Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Howhinwhẹn lẹ 26:1-28

NUHE E BẸHẸN LẸ

  • Zẹẹmẹ adidọnọ tọn (13-16)

  • Ma dádo whẹgbè mẹdevo lẹ tọn mẹ blo (17)

  • Dapana aihun mẹkiklọ tọn (18, 19)

  • Matin nake, miyọ́n ma nọ tin (20, 21)

  • Ohó mẹhẹngbletọ tọn taidi núdùdù he dotọ́n (22)

26  Kẹdẹdi osin-agó to alunlun mẹ podọ jikun to jibẹwawhé whenu, Mọ wẹ yẹyi ma jẹna nulunọ do niyẹn.+   Kẹdẹdile whẹwhinwhẹ́n de wẹ nọ zọ́n bọ ohẹ̀ de nọ họnyi bọ agadawhlé nọ zlọn yì do, Mọ wẹ dẹ̀hodo de ma nọ wá mẹji matin whẹwhinwhẹ́n tangan de do niyẹn.*   Obá wẹ tin na osọ́, bọ ogàn nọ yin dido onù na kẹtẹkẹtẹ,+ Amọ́, opò wẹ tin na nẹgbé nulunọ lẹ tọn.+   A gblọnhona nulunọ sọgbe hẹ nulú etọn blo, Na hiẹ nikaa ze dewe do hukan dopolọ ji hẹ ẹ.*   Gblọnhona nulunọ sọgbe hẹ nulú etọn, Na ewọ nikaa lẹndọ emi yọnnuin.+   Kẹdẹdi mẹhe hẹn afọ edetiti tọn lẹ kúsẹ́ bo gbleawuna ede,* Mọ wẹ mẹhe nọ ze whẹho etọn do alọmẹ na nulunọ te.   Kẹdẹdi afọ sẹkunọ he to ṣinṣọ̀n de tọn lẹ,* Mọ wẹ howhinwhẹn de nọ te to onù nulunọ lẹ tọn mẹ.+   Kẹdẹdile yè nọ blá zannu do akòtopẹ́ go do, Mọ wẹ gigo nina nulunọ nọ te do niyẹn.+   Kẹdẹdi atin owùnnọ de he jẹ alọ ahànnumunọ tọn mẹ, Mọ wẹ howhinwhẹn de nọ te to onù nulunọ lẹ tọn mẹ. 10  Kẹdẹdi ogádetọ de he nọ gbleawuna mẹdepope gbọn kosọ dali,* Mọ wẹ mẹhe nọ dà nulunọ kavi aligbọntọ depope poun taidi pakanọ te do niyẹn. 11  Kẹdẹdi avún he nọ lẹkọ do oslú etọn titi kọ̀n, Mọ wẹ nulunọ nọ vọ́ nulunu etọn lẹ wà do niyẹn.+ 12  Be hiẹ ko mọ mẹhe nọ yí ede do mọ nuyọnẹntọ de pọ́n ya?+ Todido tin na nulunọ hú ewọ. 13  Adidọnọ nọ dọmọ: “Kinnikinni winyanwinyan de to aliji, Kinnikinni de to tòplitẹn!”+ 14  Ohọ̀n nọ to lilẹ́ mapote to aṣígbè he hẹn ẹn lẹ ji, Adidọnọ sọ nọ to lilẹ́ mapote to adọzan etọn ji.+ 15  Adidọnọ nọ ylọn alọ etọn do agbán daho mẹ, Ṣigba, onú nọ ṣikọna ẹn gbau nado hẹn ẹn gọwá onù.+ 16  Adidọnọ nọ lẹndọ emi yọnnuin Hú omẹ ṣinawe he nọ yí wuntuntun do gblọnho. 17  Kẹdẹdi mẹde he to otó hẹn na avún de, Mọ wẹ aligbọntọ he gblehomẹ bo dádo whẹgbè he ma dù i de mẹ te do.+ 18  Kẹdẹdi alẹ̀nọ he to ogá miyọ́nnọ po ogába he nọ hẹn okú wá lẹ po yìn, 19  Mọdopolọ wẹ mẹhe nọ klọ kọmẹnu etọn bo nọ wá dọ dọ, “Aihunda wẹ n’te!”+ 20  Fie nake ma tin te, miyọ́n nọ ṣí, Podọ fie mẹhẹngbletọ ma tin te, whẹgbè nọ doalọte.+ 21  Dile akán te na zòkán bọ nake te na miyọ́n, Mọ wẹ avùnda-daitọ nọ fọ́n whẹgbè dote do niyẹn.+ 22  Ohó mẹhẹngbletọ de tọn lẹ nọ taidi núdùdù he dotọ́n;* Yé nọ yin zize mì bo nọ jẹte yì homẹ tlọlọ.+ 23  Kẹdẹdi fataka he yin viva do zẹ́nkla de go, Mọ wẹ hogbe owanyi tọn he wá sọn* ahun ylankan mẹ lẹ nọ te.+ 24  Mẹhe gbẹwanna mẹdevo nọ yí nùflo etọn lẹ do ṣinyọnnudo e, Ṣigba, e nọ whlá oklọ do ahun etọn mẹ. 25  Eyin ohó etọn lẹ tlẹ gọ́ na ojọmiọn, a dejido e go blo, Na osùnú ṣinawe tin to ahun etọn mẹ.* 26  Dile etlẹ yindọ e nọ yí oklọ do ze wangbẹna etọn whlá, Jijọ ylankan etọn na yin didegbà to agun mẹ. 27  Mẹhe nọ kùndò dai namẹ na flẹ jẹ e mẹ, Podọ mẹdepope he bli zannu de sẹ̀—ota etọn titi ji wẹ e na lẹkọwa.+ 28  Odẹ́ he nọ dolalo nọ gbẹwanna mẹhe e to kọgbidina lẹ, Podọ onù he nọ namẹ pipà oklọ tọn nọ hẹn dindọn wá.+

Nudọnamẹ Odò Tọn

Kavi vlavo, “Mọ wẹ dẹ̀hodo he yè ma jẹna ma nọ wá mẹji do niyẹn.”
Kavi “Na hiẹ nikaa hẹn dewe sọzẹn hẹ ẹ.”
To paa mẹ, “bo nọ nù danuwiwa.”
Kavi “afọ sẹkunọ tọn lẹ he to gblẹgblẹ.”
Kavi “he nọ gbleawuna mẹlẹpo.”
Kavi “taidi nuhe sọgan yin zize mì po nukunkẹn po.”
To paa mẹ, “nùflo zohunhun tọn he zọnpọ hẹ.”
Kavi “Na ahun etọn pete wẹ yin osùnú.”