Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Jọṣua 5:1-15

NUHE E BẸHẸN LẸ

  • Adàgbigbo to Gilgali (1-9)

  • Juwayi yin bibasi; manna doalọte (10-12)

  • Ahọvi awhànpa Jehovah tọn (13-15)

5  Tlolo he ahọlu Amolinu+ lẹ tọn lẹpo he tin to whèyihọ-waji Jọdani tọn gọna ahọlu Kenaninu+ lẹ tọn lẹpo he ma dẹn do ohù, sè dọ Jehovah ko hẹn osin Jọdani tọn lẹ hú to Islaelivi lẹ nukọn kakajẹ whenue yé dasá pó, ahun yetọn gbàdo*+ bọ yé masọ tindo adọgbigbo depope ba,* na Islaelivi lẹ tọn wutu.+  To ojlẹ enẹ mẹ, Jehovah dọna Jọṣua dọmọ: “Yí zannu do basi ohí lẹ bo gboadà+ na sunnu Islaeli tọn lẹ whladopo dogọ, yèdọ whla awetọ.”  Enẹwutu, Jọṣua yí zannu do basi ohí lẹ bo gboadà na sunnu Islaeli tọn lẹ to Gibeati-haalaloti.*+  Nuhewutu Jọṣua do gboadà na yé lọ die: Sunnu he tọ́n sọn Egipti lọ lẹpo, yèdọ sunnu awhànfuntọ* lọ lẹpo wẹ ko kú to danfafa ji to whenuena yé to ali ji ja sọn Egipti.+  Mẹhe tọ́n sọn Egipti lọ lẹpo wẹ ko gboadà, ṣigba mẹhe yin jiji to danfafa ji to whenuena yé ko tọ́n sọn Egipti lẹpo wẹ ma ko gboadà.  Owhe 40+ wẹ Islaelivi lẹ ko zingbejizọnlin na to danfafa ji, kakajẹ whenue akọta lọ pete, yèdọ sunnu awhànfuntọ he tọ́n sọn Egipti bo ma setonuna ogbè Jehovah tọn lẹpo ko kú vọ̀.+ Jehovah whlé na yé dọ emi ma na dike yé ni mọ aigba lọ gbede,+ yèdọ aigba he Jehovah ko whlé na tọgbo yetọn lẹ nado na mí,+ enẹ wẹ aigba he ji anọ́sin po owín po to sisà te de.+  Enẹwutu, e yí visunnu yetọn lẹ do diọtẹnna yé.+ Visunnu ehelẹ wẹ Jọṣua gboadà na; na yewlẹ ma ko gboadà to gbejizọnlin lọ whenu wutu.  To whenue yé ko gboadà na akọta lọ pete pó godo, yé gbọṣi otẹn yetọn mẹ to osla lọ mẹ kakajẹ whenue yé jẹgangan.  Whenẹnu wẹ Jehovah dọna Jọṣua dọmọ: “Yẹn ko de vlẹko Egipti tọn sẹ̀ sọn mì ji to egbehe.” Enẹwutu wẹ filọ do yin yiylọdọ Gilgali*+ kakajẹ egbehe. 10  Islaelivi lẹ gbọṣi osla lọ mẹ to Gilgali, bo basi hùnwhẹ Juwayi tọn to azán 14tọ osun lọ tọn gbè,+ to whèjai, to danfafa Jẹliko tọn ji. 11  Yé sọ jẹ sinsẹ́n aigba lọ tọn dù ji to azán he bọdo Juwayi go lọ gbè, yèdọ akla madotọ́n+ po jinukun sisọ lẹ po to azán enẹ dopolọ gbè. 12  To azán awetọ enẹ gbè wẹ manna doalọte to whenuena yé ko dù delẹ to sinsẹ́n aigba lọ tọn lẹ mẹ; manna masọ tin na Islaelivi lẹ ba,+ ṣigba yé jẹ sinsẹ́n aigba Kenani tọn dù ji to owhe enẹ mẹ.+ 13  Dile Jọṣua ma dẹn do Jẹliko, e ze nukun etọn lẹ daga bo mọ dawe de+ to ote to nukọn etọn he dọ̀n ohí sún.+ Jọṣua zinzọnlin yì e dè bo kanse dọmọ: “Adà mítọn mẹ wẹ a te ya, kavi adà kẹntọ mítọn lẹ tọn mẹ?” 14  Dawe lọ gblọn dọmọ: “Lala, ṣigba yẹn wá taidi ahọvi* awhànpa Jehovah tọn.”+ Whenẹnu wẹ Jọṣua họ́jai bo ṣinyọ́n nukunmẹ etọn ai bosọ dọna ẹn dọmọ: “Etẹwẹ oklunọ ṣie tindo nado dọna devizọnwatọ etọn?” 15  Ahọvi awhànpa Jehovah tọn lọ sọ gblọnna Jọṣua dọmọ: “De afọpa towe lẹ sọn afọ, na fihe hiẹ ṣite te lọ yin wiwe wutu.” Jọṣua sọ wàmọ to afọdopolọji.+

Nudọnamẹ Odò Tọn

To paa mẹ, “yọ́.”
To paa mẹ, “bọ yé masọ tindo gbigbọ to yede mẹ ba.”
Zẹẹmẹdo “Okiti Ayú Tintan lẹ Tọn.”
Kavi “sunnu he tindo owhe awhànfunfun tọn.”
Zẹẹmẹdo “Bibli; Bibli Sẹ̀.”
Kavi “ogán.”