Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Heblu lẹ 6:1-20

NUHE E BẸHẸN LẸ

  • Dovivẹnu bo lẹzun mẹhe whèwhín (1-3)

  • Mẹhe jai lẹ vọ́ Visunnu lọ whè do núgo (4-8)

  • Tindo jidide gando todido towe go (9-12)

  • Opagbe Jiwheyẹwhe tọn na mọ hẹndi dandan (13-20)

    • Opagbe po whiwhle Jiwheyẹwhe tọn po ma sọgan diọ (17, 18)

6  Enẹwutu, todin he mí ko yinukọn zẹ̀ nuplọnmẹ dodonu tọn+ Klisti tọn go, mì gbọ mí ni dovivẹnu bo lẹzun mẹhe whèwhín,+ bo masọ vọ́ dodonu de zedai ba blo, yèdọ lẹnvọjọ sọn azọ́n kúkú lẹ mẹ, podọ yise to Jiwheyẹwhe mẹ,  nuplọnmẹ gando baptẹm lẹ go po alọ zizedomẹji po,+ fọnsọnku oṣiọ lẹ tọn+ po whẹdida madopodo po.  Podọ na nugbo tọn, ehe wẹ mí na wà, eyin Jiwheyẹwhe dike.  Na nuhe dù mẹhe ko yin hinhẹnwa hinhọ́n nù to ojlẹ de mẹ wayi lẹ,+ mẹhe ko dọ́ nunina vọnu olọn tọn pọ́n lẹ, mẹhe ko lẹzun mahẹtọ gbigbọ wiwe tọn lẹ,  podọ mẹhe ko dọ́ ohó dagbe Jiwheyẹwhe tọn po huhlọn titonu* he ja lọ tọn lẹ po pọ́n,  ṣigba he ko jai lẹ,+ e ma yọnbasi nado hẹn yé gọwá ogbẹ̀ whladopo dogọ nado lẹnvọjọ, na yelọsu vọ́ Visunnu Jiwheyẹwhe tọn whè do núgo bo de e hia na e nido mọ winyan to gbangba wutu.+  Na aigba nọ mọ dona yí sọn Jiwheyẹwhe dè to whenue e nù jikun he nọ saba ja do e ji, bọ to enẹgodo nọ hẹn nuhe yọ́n-na-yizan lẹ wujẹgbonu na mẹhe pọ̀ ẹ lẹ.  Ṣigba, eyin owùn po tẹwùn lẹ po wẹ e hẹn jẹgbonu, e nọ yin gbigbẹdai bo nọ dibla yin dẹ̀hodo, podọ to godo mẹ, e nọ yin fifiọ.  Ṣigba, mẹyiwanna lẹ emi, na mìwlẹ tọn, mí tindo nujikudo dọ mì to nudagbe lẹ wà—yèdọ nuhe nọ hẹn whlẹngán wá lẹ—dile etlẹ yindọ mí to hodọ to aliho ehe mẹ. 10  Na Jiwheyẹwhe ma yin mawadodonọ nado wọn azọ́n mìtọn po owanyi he mì dohia na oyín etọn po,+ na mì ko yilizọn na* omẹ wiwe lẹ bosọ zindonukọn nado to lizọnyina yé. 11  Ṣigba, mí jlo dọ dopodopo mìtọn ni tindo vivẹnudido dopolọ nado sọgan tindo jidide mlẹnmlẹn gando todido lọ+ go kakajẹ opodo,+ 12  na mìwlẹ ma nado lẹzun adidọnọ,+ ṣigba nọ hodo apajlẹ mẹhe gbọn yise po sọwhiwhe po dali dugu opagbe lọ lẹ tọn lẹ. 13  Na to whenue Jiwheyẹwhe dopagbe lọ na Ablaham, na ewọ ma sọgan yí mẹhe yiaga hugan de do whlé wutu, e yí edetiti do whlé,+ 14  dọmọ: “Yẹn na dona we dandan podọ yẹn na hẹn we sudeji dandan.”+ 15  Enẹwutu, to whenuena Ablaham ko yí sọwhiwhe do nọte godo, e mọ opagbe ehe yí. 16  Na gbẹtọ lẹ nọ yí mẹhe yiaga hugan de do whlé, bọ whiwhle yetọn nọ hẹn opodo wá na nudindọn lẹpo, na e yin jidenamẹnu de he sọgbe hẹ osẹ́n na yé wutu.+ 17  Mọdopolọ, to whenuena Jiwheyẹwhe de nado dohia gudutọ opagbe lọ tọn lẹ+ hezeheze dọ lẹndai* etọn ma sọgan diọ, e yí whiwhle de do hẹn ohó etọn lodo,* 18  na e nido yindọ, gbọn onú awe he ma sọgan diọ ehelẹ gblamẹ, ehe mẹ e glo Jiwheyẹwhe nado dolalo te,+ míwlẹ he ko họnyi otẹn fibẹtado tọn lọ nido sọgan mọ tulinamẹ sinsinyẹn yí nado tẹdo todido he yin zizedonukọnna mí lọ go gligli. 19  Todido he mí tindo ehe+ tin taidi húnsingàn de na alindọn* mítọn, bo yin nujikudo tọn bosọ lodo, podọ e nọ biọ e mẹ yì zẹ̀ họmẹgbòvọ̀* lọ go,+ 20  fie nukọntọ de, yèdọ Jesu,+ ko biọ do ota mítọn mẹ, mẹhe ko lẹzun yẹwhenọ daho de taidi Mẹlkizedẹki kakadoi.+

Nudọnamẹ Odò Tọn

Kavi “ojlẹ.” Pọ́n Zẹm.
Kavi “ko gọalọna.”
Kavi “ayinamẹ.”
Kavi “do dá do ohó etọn mẹ.” To paa mẹ, “do gbọwhẹ hẹ ẹ.”
Kavi “ogbẹ̀.”
Enẹ wẹ, họmẹgbòvọ̀ he gbò Fiwiwe Gbaugbau lọ dovo.