Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Howhinwhẹn lẹ 15:1-33

NUHE E BẸHẸN LẸ

  • Ogbè dẹẹdẹ nọ lẹ́ adi sẹ̀ (1)

  • Nukun Jehovah tọn tin to filẹpo (3)

  • Odẹ̀ nugbonọ tọn nọ hẹn homẹhun Jiwheyẹwhe (8)

  • Matin wedide, tito nọ gboawupo (22)

  • Nọ lẹnnupọn whẹpo do dọho (28)

15  Gblọndo he yin nina po ogbè dẹẹdẹ* po nọ lilẹ́ adi sẹ̀,+ Ṣigba, hogbe kàunkàun* nọ fọ́n homẹgble dote.+   Odẹ́ nuyọnẹntọ tọn nọ yí oyọnẹn zan to aliho dagbe mẹ,+ Ṣigba, onù nulunọ tọn nọ kọ́ nulú jẹgbonu.   Nukun Jehovah tọn tin to filẹpo, Bo nọ to mẹylankan po mẹdagbe po pọ́n.+   Atin ogbẹ̀ tọn de wẹ odẹ́ he nọ whesọ* yin,+ Ṣigba, hodidọ mẹbublu tọn nọ hẹnmẹ jẹflumẹ.*   Nulunọ nọ yí nukunpẹvi do pọ́n mẹplọnlọ otọ́ etọn tọn,+ Ṣigba, zinzintọ nọ kẹalọyi wọhẹ.+   Adọkun susugege wẹ tin to owhé dodonọ tọn gbè, Ṣigba, sinsẹ́n* mẹylankan tọn nọ hẹn tukla wá e ji.+   Nùflo nuyọnẹntọ tọn nọ hẹn oyọnẹn gbayipe,+ Ṣigba, ahun nulunọ tọn ma nọ wàmọ.+   Osùnú de wẹ avọ́sinsan mẹylankan tọn yin na Jehovah,+ Ṣigba, odẹ̀ nugbonọ tọn nọ hẹn homẹ Etọn hùn.+   Jehovah gbẹwanna aliho mẹylankan tọn,+ Ṣigba, e yiwanna mẹhe nọ doafọna dodowiwa.+ 10  Mẹplọnlọ nọ taidi nuylankan* to nukun mẹhe to dindanbu tọn mẹ,+ Ṣigba, okú wẹ to tepọn mẹdepope he gbẹwanna wọhẹ.+ 11  Jehovah nọ mọnú jẹ Yọdò* po otẹn vasudo tọn po* mẹ gblegede.+ Nẹmunẹmu wẹ yin ahun gbẹtọvi lẹ tọn mẹ!+ 12  Mẹṣankotọ ma nọ yiwanna mẹhe to wiwọhẹ ẹ.+ E ma nọ kàn ayinamẹ biọ nuyọnẹntọ.+ 13  Ahun he gọ́ na ayajẹ nọ hẹn nukunmẹ sẹ́, Ṣigba, awufiẹsa nọ hẹn ayiha jẹflumẹ.+ 14  Ahun he tindo nukunnumọjẹnumẹ nọ dín oyọnẹn,+ Ṣigba, onù nulunọ tọn nọ mọ pekọ to nulú mẹ.*+ 15  Azán lẹpo wẹ nọ yin ylankan na mẹhe yè to yasana,+ Ṣigba, mẹhe ahun etọn gọ́ na ayajẹ* nọ tin to hùnwhẹ mẹ to whepoponu.+ 16  E pọnte nado dibusi Jehovah bo tindo vude+ Hú nado yin magbọjẹnọ* bo tindo adọkun susugege.+ 17  E pọnte nado dù omá-nusọnu to fie owanyi tin te+ Hú nado dù olàn oyìnsú he dojó* de tọn to fie wangbẹna tin te.+ 18  Mẹhe nọ yawu gblehomẹ nọ dà avùn dai,+ Ṣigba, mẹhe nọ whleawu nado gblehomẹ nọ doalọtena whẹgbè.+ 19  Aliho adidọnọ tọn taidi pákàn owùnnọ de,+ Ṣigba, ali nugbonọ tọn taidi alihogbó jijlọ de.+ 20  Visunnu nuyọnẹntọ nọ hẹn homẹ otọ́ etọn tọn hùn,+ Ṣigba, nulunọ nọ vlẹ onọ̀ etọn kò.+ 21  Mẹhe zinzin* whèdo nọ mọ ayajẹ to nulú mẹ,+ Ṣigba, mẹhe tindo wuntuntun nọ zinzọnlin tlélé.+ 22  Fie wedide dopọ* ma tin te, tito lẹ nọ gboawupo, Ṣigba, gbọn ayinamẹtọ susu gblamẹ wẹ nuwadotana dagbe nọ tin.+ 23  Gblọndo he sọgbe nina* nọ hẹnmẹ jaya,+ Podọ ohó he yin didọ to ojlẹ he sọgbe mẹ—lehe e nọ yọ́n sọ!+ 24  Ali ogbẹ̀ tọn nọ plan mẹhe tindo zinzin yiaga,+ Nado basi hihọ́na ẹn ma nado jẹte yì Yọdò* mẹ.+ 25  Jehovah na họ́ owhé saklanọ tọn liai,+ Ṣigba, ewọ na basi hihọ́na dogbó asuṣiọsi tọn.+ 26  Jehovah gbẹwanna ayiha gigẹdẹ mẹylankan tọn lẹ,+ Ṣigba, hodidọ awuvivinamẹ tọn lẹ nọ wé-ṣeke to nukun Etọn mẹ.+ 27  Mẹhe to ale mawadodo tọn dù nọ hẹn tukla* wá whédo etọn titi ji,+ Ṣigba, mẹhe gbẹwanna alọgodo-kuẹ na to gbẹnọ zọnmii.+ 28  Ahun dodonọ tọn nọ lẹnayihamẹpọn whẹpo do gblọnho,*+ Ṣigba, onù mẹylankan tọn nọ kọ́ nuylankan lẹ jẹgbonu. 29  Jehovah dẹn do mẹylankan taun, Ṣigba, e nọ sè odẹ̀ dodonọ tọn.+ 30  Nukun he to sisẹ́* nọ hẹn ahun gọ́ na ayajẹ; Linlin dagbe nọ hẹn ohú lodo dogọ.*+ 31  Mẹhe nọ kẹalọyi wọhẹ he nọ hẹnmẹ dogbẹ̀ Wẹ nọ nọ̀ nuyọnẹntọ lẹ ṣẹnṣẹn to whégbè.+ 32  Mẹdepope he gbẹ́ mẹplọnlọ dai vlẹ ogbẹ̀* edetiti tọn,+ Ṣigba, mẹdepope he nọ kẹalọyi wọhẹ na tindo nukunnumọjẹnumẹ.*+ 33  Budisi Jehovah nọ plọnmẹ nuyọnẹn,+ Podọ whiwhẹ wẹ nọ jẹnukọnna gigo.+

