Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Howhinwhẹn lẹ 12:1-28

NUHE E BẸHẸN LẸ

  • Mẹhe gbẹwanna wọhẹ ma yin wuntuntunnọ (1)

  • ‘Hodidọ matin lẹnpọn nọ taidi ohísọmẹ’ (18)

  • Jijọho dindin nọ hẹn ayajẹ wá (20)

  • Osùnú wẹ nùflo he nọ dolalo yin na Jehovah (22)

  • Magbọjẹ nọ hẹn agbàn pẹ̀n ahun (25)

12  Mẹhe yiwanna mẹplọnlọ yiwanna oyọnẹn,+ Ṣigba, mẹhe gbẹwanna wọhẹ ma tindo wuntuntun depope.+   Mẹdagbe wẹ nọ yin alọkẹyi to Jehovah dè, Ṣigba, Ewọ nọ gblewhẹdo mẹhe nọ kàn ayiha ylankan lẹ.+   Kanyinylan ma nọ basi hihọ́namẹ,+ Ṣigba, dodonọ ma na yin hinhọ̀nsẹ gbede.   Jẹgbakun de wẹ asi nugopetọ yin na asu etọn,+ Ṣigba, asi he walọ etọn huwinyan nọ taidi azọ̀n to ohú mẹ na asu etọn.+   Linlẹn dodonọ tọn lẹ nọ sọgbe, Ṣigba, oklọ wẹ anademẹ mẹylankan tọn.   Mẹylankan nọ yí ohó do tọ̀pọwu namẹ nado hùmẹ,*+ Ṣigba, onù nugbonọ lẹ tọn nọ whlẹn yé.+   Eyin yè takiti na mẹylankan lẹ, yé nọ busẹ, Ṣigba, whédo dodonọ lẹ tọn na gbọṣi aimẹ zọnmii.+   Mẹde nọ yin pipà na nuyọnẹn he nọ tọ́n sọn onù etọn mẹ wutu,+ Ṣigba, mẹhe tindo ahun bublu tọn na yin nuyiwa hẹ po vlẹko po.+   E pọnte nado yin omẹ tata de poun ṣigba bo tindo devizọnwatọ de Hú nado nọ ze mẹdetiti daga bo ma ka tindo nudepope nado dù.*+ 10  Dodonọ nọ penukundo kanlin whégbè tọn etọn lẹ* go,+ Ṣigba, eyin mẹylankan tlẹ to awuvẹmẹ, kanyinylan wẹ e nọ yin. 11  Mẹhe nọ pọ̀ aigba etọn na nọ dùnú gọ́ho,+ Ṣigba, zinzin* whèdo mẹhe nọ doafọna onú ovọ́ lẹ. 12  Mẹylankan nọ whànwu ogbẹ́ etọn devo lẹ na nuhe yé ko wle lẹ wutu, Ṣigba, dodonọ taidi atin he doadọ̀do de he nọ de sinsẹ́n tọ́n. 13  Ohó ylankan he dọ mẹylankan te wẹ nọ domọwle e,+ Ṣigba, dodonọ nọ họ̀ngán sọn ayimajai mẹ. 14  Sinsẹ́n he ohó* mẹde tọn detọ́n wẹ nọ hẹn nudagbe lẹ pekọna ẹn,+ Podọ azọ́n alọ etọn lẹ tọn wẹ na hẹn ale wá na ẹn. 15  Aliho nulunọ tọn nọ sọgbe to nukun etọn mẹ,+ Ṣigba, nuyọnẹntọ nọ kẹalọyi ayinamẹ.+ 16  Nulunọ nọ do homẹgble etọn hia to afọdopolọji,*+ Ṣigba, zinzintọ ma nọ na ayidonugo* zungbe. 17  Mẹhe nọ dekunnu po nugbonọ-yinyin po na dọ nugbo,* Ṣigba, kunnudetọ lalonọ nọ dọho oklọ tọn. 18  Ohó he yè ma lẹnnupọn whẹpo do dọ nọ taidi ohísọmẹ, Ṣigba, odẹ́ nuyọnẹntọ tọn nọ hẹnazọ̀ngbọ.+ 19  Nùflo he nọ dọ nugbo lẹ wẹ na gbọṣi aimẹ kakadoi,+ Ṣigba, odẹ́ he nọ dolalo na nọ aimẹ na ojlẹ kleun de poun.+ 20  Oklọ tin to ahun mẹhe nọ blasé domẹgo lẹ tọn mẹ, Ṣigba, jijọho-dintọ* lẹ nọ tindo ayajẹ.+ 21  Awugble depope ma na wá dodonọ ji,+ Ṣigba, gbẹzan mẹylankan lẹ tọn na gọ́ na nugbajẹmẹji.+ 22  Osùnú de wẹ nùflo he nọ dolalo lẹ yin na Jehovah,+ Ṣigba, mẹhe nọ yinuwa po nugbonọ-yinyin po lẹ nọ hẹn homẹ etọn hùn. 23  Zinzintọ nọ whlá nuhe e yọnẹn, Ṣigba, ahun nulunọ tọn nọ túntún nulú etọn jẹgbonu.+ 24  Vivẹnudotọ lẹ wẹ na dugán,+ Ṣigba, adidọnọ lẹ na nọ yin hinhẹn gánnugánnu nado wazọ́n sinsinyẹn.+ 25  Magbọjẹ he to ahun gbẹtọ tọn mẹ nọ hẹn agbàn pẹ̀n ẹn,*+ Ṣigba, ohó dagbe nọ vọ́ zodolanmẹna ẹn.+ 26  Dodonọ nọ dín kanlindugbo etọn mọ, Ṣigba, nuyiwa mẹylankan lẹ tọn nọ hẹn yé danbú. 27  Adidọnọ ma nọ họ̀nwezun to nuhe e jlo na wle godo,+ Ṣigba, vivẹnudido wẹ yin adọkunnu họakuẹ he mẹde sọgan tindo. 28  Aliho dodowiwa tọn nọ planmẹ yì ogbẹ̀ mẹ;+ Okú ma tin to omọ́-liho etọn ji.

Nudọnamẹ Odò Tọn

To paa mẹ, “do tọ̀wu dai na ohùn.”
To paa mẹ, “akla depope.”
Kavi “alindọn kanlin whégbè tọn etọn tọn.”
To paa mẹ, “ahun.”
To paa mẹ, “onù.”
Kavi “to azán dopolọ ji.”
To paa mẹ, “zinzintọ nọ ṣinyọnnudo.”
To paa mẹ, “nuhe yin dodo.”
To paa mẹ, “mẹhe nọ na ayinamẹ jijọho tọn.”
Kavi “hẹn apọṣi i.”