Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Jọṣua 7:1-26

NUHE E BẸHẸN LẸ

  • Ai gbawhàn Islaeli tọn (1-5)

  • Odẹ̀ Jọṣua tọn (6-9)

  • Islaeli ṣíawhàn na ylando wutu (10-15)

  • Akani yin didegbà bo yin hùhù (16-26)

7  Ṣigba, Islaelivi lẹ ma yin nugbonọ gando nuhe dona yin vivasudo mlẹnmlẹn lọ lẹ go, na Akani+ visunnu Kalmi tọn, visunnu Zabdi tọn, visunnu Zela tọn, sọn hẹnnu Juda tọn mẹ yí delẹ to nuhe dona yin vivasudo mlẹnmlẹn lọ lẹ mẹ.+ Enẹwutu, Jehovah gblehomẹ sinsinyẹn do Islaelivi lẹ go.+  To whenẹnu, Jọṣua do sunnu delẹ hlan sọn Jẹliko yì Ai,+ he ma dẹn do Bẹti-aveni, bo to whèzẹtẹn-waji Bẹtẹli+ tọn bo dọna yé dọmọ: “Mì hẹji yì bo bẹ̀ aigba lọ pọ́n.” Enẹwutu, sunnu lọ lẹ hẹji yì bo bẹ̀ Ai pọ́n.  To whenue yé lẹkọwa Jọṣua dè, yé dọna ẹn dọmọ: “E ma yin dandan dọ gbẹtọ lọ lẹpo ni hẹji yì. Nudi sunnu 2 000 kavi 3 000 ko pé nado gbawhàn Ai tọn. A dike gbẹtọ lọ lẹpo yì blo, na onú nikaa ṣikọna yé, na mẹlọ lẹ ma sù.”  Enẹwutu, nudi sunnu 3 000 wẹ hẹji yì dọ́n, ṣigba yé to dandannu glọ nado họ̀n to omẹ Ai tọn lẹ nukọn.+  Omẹ Ai tọn lẹ hù sunnu 36 bo dómọna yé sọn gbonu họngbo tòdaho lọ tọn kakajẹ Ṣebalimi,* bosọ to hùhù to yé mẹ kaka biọ dòdò lọ mẹ. Enẹwutu, obu jẹ gbẹtọ lọ lẹ ji bọ ahun yetọn gbàdo pete.  To whenẹnu, Jọṣua tlẹ́n awù etọn lẹ bo ṣinyọ́n nukunmẹ etọn ai to Apotin Jehovah tọn nukọn kakajẹ whèjai, yèdọ ewọ po mẹho Islaeli tọn lẹ po, bọ yé to kọ́gudu kọ̀n do ota.  Jọṣua sọ dọmọ: “Ṣo, Oklunọ Nupojipetọ Jehovah E, naegbọn hiẹ do plan omẹ ehe lẹpo sọn awà awetọ Jọdani tọn ji dọ́n gbọ́n kiki nado wá jo mí do alọ Amolinu lẹ tọn mẹ nado yin vivasudo? E na ko pọnte na mí nado gbọṣi awà awetọ* Jọdani tọn ji dọ́n!  Jehovah E, jaale, ṣigba etẹwẹ yẹn sọgan dọ todin he Islaeli ko họ̀n* to kẹntọ etọn lẹ nukọn?  Eyin Kenaninu lẹ po mẹhe nọ nọ̀ aigba lọ ji lẹpo po sè ehe, yé na lẹdo mí pé bo na súnsún oyín mítọn sẹ̀ sọn aigba ji, to whenẹnu, etẹwẹ na jọ do oyín daho towe go?”+ 10  Jehovah sọ gblọnna Jọṣua dọmọ: “Fọ́n! Naegbọn hiẹ do ṣinyọ́n nukunmẹ towe ai? 11  Islaeli ko waylando. Yé ko gbà alẹnu ṣie+ he yẹn zedai na yé taidi gbedide de nado nọ yìn. Yé ko bẹ delẹ to nuhe dona yin vivasudo mlẹnmlẹn lọ lẹ mẹ+ bo fìn+ yé bosọ bẹ yé whlá do nutindo yetọn lẹ mẹ.+ 12  Enẹwutu, Islaelivi lẹ ma na penugo nado nọte to kẹntọ yetọn lẹ nukọn ba. Họ̀n wẹ yé na nọ họ̀n to kẹntọ yetọn lẹ nukọn, na yé ko lẹzun nuhe dona yin vivasudo mlẹnmlẹn wutu. Yẹn ma nasọ tin hẹ mì ba adavo mì sukúndona nuhe dona yin vivasudo mlẹnmlẹn lọ sọn ṣẹnṣẹn mìtọn.+ 13  Fọ́n bo klan gbẹtọ lọ lẹ do wiwe!+ Dọna yé dọmọ, ‘Mì klan mìde do wiwe to osọ he ja, na nuhe Jehovah Jiwheyẹwhe Islaeli tọn dọ die: “Nuhe dona yin vivasudo mlẹnmlẹn de tin to ṣẹnṣẹn towe, Islaeli E. Hiẹ ma na penugo nado nọte to kẹntọ towe lẹ nukọn kakajẹ whenue mì na ko de nuhe dona yin vivasudo mlẹnmlẹn lọ sẹ̀ sọn ṣẹnṣẹn mìtọn. 