Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Heblu lẹ 12:1-29

NUHE E BẸHẸN LẸ

  • Jesu, Mẹhe nọ hẹn yise mítọn zun pipé (1-3)

    • Aslọ daho kunnudetọ lẹ tọn (1)

  • Ma yí nukunpẹvi do pọ́n mẹplọnlọ Jehovah tọn blo (4-11)

  •  Nọ de ali jijlọ lẹ na afọ towe lẹ (12-17)

  • Dindọnsẹpọ Jelusalẹm olọn tọn (18-29)

12  Enẹwutu, to whelọnu lo, na mí tindo aslọ daho kunnudetọ lẹ tọn mọnkọtọn lẹdo mí pé wutu, mì gbọ mí nisọ ze onú pinpẹn lẹpo gọna ylando he nọ bẹpla mí po awubibọ po lọ dlan,+ mì sọ gbọ mí ni yí akọndonanu do họ̀n alewezun he yin zizedonukọnna mí lọ,+  dile mí to Jesu, yèdọ Afọzedaitọ-gán lọ podọ Mẹhe nọ hẹn yise mítọn zun pipé lọ pọ́n tlintlin.+ Na ayajẹ he yin zizedonukọnna ẹn wutu, e doakọnna yatin* de, bo ma hò winyan lọ pọ́n, bo ko sọ sinai to adusilọ ofìn Jiwheyẹwhe tọn mẹ.+  Na nugbo tọn, mì nọ yí sọwhiwhe do lẹn mẹhe ko doakọnna hodidọ agọjẹdomẹ tọn mọnkọtọn lẹ he wá sọn ylandonọ lẹ dè tọn pọ́n,+ yèdọ yé mẹhe gbọnmọ dali to awugblena yedelẹ, na onú nikaa ṣikọna mì bọ mì na jogbe.*+  To ahididi mìtọn sọta ylando enẹ mẹ, mì ma ko doakọnna todin kakajẹ ohùn mìtọn sinsọndai ji gba.  Podọ mì ko wọn tudohomẹnamẹ lọ he dọhona mì di ovi lẹ mlẹnmlẹn dọmọ: “Visunnu ṣie, a yí nukunpẹvi do pọ́n mẹplọnlọ Jehovah* tọn blo, mọjanwẹ a jogbe blo to whenue ewọ wọhẹ we;  na mẹhe Jehovah* yiwanna lẹ go wẹ e nọ domẹplọnlọ, na taun tọn, mẹdepope he e kẹalọyi taidi visunnu wẹ e nọ hò.”*+  Mìwlẹ dona doakọnnanu, na enẹ yin apadewhe mẹplọnlọ* he mì to mimọyi lọ tọn. Jiwheyẹwhe to nuyiwa hẹ mì taidi ovi lẹ.+ Na ovi tẹwẹ tin he otọ́ etọn ma nọ domẹplọnlọ e go?+  Ṣigba, eyin mìmẹpo ma ko mọ mẹplọnlọ ehe yí wẹ, be ayọvi lẹ wẹ mì na ko yin na nugbo tọn, bọ e ma yin ovi jọnun lẹ.  Humọ, otọ́ mítọn lẹ he yin gbẹtọvi* nọ domẹplọnlọ mí go to dai, bọ mí nọ na sisi yé. Be e ma jẹ dọ mí ni nọ litai humọ na Otọ́ ogbẹ̀ gbigbọmẹ tọn mítọn bo nọgbẹ̀ ya?+ 10  Na yewlẹ nọ domẹplọnlọ mí go na ojlẹ gli de sọgbe hẹ nuhe yọ́n to nukun yetọn mẹ, ṣigba ewọ nọ wàmọ na ale mítọn na mí nido sọgan lẹzun wiwe taidi ewọ.+ 11  Na nugbo tọn, mẹplọnlọ depope ma nọ sọawuhia nado yin ayajẹnu to whenue e tin-to-aimẹ, adavo awublanu;* ṣogan to godo mẹ, e nọ de sinsẹ́n jijọho tọn, yèdọ dodowiwa tọ́n na mẹhe e ko yin yíyí do plọn lẹ. 12  Enẹwutu, mì hẹn alọ he ko kuyẹ̀ lẹ po kligonu he ma sinyẹn lẹ po lodo,+ 13  bo nọ to ali jijlọ lẹ de na afọ mìtọn lẹ,+ na dehe kúsẹ́ nikaa ylan dogọ, ṣigba kakatimọ nido yin hinhẹn jẹgangan. 14  Mì nọ doafọna jijọho mẹ ninọ hẹ mẹlẹpo,+ gọna wiwe-yinyin,+ na matin ehe mẹdepope ma na mọ Oklunọ. 