Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn | OWE WIWE LẸ—LẸDOGBEDEVOMẸ AIHỌN YỌYỌ TỌN

Heblu lẹ 10:1-39

NUHE E BẸHẸN LẸ

  • Avọ́sinsan kanlin tọn ma nọ de ylando sẹ̀ (1-4)

    • Osẹ́n, oyẹ̀ de (1)

  • Klisti basi avọ́sinsan dopo podọ kakadoi (5-18)

  • Aliho yọyọ podọ ogbẹ̀nọ de (19-25)

    • Ma gbẹkọ opli mítọn lẹ go blo (24, 25)

  • Avase gando ylando sọn ojlo mẹ wá go (26-31)

  • Jidide po yise po yíyí do doakọnnanu (32-39)

10  Na to whenuena e yindọ Osẹ́n lọ tindo oyẹ̀+ nudagbe he ja lẹ tọn,+ ṣigba bọ e ma yin nulọ lẹ lọsu jọnun, e* ma sọgan gbọn avọ́sinsan dopolọ lẹ bibasi mapote sọn owhe de mẹ jẹ owhe de mẹ dali hẹn mẹhe to dindọnsẹpọ Jiwheyẹwhe lẹ zun pipé gbede gba.+  Eyin e ma yinmọ, be avọ́sinsan lọ lẹ ma na ko doalọte, to whenuena e yindọ mẹhe to sinsẹ̀nzọn wiwe basi, he ko yin kiklọ́we whladopo lẹ ma nasọ nọ mọ yedelẹ taidi ylandonọ lẹ ba?  Kakatimọ, avọ́sinsan ehelẹ nọ hẹn ylando lẹ wá oflin mẹ sọn owhe de mẹ jẹ owhe de mẹ,+  na e ma yọnbasi na ohùn oyìnsú lẹ tọn podọ gbọgbọẹ lẹ tọn nado de ylando lẹ sẹ̀ gba.  Enẹwutu, to whenue ewọ wá aihọn mẹ, e dọmọ: “‘Hiẹ ma jlo avọ́sinsan po avọ́nunina po, ṣigba hiẹ wleawu agbasa de tọn na mi.  Hiẹ ma kẹalọyi avọ́nunina mimẹ̀ blebu po avọ́nunina ylando tọn lẹ po.’+  To whenẹnu, yẹn dọmọ: ‘Pọ́n! Yẹn ko wá (to owe-hihá lọ mẹ* wẹ e ko yin kinkan do gando go e) nado wà ojlo towe, Jiwheyẹwhe E.’”+  To whenue e ko dọ jẹnukọn dọmọ: “Hiẹ ma jlo kavi kẹalọyi avọ́sinsan lẹ po avọ́nunina lẹ po gọna avọ́nunina mimẹ̀ blebu po avọ́nunina ylando tọn lẹ po”—yèdọ avọ́sinsan lẹ he nọ yin bibasi sọgbe hẹ Osẹ́n lọ—  enẹgodo e dọmọ: “Pọ́n! Yẹn ko wá nado wà ojlo towe.”+ Ewọ hẹn nuhe yin tintan lọ zun ovọ́ na e nido sọgan do nuhe yin awetọ lọ ai. 10  Gbọn “ojlo”+ ehe lọ dali wẹ míwlẹ ko yin hinhẹn zun wiwe gbọn agbasa Jesu Klisti tọn he yin yíyí do sanvọ́ whladopo podọ kakadoi gblamẹ.+ 11  Humọ, yẹwhenọ dopodopo wẹ nọ yì otẹn etọn mẹ sọn azán de ji jẹ azán de ji nado wà lizọnyizọn wiwe*+ podọ nado basi avọ́sinsan dopolọ lẹ gbọzangbọzan,+ ehe ma sọgan de ylando lẹ sẹ̀ mlẹnmlẹn gbede.+ 12  Ṣigba, dawe ehe basi avọ́sinsan dopo na ylando lẹ kakadoi bo sinai to adusilọ Jiwheyẹwhe tọn mẹ,+ 13  sọn ojlẹ enẹ mẹ sọyi, e to tenọpọn whenue kẹntọ etọn lẹ na yin yíyí do basi tokloafọligbe afọ etọn lẹ tọn.+ 14  Na gbọn avọ́sinsan dopo bibasi dali wẹ ewọ ko hẹn mẹhe to yinyin hinhẹn zun wiwe lẹ zun pipé+ kakadoi. 15  Humọ, gbigbọ wiwe sọ dekunnuna mí ga, na to whenue e ko dọ dọ: 16  “‘Ehe wẹ alẹnu he yẹn na basi hẹ yé to azán enẹlẹ godo,’ wẹ Jehovah* dọ. ‘Yẹn na yí osẹ́n ṣie lẹ do ahun yetọn mẹ, podọ ayiha yetọn mẹ wẹ yẹn na kàn yé do.’”+ 17  Enẹgodo, e dọmọ: “Yẹn ma nasọ flin ylando yetọn lẹ podọ sẹ́nhẹngba yetọn lẹ ba.”