Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn | OWE WIWE LẸ—LẸDOGBEDEVOMẸ AIHỌN YỌYỌ TỌN

Jọṣua 11:1-23

NUHE E BẸHẸN LẸ

  • Tòdaho he to agewaji lẹ yin yíyí (1-15)

  • Awhàngbigba Jọṣua tọn lẹ (16-23)

11  Tlolo he Jabini ahọlu Hazọli tọn sè ehe, e dowẹn hlan Jobabi ahọlu Madọni tọn,+ podọ hlan ahọlu Ṣimloni tọn, ahọlu Akṣafi tọn,+  ahọlu he tin to lẹdo osó tọn he to agewaji lọ lẹ, dehe tin to danfafa* he to hùwaji Kinnelẹti tọn lẹ, dehe to Ṣefela podọ to dòdòmẹ Dọli+ tọn to whèyihọ-waji lẹ,  Kenaninu lẹ+ to whèzẹtẹn-waji po whèyihọ-waji po, Amolinu lẹ,+ Hetinu lẹ, Pelizinu lẹ, Jẹbusinu lẹ to lẹdo osó tọn lọ mẹ gọna Hivinu lẹ+ to Osó Hẹlmọni+ kọ̀n to aigba Mizpa tọn ji.  Enẹwutu, yewlẹ po awhànpa yetọn lẹpo po tọ́njẹgbonu, bo sù taun di tọkẹ́n huto tọn lẹ, gọna osọ́ po osọ́-kẹkẹ awhàn tọn susugege lẹ po.  Ahọlu ehe lẹpo dogbepọ nado bẹ yede pli, yé sọ wá dosla do osin Mẹlọmi tọn lẹ tó nado funawhàn hẹ Islaeli.  To whenẹnu, Jehovah dọna Jọṣua dọmọ: “A dibuna yé blo,+ na to ojlẹ ehe nkọ mẹ to osọ he ja, yẹn na jo yemẹpo do alọ Islaeli tọn mẹ bọ mì na hù yé. Mì na sán dọ̀nklanmẹ na osọ́ yetọn lẹ+ bo na mẹ̀ osọ́-kẹkẹ yetọn lẹ to miyọ́n mẹ.”  Jọṣua po sunnu awhànfuntọ lọ lẹpo po sọ tọ́nawhàn yé to ajiji mẹ to osin Mẹlọmi tọn lẹ tó.  Jehovah jo yé do alọ Islaeli tọn mẹ,+ bọ yé gbawhàn yetọn bo dómọna yé kakajẹ Sidoni Daho lọ+ po Mislefọti-maimi+ po gọna Agbàdo Mizpẹ tọn to whèzẹtẹn-waji, yé sọ hù yé kaka bọ mẹdepope ma pò.+  Enẹgodo, Jọṣua wà na yé kẹdẹdile Jehovah ko dọna ẹn do; e sán dọ̀nklanmẹ na osọ́ yetọn lẹ bo mẹ̀ osọ́-kẹkẹ yetọn lẹ to miyọ́n mẹ.+ 10  Humọ, Jọṣua lẹkọ to enẹgodo bo yí Hazọli bosọ yí ohí do hù ahọlu etọn,+ na Hazọli wẹ yin tatọ́ ahọluduta ehe lẹpo tọn dai. 11  Yé yí ohí do hù mẹhe* nọ nọ̀ finẹ lẹpo, bo và yemẹpo sudo mlẹnmlẹn.+ Nuhe tindo gbọfufu depope ma yin pipò dogbẹ̀.+ Enẹgodo, e yí miyọ́n do mẹ̀ Hazọli. 12  Jọṣua yí tòdaho ahọlu ehelẹ tọn lẹpo bo yí ohí do gbawhàn ahọlu lọ lẹpo tọn.+ Yemẹpo wẹ e vasudo mlẹnmlẹn+ kẹdẹdile Mose devizọnwatọ Jehovah tọn ko degbe etọn do. 13  Ṣigba, Islaeli ma mẹ̀ tòdaho he tin to okiti ji lẹ depope, adavo Hazọli; tòdaho enẹ kẹdẹ wẹ Jọṣua mẹ̀. 14  Islaelivi lẹ bẹ ogblànnu tòdaho ehelẹ tọn lẹpo gọna kanlin-yìnyìn lẹ.+ Ṣigba, gbẹtọ he nọ nọ̀ finẹ lẹpo wẹ yé yí ohí do hù kakajẹ whenue yé hù dopodopo yetọn sudo.+ Yé ma pò mẹdepope dogbẹ̀.+ 15  Dile Jehovah ko degbena Mose devizọnwatọ etọn do, mọ wẹ Mose degbena Jọṣua do,+ podọ mọ wẹ Jọṣua wà do. E ma nọma wà dopo tata to nuhe Jehovah ko degbe etọn na Mose lẹpo mẹ.+ 16  Jọṣua gbawhàn aigba ehe lẹpo tọn, enẹ wẹ lẹdo osó tọn lọ, Negẹb+ pete, aigba Goṣẹni tọn lẹpo, Ṣefela,+ Alaba+ gọna lẹdo osó tọn Islaeli tọn po Ṣefela etọn* po, 17  yèdọ sọn Osó Halaki he pannukọn Seili kọ̀n kakajẹ Baali-gadi+ to Agbàdo Lẹbanọni tọn mẹ to Osó Hẹlmọni kọ̀n,+ ewọ sọ gbawhàn ahọlu yetọn lẹpo tọn bo wle yé bosọ hù yé. 18  Jọṣua funawhàn hẹ ahọlu ehe lẹpo na ojlẹ de. 19  Tòdaho depope ma tin he basi jijọho hẹ Islaelivi lẹ, adavo Hivinu lẹ he nọ nọ̀ Gibeọni.+ Dehe pò lẹpo wẹ yé funawhàn do yí.+ 20  Jehovah wẹ dike bọ ahun yetọn do sinyẹn+ bọ yé do tọ́nawhàn Islaeli, na e nido và yemẹpo sudo mlẹnmlẹn, matin nukundagbe depope didohia yé.+ Yé dona yin huhusudo kẹdẹdile Jehovah ko degbena Mose do.+ 21  To ojlẹ enẹ mẹ, Jọṣua sukúndona Anakimi+ lẹ sọn lẹdo osó tọn lọ mẹ, yèdọ sọn Heblọni, Debili, po Anabi po, podọ sọn lẹdo osó tọn Juda tọn lẹpo po Islaeli tọn lẹpo po mẹ. Jọṣua và yemẹpo po tòdaho yetọn lẹ po sudo mlẹnmlẹn.+ 22  Anakimi depope ma pò to aigba Islaelivi lẹ tọn ji; Gaza,+ Gati+ po Aṣidọdi+ po kẹdẹ wẹ yé pò+ te. 23  Gbọnmọ dali, Jọṣua yí aigba lọ lẹpo, kẹdẹdile Jehovah ko dopagbe etọn na Mose do,+ bọ to enẹgodo Jọṣua yí i na omẹ Islaeli tọn lẹ taidi ogú de, he na yin mimá sọgbe hẹ hẹnnu yetọn lẹ.+ Aigba lọ sọ vò sọn awhànfunfun mẹ.+

Nudọnamẹ Odò Tọn

Kavi “Alaba.”
Kavi “alindọn he.”
Kavi “okọ́ta pẹvipẹvi etọn lẹ.”