Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Howhinwhẹn lẹ 5:1-23

NUHE E BẸHẸN LẸ

  • Avase gando yọnnu fẹnnuwatọ lẹ go (1-14)

  • Nọ jaya hẹ asi towe (15-23)

5  Visunnu ṣie, na ayidonugo nuyọnẹn ṣie. Yí sọwhiwhe do dotoaina* nuplọnmẹ ṣie gando wuntuntun go,+   Na hiẹ nido nọ basi hihọ́na nugopipe nulẹnpọn tọn towe Bo nọ yí nùflo towe lẹ do dọho sọgbe hẹ oyọnẹn.+   Na nùflo yọnnu gblewanọ* tọn nọ kùn di owínjá,+ Ohó he nọ tọ́n sọn onù etọn mẹ sọ nọ dídí hú amì.+   Ṣigba to godo mẹ, e nọ vẹ́ di vivẹ́+ Bo nọ dá di ohí nùawenọ.+   Okú mẹ wẹ afọ etọn lẹ nọ jẹte yì. Yọdò* mẹ wẹ afọdide etọn lẹ nọ planmẹ yì tlọlọ.   Ewọ ma nọ lẹnnupọndo ali ogbẹ̀ tọn ji paali. E nọ wleali bo nọ to dindanpe, ṣigba ewọ lọsu ma nọ yọ́n fie e jei.   Todin, visunnu ṣie lẹ emi, mì dotoaina mi Bo ma lẹhlan apadopo sọn nuhe dọ n’te lẹ kọ̀n blo.   Nọ nọla na yọnnu mọnkọtọn; A sẹpọ họntonu ohọ̀ etọn tọn blo,+   Na hiẹ nikaa jo yẹyi towe na mẹdevo lẹ+ Kavi gbẹ̀n kọdetọn vẹadi lẹ na owhe susu;+ 10  Na jonọ lẹ nikaa vọ̀ nutindo* towe lẹ+ Bọ nuhe a jẹtukla do bẹpli lẹ na wá yin bibẹ yì ohọ̀ jonọ de tọn mẹ. 11  E ma yinmọ, a na wá wẹnhun to vivọnu gbẹzan towe tọn To whenue huhlọn towe po agbasa towe po na ko to godo yì,+ 12  Hiẹ nasọ dọmọ: “Lehe n’gbẹwanna mẹplọnlọ do sọ! Lehe ahun ṣie vlẹ wọhẹ kò do sọ! 13  N’ma dotoaina ogbè nuplọnmẹtọ ṣie lẹ tọn Kavi na ayidonugo mẹplọntọ ṣie lẹ. 14  N’ko dibla sudo pete To nukun agun lọ blebu tọn mẹ.”*+ 15  Nọ nùsin sọn osindò towe titi mẹ, Yèdọ osin he to sisà* sọn dotọ̀ towe titi mẹ.+ 16  Be hiẹ na vúnvún asisa towe lẹ pé to gbonu wẹ, Yèdọ asisa osin tọn towe lẹ to tòplitẹn lẹ wẹ ya?+ 17  Gbọ yé ni yin hiẹ doponọ tọn, Kakati nido yin hiẹ po jonọ lẹ po tọn.+ 18  Na asisa* towe titi ni yin didona, Hiẹ nisọ nọ jaya hẹ asi jọja whenu towe tọn,+ 19  Yèdọ agbanlin-si dagbedagbe de, gbọgbọẹ osó ji tọn whanpẹnọ de.+ Gbọ anọ́ etọn lẹ ni nọ hẹn pekọ wá na* we to whepoponu. Dike owanyi etọn ni nọ dọ̀n we to whelẹponu.+ 20  Enẹwutu, visunnu ṣie, naegbọn hiẹ nado dike yọnnu gblewanọ* de ni dọ̀n we Kavi naegbọn hiẹ nado gbò akọ́nnu yọnnu fẹnnuwatọ* de tọn fán?+ 21  Na aliho gbẹtọ tọn lẹ tin to Jehovah nukọn; Ewọ sọ nọ gbeje ali gbẹtọ tọn lẹpo pọ́n.+ 22  Nuṣiwa mẹylankan tọn titi lẹ wẹ nọ domọwle e, Podọ okàn ylando etọn titi tọn lẹ mẹ wẹ e na yin wiwle do.+ 23  Ewọ na kú, na e ma kẹalọyi mẹplọnlọ wutu Bo nasọ buali, na nulú etọn zẹjlẹgo wutu.

Nudọnamẹ Odò Tọn

To paa mẹ, “Lẹ́ otó towe hlan.”
To paa mẹ, “jonọ.” Pọ́n Hwh 2:16.
Kavi “Ṣeol,” enẹ wẹ, yọdò paa gbẹtọvi lẹ tọn. Pọ́n Zẹm.
Kavi “huhlọn.”
To paa mẹ, “To pipli lọ po agun lọ po ṣẹnṣẹn.”
Kavi “he fá.”
Kavi “asisa osin tọn.”
Kavi “ni nọ mú.”
To paa mẹ, “jonọ.” Pọ́n Hwh 2:16.
To paa mẹ, “jonọ.” Pọ́n Hwh 2:16.