Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn | OWE WIWE LẸ—LẸDOGBEDEVOMẸ AIHỌN YỌYỌ TỌN

Jọṣua 24:1-33

NUHE E BẸHẸN LẸ

  • Jọṣua vọ́ otàn Islaeli tọn pìn (1-13)

  • Tudohomẹnamẹ nado sẹ̀n Jehovah (14-24)

    • “Na yẹn po whédo ṣie po tọn, Jehovah wẹ mí na nọ sẹ̀n” (15)

  • Alẹnu Jọṣua tọn hẹ Islaeli (25-28)

  • Jọṣua kú bo yin dìdì (29-31)

  • Ohú Josẹfu tọn lẹ yin dìdì do Ṣekẹmi (32)

  • Eleazali kú bo yin dìdì (33)

24  Enẹgodo, Jọṣua pli hẹnnu Islaeli tọn lẹpo dopọ to Ṣekẹmi bo ylọ mẹho Islaeli tọn lẹ, nukọntọ lẹ, whẹdatọ lẹ po anademẹtọ lẹ po,+ bọ yé ṣite to Jiwheyẹwhe nugbo lọ nukọn.  Jọṣua dọna gbẹtọ lọ lẹpo dọmọ: “Nuhe Jehovah Jiwheyẹwhe Islaeli tọn dọ die, ‘Awà awetọ Tọ̀sisa* lọ tọn ji wẹ tọgbo mìtọn lẹ+ nọ to ojlẹ dindẹn die+—yèdọ Tela, otọ́ Ablaham tọn podọ otọ́ Nahọli tọn—bọ yé nọ sẹ̀n yẹwhe devo lẹ.+  “‘To godo mẹ, yẹn plan tọgbo mìtọn Ablaham+ sọn awà awetọ Tọ̀sisa* lọ tọn ji bo hẹn ẹn nado dán gbọn aigba Kenani tọn lẹpo ji bosọ hẹn kúnkan* etọn sudeji.+ Yẹn na ẹn Isaki;+  enẹgodo hlan Isaki, yẹn na Jakọbu po Esau po.+ To godo mẹ, yẹn na Osó Seili Esau taidi nutindo etọn;+ Jakọbu po visunnu etọn lẹ po sọ jẹte yì Egipti.+  To agọgbọnẹnmẹ, yẹn do Mose po Aalọn po hlan,+ yẹn sọ yí azọ̀nylankan do hò Egipti gbọn nuhe yẹn wà to ṣẹnṣẹn yetọn lẹ dali,+ podọ to enẹgodo, yẹn hẹn mìwlẹ tọ́njẹgbonu.  To whenue yẹn to otọ́ mìtọn lẹ hẹn tọ́njẹgbonu sọn Egipti+ bọ mì wá ohù lọ kọ̀n, Egiptinu lẹ yí osọ́-kẹkẹ awhàn tọn po awhànfuntọ osọ́ ji tọn lẹ po do dómọna otọ́ mìtọn lẹ kaka wá Ohù Vẹẹ kọ̀n.+  Yé sọ jẹ awhádo ylọ Jehovah ji,+ bọ ewọ hẹn zinvlu tin to mìwlẹ po Egiptinu lẹ po ṣẹnṣẹn bo hẹn ohù ṣinyọ́n yé ji,+ podọ nukun mìtọn titi lẹ mọ nuhe yẹn wà to Egipti.+ To whenẹnu, mìwlẹ nọ danfafa ji na owhe* susu.+  “‘Yẹn sọ hẹn mì wá aigba Amolinu lẹ tọn ji, yèdọ mẹhe nọ nọ̀ awà awetọ* Jọdani tọn ji lẹ, bọ yé hoavùn hẹ mì.+ Ṣigba, yẹn jo yé do alọ mìtọn mẹ na mì nido sọgan yí aigba yetọn, yẹn sọ hù yé sudo sọn nukọn mìtọn.+  Enẹgodo, Balaki visunnu Zipọli tọn, yèdọ ahọlu Moabi tọn, fọ́n bo hoavùn hẹ Islaeli. E sọ ylọ Balaami visunnu Beoli tọn nado hodẹ̀do mì.