Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Jọṣua 13:1-33

NUHE E BẸHẸN LẸ

  • Aigba he yè ma ko yí lẹ (1-7)

  • Aigba he to whèzẹtẹn Jọdani tọn mimá (8-14)

  •  Ogú Leubẹni tọn (15-23)

  • Ogú Gadi tọn (24-28)

  • Ogú Manasse tọn to whèzẹtẹn (29-32)

  • Jehovah wẹ ogú Levinu lẹ tọn (33)

13  Todin, Jọṣua ko poyọnho bọ owhe etọn ko sẹyì.+ Enẹwutu, Jehovah dọna ẹn dọmọ: “Hiẹ ko poyọnho bọ owhe towe ko sẹyì; ṣigba e gbẹ́ pò adà daho aigba lọ tọn de he dona yin yíyí.*  Aigba he gbẹ́ pò+ lọ lẹ die: agbegbe Filistinu lẹ tọn lẹpo gọna Gẹṣulinu+ lẹ tọn lẹpo  (sọn alà Nile tọn* he to whèzẹtẹn-waji Egipti tọn* lọ kọ̀n jẹ dogbó Eklọni tọn kọ̀n to agewaji, fihe nọ yin pinpọnhlan nado yin aigba Kenaninu lẹ tọn dai)+ gọna aigba he yin ogán atọ́n Filistinu lẹ tọn+—yèdọ Gazanu lẹ, Aṣidọdinu lẹ,+ Aṣikelọninu lẹ,+ Gatinu lẹ+ po Eklọninu lẹ+ po tọn; Avimi lẹ+ tọn  to hùwaji; aigba Kenaninu lẹ tọn lẹpo; Meala he yin Sidoninu lẹ tọn,+ kaka yì Afẹki, jẹ dogbó Amolinu lẹ tọn ji;  aigba Gebalinu lẹ+ tọn po Lẹbanọni pete po to whèzẹtẹn-waji, sọn Baali-gadi to Osó Hẹlmọni kọ̀n yì Lebo-hamati;*+  mẹhe nọ nọ̀ lẹdo osó tọn lọ mẹ lẹpo sọn Lẹbanọni+ jẹ Mislefọti-maimi;+ gọna Sidoninu lẹpo.+ Yẹn na yàn yé sọn Islaelivi lẹ nukọn.+ Hiẹ ni saa yí i na omẹ Islaeli tọn lẹ taidi ogú de, kẹdẹdile yẹn ko degbe etọn na we do.+  Todin, hiẹ dona má aigba ehe na hẹnnu ṣinẹnẹ lẹ po mado-awe hẹnnu Manasse tọn po taidi ogú de.”+  Mado-awe hẹnnu lọ tọn diẹ gọna Leubẹninu lẹ po Gadinu lẹ po ko yí ogú yetọn he Mose na yé to whèzẹtẹn-waji Jọdani tọn, kẹdẹdile Mose devizọnwatọ Jehovah tọn ko na yé do:+  sọn Aloeli+ he tin to Agbàdo* Alnọni tọn+ tó, gọna tòdaho he tin to ṣẹnṣẹn agbàdo lọ tọn po aigba flala* Medeba tọn pete po kaka yì Dibọni; 10  gọna tòdaho Ahọlu Sihọni Amolinu lẹ tọn lẹpo, mẹhe dugán to Hẹṣbọni, jẹ dogbó Amọninu lẹ tọn kọ̀n;+ 11  gọna Giliadi podọ aigba Gẹṣulinu lẹ po Maakatinu+ lẹ tọn po gọna Osó Hẹlmọni pete po Baṣani+ pete po kaka yì Saleka;+ 12  fidugando ahọlu Ogi tọn lẹpo to Baṣani, mẹhe dugán to Aṣtalọti podọ to Edlẹi. (Ewọ yin dopo to omẹ godo tọn he pò to Lefaimi lẹ mẹ.)+ Mose gbawhàn yetọn bo yàn yé sẹ̀.+ 13  Ṣigba, Islaelivi lẹ ma yàn+ Gẹṣulinu lẹ po Maakatinu lẹ po sẹ̀, na Gẹṣuli po Maakati po nọ nọ̀ ṣẹnṣẹn Islaeli tọn kakajẹ egbehe. 14  Hẹnnu Levinu lẹ tọn kẹdẹ wẹ e ma na ogú de.+ Avọ́nunina he nọ yin bibasi hlan Jehovah Jiwheyẹwhe Islaeli tọn gbọn miyọ́n dali lẹ wẹ ogú yetọn+ kẹdẹdile e ko dopagbe na yé do.