Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Jọṣua 3:1-17

NUHE E BẸHẸN LẸ

  • Islaeli dasá Jọdani (1-17)

3  Jọṣua sọ fọ́n to afọnnu fuu, bọ ewọ po Islaelivi* lẹpo po dedo sọn Ṣitimi+ bo wá Jọdani. Yé sọ dọ́ finẹ whẹpo do dasá tọ̀sisa lọ.  To azán atọ̀n godo, anademẹtọ+ lọ lẹ gbọn osla lọ pete mẹ  bo degbena gbẹtọ lẹ dọmọ: “Tlolo he mì mọ bọ yẹwhenọ Levinu lẹ ze apotin alẹnu Jehovah Jiwheyẹwhe mìtọn tọn,+ mìwlẹ dona dedo sọn otẹn mìtọn mẹ bo hodo e.  Ṣigba, mì gbọ e ni dẹn do mì na nudi awagbà 2 000;* mì ma sẹpọ ẹ humọ blo, na mì nido yọ́n ali he ji mì dona gbọn, na mì ma ko zingbejizọnlin gbọn ali ehe ji pọ́n.”  Jọṣua sọ dọna gbẹtọ lọ lẹ dọmọ: “Mì klan mìde do wiwe,+ na Jehovah na wà nujiawu lẹ to ṣẹnṣẹn mìtọn to osọ he ja.”+  Enẹgodo, Jọṣua dọna yẹwhenọ lẹ dọmọ: “Mì ze apotin+ alẹnu tọn lọ bo jẹnukọnna gbẹtọ lọ lẹ.” Yé sọ ze apotin alẹnu tọn lọ bo dedo to gbẹtọ lọ lẹ nukọn.  Jehovah sọ dọna Jọṣua dọmọ: “Egbehe wẹ yẹn na jẹ zize we daga ji to nukun Islaeli lẹpo tọn mẹ,+ na yé nido yọnẹn dọ yẹn na tin hẹ we+ kẹdẹdile yẹn ko tin hẹ Mose do.+  Hiẹ dona degbena yẹwhenọ lọ lẹ he hẹn apotin alẹnu tọn lọ dọmọ: ‘Tlolo he mì jẹ tọ̀sisa Jọdani tó, mì dona nọte guun to tọ̀sisa lọ mẹ.’”+  Jọṣua sọ dọna Islaelivi lẹ dọmọ: “Mì wáfi bo dotoaina ohó Jehovah Jiwheyẹwhe mìtọn tọn lẹ.” 10  Enẹgodo, Jọṣua dọmọ: “Gbọn ehe dali wẹ mìwlẹ na yọnẹn dọ Jiwheyẹwhe ogbẹ̀nọ de tin to ṣẹnṣẹn mìtọn,+ podọ ewọ na yàn Kenaninu lẹ, Hetinu lẹ, Hivinu lẹ, Pelizinu lẹ, Gilgaṣinu lẹ, Amolinu lẹ po Jẹbusinu lẹ po sẹ̀ sọn nukọn mìtọn dandan.+ 11  Mì pọ́n! Apotin alẹnu Oklunọ aigba lẹpo pete tọn to yìyì to nukọn mìtọn biọ Jọdani mẹ. 12  Todin, mì de sunnu 12 sọn hẹnnu Islaeli tọn lẹ mẹ, yèdọ sunnu dopo sọn hẹnnu dopodopo mẹ,+ 13  podọ tlolo he afọpahomẹ yẹwhenọ he hẹn Apotin Jehovah Oklunọ aigba lẹpo pete tọn lọ tọn lẹ na biọ* osin Jọdani tọn lẹ mẹ, osin Jọdani tọn he to sisà sọn aga na doalọte bo nasọ ṣite guun taidi adó de.”+ 14  Enẹwutu, whenue gbẹtọ lọ lẹ dedo sọn gòhọ yetọn lẹ mẹ, tlolo whẹpo yé nido dasá Jọdani, yẹwhenọ lọ lẹ he hẹn apotin+ alẹnu tọn lọ jẹnukọnna gbẹtọ lọ lẹ. 15  Tlolo he mẹhe hẹn Apotin lọ lẹ jẹ Jọdani kọ̀n bọ yẹwhenọ he hẹn Apotin lọ lẹ ze afọ do osin mẹ to tọ̀sisa lọ tó (na Jọdani nọ gọfla wá agé+ to azán jibẹwawhé tọn lẹpo whenu wutu), 16  osin he to sisà sọn aga lẹ nọte guun. Yé jlọ ṣite taidi adó de to aganu boboe to Adam, yèdọ tòdaho lọ he ma dẹn do Zaletani, bọ osin he to sisà hlan Ohù Alaba, enẹ wẹ Ohù Ojẹ̀ tọn* mẹ lẹ hú sẹ̀. Osin he to sisà lọ lẹ doalọte, bọ gbẹtọ lọ lẹ dasá to fie pannukọn Jẹliko. 17  Dile yẹwhenọ lọ lẹ he hẹn apotin alẹnu Jehovah tọn lọ gbọṣi ote guun to aigba húhú ji+ to ṣẹnṣẹn Jọdani tọn, Islaeli lẹpo dasá gbọn aigba húhú ji+ kakajẹ whenue akọta lọ pete ko dasá Jọdani pó.

Nudọnamẹ Odò Tọn

To paa mẹ, “visunnu Islaeli tọn.”
Nudi m 890. Pọ́n Nud. B14.
To paa mẹ, “jẹ.”
Enẹ wẹ, Ohù Kúkú.