ko yí tòdaho lọ, mì domiyọ́n ẹn.+ Mì dona wà kẹdẹdile Jehovah ko dọ do. Mì pọ́n, yẹn ko na mì anademẹ.”  Enẹgodo, Jọṣua do yé hlan bọ yé zinzọnlin yì fie yé dona tọ̀pọwu dai do lọ; yé sọ dosla do Bẹtẹli po Ai po ṣẹnṣẹn, to whèyihọ-waji Ai tọn, amọ́ Jọṣua po awhànfuntọ he pò lẹ po dọ́ finẹ to ozán enẹ mẹ. 10  To whenue Jọṣua ko fọ́n to afọnnu fuu bo ko bẹ awhànpa lọ lẹ pli* godo, ewọ po mẹho Islaeli tọn lẹ po deanana yé yì Ai. 11  Sunnu awhànfuntọ+ he tin to e dè lọ lẹpo hẹji yì bo wá tòdaho lọ nukọn. Yé sọ dosla do agewaji Ai tọn, bọ agbàdo lọ tin to ṣẹnṣẹn na yewlẹ po Ai po. 12  To ojlẹ enẹ mẹ, e ko de nudi sunnu 5 000 bo ko hẹn yé nado tọ̀pọwu dai+ do Bẹtẹli+ po Ai po ṣẹnṣẹn, to whèyihọ-waji tòdaho lọ tọn. 13  Gbọnmọ dali, suhugan awhànfuntọ lọ lẹ tọn dosla do agewaji tòdaho lọ tọn+ bọ adà he to godo lọ tin to whèyihọ-waji tòdaho lọ tọn,+ podọ to ozán enẹ mẹ, Jọṣua yì ṣẹnṣẹn agbàdo lọ tọn. 14  Tlolo he ahọlu Ai tọn mọ ehe, ewọ po sunnu he tin to tòdaho lọ mẹ lẹ po yawu tọ́n to afọnnu fuu nado tọ́nawhàn Islaeli to fihe yè sọgan mọ danfafa lọ hlan te. Ṣigba, ewọ ma yọnẹn dọ yè ko tọ̀pọwuna ẹn do tòdaho lọ godo. 15  To whenue sunnu Ai tọn lẹ tọ́n ja, Jọṣua po Islaeli lẹpo po họ̀n bo wle ali danfafa lọ tọn.+ 16  To whenẹnu, mẹhe tin to tòdaho lọ mẹ lẹpo yin yiylọ jẹgbonu nado dómọna yé; podọ dile yé dómọna Jọṣua, yé yin dindọn yì fie dẹn do tòdaho lọ. 17  Sunnu depope ma pò to Ai po Bẹtẹli po he ma dómọna Islaeli. Yé jo tòdaho lọ do nùvo wlala bo dómọna Islaeli. 18  Todin, Jehovah dọna Jọṣua dọmọ: “Dlẹn owhán he tin to alọ towe mẹ hlan Ai,+ na yẹn na jo e do alọ towe mẹ.”+ Enẹwutu, Jọṣua dlẹn owhán he tin to alọ etọn mẹ hlan tòdaho lọ. 19  Tlolo he ewọ dlẹnalọ etọn, mẹhe ko tọ̀pọwu dai lọ lẹ fọ́n plaun sọn fihe yé te, bo bẹwezun biọ tòdaho lọ mẹ bosọ yí i. Yé sọ domiyọ́n tòdaho lọ to afọdopolọji.+ 20  To whenue sunnu Ai tọn lẹ lilẹ́ bo pọ́n godo, yé mọ bọ azọ̀ tòdaho lọ tọn to tìtì yiaga, yé masọ sọgan họnyi awà depope ji. To whenẹnu, mẹhe to hinhọ̀n yì danfafa ji dai lọ lẹ lilẹ́ pannukọn mẹhe dómọna yé lẹ. 21  Dile Jọṣua po Islaeli lẹpo po mọdọ mẹhe tọ̀pọwu dai lọ lẹ ko yí tòdaho lọ bọ azọ̀ tòdaho lọ tọn ko to tìtì, yé lilẹ́ bo dlí do omẹ Ai tọn lẹ ji. 22  Mẹhe yí tòdaho lọ lẹ sọ tọ́njẹgbonu sọn tòdaho lọ mẹ nado pé yé, sọmọ bọ Islaelivi lẹ glọn sunnu Ai tọn lẹ do ṣẹnṣẹn, yèdọ mẹdelẹ to adà ehe ji bọ mẹdevo lẹ to adà awetọ ji, bọ yé jẹ yé hù ji kakajẹ whenue mẹde ma pò he luntọ́n kavi họ̀ngán.