15  Mì nọ to aṣeji na mẹdepope nikaa gboawupo nado mọ nukundagbe majẹhẹ Jiwheyẹwhe tọn yí podọ na adọ̀ adínọ de nikaa tọ́n bo hẹn bẹwlu wá bosọ hẹn mẹsusu flu;+ 16  podọ mì payi dọ mẹde he nọ joawuna fẹnnuwiwa zanhẹmẹ tọn* kavi mẹdepope he ma yọ́n pinpẹn onú wiwe lẹ tọn taidi Esau, mẹhe yí núdùdù dopo do diọ jlọjẹ viplọnji tọn etọn tin to ṣẹnṣẹn mìtọn blo.+ 17  Na mì yọnẹn dọ to godo mẹ, to whenue ewọ jlo nado dugu dona lẹ tọn, e yin gbigbẹdai; na dile etlẹ yindọ e yí dasin do dín vẹkuvẹku nado diọ linlẹn otọ́ etọn tọn,+ e yin to ovọ́ mẹ.* 18  Na mì ma ko dọnsẹpọ nude he sọgan yin alọdo e go,+ he yè ko domiyọ́n,+ he gọ́ na aslọ titli, zinvlu gọ́ngọ́n, yujẹhọn,+ 19  kúnkún opẹ̀n de tọn+ po ogbè hodidọ lẹ tọn po,+ bọ to whenue gbẹtọ lẹ sè ehe, yé vẹvẹ dọ ohó depope ni masọ yin didọna yé dogọ ba blo.+ 20  Na gbedide lọ vẹawuna yé taun: “Eyin agbasa kanlin de tọn tlẹ jẹ osó lọ go, e dona yin zannu dlan do hù.”+ 21  Humọ, nuhe yin mimọ lọ dobu sọmọ bọ Mose dọmọ: “Yẹn dibu bo to sisọsisọ.”+ 22  Ṣigba, mìwlẹ ko dọnsẹpọ Osó Ziọni de+ podọ tòdaho Jiwheyẹwhe ogbẹ̀nọ lọ tọn, yèdọ Jelusalẹm olọn tọn,+ podọ angẹli fọtọ́n ao lẹ, 23  he pli dopọ,+ podọ agun plọnji lọ tọn, yinkọ mẹhe tọn ko yin kinkandai to olọn mẹ lẹ, gọna Jiwheyẹwhe Whẹdatọ mẹlẹpo tọn,+ podọ ogbẹ̀ gbigbọmẹ tọn+ dodonọ he ko yin hinhẹn zun pipé lẹ tọn,+ 24  podọ Jesu whẹgbọtọ+ alẹnu yọyọ de tọn,+ po ohùn he ewọ húnhún do mí ji lọ po, ehe to hodọ to aliho dagbe de mẹ hú ohùn Abẹli tọn.+ 25  Mì hẹn diun dọ mì gboawupo nado* dotoaina mẹhe to hodọ lọ blo. Na eyin yé mẹhe gboawupo nado dotoaina mẹlọ he na avase Jiwheyẹwhe tọn to aigba ji lẹ ma họ̀ngán, lehe e na vẹawuna mí nado họ̀ngán do sọ eyin mí ma dotoaina mẹhe to hodọ sọn olọn mẹ lọ!+ 26  To ojlẹ enẹ mẹ, ogbè etọn whàn aigba,+ ṣigba ewọ ko dopagbe todin dọmọ: “Whladopo dogọ, yẹn na whàn, e ma yin aigba kẹdẹ ṣigba olọn lọsu ga.”+ 27  Todin, hogbe lọ “whladopo dogọ” zẹẹmẹdo didesẹ nuhe yin whinwhàn lẹ tọn—yèdọ nuhe ko yin bibasi lẹ*—na nuhe ma yin whinwhàn lẹ nido sọgan gbọṣi aimẹ. 28  Enẹwutu, mimọ dọ míwlẹ na mọ Ahọluduta he ma sọgan yin whinwhàn de yí, mì gbọ mí ni zindonukọn nado to vivi nukundagbe majẹhẹ tọn dù, gbọn ehe gblamẹ mí sọgan yí budisi Jiwheyẹwhe po sisi sisosiso po do basi sinsẹ̀nzọn wiwe na Jiwheyẹwhe to aliho he yin alọkẹyi de mẹ. 29  Na miyọ́n nuvasudotọ de wẹ Jiwheyẹwhe mítọn yin.+

Nudọnamẹ Odò Tọn

Pọ́n Zẹm.
Kavi “bọ agbọ́ na pé alindọn mìtọn.”
Pọ́n Nud. A5.
Pọ́n Nud. A5.
Kavi “go wẹ e nọ domẹplọnlọ.”
Kavi “azọ́nplọnmẹ.”
To paa mẹ, “otọ́ mítọn lẹ to agbasalan-liho.”
Kavi “homẹgblenu.”
Pọ́n Zẹm.
To paa mẹ, “e ma mọ dotẹnmẹ etọn.”
Kavi “ma nado nọ dín whẹjijọ nado; mì gbẹ́ nado.”
Enẹ wẹ, nuhe mẹdevo de basi bọ e ma yin Jiwheyẹwhe wẹ basi lẹ.