Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Howhinwhẹn lẹ 30:1-33

NUHE E BẸHẸN LẸ

  • OAGULI TỌN LẸ (1-33)

    • A hẹn mi jẹhẹ́n kavi jẹ adọkun blo (8)

    • Nuhe ma nọ tindo pekọ gbede lẹ (15, 16)

    • Nuhe ma nọ na ohia depope lẹ (18, 19)

    • Yọnnu ayọdetọ (20)

    • Kanlin he yọnnuin to jọwamọ-liho lẹ (24)

30  Owẹ̀n vivẹ́ he tin to ohó Aguli visunnu Jake tọn mẹ, ehe e dọna Itiẹli, yèdọ Itiẹli po Ukali po.   N’yin wunvinọ hú mẹdevo depope,+ Podọ n’gbọagba nukunnumọjẹnumẹ he gbẹtọ dona tindo tọn.   N’ma plọn nuyọnẹn, Podọ n’ma tindo oyọnẹn Omẹ Wiwe Hugan lọ tọn.   Mẹnu wẹ ko hẹji yì olọn bosọ jẹte wá?+ Mẹnu wẹ ko bẹ jẹhọn pli do alọgogo etọn awe lẹ mẹ? Mẹnu wẹ ko glọn osin lẹ do awù etọn mẹ?+ Mẹnu wẹ ko do dodonu opodo aigba tọn lẹpo ai?*+ Etẹwẹ yin yinkọ mẹlọ tọn podọ visunnu etọn tọn—eyin hiẹ yọnẹn?   Wiwe wẹ ohó Jiwheyẹwhe tọn lẹpo.+ Ewọ wẹ awọ̀yinu de na mẹhe nọ dín fibẹtado to ewọ mẹ lẹ.+   A yí nudepope dogọ ohó etọn lẹ blo,+ Ewọ nikaa wọhẹ we, Bọ hiẹ na yin didohia di lalonọ.   Onú awe wẹ n’to bibiọ we. A tẹ̀ yé mi kaka yẹn nado kú blo.   Hẹn nugbomadọ po lalo lẹ po dẹn do mi.+ A hẹn mi jẹhẹ́n kavi jẹ adọkun blo. Gbọ ma nọ mọ núdùdù he pé mi dù poun,+   Yẹn nikaa gọ́ho bo mọ́n we bosọ dọ dọ, “Mẹnu wẹ nọ yin Jehovah?”+ Kavi a dike yẹn lẹzun wamọnọ bo fìnnú bosọ kọnmasin do* oyín Jiwheyẹwhe ṣie tọn go blo. 10  A hẹn devizọnwatọ de gble to ogán etọn dè blo, Ewọ nikaa hodẹ̀do we bọ hiẹ na yin whẹgbledo.+ 11  Whẹndo de tin he nọ hodẹ̀do otọ́ etọn Bo masọ nọ dona onọ̀ etọn.+ 12  Whẹndo de tin he wé-ṣeke to nukun edetiti tọn mẹ,+ Ṣigba, e ma ko yin kiklọ́we sọn dihó* etọn mẹ. 13  Whẹndo de tin he nukun etọn gọ́ na sakla Bọ nukun etọn sọ gọ́ na goyiyi!+ 14  Whẹndo de tin he adú etọn lẹ taidi ohí Bọ aglàn etọn lẹ taidi ohí; Yé nọ tlẹ́n agbátọnọ aigba ji tọn lẹ dù Gọna wamọnọ lẹ sọn gbẹtọvi lẹ mẹ.