+ 23  Ṣigba, yé wle ahọlu Ai tọn+ gbẹ̀te bo plan ẹn wá Jọṣua dè. 24  To whenue Islaeli ko hù omẹ Ai tọn he to danji lẹpo to danfafa he ji yé dómọna yé te lọ ji, bo ko yí ohí do hù yemẹpo godo, whenẹnu wẹ Islaeli lẹpo lẹkọyi Ai bo yí ohí do hù mẹhe pò lẹ. 25  Sọha mẹhe kú to azán enẹ gbè lẹpo tọn, sọn sunnu ji jẹ yọnnu ji, yin 12 000, yèdọ omẹ Ai tọn lẹpo. 26  Jọṣua ma há alọ etọn he e ko yí do dlẹn owhán lọ+ kakajẹ whenue e ko và omẹ Ai tọn lẹpo sudo.+ 27  Ṣigba, Islaeli bẹ kanlin-yìnyìn po ogblànnu tòdaho enẹ tọn lẹ po, sọgbe hẹ gbedide he Jehovah ko na Jọṣua.+ 28  Enẹgodo, Jọṣua mẹ̀ Ai bo hẹn ẹn zun okiti gbakija tẹgbẹ tọn de,+ bọ e gbọṣi mọ kakajẹ egbehe. 29  E ze ahọlu Ai tọn plá do pòtin* de go kakajẹ whèjai, podọ dile owhè to họyì, Jọṣua degbe dọ oṣiọ lọ ni yin zize jẹte sọn pòtin lọ ji.+ Enẹgodo, yé ze e dlan họngbo tòdaho lọ tọn nukọn bo bẹ zannu susu pli do e ji, he gbẹ́ pò to finẹ kakajẹ egbehe. 30  Whenẹnu wẹ Jọṣua do agbà de na Jehovah Jiwheyẹwhe Islaeli tọn to Osó Ebali+ ji, 31  kẹdẹdile Mose devizọnwatọ Jehovah tọn ko degbena Islaelivi lẹ do podọ dile e yin kinkan do owe Osẹ́n+ Mose tọn lọ mẹ do dọmọ: “Agbà zannu blebu lẹ tọn de, ehe ji azọ́nwanu gànyuu tọn depope ma ko yin yiyizan te.”+ Yé sọ basi avọ́nunina mimẹ̀ po avọ́sinsan jijọho tọn lẹ po hlan Jehovah to e ji.+ 32  Enẹgodo, e basi vọkan Osẹ́n+ he Mose ko kàn to Islaelivi lẹ nukọn lọ tọn do zannu lẹ ji+ to finẹ. 33  Islaeli lẹpo, mẹho yetọn lẹ, anademẹtọ lẹ po whẹdatọ yetọn lẹ po ṣite to adà Apotin lọ tọn awe lẹ ji to yẹwhenọ Levinu he hẹn apotin alẹnu Jehovah tọn lọ lẹ nukọn. Mẹhe to jonọ-gbéji lẹ po tòvi-jiji lẹ po tin to finẹ.+ Odaa yetọn ṣite to Osó Gelizimi nukọn bọ odaa he pò tin to Osó Ebali nukọn+ (kẹdẹdile Mose devizọnwatọ Jehovah tọn ko degbe etọn dai do),+ nado dona omẹ Islaeli tọn lẹ. 34  To ehe godo, ewọ hia nuhe tin to Osẹ́n+ lọ mẹ lẹpo daga, yèdọ dona+ lẹ po dẹ̀hodo+ lẹ po, sọgbe hẹ nuhe yin kinkan do owe Osẹ́n tọn lọ mẹ lẹpo. 35  Nudepope ma pò to nuhe Mose ko degbe etọn lẹpo mẹ, he Jọṣua ma hia daga to agun Islaeli tọn lẹpo nukọn,+ ehe bẹ yọnnu lẹ, ovi lẹ po mẹhe to jonọ-gbéji+ he nọ nọ̀* ṣẹnṣẹn yetọn lẹ po hẹn.+

Nudọnamẹ Odò Tọn

Kavi “ko wleawuna awhànpa lọ lẹ.”
Kavi “atin.”
To paa mẹ, “he to zọnlinzin to.”