Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn | OWE WIWE LẸ—LẸDOGBEDEVOMẸ AIHỌN YỌYỌ TỌN

Heblu lẹ 13:1-25

NUHE E BẸHẸN LẸ

  • Tuli po nudọdomẹ tadona tọn po (1-25)

    • Ma wọnji johẹmẹ go blo (2)

    • Dike alọwle ni tindo gbégbò (4)

    • Setonuna mẹhe to anadenanu (7, 17)

    • Nọ basi avọ́sinsan pipà tọn (15, 16)

13  Mì zindonukọn to owanyi mẹmẹsunnu tọn mìtọn mẹ.+  Mì wọnji johẹmẹ* go blo,+ na gbọn enẹ dali, mẹdelẹ ko yí angẹli lẹ to mayọnẹn mẹ.+  Mì nọ hẹn mẹhe to gànpamẹ* lẹ do ayiha mẹ,+ taidi dọ mìlọsu ko yin zizedo gànpamẹ hẹ yé wẹ nkọ,+ podọ mẹhe to yinyin yasana lẹ, na mìlọsu lẹ gbẹ́ tin togbẹ̀ to aigba ji wutu.*  Mì gbọ alọwle ni tindo gbégbò to nukun mẹlẹpo tọn mẹ, podọ adọzan alọwle tọn yin hinhẹnflu blo,+ na Jiwheyẹwhe na dawhẹna mẹhe nọ joawuna fẹnnuwiwa zanhẹmẹ tọn* lẹ po ayọdetọ lẹ po.+  Mì gbọ aliho gbẹninọ tọn mìtọn ni tin matin wanyina akuẹ,+ na mì ni tindo pekọ po nuhe mì tindo* lẹ po.+ Na ewọ ko dọmọ: “Yẹn ma na jo mì do gbede podọ yẹn ma na gbẹ́ mì dai gbede.”+  Na mí nido sọgan gọ́ na adọgbigbo bo dọmọ: “Jehovah* wẹ alọgọtọ ṣie; yẹn ma na dibu. Etẹwẹ gbẹtọ sọgan wà na mi?”+  Mì nọ flin mẹhe to anadenanu to ṣẹnṣẹn mìtọn lẹ,+ mẹhe ko dọ ohó Jiwheyẹwhe tọn na mì lẹ, podọ dile mì to nulẹnpọn do kọdetọn walọyizan yetọn tọn ji, mì nọ hodo apajlẹ yise yetọn tọn.+  Nudopolọ wẹ Jesu Klisti yin to osọ he wayi, to egbé podọ kakadoi.  Mì yin hinhẹn buali gbọn nuplọnmẹ voovo lẹ po dehe mì ma jẹakọ hẹ lẹ po dali blo, na e pọnte dọ ahun ni yin hinhẹn lodo gbọn nukundagbe majẹhẹ dali kakati nido yin gbọn núdùdù* lẹ dali, ehe ma nọ hẹn ale wá na mẹhe yí yé do hẹn alọnu yede tọn ján lẹ.+ 10  Mí tindo agbà de he mẹhe nọ wà sinsẹ̀nzọn wiwe to gòhọ lọ mẹ lẹ ma tindo jlọjẹ nado dù sọn e ji.+ 11  Na gbonu osla lọ tọn wẹ agbasa kanlin he yẹwhenọ daho lọ nọ hẹn ohùn yetọn biọ ofi wiwe lọ mẹ taidi avọ́nunina ylando tọn lẹ tọn nọ yin fifiọ te.+ 12  Enẹwutu, Jesu lọsu jiya to gbonu họngbo tòdaho lọ tọn+ nado sọgan yí ohùn etọn titi do hẹn gbẹtọ lẹ zun wiwe.+ 13  Enẹwutu, mì gbọ mí ni yì ewọ dè to gbonu osla lọ tọn, bo hẹn vlẹko he ewọ ko hẹn lọ,+ 14  na mí ma tindo tòdaho he na gbọṣi aimẹ de tofi gba, ṣigba dehe ja lọ wẹ mí to tenọpọn vẹkuvẹku.+ 15  Mì gbọ mí ni nọ gbọn ewọ gblamẹ do basi avọ́sinsan pipà tọn hlan Jiwheyẹwhe to whepoponu,+ enẹ wẹ, sinsẹ́n nùflo mítọn tọn+ he nọ basi gbeyiyi gbangba tọn na oyín etọn.+ 16  Humọ, mì wọnji nado nọ wà dagbe podọ nado nọ má nuhe mì tindo lẹ hẹ mẹdevo lẹ blo,+ na avọ́sinsan mọnkọtọn lẹ go wẹ homẹ Jiwheyẹwhe tọn nọ hùn do taun.+ 17  Mì nọ setonuna mẹhe to anadenanu to ṣẹnṣẹn mìtọn lẹ+ bo nọ litai,+ na yewlẹ wẹ to mì* họ́ bo yọnẹn dọ yé na dogbè,+ na yé nido sọgan yí ayajẹ do wà ehe bọ e ma yin po azọ̀nwinwẹn po, na ehe na yin awugblenu na mì. 18  Mì nọ hodẹ̀ na mí, na mí deji dọ mí tindo ayihadawhẹnamẹnu dagbe de, bọ mí jlo nado nọ yinuwa po ahundopo po to nulẹpo mẹ.+ 19  Ṣigba, yẹn vẹ̀ mì vẹkuvẹku nado nọ hodẹ̀, na yẹn nido sọgan wá mì dè to madẹnmẹ. 20  Todin, na Jiwheyẹwhe jijọho tọn, mẹhe hẹn lẹngbọhọtọ daho+ lẹngbọ lẹ tọn, yèdọ Oklunọ mítọn Jesu gọwá ogbẹ̀ sọn oṣiọ lẹ mẹ po ohùn alẹnu madopodo de tọn po, 21  ni yí nudagbe lẹpo do hẹn mì penugo nado wà ojlo etọn, bo gbọn Jesu Klisti gblamẹ wà nuhe sọgbe taun to nukun etọn mẹ to mí mẹ, mẹhe gigo ni tin na kakadoi podọ doidoi. Niṣẹ.* 22  Todin, mẹmẹsunnu lẹ emi, yẹn vẹ̀ mì nado yí sọwhiwhe do dotoaina ohó tulinamẹ tọn ehe, na wekanhlanmẹ kleun de wẹ yẹn ko kàn hlan mì. 23  Yẹn jlo dọ mì ni yọnẹn dọ mẹmẹsunnu mítọn Timoti ko yin tuntundote. Eyin ewọ wá to madẹnmẹ, mí na zọnpọ wá mì dè. 24  Mì yí nudọdomẹ ṣie lẹ na mẹhe to anadenanu to ṣẹnṣẹn mìtọn lẹ podọ na omẹ wiwe lẹpo. Mẹhe tin to Itali+ lẹ yí nudọdomẹ yetọn hlan mì. 25  Nukundagbe majẹhẹ ni tin hẹ mìmẹpo.

Nudọnamẹ Odò Tọn

Kavi “homẹdagbe didohia jonọ lẹ.”
To paa mẹ, “mẹhe yè do gẹdẹ; mẹhe to gẹdẹ mẹ.”
Kavi vlavo, “taidi dọ mì to yaji hẹ yé wẹ nkọ.”
Pọ́n Zẹm.
Kavi “onú dintọn.” To paa mẹ, “[nuhe] tin to yakẹ.”
Pọ́n Nud. A5.
Enẹ wẹ, núdùdù he yè dosẹ́n etọn.
Kavi “alindọn mìtọn.”
Kavi “Amẹn” to Glẹkigbe mẹ.