Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Howhinwhẹn lẹ 4:1-27

NUHE E BẸHẸN LẸ

  • Anademẹ otọ́ nuyọnẹntọ de tọn (1-27)

    • Nuyọnẹn wẹ yin nujọnu hugan (7)

    • Gbẹ́ ali mẹylankan tọn lẹ dai (14, 15)

    • Ali dodonọ tọn nọ to wunhọ́n (18)

    • “Nọ họ́ ahun towe” (23)

4  Visunnu ṣie lẹ emi, mì dotoaina mẹplọnlọ he wá sọn otọ́ de dè;+ Mì nọ payi e go, na mì nido tindo nukunnumọjẹnumẹ,   Na yẹn na na mì anademẹ dagbe; Mì gbẹ́ nuplọnmẹ* ṣie dai blo.+   Ovi dagbe wẹ n’yin na otọ́ ṣie,+ Onọ̀ ṣie sọ yiwanna mi taun.+   Otọ́ ṣie ko plọn mi bo dọmọ: “Nọ yí ohó ṣie lẹ hẹn do ahun towe mẹ gligli.+ Nọ yìn gbedide ṣie lẹ, hiẹ nasọ nọgbẹ̀ dẹn.+   Tindo nuyọnẹn, tindo nukunnumọjẹnumẹ.+ A wọn blo, mọ a sọ lẹhlan apadopo sọn nuhe dọ n’te lẹ kọ̀n blo.   A gbẹ́ ẹ dai blo, e nasọ basi hihọ́na we. Yiwanna ẹn, e nasọ họ́ we.   Nuyọnẹn wẹ yin nujọnu hugan,*+ enẹwutu tindo nuyọnẹn, Podọ gbọnvona nuhe hiẹ tindo lẹpo, sọ tindo nukunnumọjẹnumẹ.+   Nọ yí nukun nujọnu tọn do pọ́n ẹn, e nasọ ze we daga.+ E na doyẹyigona we, na hiẹ tẹdego pẹkipẹki wutu.+   E na ze gbakun whanpẹnọ de ṣinyọ́n ota na we; E nasọ yí jẹgbakun dagbedagbe de do doaṣọ́na we.” 10  Visunnu ṣie, dotoai bo kẹalọyi nuhe dọ n’te lẹ, Hiẹ nasọ tindo gbẹ̀gaa.+ 11  Yẹn na nọ plọn we nado gbọn aliho nuyọnẹn tọn ji;+ Yẹn na nọ plan we gbọn ali dodowiwa tọn lẹ ji.+ 12  To whenue hiẹ to zọnlinzin, nude ma na nọ glọnalina afọdide towe lẹ; Podọ eyin hiẹ tlẹ dowezun, hiẹ ma na dahli. 13  Nọ tẹdo mẹplọnlọ go; a dike e yì do we blo.+ Nọ yí i whlá, na e na hẹn we dogbẹ̀.+ 14  A yì gbọn ali mẹylankan tọn ji blo, A sọ zinzọnlin gbọn aliho ylanwatọ lẹ tọn ji blo.+ 15  Dapana ẹn, a gbọn e ji blo;+ Zẹ̀ na ẹn, bo gbọn olá na ẹn.+ 16  Na yé ma sọgan nọ damlọn adavo yé wà nuylankan. Amlọn nọ gbẹ́ yé kakajẹ whenue yé hẹn mẹde jai. 17  Akla kanyinylan tọn wẹ yé nọ dù, Podọ ovẹn danuwiwa tọn wẹ yé nọ nù. 18  Ṣigba, ali dodonọ tọn taidi hinhọ́n afọnnu tọn he nọ họnwun Bosọ nọ to wunhọ́n dogọ kakajẹ owhè ṣádada mẹ.+ 19  Aliho mẹylankan lẹ tọn taidi zinvlu; Yé ma tlẹ yọ́n nuhe nọ hẹn yé dahli. 20  Visunnu ṣie, na ayidonugo ohó ṣie lẹ; Yí sọwhiwhe do dotoaina* nuhe dọ n’te lẹ. 21  A dekọ sọn yé go blo; Whlá yé do ahun towe mẹ dọ́n,+ 22  Na yé nọ hẹn mẹhe dín yé mọ lẹ dogbẹ̀+ Bosọ nọ na yé* agbasalilo. 23  Hú nuhe a nọ basi hihọ́na lẹpo, nọ họ́ ahun towe,+ Na e mẹ wẹ asisa ogbẹ̀ tọn lẹ nọ wá sọn. 24  De ohó oklọ tọn lẹ sọn dè we,+ Podọ họ̀nna hodidọ mẹkiklọ tọn lẹ. 25  Nukun towe ni nọ to nukọn pọnhlan, Mọwẹ, nọ to nukọn towe pọnhlan tlintlin.+ 26  Nọ jlọ* aliho he ji afọ towe lẹ nọ gbọn,+ Aliho towe lẹpo nasọ tindo jide. 27  A lẹhlan adusi kavi amiyọn blo.+ De afọ towe lẹ sọn oylan mẹ.

Nudọnamẹ Odò Tọn

Kavi “osẹ́n.”
Kavi “onú tintan.”
To paa mẹ, “Lẹ́ otó towe hlan.”
To paa mẹ, “agbasalan yetọn pete.”
Kavi vlavo, “Nọ yí sọwhiwhe do lẹnnupọndo.”