Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn | OWE WIWE LẸ—LẸDOGBEDEVOMẸ AIHỌN YỌYỌ TỌN

Galatianu lẹ 5:1-26

NUHE E BẸHẸN LẸ

  • Mẹdekannujẹ Klistiani tọn (1-15)

  • Zọnlinzinzin gbọn gbigbọ dali (16-26)

    • Azọ́n agbasalan tọn lẹ (19-21)

    • Sinsẹ́n gbigbọ tọn (22, 23)

5  Na mẹdekannujẹ mọnkọtọn wutu wẹ Klisti tún mí dote. Enẹwutu mì nọtegli,+ mì sọ dike bo yin ginglọndo zẹgẹ afanumẹ-yinyin tọn mẹ ba blo.+  Mì doayi e go! Yẹn, Paulu, to didọna mì dọ eyin mì yin adàgbona, Klisti ma na yin ale de na mì.+  Whladopo dogọ, yẹn dekunnu hlan mẹdepope he yin adàgbona dọ ewọ tin to dandannu glọ nado yìn Osẹ́n lọ blebu.+  Mì ko yin kinklan sọn Klisti go, mì mẹhe to tintẹnpọn nado yin lilá taidi dodonọ gbọn osẹ́n dali lẹ;+ mì ko buali sọn nukundagbe majẹhẹ etọn mẹ.  Na míwlẹ tọn, mí gbọn gbigbọ dali yí jejejininọ do to tenọpọn dodowiwa he mí to todo, ehe nọ wá sọn yise mẹ.  Na to kọndopọ mẹ hẹ Klisti Jesu, adàgbigbo kavi adàmagbo ma yin nude,+ adavo yise he to azọ́nwa gbọn owanyi gblamẹ.  Mì to wezundo ganji dai.+ Mẹnu wẹ glọnalina mì ma nado to tonusena nugbo lọ zọnmii?  Linlẹndiọnamẹ wunmẹ ehe ma wá sọn Mẹlọ he to mì ylọ dè gba.  Otọ́n vude wẹ nọ hẹn linfin yinyan lẹpo fọ́n.+ 10  Yẹn deji dọ mìwlẹ he tin to kọndopọ mẹ hẹ Oklunọ+ ma na wá lẹnnu to aliho devo mẹ; ṣigba ewọ he to tukla+ hẹn biọ mì mẹ na mọ whẹgbledomẹ he e jẹna lọ yí, mahopọnna mẹhe nkọ ewọ sọgan yin. 11  Na yẹn tọn, mẹmẹsunnu lẹ emi, eyin yẹn gbẹ́ pò to yẹwheho adàgbigbo tọn dọ, naegbọn yè pò to homẹkẹndo mi? Eyin mọ wẹ, be zannu ahlida tọn depope he gando yatin*+ lọ go ko yin didesẹ. 12  Yẹn jlo dọ mẹhe to tintẹnpọn nado hẹn bẹwlu wá mì mẹ lẹ ni tlẹ sá yedelẹ.* 13  Mẹmẹsunnu lẹ emi, mẹdekannujẹ mẹ wẹ mì yin yiylọ do; etomọṣo mì yí mẹdekannujẹ ehe zan taidi dotẹnmẹ hundote de nado doafọna ojlo agbasalan tọn lẹ blo,+ ṣigba gbọn owanyi dali mì nọ wazọ́n na ode awetọ taidi afanumẹ.+ 14  Na Osẹ́n lọ blebu yin bibladopọ do gbedide dopo mẹ, enẹ wẹ: “Hiẹ dona yiwanna kọmẹnu towe di dewe.”+ 15  Nalete, eyin mì to adúhẹn bosọ to ode awetọ mìtọn tlẹndu zọnmii,+ mì payi na mì nikaa hù ode awetọ mìtọn sudo.+ 16  Ṣigba yẹn dọmọ, Mì to zọnlinzin gbọn gbigbọ dali zọnmii,+ mì masọ to na hẹn ojlo agbasalan tọn depope di.+ 17  Na agbasalan jẹagọdo gbigbọ to ojlo etọn mẹ, podọ gbigbọ jẹagọdo agbasalan; onú ehelẹ jẹagọdo yedelẹ, sọmọ bọ nuhe mìwlẹ jlo na taun tọn nado wà lẹ, mì ma nọ wà.+ 18  Humọ, eyin gbigbọ wẹ to anadena mì, be mì ma tin to osẹ́n glọ. 19  Todin, azọ́n agbasalan tọn lẹ yin yinyọnẹn hezeheze, podọ ehelẹ wẹ fẹnnuwiwa zanhẹmẹ tọn,*+ mawé, walọ gblezọn tasinsinyẹn tọn,*+ 20  boṣiọ-sinsẹ̀n, afinyọnnuwiwa,*+ wangbẹnamẹ, avùn, awuwhàn, adánjijẹ whẹwhẹ, wiwọ́, kinklan, plọngiglọ, 21  nuvẹun, ahànnu-zẹjlẹgo,+ agọ́-gànyìn* po onú mọnkọ lẹ po.+ Yẹn to avase na mì jẹnukọn gando onú ehelẹ go, kẹdẹdile yẹn ko na avase mì do dai, dọ mẹhe nọ wà onú mọnkọtọn lẹ ma na dugu Ahọluduta Jiwheyẹwhe tọn.+ 22  To alọ devo mẹ, sinsẹ́n gbigbọ tọn wẹ owanyi, ayajẹ, jijọho, homẹfa,* homẹdagbe, dagbewà,+ yise, 23  walọmimiọn, mawazẹjlẹgo.+ Osẹ́n depope ma tin he jẹagọdo onú mọnkọtọn lẹ. 24  Humọ, mẹhe yin Klisti Jesu tọn lẹ ko whè agbasalan do atin go to pọmẹ hẹ numọtolanmẹ zogbe po ojlo etọn lẹ po.+ 25  Eyin mí to gbẹnọ gbọn gbigbọ dali, mì gbọ mí nisọ to zọnlinzin zọnmii to aliho he sọgbe mẹ gbọn gbigbọ dali ga.+ 26  Mì dike mí dín gigo ovọ́,+ to agbàwhinwhlẹn finfọndote to ode awetọ mítọn ṣẹnṣẹn,+ to nuvẹun tintindo na ode awetọ mẹ blo.

Nudọnamẹ Odò Tọn

Pọ́n Zẹm.
Kavi “lẹzun ojọ̀ lẹ,” bọ gbọnmọ dali yé ma na pegan nado yìn osẹ́n lọ he yé to avùnlọyina.
Glẹki, pọlnẹia. Pọ́n Zẹm.
Kavi “walọ he huwinyan.” Glẹki, asẹlgeia. Pọ́n Zẹm.
Kavi “owọ́n.”
Kavi “paṣadudu.”
Kavi “linsinsinyẹn.”