+ 15  Aslọ́nẹn lẹ tindo viyọnnu awe he nọ to awhádo dọ, “Na mi! Na mi!” Onú atọ̀n delẹ tin he ma nọ tindo pekọ, Onú ẹnẹ he ma nọ dọ gbede dọ, “E pé!” 16  —Yọdò*+ po vidọ̀ wẹnsinọ de tọn po, Aigba-klo he ma tindo osin, Gọna miyọ́n he ma nọ dọ gbede dọ: “E pé!” 17  Nukun he nọ ṣàn otọ́ kò bo nọ vlẹ tonusisena onọ̀ kò+ —Ohọ́n agbàdo* mẹ tọn lẹ wẹ na sún in tọ́n, Bọ ovi akùn tọn lẹ na dù i.+ 18  Onú atọ̀n delẹ tin he zẹ̀ nukunnumọjẹnumẹ ṣie go,* Podọ onú ẹnẹ he mẹ n’ma mọnukunnujẹ: 19  Aliho akùn tọn to olọn mẹ, Aliho odàn tọn to osé de ji, Aliho tọjihun tọn to ohù ji, Podọ aliho sunnu de tọn hẹ awhli de. 20  Aliho yọnnu ayọdetọ de tọn die: E nọ dùnú bo nọ súnsún nùtó; Enẹgodo, e nọ dọ dọ, “N’ma wà nuylankan depope.”+ 21  Onú atọ̀n delẹ tin he nọ hẹn aigba sisọ Podọ onú ẹnẹ he e ma sọgan doakọnna: 22  Eyin afanumẹ de duahọlu,+ Eyin núdùdù gọfla to nulunọ si, 23  Eyin yọnnu he yin wangbẹna* de yin didà di asi, Podọ eyin deviyọnnu de yí otẹn klunọ-yọnnu etọn tọn.+ 24  Onú ẹnẹ delẹ to aigba ji he tin to nuhe whè hugan lẹ mẹ, Ṣigba, yé yọnnuin to jọwamọ-liho:*+ 25  Adidẹ́ lẹ ma yin nudida huhlọnnọ lẹ, Ṣogan, yé nọ wleawuna núdùdù yetọn to alunlun mẹ.+ 26  Agidipanun+ lẹ ma yin nudida huhlọnnọ lẹ, Ṣogan, yé nọ wleawuna ohọ̀ yetọn do osé lẹ mẹ.+ 27  Owẹ̀n+ lẹ ma tindo ahọlu de, Ṣogan, yemẹpo nọ to yìyì to tito ji.*+ 28  Họmẹsi+ nọ yí afọ etọn lẹ do tẹdo núgo Bo nọ biọ họ̀nmẹ ahọlu tọn. 29  Onú atọ̀n delẹ tin he afọdide yetọn jiawu, Onú ẹnẹ he zọnlin yetọn jiawu: 30  Kinnikinni, yèdọ huhlọnnọ hugan to gbekanlin lẹ mẹ He ma nọ joagọyigodo to mẹdepope nukọn;+ 31  Avún he nọ yangbé; gbọgbọẹ asu; Podọ ahọlu de he awhànpa etọn tin po e po. 32  Eyin hiẹ ko gbọn nulú dali ze dewe daga+ Kavi ko lẹn nado wàmọ, Yí alọ towe do sú onù.+ 33  Na dile anọ́sin he yin hihò nọ de limu anọ́sin tọn tọ́n Bọ awọntin he yin finfinyọ́n nọ de ohùn tọ́n do, Mọ wẹ homẹgble finfọndote nọ hẹn whẹgbè wá do niyẹn.+

Nudọnamẹ Odò Tọn

To paa mẹ, “ko ze dodonu opodo aigba tọn lẹpo daga?”
Kavi “diọnukunsọ.”
To paa mẹ, “omí.”
Kavi “Ṣeol,” enẹ wẹ, yọdò paa gbẹtọvi lẹ tọn. Pọ́n Zẹm.
Kavi “agbàdo tọ̀sisa tọn.” Pọ́n Zẹm.
Kavi “he jiawu gbau na mi.”
Kavi “he ma yin wanyina.”
Kavi “yọnnuin zẹjlẹgo.”
Kavi “nọ má do pipli voovo lẹ mẹ.”