Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Jọṣua 10:1-43

NUHE E BẸHẸN LẸ

  • Islaeli yiavùnlọna Gibeọni (1-7)

  • Jehovah hoavùn na Islaeli (8-15)

    • Kẹ́nsu ja do kẹntọ he to hinhọ̀n lẹ ji (11)

    • Owhè nọte guun (12-14)

  • Ahọlu mẹgbeyantọ 5 lẹ yin hùhù (16-28)

  • Tòdaho he to hùwaji lẹ yin yíyí (29-43)

10  Tlolo he Ahọlu Adoni-zedẹki Jelusalẹm tọn sè dọ Jọṣua ko yí Ai bo và ẹ sudo mlẹnmlẹn, bo ko sọ wà na Ai po ahọlu etọn po+ kẹdẹdile e wà na Jẹliko po ahọlu etọn po+ do, podọ lehe mẹhe nọ nọ̀ Gibeọni lẹ ko basi jijọho hẹ Islaeli+ bo nọ nọ̀ ṣẹnṣẹn yetọn do,  e dibu tlala,+ na Gibeọni yin tòdaho de taidi dopo to tòdaho he tindo ahọlu lẹ mẹ wutu. E sọ klohu Ai+ bọ sunnu etọn lẹpo sọ yin awhànfuntọ lẹ.  Enẹwutu, Adoni-zedẹki ahọlu Jelusalẹm tọn dowẹn hlan Hohami ahọlu Heblọni tọn,+ Pilami ahọlu Jalmuti tọn, Jafia ahọlu Lakiṣi tọn po Debili ahọlu Eglọni tọn po+ dọmọ:  “Mì wá gọalọna mi, bo gbọ mí ni tọ́nawhàn Gibeọni, na e ko basi jijọho hẹ Jọṣua po Islaelivi lẹ po wutu.”+  To whenẹnu, ahọlu atọ́n Amolinu+ lẹ tọn lẹ pli dopọ—enẹ wẹ ahọlu Jelusalẹm tọn, ahọlu Heblọni tọn, ahọlu Jalmuti tọn, ahọlu Lakiṣi tọn po ahọlu Eglọni tọn po—to pọmẹ hẹ awhànpa yetọn lẹpo, yé sọ yì bo dosla nado funawhàn hẹ Gibeọni.  Enẹwutu, omẹ Gibeọni tọn lẹ dowẹn hlan Jọṣua to osla lọ mẹ to Gilgali+ dọmọ: “A jo afanumẹ+ towe lẹ do blo. Yawu wá mí dè! Wá whlẹn mí bo gọalọna mí! Ahọlu Amolinu lẹ tọn he nọ nọ̀ lẹdo osó tọn mẹ lẹpo ko bẹ yede pli sọta mí.”  Jọṣua sọ hẹji yì sọn Gilgali gọna sunnu awhànfuntọ lẹ po awhànfuntọ huhlọnnọ lẹpo po.+  To whenẹnu, Jehovah dọna Jọṣua dọmọ: “A dibuna yé blo,+ na yẹn ko jo yé do alọ towe mẹ.+ Depope to yé mẹ ma na penugo nado nọte to nukọn towe.”+  Jọṣua yí ozán lọ blebu do zinzọnlin sọn Gilgali bo wá yé ji to ajiji mẹ. 10  Jehovah sọ hẹn bẹwlu biọ yé mẹ to Islaeli nukọn,+ bọ yé hù yé badabada to Gibeọni bosọ dómọna yé gbọn aliho he hẹji yì Bẹti-holọni lọ ji bo to yé hù kakajẹ Azeka po Makeda po. 11  Dile yé to hinhọ̀n sọn Islaeli nukọn bo to tejẹ sọn Bẹti-holọni, Jehovah ja kẹ́nsu daho lẹ do yé ji sọn agahomẹ kakajẹ Azeka bọ yé kú. Mẹhe kẹ́nsu lọ hù lẹ sù hugan mẹhe Islaelivi lẹ yí ohí do hù. 12  To whenue Jehovah gbawhàn Amolinu lẹ tọn to nukun Islaelivi lẹ tọn mẹ, azán enẹ lọ gbè wẹ Jọṣua dọna Jehovah to Islaeli nukọn dọmọ: “Owhè, nọte guun+ do Gibeọni ji,+ Podọ osun, do Agbàdo Aijalọni tọn ji!” 13  Enẹwutu, owhè nọte guun bọ osun ma sẹtẹn kakajẹ whenue akọta lọ penugo nado yiahọsu to kẹntọ etọn lẹ go. Be e ma yin kinkandai do owe Jaṣali tọn mẹ ya?