Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Galatianu lẹ 4:1-31

NUHE E BẸHẸN LẸ

  • Mì ma yin afanumẹ lẹ, amọ́ ovi lẹ (1-7)

  • Paulu hanú na Galatianu lẹ (8-20)

  • Hagali po Sala po: alẹnu 2 (21-31)

    • Jelusalẹm he to aga to edekannu (26)

4  Todin, yẹn dọ dọ dile e na dẹnsọ bọ gudutọ lọ na gbẹ́ pò to yọpọvu de yin, ewọ ma gbọnvo to aliho depope mẹ na afanumẹ de, dile etlẹ yindọ ewọ wẹ oklunọ nulẹpo tọn,  ṣigba ewọ tin to nukunpedonugotọ lẹ po họ̀nkọnsi lẹ po glọ kakajẹ azán he otọ́ etọn ko de jẹnukọn lọ gbè.  Mọdopolọ, to whenue mí pò to yọpọvu, mílọsu lẹ yin hinhẹn zun afanumẹ gbọn onú dodonu tọn aihọn tọn lẹ dali.+  Ṣigba, whenuena ojlẹ dide lọ pé, Jiwheyẹwhe do Visunnu etọn hlan, mẹhe yin jiji gbọn yọnnu de+ dali bosọ tin to osẹ́n glọ,+  na ewọ nido sọgan tún mẹhe to osẹ́n glọ lẹ dote gbọn hihọ̀ yé dali,+ na míwlẹ nido sọgan yin sisọdodovi.+  Todin, na ovi wẹ mì yin wutu, Jiwheyẹwhe ko do gbigbọ+ Visunnu etọn tọn hlan ahun mítọn mẹ+ bọ e yí ogbè lélé do dawhá dọmọ: “Abba,* Otọ́!”+  Enẹwutu, hiẹ masọ yin afanumẹ de ba ṣigba ovi de; to whelọnu lo, eyin ovi de wẹ hiẹ yin, be gudutọ de wẹ hiẹ sọ yin gbọn Jiwheyẹwhe dali.+  Etomọṣo, to whenue mìwlẹ ma ko yọ́n Jiwheyẹwhe, whenẹnu, mìwlẹ yin afanumẹ na nuhe ma yin yẹwhe nujọnu tọn lẹ.  Ṣigba, todin he mìwlẹ ko wá yọ́n Jiwheyẹwhe, kavi todin he mì ko wá yin yinyọnẹn gbọn Jiwheyẹwhe dali, naegbọn mìwlẹ sọ vọ́ to lilẹhlan onú dodonu tọn lẹ he yin ovọ́+ po onú tata lẹ po kọ̀n bosọ jlo nado yin afanumẹ na yé whladopo dogọ?+ 10  Mìwlẹ nọ yí sọwhiwhe do payi azán lẹ, osun lẹ, osaa*+ lẹ po owhe lẹ po go. 11  Obu mìtọn to dìdì mi, dọ to aliho de mẹ, vivẹnudido ṣie do ota mìtọn mẹ ni ma yin to ovọ́ mẹ blo. 12  Mẹmẹsunnu lẹ emi, yẹn vẹ̀ mì dọ mì ni lẹzun yẹn nkọ, na yẹnlọsu ko nọ lehe mìwlẹ te dai ga.+ Mì ma waylan de do mi. 13  Ṣigba, mìwlẹ yọnẹn dọ azọ̀njijẹ ṣie to agbasa mẹ wẹ hùn dotẹnmẹ dote na mi to tintan whenu nado lá wẹndagbe lọ na mì. 14  Podọ dile azọ̀njijẹ ṣie to agbasa mẹ tlẹ yin whlepọn de na mì, mìwlẹ ma yinuwa hẹ mi po vlẹko po kavi po wangbẹna po* gba; ṣigba mì kẹalọyi mi taidi angẹli Jiwheyẹwhe tọn de, taidi Klisti Jesu. 15  Fie wẹ ayajẹ he mì tindo enẹ te? Na yẹn dekunnu gando mì go dọ, eyin e ko yọnbasi wẹ, mìwlẹ na ko de nukun mìtọn lẹ bo yí yé na mi.