Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Jọṣua 6:1-27

NUHE E BẸHẸN LẸ

  • Adó Jẹliko tọn họ́ (1-21)

  • Lahabi po whẹndo etọn po gán (22-27)

6  Todin, Jẹliko yin súsú gbanun-gbanun na Islaelivi lẹ tọn wutu; mẹdepope ma to tintọ́n kavi to bibiọ e mẹ.+  To whenẹnu, Jehovah dọna Jọṣua dọmọ: “Pọ́n, yẹn ko jo Jẹliko, ahọlu etọn po awhànfuntọ huhlọnnọ etọn lẹ po do alọ towe mẹ.+  Mì sunnu awhànfuntọ lẹpo dona zinzọnlin lẹdo tòdaho lọ, bo lẹdo e pé whladopo. Mọ wẹ mì dona wà do na azán ṣidopo.  Yẹwhenọ ṣinawe ni hẹn agbòzò ṣinawe to Apotin lọ nukọn. Ṣigba, to azán ṣinawetọ gbè, mì dona zinzọnlin lẹdo tòdaho lọ whla ṣinawe bọ yẹwhenọ lọ lẹ na kún azò lọ lẹ.+  To whenue agbòzò lọ yin kúnkún—yèdọ tlolo he mì sè kúnkún* azò lọ tọn—gbẹtọ lọ lẹpo dona yí ogbè lélé do dawhá awhàn tọn. To whenẹnu, adó tòdaho lọ tọn na họ́jai petepete+ bọ gbẹtọ lọ lẹpo na dlí biọ e mẹ tlọlọ.”  Enẹwutu, Jọṣua visunnu Nuni tọn ylọ yẹwhenọ lẹ pli bo dọna yé dọmọ: “Mì ze apotin alẹnu tọn lọ, yẹwhenọ ṣinawe sọ dona hẹn agbòzò ṣinawe to Apotin Jehovah tọn nukọn.”+  E sọ dọna gbẹtọ lọ lẹ dọmọ: “Mì dedo bo zinzọnlin lẹdo tòdaho lọ, bọ awhànpa he sọawhànnu+ lọ dona tin to nukọnna Apotin Jehovah tọn.”  Podọ kẹdẹdile Jọṣua dọna gbẹtọ lọ lẹ do, yẹwhenọ ṣinawe he hẹn agbòzò ṣinawe to Jehovah nukọn lọ lẹ to yìyì to nukọn bo kún azò lọ lẹ bọ apotin alẹnu Jehovah tọn to hihodo yé.  Awhànpa he sọawhànnu lọ sọ to yìyì to nukọnna yẹwhenọ he to azò kún lọ lẹ, bọ hihọ́tọ he to godo lẹ to hihodo Apotin lọ dile azò lọ lẹ to yinyin kúnkún zọnmii. 10  Todin, Jọṣua ko degbena gbẹtọ lọ lẹ dọmọ: “Mì dawhá kavi dike ogbè mìtọn yin sisè blo. Ohó depope ma dona tọ́n sọn onù mìtọn mẹ kakajẹ azán he gbè yẹn na dọna mì dọ, ‘Mì dawhá!’ Whenẹnu wẹ mì na dawhá.” 11  E sọ hẹn ẹn diun dọ Apotin Jehovah tọn lọ yin zize pé lẹdo tòdaho lọ, yèdọ whladopo, enẹgodo yé lẹkọyi osla lọ mẹ bo dọ́ finẹ. 12  To wunkẹngbe, Jọṣua fọ́n to afọnnu fuu, bọ yẹwhenọ lọ lẹ ze Apotin+ Jehovah tọn, 13  podọ yẹwhenọ ṣinawe he hẹn agbòzò ṣinawe lọ lẹ to zọnlinzin to Apotin Jehovah tọn nukọn bo to azò lọ lẹ kún zọnmii. Awhànpa he sọawhànnu lọ sọ to zọnlinzin to nukọn yetọn, dile hihọ́tọ he to godo lẹ to hihodo Apotin Jehovah tọn lọ bọ azò lọ lẹ to yinyin kúnkún zọnmii. 14  To azán awetọ gbè, yé zinzọnlin lẹdo tòdaho lọ whladopo, enẹgodo yé lẹkọyi osla lọ mẹ. Mọ wẹ yé wà do na azán ṣidopo.+ 15  To azán ṣinawetọ gbè, yé yawu fọ́n to whenue owùn kẹ̀n tlolo, bo zinzọnlin lẹdo tòdaho lọ to aliho dopolọ mẹ whla ṣinawe. Azán enẹ kẹdẹ gbè wẹ yé zinzọnlin lẹdo tòdaho lọ whla ṣinawe.