+ Owhè nọte guun to agahomẹ bo ma yawu yihọ na nudi azán dopo blebu. 14  Azán de ma ko tin di azán enẹ nkọ, vlavo jẹnukọnna ẹn kavi to godo etọn, bọ Jehovah dotoaina ogbè gbẹtọ de tọn+ to aliho mọnkọtọn mẹ, na Jehovah wẹ to avùnho na Islaeli.+ 15  Enẹgodo, Jọṣua po omẹ Islaeli tọn lẹpo po lẹkọyi osla lọ mẹ to Gilgali.+ 16  To ojlẹ enẹ mẹ, ahọlu atọ́n lọ lẹ họ̀n bo whlá yede do oslò de mẹ to Makeda.+ 17  To whenẹnu, linlin yin nina Jọṣua dọmọ: “Ahọlu atọ́n lọ lẹ yin mimọ bọ yé whlá yede do oslò de mẹ to Makeda.”+ 18  Enẹwutu, Jọṣua dọmọ: “Mì bli zannu daho lẹ do oslò lọ nù bo de sunnu delẹ nado to ṣiṣọ́ yé. 19  Ṣigba, mì mẹhe pò lẹ ni ma nọte blo. Mì dómọna kẹntọ mìtọn lẹ bo jẹ yé ji sọn godo.+ Mì dike yé biọ tòdaho yetọn lẹ mẹ blo, na Jehovah Jiwheyẹwhe mìtọn ko jo yé do alọ mìtọn mẹ.” 20  To whenue Jọṣua po Islaelivi lẹ po ko hù yé badabada jẹ obá lọ mẹ nado sukúndona yé, adavo mẹdelẹ he họ̀ngán to yé mẹ bo biọ tòdaho gángán lẹ mẹ, 21  gbẹtọ lọ lẹpo lẹkọwa Jọṣua dè awuyẹyẹ-afọyẹyẹ to osla lọ mẹ to Makeda. Mẹdepope ma gboadọ nado dọho* jẹagọdo Islaelivi lẹ. 22  To whenẹnu, Jọṣua dọmọ: “Mì hùn oslò lọ bo hẹn ahọlu atọ́n lọ lẹ jẹgbonu sọn oslò lọ mẹ wá dè e.” 23  Enẹwutu, yé hẹn ahọlu atọ́n lọ lẹ jẹgbonu sọn oslò lọ mẹ wá e dè: yèdọ ahọlu Jelusalẹm tọn, ahọlu Heblọni tọn, ahọlu Jalmuti tọn, ahọlu Lakiṣi tọn po ahọlu Eglọni tọn po.+ 24  To whenue yé ko hẹn ahọlu ehelẹ jẹgbonu wá Jọṣua dè, e ylọ sunnu Islaeli tọn lẹpo bo dọna awhàngán daho he to sunnu awhànfuntọ he hodo e yì lẹ mẹ lẹ dọmọ: “Mì sẹwá. Mì ze afọ mìtọn lẹ do kọ̀godo na ahọlu ehelẹ.” Enẹwutu, yé sẹwá bo ze afọ yetọn lẹ do kọ̀godo na yé.+ 25  Jọṣua sọ dọna yé dọmọ: “Mì dibu kavi dike ahun mìtọn gbàdo blo.+ Mì yin adọgbotọ bo yin huhlọnnọ, na mọ wẹ Jehovah na wà na kẹntọ mìtọn he mì to awhànfun hẹ lẹpo do.”+ 26  Enẹgodo, Jọṣua hù yé bo ze yé plá do pòtin* atọ́n go, bọ yé gbọṣi pòtin lọ lẹ go kakajẹ whèjai. 27  To whenue owhè yihọ, Jọṣua degbe dọ yé ni yin zize jẹte sọn pòtin lọ lẹ go+ bo yin zize dlan oslò he mẹ yé whlá yede do dai lọ. Enẹgodo, zannu daho lẹ yin bibli do oslò lọ nù, bo gbọṣi finẹ kakajẹ egbehe. 28  Jọṣua yí Makeda+ to azán enẹ gbè bo yí ohí do hù mẹhe nọ nọ̀ e mẹ lẹ. Ewọ sọ và ahọlu etọn po mẹhe* nọ nọ̀ tòdaho lọ mẹ lẹpo po sudo mlẹnmlẹn bo ma pò mẹde dogbẹ̀.