+ 10  Amọ́, yẹn ma dotoaina Balaami.+ Enẹwutu, ewọ dona mì whlasusu,+ bọ yẹn whlẹn mì sọn alọ etọn mẹ.+ 11  “‘Enẹgodo, mì dasá Jọdani+ bo wá Jẹliko.+ Nukọntọ* Jẹliko tọn lẹ, Amolinu lẹ, Pelizinu lẹ, Kenaninu lẹ, Hetinu lẹ, Gilgaṣinu lẹ, Hivinu lẹ po Jẹbusinu lẹ po sọ hoavùn hẹ mì, ṣigba yẹn jo yé do alọ mìtọn mẹ.+ 12  To whenẹnu, yẹn hẹn numọtolanmẹ flumẹjijẹ* tọn gbayipe to nukọn mìtọn, bọ e yàn yé jẹgbonu sọn nukọn mìtọn+—kẹdẹdi ahọlu awe Amolinu lẹ tọn. E ma yin po ohí mìtọn po, mọdopolọ e ma yin po ogá mìtọn po.+ 13  Gbọnmọ dali, yẹn na mì aigba de he mì ma jẹtukla na podọ tòdaho lẹ he mì ma gbá,+ bọ mì nọ nọ̀ yé mẹ. Sinsẹ́n vẹngle po olivie-gle po tọn he mì ma do lẹ wẹ mì to dùdù.’+ 14  “Enẹwutu, mì dibusi Jehovah bo nọ yí tenọgligo-hinhẹn po nugbonọ-yinyin po do sẹ̀n ẹn,*+ bosọ de yẹwhe he tọgbo mìtọn lẹ ko sẹ̀n to awà awetọ Tọ̀sisa* lọ tọn ji podọ to Egipti lẹ sẹ̀+ bo nọ sẹ̀n Jehovah. 15  Todin, eyin e ylan to nukun mìtọn mẹ nado sẹ̀n Jehovah, mì bo de na mìdelẹ to egbehe mẹhe mì na sẹ̀n,+ vlavo yẹwhe he tọgbo mìtọn lẹ sẹ̀n to awà awetọ Tọ̀sisa* lọ tọn ji lẹ+ kavi yẹwhe Amolinu he sin aigba ji mì nọ nọ̀ lẹ tọn lẹ.+ Ṣigba, na yẹn po whédo ṣie po tọn, Jehovah wẹ mí na nọ sẹ̀n.” 16  To whenẹnu, gbẹtọ lọ lẹ gblọn dọmọ: “E ma sọgan wá linlẹn mẹ na míwlẹ gbede nado jo Jehovah do bo sẹ̀n yẹwhe devo lẹ. 17  Jehovah Jiwheyẹwhe mítọn wẹ hẹn míwlẹ po otọ́ mítọn lẹ po tọ́njẹgbonu sọn aigba Egipti tọn ji,+ sọn kanlinmọgbenu,+ podọ ewọ wẹ wà azọ́njiawu ehelẹ to nukun mítọn lẹ mẹ+ bosọ to hihọ́ mí to aliho he ji mí gbọn lẹpo podọ to mẹhe mẹ mí gbọn wayi lẹpo ṣẹnṣẹn.+ 18  Jehovah sọ yàn mẹlọ lẹpo, kakajẹ Amolinu he nọ nọ̀ aigba lọ ji lẹ sẹ̀ sọn nukọn mítọn. Enẹwutu, Jehovah wẹ mílọsu na nọ sẹ̀n, na ewọ wẹ Jiwheyẹwhe mítọn.” 19  To whenẹnu, Jọṣua dọna gbẹtọ lọ lẹ dọmọ: “Be mì na penugo nugbonugbo nado nọ sẹ̀n Jehovah ya? Na Jiwheyẹwhe wiwe de wẹ ewọ;+ ewọ yin Jiwheyẹwhe de he nọ biọ mẹdezejo mlẹnmlẹn.+ E ma na jo sẹ́nhẹngba* po ylando mìtọn lẹ po na mì.+ 20  Eyin mì jo Jehovah do bo nọ sẹ̀n yẹwhe jonọ lẹ, ewọ lọsu na diọnukunsọ mì bo sukúndona mì to whenue e ko wà dagbe na mì godo.”