+ 16  Todin, be yẹn ko lẹzun kẹntọ mìtọn na yẹn dọ nugbo na mì wutu wẹ ya? 17  Yé nọ yí zohunhun do dọ̀n mì, ṣigba e ma yin na lẹndai dagbe de wutu; yé jlo na klan mì sọn dè e, na mìwlẹ nido to jejeji nado hodo yé wẹ. 18  Ṣigba, e na yọ́n dọ yè ni nọ yí zohunhun do dín mì na lẹndai dagbe wutu to whepoponu, bọ e ma na yin to whenue yẹn tin to mì dè kẹdẹ, 19  yọpọ ṣie lẹ emi,+ mì mẹhe yẹn gbẹsọ to awufiẹsa vijiji tọn mẹ na kakajẹ whenue Klisti na yin awuwlena do mì mẹ lẹ. 20  E na ko jlo mi nado tin to mì dè todin bo nado dọhona mì to aliho he gbọnvo de mẹ, na yẹn jẹflumẹ na mìtọn wutu. 21  Mì dọna mi, mì mẹhe jlo nado to osẹ́n glọ lẹ, Be mìwlẹ ma sè nuhe Osẹ́n lọ dọ ya? 22  Di apajlẹ, e yin kinkandai dọ Ablaham tindo visunnu awe, dopo yin gbọn deviyọnnu lọ+ dali bọ awetọ yin gbọn yọnnu he to edekannu lọ+ dali; 23  ṣigba na taun tọn, dehe yin deviyọnnu lọ tọn yin jiji to jọwamọ-liho*+ bọ awetọ lọ he yin yọnnu he to edekannu lọ tọn yin gbọn opagbe de gblamẹ.+ 24  Onú ehelẹ sọgan tindo zẹẹmẹ yẹhiadonu tọn de;* na yọnnu ehelẹ nọtena alẹnu awe, dehe sọn Osó Sinai tọn ji,+ he ji ovi lẹ nado yin afanumẹ, podọ enẹ wẹ Hagali. 25  Todin, Hagali nọtena Sinai,+ yèdọ osó de to Alabia, podọ ewọ nọtena Jelusalẹm egbehe tọn, na ewọ po ovi etọn lẹ po yin afanumẹ lẹ. 26  Ṣigba, Jelusalẹm he to aga lọ tin to edekannu, podọ ewọ wẹ onọ̀ mítọn. 27  Na e ko yin kinkandai dọmọ: “Jaya, hiẹ yọnnu wẹnsinọ he ma jivi; yí ayajẹ do dawhá, hiẹ yọnnu he ma mọ awufiẹsa vijiji tọn; na ovi yọnnu he ko jẹvọ́ lọ tọn lẹ sù taun hú dehe yin yọnnu he tindo asu lọ tọn lẹ.”+ 28  Todin, mẹmẹsunnu lẹ emi, míwlẹ wẹ ovi dopagbe lẹ kẹdẹdile Isaki te do.+ 29  Ṣigba, kẹdẹdile e te do to whenẹnu bọ dehe yin jiji to jọwamọ-liho* jẹ homẹkẹndo dehe yin jiji to gbigbọ-liho ji,+ mọ wẹ e te do todin ga.+ 30  Etomọṣo, etẹwẹ Owe-wiwe dọ? “De deviyọnnu lọ po visunnu etọn po tọ́n, na visunnu deviyọnnu lọ tọn ma na yin gudutọ hẹ visunnu yọnnu he to edekannu lọ tọn to aliho depope mẹ.”+ 31  Enẹwutu, mẹmẹsunnu lẹ emi, míwlẹ ma yin ovi deviyọnnu de tọn, ṣigba yọnnu he to edekannu lọ tọn lẹ.

Nudọnamẹ Odò Tọn

Hogbe Alamaikigbe tọn de he zẹẹmẹdo “Otọ́ E.”
Kavi “ojlẹ dide.”
Kavi “túntán do go e.”
To paa mẹ, “sọgbe hẹ agbasalan.”
Kavi “Onú ehelẹ nọtena wadohia yẹhiadonu tọn de.”
To paa mẹ, “sọgbe hẹ agbasalan.”