+ 18  Todin, fihe jona ehelẹ tọn tin te, avọ́nunina de masọ tin na ylando ba. 19  Enẹwutu, mẹmẹsunnu lẹ emi, to whenuena e yindọ míwlẹ tindo adọgbigbo* dọ aliho lọ na planmẹ yì ofi wiwe lọ+ mẹ gbọn ohùn Jesu tọn dali, 20  ehe ewọ ko hundote* na mí taidi aliho yọyọ podọ ogbẹ̀nọ de gbọn họmẹgbòvọ̀ lọ gblamẹ,+ enẹ wẹ agbasalan etọn, 21  podọ na míwlẹ tindo yẹwhenọ daho de do owhé Jiwheyẹwhe tọn ji wutu,+ 22  mì gbọ mí ni yí ahun jijlọ po yise he lodo de po do dọnsẹpọ Jiwheyẹwhe, na ahun mítọn ko yin kiklọ́we* sọn ayihadawhẹnamẹnu ylankan de mẹ+ podọ agbasa mítọn ko yin lilẹ̀wé po osin he wé po.+ 23  Mì gbọ mí ni tẹdo gbeyiyi gbangba tọn todido mítọn tọn go gligli bo ma tindo ayihaawe,+ na nugbonọ wẹ mẹhe dopagbe lọ. 24  Podọ mì gbọ mí ni nọ na ayidonugo ode awetọ* nado nọ whàn* mídelẹ hlan owanyi po azọ́n dagbe lẹ po kọ̀n,+ 25  e ma yin nado nọ gbẹkọ pipli dopọ mítọn lẹ go,+ dile mẹdelẹ tindo aṣa lọ do gba, ṣigba nado nọ na tuli ode awetọ,+ podọ humọ dile mì mọdọ azán lọ to dindọnsẹpọ.+ 26  Na eyin mí nọ hẹn ylando zun aṣa sọn ojlo mẹ wá to whenue mí ko mọ oyọnẹn he pegan nugbo lọ tọn yí godo,+ avọ́sinsan devo depope ma pò na ylando mítọn lẹ ba,+ 27  ṣigba teninọpọn whẹdida to obu mẹ wẹ yin nuhe pò gọna homẹgble sinsinyẹn he na hù mẹhe yin agọjẹdomẹtọ lẹ sudo.+ 28  Mẹdepope he ko gbẹkọ Osẹ́n Mose tọn go nọ kú matin lẹblanu, gbọn kunnudide omẹ awe kavi atọ̀n tọn gblamẹ.+ 29  Yasanamẹ he sinyẹn taun humọ tẹwẹ mìwlẹ lẹndọ mẹde na jẹna, eyin ewọ tùnafọ Visunnu Jiwheyẹwhe tọn ji bo pọ́n nuhọakuẹ ohùn alẹnu+ he hẹn ewọ lọsu titi zun wiwe lọ tọn hlan di onú tata, bosọ yí wangbẹna do vlẹ gbigbọ nukundagbe majẹhẹ tọn lọ kò?+ 30  Na mí yọ́n Mẹlọ he dọmọ: “Ṣie wẹ ahọsuyi; yẹn na suahọ etọn.” Podọ ga: “Jehovah* na dawhẹna omẹ etọn lẹ.”+ 31  Nudobu de wẹ e yin nado jai jẹ alọ Jiwheyẹwhe ogbẹ̀nọ lọ tọn lẹ mẹ. 32  Ṣigba, mì nọ to azán he wayi lẹ flin, yèdọ ojlẹ lọ he mẹ mì jiya bo doakọnna whlepọn sinsinyẹn lẹ, to whenue hinhọ́n ko họ́n do mì ji+ godo. 33  To whedelẹnu, mì nọ yin nukunbiana bo nọ yin vivlẹko to gbangba,* podọ to whedelẹnu mì nọ jiya dopọ hẹ* mẹhe to numimọ nudopolọ tọn tindo lẹ. 34  Na mì do awuvẹmẹ hia mẹhe tin to gànpamẹ lẹ bosọ yí ayajẹ do kẹalọyi to whenue nutindo mìtọn lẹ yin bibẹ yì,+ to yinyọnẹn mẹ dọ mìlọsu tindo nutindo he yọ́n hugan bo nọ gbọṣi aimẹ tẹgbẹ de.+ 35  Enẹwutu, mì hẹn adọgbigbo* mìtọn bu blo, ehe na hẹn ale daho de wá.+ 36  Na mì tindo nuhudo akọndonanu tọn+ nado sọgan mọ hẹndi opagbe lọ tọn yí to whenue mì ko wà ojlo Jiwheyẹwhe tọn godo. 37  Na “whenu vude dogọ” wẹ e pò,+ bọ “ewọ he ja lọ na wá bo ma na dọngbàn.”+ 38  “Ṣigba, dodonọ ṣie na nọgbẹ̀ gbọn yise etọn dali,”+ podọ, “eyin ewọ joagọyigodo, yẹn* ma na tindo homẹhun to ewọ mẹ.”+ 39  Todin, míwlẹ ma yin mẹhe nọ joagọyigodo gba, na ehe nọ hẹn dindọn wá,+ ṣigba míwlẹ tindo yise, na ehe nọ hẹn mí* dogbẹ̀.

Nudọnamẹ Odò Tọn

Kavi vlavo, “gbẹtọ lẹ.”
To paa mẹ, “to adà owe lọ tọn mẹ.”
Kavi “wà sinsẹ̀nzọn gbangba tọn.”
Pọ́n Nud. A5.
Kavi “jidide.”
To paa mẹ, “doai.”
To paa mẹ, “húnhún,” enẹ wẹ, ohùn Jesu tọn he yin yiyizan.
Kavi “hò ode awetọ tọn pọ́n.”
Kavi “dozolanmẹna.”
Pọ́n Nud. A5.
To paa mẹ, “yin didehia taidi to nupọntẹn.”
Kavi “nọ ṣite to apá na.”
To paa mẹ, “awuvivo hodidọ tọn.”
Kavi “alindọn ṣie.”
Kavi “alindọn mítọn.”