+ 21  Ṣigba, gbẹtọ lọ lẹ gblọnna Jọṣua dọmọ: “Lala, ṣigba Jehovah wẹ mí na nọ sẹ̀n!”+ 22  Enẹwutu, Jọṣua dọna gbẹtọ lọ lẹ dọmọ: “Mìlọsu yin kunnudetọ sọta mìde dọ mì ko desọn ojlo mẹ wá nado nọ sẹ̀n Jehovah.”+ Yé sọ gblọnna ẹn dọmọ: “Mí yin kunnudetọ.” 23  “Enẹwutu, mì de yẹwhe jonọ he tin to ṣẹnṣẹn mìtọn lẹ sẹ̀ bo lẹ́ ahun mìtọn hlan Jehovah Jiwheyẹwhe Islaeli tọn dè.” 24  Gbẹtọ lọ lẹ sọ gblọnna Jọṣua dọmọ: “Jehovah Jiwheyẹwhe mítọn wẹ mí na nọ sẹ̀n bo na nọ setonuna ogbè etọn!” 25  To whenẹnu, Jọṣua basi alẹnu de hẹ gbẹtọ lọ lẹ to azán enẹ gbè bo ze aṣẹdai po nunọwhinnusẹ́n de po dai na yé to Ṣekẹmi. 26  Enẹgodo, Jọṣua kàn ohó ehelẹ do owe Osẹ́n Jiwheyẹwhe tọn+ mẹ bo ze zannu daho de+ bosọ ze e tùnte to atin blibata he sẹpọ fiwiwe Jehovah tọn lọ sá. 27  Jọṣua zindonukọn bo dọna gbẹtọ lọ lẹpo dọmọ: “Mì pọ́n! Zannu ehe wẹ na yin kunnudenu de sọta mí,+ na e ko sè nuhe Jehovah ko dọ hẹ mí lọ lẹpo, podọ e na yin kunnudenu de sọta mì, na mì nikaa gbẹ́ Jiwheyẹwhe mìtọn dai.” 28  To whenẹnu, Jọṣua do gbẹtọ lọ lẹ hlan, yèdọ dopodopo yetọn yì ogú yetọn kọ̀n.+ 29  To onú ehelẹ godo, Jọṣua visunnu Nuni tọn, yèdọ devizọnwatọ Jehovah tọn lọ kú to whenue e tindo owhe 110.+ 30  Yé sọ dì i do aigba he yin ogú etọn lọ ji to Timnati-sela,+ ehe tin to lẹdo osó tọn Eflaimi tọn mẹ, to agewaji Osó Gaaṣi tọn. 31  Islaeli zindonukọn nado to Jehovah sẹ̀n to azán Jọṣua tọn lẹpo gbè podọ to azán mẹho he zindonukọn nado to gbẹnọ to Jọṣua godo bo ko yọ́n azọ́n he Jehovah wà na Islaeli lẹpo tọn whenu.+ 32  Islaelivi lẹ dì ohú Josẹfu tọn lẹ+ he yé hẹn jẹgbonu sọn Egipti do Ṣekẹmi to ogle he Jakọbu ko họ̀ sọn visunnu Hamọli tọn lẹ si,+ yèdọ otọ́ Ṣekẹmi tọn, yin fataka-kuẹ 100+ lọ mẹ; podọ e lẹzun ogú visunnu Josẹfu tọn lẹ tọn.+ 33  Humọ, Eleazali visunnu Aalọn tọn kú.+ Yé sọ dì i do Okọ́ta Finehasi visunnu etọn+ tọn he ko yin nina ẹn to lẹdo osó tọn Eflaimi tọn mẹ.

Nudọnamẹ Odò Tọn

Enẹ wẹ, Euflate.
Enẹ wẹ, Euflate.
To paa mẹ, “okún.”
To paa mẹ, “azán.”
Enẹ wẹ, whèzẹtẹn-waji.
Kavi vlavo, “Aigbanọ.”
Kavi vlavo, “obu; sijọsijọ.”
Kavi “bo nọ sẹ̀n ẹn to madoblọ po nugbo po mẹ.”
Enẹ wẹ, Euflate.
Enẹ wẹ, Euflate.
Kavi “atẹṣiṣi.”