Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn | OWE WIWE LẸ—LẸDOGBEDEVOMẸ AIHỌN YỌYỌ TỌN

Heblu lẹ 5:1-14

NUHE E BẸHẸN LẸ

  • Jesu klohu yẹwhenọ daho depope (1-10)

    • Taidi Mẹlkizedẹki (6, 10)

    • E plọn tonusise sọn yajiji mẹ (8)

    • E lẹzun aliho whlẹngán madopodo tọn (9)

  • Mí dona whẹ́n to gbigbọ-liho (11-14)

5  Na yẹwhenọ daho depope he yin didesọn gbẹtọ lẹ ṣẹnṣẹn wẹ nọ yin dide nado wà sinsẹ̀nzọn Jiwheyẹwhe tọn do ota yetọn mẹ,+ na ewọ nido sọgan basi nunina lẹ po avọ́sinsan lẹ po na ylando lẹ wutu.+  Ewọ penugo nado yinuwa po awuvẹmẹ* po hẹ mẹhe to wunvi mẹ po mẹhe to nuṣiwa* lẹ po na ewọ lọsu to pipehẹ madogán edetiti tọn* wutu,  podọ na enẹ wutu, ewọ dona basi avọ́nunina lẹ na ylando edetiti tọn lẹ kẹdẹdile e nọ basi na ylando gbẹtọ lẹ tọn do.+  Mẹde ma nọ ze ede do otẹn gbégbò tọn ehe mẹ gba, adavo ewọ yin dide gbọn Jiwheyẹwhe dali, kẹdẹdile Aalọn yin dide do.+  Mọdopolọ ga, Klisti ma pagigona ede+ gbọn lilẹzun yẹwhenọ daho de dali gba, ṣigba ewọ yin gigopana gbọn Mẹlọ he dọna ẹn dali dọmọ: “Hiẹ wẹ visunnu ṣie; yẹn ko lẹzun otọ́ towe to egbé.”+  Ewọ sọ dọ to fidevo ga dọmọ, “Hiẹ yin yẹwhenọ de kakadoi taidi Mẹlkizedẹki.”+  To whenue Klisti tin to aigba ji,* ewọ yí avi sinsinyẹn po dasin lẹ po do basi ovẹvivẹ po obiọ lẹ po+ hlan Mẹlọ he penugo nado whlẹn ẹn sọn okú si, e sọ sè etọn na ewọ dibusi Jiwheyẹwhe wutu.  Dile etlẹ yindọ visunnu etọn wẹ ewọ yin, e plọn tonusise sọn nuhe e jiya etọn lẹ mẹ.+  Podọ to whenue e ko yin hinhẹn zun pipé godo,+ e lẹzun aliho whlẹngán madopodo tọn na mẹhe to tonusena ẹn lẹpo,+ 10  na ewọ ko yin dide gbọn Jiwheyẹwhe dali nado yin yẹwhenọ daho de taidi Mẹlkizedẹki.+ 11  Mí tindo nususu nado dọ gando ewọ go, podọ e vẹawu nado basi zẹẹmẹ etọn, na mì ko lẹzun tótlitọ to sisè mìtọn mẹ wutu. 12  Na dile etlẹ yindọ mìwlẹ dona ko yin mẹplọntọ lẹ todin,* mìwlẹ gbẹsọ tindo nuhudo mẹde tọn nado plọn mì onú dodonu+ nulila wiwe Jiwheyẹwhe tọn lẹ tọn sọn bẹjẹeji, mì ko sọ gọyìgodo jẹ obá lọ mẹ nado tindo nuhudo anọ́sin tọn, e ma yin núdùdù sinsinyẹn tọn gba. 13  Na mẹdepope he zindonukọn nado to anọ́sin nù ma jẹakọ hẹ ohó dodo tọn lọ, na ovivu de wẹ ewọ.+ 14  Ṣigba, núdùdù sinsinyẹn yin mẹhe ko whẹ́n lẹ tọn, mẹhe ko plọn huhlọn wuntuntun tọn* yetọn gbọn yíyí i zan dali nado nọ yọ́n vogbingbọn to dagbe po oylan po ṣẹnṣẹn.

Nudọnamẹ Odò Tọn

Kavi “dẹdẹwiwa; jlẹkajininọ.”
Kavi “tasinyẹn.”
Kavi “ewọ lọsu tin to nuyiwadomẹji madogán edetiti tọn glọ.”
To paa mẹ, “tin to agbasalan mẹ.”
To paa mẹ, “sọgbe hẹ ojlẹ.”
Kavi “plọn nugopipe nulẹnpọn tọn.”