Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Howhinwhẹn lẹ 1:1-33

NUHE E BẸHẸN LẸ

  • Lẹndai howhinwhẹn lẹ tọn (1-7)

  • Owù ogbẹ́ ylankan tọn (8-19)

  • Nuyọnẹn nugbo to awhádo (20-33)

1  Howhinwhẹn Sọlomọni+ visunnu Davidi,+ ahọlu Islaeli tọn+ tọn lẹ:   Nado plọn* nuyọnẹn+ bo kẹalọyi mẹplọnlọ; Nado mọnukunnujẹ ohó he gọ́ na wuntuntun lẹ mẹ;   Nado kẹalọyi mẹplọnlọ+ he nọ namẹ zinzin, Gọna dodowiwa,+ whẹdida dodo*+ po ahunjijlọ* po;   Nado na zinzin+ wunvinọ; Nado na oyọnẹn po nugopipe nulẹnpọn tọn po jọja sunnu de.+   Mẹhe yin nuyọnẹntọ nọ dotoai bo nọ plọnnu dogọ;+ Mẹhe tindo nukunnumọjẹnumẹ nọ tindo anademẹ nuyọnẹn tọn+   Nado mọnukunnujẹ howhinwhẹn po ohó he gẹdẹ* po mẹ, Yèdọ ohó nuyọnẹntọ tọn lẹ po oló yetọn lẹ po.+   Budisi* Jehovah wẹ bẹjẹeji oyọnẹn tọn.+ Nulunọ lẹ kẹdẹ wẹ nọ gbẹkọ nuyọnẹn po mẹplọnlọ po go.+   Visunnu ṣie, nọ dotoaina mẹplọnlọ otọ́ towe tọn,+ A sọ gbẹ́ anademẹ* onọ̀ towe tọn dai blo.+   Gbakun whanpẹnọ de wẹ yé yin na ota towe+ Podọ aṣọ́donu dagbedagbe de na okọ̀ towe.+ 10  Visunnu ṣie, eyin ylandonọ lẹ tẹnpọn nado doyẹklọ we, a yigbe blo.+ 11  Eyin yé dọna we dọmọ: “Hodo mí. Gbọ mí ni yì tọ̀wu dai nado sọ̀n ohùn dai. Mí ni yì tọ̀pọwu dai na homẹvọnọ lẹ matin whẹwhinwhẹ́n de. 12  Mí ni ze yé mì gbẹ̀te, kẹdẹdile Yọdò* nọ basi do, Yèdọ blebu, taidi mẹhe to tejẹ yì odò lọ mẹ lẹ. 13  Gbọ mí ni hò adọkunnu họakuẹ yetọn lẹpo yí; Mí ni yí ogblànnu lẹ do gọ́ ohọ̀ mítọn lẹ. 14  Wá kọnawudopọ hẹ mí,* Na mí nido nọpọ́ do má nuhe mí fìn lọ lẹ do zẹnzẹn.”* 15  Visunnu ṣie, a hodo yé yì blo. Whlá afọ towe lẹ sọn ali yetọn ji,+ 16  Na afọ yetọn nọ họ̀nwezun nado yì waylan; Yé nọ dowezun nado yì sọ̀n ohùn dai.+ 17  Na nugbo tọn, ovọ́ wẹ odọ̀ he yè tá dai to nukun ohẹ̀ de tọn mẹ. 18  Enẹwutu wẹ omẹ ehelẹ nọ tọ̀pọwu dai nado sọ̀n ohùn dai; Yé nọ tọ̀wu dai nado yí ogbẹ̀* mẹdevo lẹ tọn. 19  Mọ wẹ mẹhe to ale mawadodo tọn dín lẹ nọ yinuwa do, Podọ ehe wẹ na yí ogbẹ̀* mẹhe mọ ẹn yí lẹ tọn.+ 20  Nuyọnẹn nugbo+ nọ to awhádo gángán to tòhomẹ-liho ji.+ E nọ to gbèzeyiaga to tòplitẹn lẹ.+ 21  E nọ to awhádo gángán to aliklan* tòhomẹ-liho jinján lẹ tọn ji. Podọ to họngbo tòdaho lọ tọn lẹ ji, e nọ dọmọ:+ 22  “Nawẹ e na dẹnsọ bọ mì wunvinọ lẹ na to wanyina wunvi? Nawẹ e na dẹnsọ bọ mì mẹṣankotọ lẹ na to awuvivi mọ to mẹṣanko mẹ? Podọ nawẹ e na dẹnsọ bọ mì nulunọ lẹ na to wangbẹna oyọnẹn?+ 23  Mì yinuwa sọgbe hẹ wọhẹmẹ ṣie.*+ To whenẹnu, yẹn na kọ̀n gbigbọ ṣie jẹgbonu do mì ji; Yẹn na hẹn ohó ṣie lẹ zun yinyọnẹn na mì.+ 24  Na yẹn dawhá ylọ mì, ṣigba mìwlẹ gbẹ́ nado dotoaina mi, Yẹn dlẹnalọ ṣie, ṣigba mẹdepope ma to ayidonugo na mi,+ 25  Mì zindonukọn nado nọ gbẹkọ ayinamẹ ṣie lẹpo go Bosọ nọ gbẹ́ wọhẹmẹ ṣie dai, 26  Yẹnlọsu na kò mì to whenue nugbajẹmẹji na wá mì ji; Yẹn na vlẹ mì kò to whenue nuhe mì nọ dibuna lọ na wá mì ji,+ 27  To whenue nuhe mìwlẹ nọ dibuna lọ na wá mì ji di yujẹhọn, Bọ nugbajẹmẹji mìtọn na wá di jẹhọn sinsinyẹn, Yèdọ whenue ayimajai po nuhahun po na wá mì ji. 28  To ojlẹ enẹ mẹ, yé na to awhádo ylọ mi mapote, ṣigba yẹn ma na siọ; Yé na dín mi vẹkuvẹku, ṣigba yé ma na mọ mi,+ 29  Na yé gbẹwanna oyọnẹn,+ Bo masọ basi dide nado dibusi Jehovah wutu.+ 30  Yé gbẹ́ ayinamẹ ṣie dai; Yé masọ tindo sisi depope na wọhẹmẹ ṣie. 31  Enẹwutu wẹ yé na hẹn agbàn kọdetọn* aliho yetọn tọn,+ Yé nasọ nù ayinamẹ* yetọn titi gọ́ho. 32  Na tasinsinyẹn wunvinọ lẹ tọn wẹ na hù yé, Podọ vọdonanu nulunọ lẹ tọn wẹ na và yé sudo. 33  Ṣigba, mẹhe nọ dotoaina mi na nọ nọ̀ hihọ́ mẹ+ Bọ obu nugbajẹmẹji depope tọn ma na nọ dotukla ẹ.”+

Nudọnamẹ Odò Tọn

To paa mẹ, “Nado yọ́n.”
Kavi “nuhe yin dodo.”
Kavi “nuhe sọgbe.”
Kavi “oló.”
Kavi “Sisi tintindo na.”
Kavi “osẹ́n.”
Kavi “Ṣeol,” enẹ wẹ, yọdò paa gbẹtọvi lẹ tọn. Pọ́n Zẹm.
Kavi “Wá de ovò hẹ mí.”
Kavi “do má saki (sẹgẹ) dopolọ.”
Kavi “alindọn.”
Kavi “alindọn.”
To paa mẹ, “ota.”
Kavi “Mì lẹkọ to whenue yẹn wọhẹ mì.”
To paa mẹ, “na dù sinsẹ́n.”
Kavi “ayiha wintinwintin; wlẹnwin.”