Nudọnamẹ Odò Tọn

Kavi “fifá.”
Kavi “he nọ hẹn awufiẹsa wá.”
Kavi “odẹ́ he nọ hẹnazọ̀ngbọ.”
To paa mẹ, “nọ gbà ayiha.”
Kavi “ale.”
Kavi “nuhe sinyẹn.”
Kavi “Ṣeol,” enẹ wẹ, yọdò paa gbẹtọvi lẹ tọn. Pọ́n Zẹm.
Kavi “po Abadọni po.”
Kavi “nọ doafọna nulú.”
Kavi “mẹhe tindo ahun dagbe.”
Kavi “nado tin to bẹwlu mẹ.”
To paa mẹ, “he yè na núdùdù to otò mẹ.”
To paa mẹ, “ahun.”
Kavi “hodọdopọ aṣli tọn.”
To paa mẹ, “Gblọndo he tọ́n sọn onù mẹtọn mẹ.”
Kavi “Ṣeol,” enẹ wẹ, yọdò paa gbẹtọvi lẹ tọn. Pọ́n Zẹm.
Kavi “winyan.”
Kavi “nọ yí sọwhiwhe do lẹnnupọndo lehe e na gblọnho do ji; nọ lẹnnupọn whẹpo do dọho.”
Kavi “Nukun yìnyìn pọnnu po ayajẹ po.”
To paa mẹ, “hẹn ohú dojó.”
Kavi “alindọn.”
To paa mẹ, “ahun.”