+ 16  Podọ to whla ṣinawetọ lọ whenu, yẹwhenọ lọ lẹ kún azò lọ lẹ, bọ Jọṣua dọna gbẹtọ lọ lẹ dọmọ: “Mì dawhá,+ na Jehovah ko na mì tòdaho lọ! 17  Tòdaho lọ po nuhe tin to e mẹ lẹpo po dona yin vivasudo mlẹnmlẹn;+ Jehovah tọn wẹ tòdaho lọ pete. Lahabi+ galọtọ lọ kẹdẹ wẹ sọgan yin pipò dogbẹ̀, yèdọ ewọ po mẹhe gọna ẹn to ohọ̀ lọ mẹ lẹ po, na e whlá wẹnsagun he mí dohlan lẹ wutu.+ 18  Ṣigba, mì nọla na nuhe dona yin vivasudo mlẹnmlẹn lẹ,+ na yé nikaa jlo mì bọ mì na yí delẹ to yé mẹ+ bo hẹn osla Islaeli tọn zun nuhe dona yin vivasudo mlẹnmlẹn bosọ gbọnmọ dali hẹn nugbajẹmẹji* wá e ji.+ 19  Ṣigba fataka, sika, núzinzan gànvẹẹ tọn po gànyuu tọn lẹpo po yin onú wiwe na Jehovah.+ Adọkunnu sẹdotẹn Jehovah tọn lẹ mẹ wẹ yé dona yì.”+ 20  Gbẹtọ lọ lẹ sọ dawhá to whenue azò lọ lẹ yin kúnkún.+ Tlolo he gbẹtọ lọ lẹ sè kúnkún azò lọ tọn bo yí ogbè lélé do dawhá awhàn tọn, adó lọ họ́jai petepete.+ Enẹgodo, gbẹtọ lọ lẹpo dlí biọ tòdaho lọ mẹ tlọlọ bo yí tòdaho lọ. 21  Yé yí ohí do và nuhe tin to tòdaho lọ mẹ lẹpo sudo mlẹnmlẹn, yèdọ sunnu po yọnnu po, yọpọ po mẹho po, gọna oyìn, lẹngbọ po kẹtẹkẹtẹ po.+ 22  Jọṣua sọ dọna sunnu awe he yì bẹ̀ aigba lọ pọ́n lẹ dọmọ: “Mì biọ ohọ̀ galọtọ lọ tọn mẹ, bo plan yọnnu lọ po mẹhe gando e go lẹpo po tọ́njẹgbonu, kẹdẹdile mì ko whlé na ẹn do.”+ 23  Enẹwutu, dẹpẹ he yin amẹ́ lọ lẹ biọ ohọ̀ lọ mẹ bo plan Lahabi, otọ́ etọn, onọ̀ etọn, nọvisunnu etọn lẹ po mẹhe gando e go lẹpo po tọ́njẹgbonu; mọwẹ, hẹnnumẹ etọn lẹpo wẹ yé plan tọ́njẹgbonu,+ bo hẹn yé awuyẹyẹ-afọyẹyẹ wá otẹn de mẹ to gbonu osla Islaeli tọn. 24  Enẹgodo, yé yí miyọ́n do mẹ̀ tòdaho lọ po nuhe tin to e mẹ lẹpo po. Ṣigba, yé bẹ fataka, sika, núzinzan gànvẹẹ po gànyuu tọn lẹ po do adọkunnu sẹdotẹn lẹ mẹ to ohọ̀ Jehovah tọn mẹ.+ 25  Lahabi galọtọ lọ kẹdẹ po whédo otọ́ etọn tọn po gọna mẹhe gando e go lẹpo wẹ Jọṣua pò dogbẹ̀;+ yọnnu lọ sọ nọ nọ̀ ṣẹnṣẹn Islaeli tọn kakajẹ egbehe,+ na e whlá wẹnsagun he Jọṣua dohlan nado bẹ̀ Jẹliko pọ́n lẹ wutu.+ 26  To ojlẹ enẹ mẹ, Jọṣua lá whiwhle de* dọmọ: “Mẹhodẹ̀do wẹ sunnu lọ ni yin to Jehovah nukọn he jẹ tòdaho ehe, enẹ wẹ Jẹliko vọ́ gbá ji. Viplọnji etọn ni kú to whenue e na do dodonu etọn ai, podọ pòdevi etọn ni kú to whenue e na do họngbo etọn lẹ.”+ 27  Mọ wẹ Jehovah tin hẹ Jọṣua+ do bọ e diyin lẹdo aigba lẹpo pé.+

Nudọnamẹ Odò Tọn

Kavi “nudidọ na ojlẹ dindẹn.”
Kavi “nuhahun; tukla.”
Kavi vlavo, “hẹn gbẹtọ lẹ basi whiwhle ehe.”