+ E wà na ahọlu Makeda tọn+ kẹdẹdile e ko wà na ahọlu Jẹliko tọn do. 29  Enẹgodo, Jọṣua po omẹ Islaeli tọn lẹpo po tọ́n sọn Makeda yì Libna bo funawhàn hẹ Libna.+ 30  Jehovah sọ jo tòdaho lọ po ahọlu etọn po+ do alọ omẹ Islaeli tọn lẹ tọn mẹ, bọ yé yí ohí do hù mẹhe* nọ nọ̀ e mẹ lẹpo bo ma pò mẹde dogbẹ̀ to finẹ. Mọ wẹ yé wà na ahọlu etọn kẹdẹdile yé ko wà na ahọlu Jẹliko tọn+ do. 31  Bọdo enẹ go, Jọṣua po omẹ Islaeli tọn lẹpo po tọ́n sọn Libna yì Lakiṣi+ bo dosla do finẹ bosọ funawhàn hẹ ẹ. 32  Jehovah jo Lakiṣi do alọ omẹ Islaeli tọn lẹ tọn mẹ, bọ yé yí i to azán awetọ gbè. Yé yí ohí do hù mẹhe* nọ nọ̀ e mẹ lẹpo,+ kẹdẹdile yé ko wà na Libna do. 33  To whenẹnu, Holami ahọlu Gezẹli+ tọn hẹji yì nado gọalọna Lakiṣi, ṣigba Jọṣua hù ewọ po omẹ etọn lẹpo po bo ma pò mẹde dogbẹ̀. 34  Enẹgodo, Jọṣua po omẹ Islaeli tọn lẹpo po tọ́n sọn Lakiṣi yì Eglọni+ bo dosla do finẹ bosọ funawhàn hẹ ẹ. 35  Yé sọ yí i to azán enẹ gbè bo yí ohí do hù mẹhe nọ nọ̀ e mẹ lẹ. Yé và mẹhe* nọ nọ̀ e mẹ lẹpo sudo mlẹnmlẹn to gbenẹgbe, kẹdẹdile yé ko wà na Lakiṣi do.+ 36  Enẹgodo, Jọṣua po omẹ Islaeli tọn lẹpo po hẹji sọn Eglọni yì Heblọni+ bo funawhàn hẹ ẹ. 37  Yé sọ yí i po tòpẹvi etọn lẹpo po bo yí ohí do hù ahọlu etọn po mẹhe* nọ nọ̀ e mẹ lẹpo po bo ma pò mẹde dogbẹ̀. E và tòdaho lọ po mẹhe* nọ nọ̀ e mẹ lẹpo po sudo mlẹnmlẹn, kẹdẹdile e ko wà na Eglọni do. 38  To godo mẹ, Jọṣua po omẹ Islaeli tọn lẹpo po lilẹ́ sọta Debili+ bo funawhàn hẹ ẹ. 39  E sọ yí i po tòpẹvi etọn lẹpo po bo yí ohí do hù ahọlu etọn bo và mẹhe* nọ nọ̀ e mẹ lẹpo sudo mlẹnmlẹn+ bo masọ pò mẹde dogbẹ̀.+ E wà na Debili po ahọlu etọn po kẹdẹdile e ko wà na Heblọni gọna Libna po ahọlu etọn po do. 40  Jọṣua gbawhàn aigba lọ lẹpo tọn, yèdọ lẹdo osó tọn lọ, Negẹb, Ṣefela+ po dòdòmẹ lẹ po, bo hù ahọlu yetọn lẹpo bo masọ pò mẹde dogbẹ̀; nuhe nọ gbọ to finẹ lẹpo wẹ e vasudo mlẹnmlẹn,+ kẹdẹdile Jehovah Jiwheyẹwhe Islaeli tọn ko degbe etọn do.+ 41  Jọṣua gbawhàn yetọn sọn Kadẹṣi-balnea+ jẹ Gaza,+ gọna aigba Goṣẹni+ tọn lẹpo podọ jẹ Gibeọni.+ 42  Jọṣua hù ahọlu ehe lẹpo bo yí aigba yetọn lẹ, yèdọ popolẹpo to ojlẹ dopolọ mẹ, na Jehovah Jiwheyẹwhe Islaeli tọn wẹ to avùnho na Islaeli wutu.+ 43  Enẹgodo, Jọṣua po omẹ Islaeli tọn lẹpo po lẹkọyi osla lọ mẹ to Gilgali.+

Nudọnamẹ Odò Tọn

To paa mẹ, “nado gàn odẹ́ etọn.”
Kavi “atin.”
Kavi “alindọn he.”
Kavi “alindọn he.”
Kavi “alindọn he.”
Kavi “alindọn he.”
Kavi “alindọn he.”
Kavi “alindọn he.”
Kavi “alindọn he.”