Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Howhinwhẹn lẹ 25:1-28

NUHE E BẸHẸN LẸ

  • Aṣlihó (9)

  • Ohó he yè pọ́n do dọ (11)

  • A yì owhé mẹtọn gbè whẹwhẹ blo (17)

  • Miyọ́nkán bibẹpli do ota na kẹntọ (21, 22)

  • Linlin dagbe nọ taidi osin fifá (25)

25  Howhinwhẹn Sọlomọni tọn wẹ ehelẹ+ lọsu ga, ehe sunnu Hẹzekia+ ahọlu Juda tọn tọn lẹ vọkan* dọmọ:   Gigo Jiwheyẹwhe tọn wẹ nado nọ hẹn whẹho de di aṣli,+ Amọ́, gigo ahọlu lẹ tọn wẹ nado nọ dindona whẹho de.   Dile olọn yiaga bọ aigba siso do, Mọ wẹ ahun ahọlu lẹ tọn yin dinmamọdona do niyẹn.   De dihó* sẹ̀ sọn fataka go, Awusọhia etọn nasọ wé pete.+   De mẹylankan sẹ̀ sọn ahọlu nukọn, Ofìn etọn nasọ yin didoai gligli to dodowiwa mẹ.+   A doyẹyigona dewe to ahọlu nukọn blo,+ A sọ dín otẹn to mẹhe diyin lẹ ṣẹnṣẹn blo,+   Na e pọnte dọ ewọ ni dọna we dọ, “Wá aga fi,” Hú dọ ni dowinyan we to omẹ nukundeji de nukọn.+   A zọ̀n plaplaji ze whẹho de yì owhẹ̀ nukọn blo, Na etẹwẹ hiẹ na wà to nukọn mẹ eyin kọmẹnu towe dowinyan we?+   Dọwhẹgbọ hẹ kọmẹnu towe,+ Ṣigba, a de aṣlihó he ko yin didọna we* gbà blo,+ 10  Na mẹhe to todoai nikaa dowinyan we Podọ hiẹ nikaa hẹn linlin* ylankan he ma sọgan yin gigọ̀ bẹ lẹ gbayipe. 11  Kẹdẹdi atin-sinsẹ́n pọmu sika tọn to núzinzan fataka tọn mẹ, Mọ wẹ ohó he yin didọ to ojlẹ he sọgbe mẹ te do niyẹn.+ 12  Kẹdẹdi tómẹnu sika tọn po aṣọ́donu sika dagbedagbe tọn de po, Mọ wẹ hokọnamẹ nuyọnẹntọ tọn te to otó mẹhe sè e tọn mẹ.+ 13  Kẹdẹdi fifá osin-agó tọn to azán jibẹwawhé tọn gbè, Mọ wẹ wẹnsagun nugbonọ de te na mẹhe do e hlan, Na ewọ nọ hẹn kọfanamẹ wá na ogán etọn.*+ 14  Kẹdẹdi aslọ po jẹhọn po he ma hẹn jikun wá, Mọ wẹ mẹhe to awagundo gando nunina he e ma namẹ gbede* de go te.+ 15  Gbọn homẹfa dali wẹ yè nọ duto awhàngán daho de ji, Podọ odẹ́ he nọ wà dẹẹdẹ* sọgan gbà ohú.+ 16  Eyin hiẹ mọ owín, dù dehe na pé we kẹdẹ, Na eyin a dù hugan, a sọgan wá slú i pete.+ 17  Afọ towe ni ma jẹ whẹwhẹ to owhé kọmẹnu towe tọn gbè blo, Agbọ́ towe nikaa pé e bọ ewọ na gbẹwanna we. 18  Kẹdẹdi aglọpò awhànfunfun tọn, ohí po ogá didá de po, Mọ wẹ mẹhe to kunnu lalo de sọta kọmẹnu etọn te.+ 19  Kẹdẹdi adú he wẹ́n kavi afọ he ma lodo, Mọ wẹ jidide do mẹhe go yè ma sọgan ganjẹ* to ojlẹ tukla tọn mẹ te. 20  Kẹdẹdi mẹhe de awù to avivọ whenu Podọ kẹdẹdi ovẹn vẹsin he yin kinkọ̀n do soda ji, Mọ wẹ mẹhe nọ jihàn na ahun he jẹflumẹ de te.+ 21  Eyin huvẹ hù kẹntọ towe,* na ẹn akla nado dù; Eyin nugbla hù i, na ẹn osin nado nù,+ 22  Na gbọnmọ dali, hiẹ na to miyọ́nkán he to jiji bẹ do ota na ẹn,*+ Jehovah nasọ suahọ etọn we. 23  Jẹhọn agewaji tọn nọ hẹn jikun sinsinyẹn wá, Podọ odẹ́ he nọ dọmẹnu nọ hẹn homẹgble sọawuhia to nukunta.+ 24  E pọnte nado nọ nọ̀ lọnglọnẹnmẹ to họta Hú nado nọ nọ̀ ohọ̀ dopolọ mẹ hẹ asi whẹgbènọ.*+ 25  Kẹdẹdi osin fifá na mẹhe* agbọ́pe, Mọ wẹ linlin dagbe he wá sọn otò dindẹn de mẹ nọ te do niyẹn.+ 26  Kẹdẹdi asisa he gọ́ na ogbọ̀n po dotọ̀ he gbọgbé de po, Mọ wẹ dodonọ he jogbe* to mẹylankan nukọn de te. 27  E ma yọ́n nado nọ dù owín zẹjlẹgo,+ Mọjanwẹ gigo dindin na mẹdetiti ma nọ hẹn gigo wá do niyẹn.+ 28  Kẹdẹdi tòdaho de he yè gbà adó biọ e mẹ, ehe ma tindo adó jọ adó de ba, Mọ wẹ mẹhe ma sọgan dava homẹgble* etọn te.+

Nudọnamẹ Odò Tọn

Kavi “kàn bo bẹplidopọ.”
To paa mẹ, “ayámí.”
Kavi “aṣlihó mẹdevo lẹ tọn.”
Kavi “yèdọ-yèdọ.”
Kavi “na alindọn ogán etọn tọn.”
To paa mẹ, “nunina oklọ tọn.”
Kavi “he gọ́ na homẹmimiọn.”
Kavi vlavo, “do mẹklọtọ go.”
To paa mẹ, “mẹhe gbẹwanna we.”
Enẹ wẹ, nado whiwhẹ mẹlọ bo hẹn ẹn yọ́ to yẹhiadonu-liho.
Kavi “nutlọtọ.”
Kavi “alindọn he.” Pọ́n Zẹm.
Kavi “joawunanu.” To paa mẹ, “to sàmù.”
Kavi “ayiha.”