+ 15  Enẹgodo, Mose na ogú de hẹnnu Leubẹninu lẹ tọn sọgbe hẹ whẹndo yetọn lẹ, 16  aigba yetọn bẹsọn Aloeli he tin to Agbàdo* Alnọni tọn tó, gọna tòdaho he tin to ṣẹnṣẹn agbàdo lọ tọn po aigba flala he to Medeba pá lọ pete po; 17  Hẹṣbọni po tòpẹvi etọn+ he tin to aigba flala lọ ji lẹpo po, Dibọni, Bamoti-baali, Bẹti-baali-meọni,+ 18  Jahazi,+ Kedemọti,+ Mẹfaati,+ 19  Kiliataimi, Sibma,+ Zeleti-ṣahali he to osó he sẹpọ agbàdo lọ ji, 20  Bẹti-peọli, dòdòmẹ Pisga tọn,+ Bẹti-jẹṣimọti,+ 21  tòdaho aigba flala lọ tọn lẹpo gọna fidugando Ahọlu Sihọni Amolinu lẹ tọn lẹpo, mẹhe dugán to Hẹṣbọni.+ Mose gbawhàn ewọ+ po ahọvi Midiani tọn lẹ po tọn, enẹ wẹ Ẹvi, Lekẹmi, Zuli, Huuli, po Leba po,+ yèdọ ogán he yin tẹnmẹpọntọ na* Sihọni bo nọ nọ̀ aigba lọ ji lẹ. 22  Balaami+ visunnu Beoli tọn, dọṣẹdọtọ lọ,+ yin dopo to mẹhe Islaelivi lẹ yí ohí do hù lẹ mẹ to pọmẹ hẹ mẹdevo he yé hù lẹ. 23  Jọdani wẹ yin dogbó Leubẹninu lẹ tọn; podọ aigba ehe to pọmẹ hẹ tòdaho lọ lẹ po gbétatò yetọn lẹ po wẹ ogú he yin nina Leubẹninu lẹ sọgbe hẹ whẹndo yetọn lẹ. 24  Humọ, Mose na ogú de hẹnnu Gad tọn, yèdọ Gadinu lẹ sọgbe hẹ whẹndo yetọn lẹ, 25  podọ aigba yetọn lẹ die: Jazẹli+ gọna tòdaho Giliadi tọn lẹpo, mado-awe aigba Amọninu lẹ+ tọn kaka yì Aloeli, he pannukọn Laba;+ 26  podọ sọn Hẹṣbọni+ yì Lamati-mizpẹ po Bẹtonimi po, podọ sọn Mahanaimi+ jẹ dogbó Debili tọn kọ̀n; 27  podọ to agbàdo lọ mẹ, Bẹti-halami, Bẹti-nimla,+ Sukoti,+ Zafoni, pipotọ fidugando Ahọlu Sihọni Hẹṣbọni tọn tọn,+ bọ Jọdani yin dogbó etọn sọn vivọnu Ohù Kinnelẹti tọn*+ tó to whèzẹtẹn-waji Jọdani tọn. 28  Ehe to pọmẹ hẹ tòdaho lọ lẹ po gbétatò yetọn lẹ po wẹ ogú Gadinu lẹ tọn sọgbe hẹ whẹndo yetọn lẹ. 29  Humọ, Mose na ogú de mado-awe hẹnnu Manasse tọn, yèdọ na mado-awe hẹnnu Manasse tọn sọgbe hẹ whẹndo yetọn lẹ.+ 30  Aigba yetọn bẹsọn Mahanaimi+ bo bẹ Baṣani pete hẹn, fidugando Ahọlu Ogi Baṣani tọn lẹpo, gọna gbétatò Jaili+ tọn lẹ he gọ́ na gòhọ bo to Baṣani, tòpẹvi 60. 31  Podọ mado-awe Giliadi tọn, gọna tòdaho fidugando ahọlu Ogi tọn to Baṣani, yèdọ Aṣtalọti po Edlẹi+ po, yin nina visunnu Makili tọn lẹ,+ yèdọ mado-awe visunnu Makili tọn lẹ tọn, mẹhe yin visunnu Manasse tọn, sọgbe hẹ whẹndo yetọn lẹ. 32  Ogú he Mose na yé lọ lẹ niyẹn, to danfafa Moabi tọn ji to Jọdani godo, to whèzẹtẹn-waji Jẹliko tọn.+ 33  Ṣigba, Mose ma na ogú de hẹnnu Levinu lẹ tọn.+ Jehovah Jiwheyẹwhe Islaeli tọn wẹ yin ogú yetọn kẹdẹdile e ko dopagbe na yé do.+

Nudọnamẹ Odò Tọn

Kavi “he yè dona gbawhàn etọn.”
Kavi “sọn Ṣiholi.”
To paa mẹ, “he pannukọn Egipti.”
Kavi “họntonu Hamati tọn.”
Kavi “Agbàdo Tọ̀sisa tọn.” Pọ́n Zẹm.
Kavi “aigba he jlọ.”
Kavi “Agbàdo Tọ̀sisa tọn.” Pọ́n Zẹm.
Enẹ wẹ, ahọlu he to oglọ na.
Enẹ wẹ, tándo Genezalẹti tọn, kavi Ohù Galili tọn.