14  Mì dona bẹ mìde pli to afọnnu, bọ hẹnnu dopodopo na tọ́n wá debọdo-dego, podọ sọn hẹnnu he Jehovah na de+ mẹ, whẹndo dopodopo na tọ́n wá debọdo-dego, podọ sọn whẹndo he Jehovah na de mẹ, whédo dopodopo na tọ́n wá debọdo-dego, podọ sọn whédo he Jehovah na de mẹ, sunnu dopodopo na tọ́n wá debọdo-dego. 15  Mẹhe si nuhe dona yin vivasudo mlẹnmlẹn lọ yin mimọ te, yè na yí miyọ́n do mẹ̀+ ewọ po nutindo etọn lẹpo po, na e ko gbà alẹnu Jehovah tọn wutu+ podọ na e ko wà nuhe huwinyan de to Islaeli mẹ wutu.”’” 16  Enẹwutu, Jọṣua fọ́n to wunkẹngbe afọnnu fuu bo hẹn hẹnnu Islaeli tọn dopodopo nado tọ́n wá debọdo-dego, bọ hẹnnu Juda tọn yin dide. 17  E hẹn whẹndo Juda tọn lẹ tọ́n wá debọdo-dego bọ whẹndo Zelanu+ lẹ tọn yin dide, enẹgodo e hẹn sunnu dopodopo tọ́n wá debọdo-dego sọn whẹndo Zelanu lẹ tọn mẹ, bọ Zabdi yin dide. 18  To godo mẹ, e hẹn sunnu dopodopo tọ́n wá debọdo-dego sọn whédo Zabdi tọn mẹ, bọ Akani visunnu Kalmi tọn, visunnu Zabdi tọn, visunnu Zela tọn, sọn hẹnnu Juda tọn mẹ, yin dide.+ 19  Jọṣua sọ dọna Akani dọmọ: “Visunnu ṣie, jaale gbògbéna Jehovah Jiwheyẹwhe Islaeli tọn bo yigbe nuṣiwa towe tọn na ẹn. Jaale dọ nuhe a wà na mi. Ma whlá ẹ do mi blo.” 20  Akani gblọnna Jọṣua dọmọ: “Sọn nugbo de mẹ, yẹn wẹ waylando sọta Jehovah Jiwheyẹwhe Islaeli tọn, podọ nuhe yẹn wà die. 21  Whenue yẹn mọ awugbó vonọtaun whanpẹnọ Ṣinali+ tọn de to ogblànnu lọ lẹ mẹ gọna ṣekẹli* fataka tọn 200 po sika he zínpinpẹn etọn yin ṣekẹli 50 po, yé biọ nukunmẹ na mi, bọ yẹn bẹ yé. Todin, yé tin to odò mẹ to gòhọ ṣie mẹ bọ akuẹ lọ tin to oglọ yetọn.” 22  To afọdopolọji, Jọṣua do wẹnsagun lẹ hlan bọ yé họ̀nwezun yì gòhọ lọ mẹ, bo mọdọ awugbó lọ yin zizewhla do gòhọ etọn mẹ, bọ akuẹ lọ tin to odò. 23  Enẹwutu, yé bẹ nulọ lẹ sọn gòhọ lọ mẹ bo hẹn yé wá Jọṣua po Islaelivi lẹpo po dè bosọ bẹ yé dai to nukọn Jehovah tọn. 24  To whenẹnu, Jọṣua po Islaeli lẹpo po hẹn Akani+ visunnu Zela tọn, gọna fataka lọ, awugbó vonọtaun lọ, sika lọ,+ visunnu etọn lẹ, viyọnnu etọn lẹ, oyìn etọn, kẹtẹkẹtẹ etọn, lẹngbọpa etọn, gòhọ etọn po nutindo etọn lẹpo po wá Agbàdo Akọli tọn+ mẹ. 25  Jọṣua sọ dọmọ: “Naegbọn hiẹ do hẹn nugbajẹmẹji* wá mí ji?+ Jehovah na hẹn nugbajẹmẹji wá ji we to egbehe.” To whenẹnu wẹ Islaeli lẹpo dlan zannu do yé hù,+ enẹgodo yé yí miyọ́n do mẹ̀ yé.+ Mọ wẹ yé dlan zannu do yemẹpo hù do. 26  Yé sọ bẹ zannu susu pli do e ji, he gbẹ́ pò to finẹ kakajẹ egbehe. Enẹwutu, homẹgble sinsinyẹn Jehovah tọn doalọte.+ Nuhe zọ́n bọ filọ do nọ yin yiylọdọ Agbàdo Akọli* tọn kakajẹ egbehe niyẹn.

Nudọnamẹ Odò Tọn

Zẹẹmẹdo “Osé-Kùntẹn.”
Enẹ wẹ, whèzẹtẹn-waji.
Kavi “lẹgodo.”
Ṣekẹli dopo sọzẹn hẹ g 11,4. Pọ́n Nud. B14.
Kavi “nuhahun; tukla.”
Zẹẹmẹdo “Nugbajẹmẹji; Tukla.”