Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn | OWE WIWE LẸ—LẸDOGBEDEVOMẸ AIHỌN YỌYỌ TỌN

Galatianu lẹ 1:1-24

NUHE E BẸHẸN LẸ

  • Nudọdomẹ lẹ (1-5)

  • Wẹndagbe devo de ma tin (6-9)

  • Wẹndagbe he lá Paulu te wá sọn Jiwheyẹwhe dè (10-12)

  • Didiọ Paulu tọn; nuhe e wà wayi lẹ (13-24)

1  Paulu, apọsteli de, he ma yin sọn gbẹtọ lẹ dè mọjanwẹ e ma yin gbọn gbẹtọ de gblamẹ, ṣigba gbọn Jesu Klisti+ podọ Jiwheyẹwhe Otọ́ lọ+ gblamẹ, mẹhe fọ́n ẹn sọn oṣiọ lẹ mẹ,  podọ mẹmẹsunnu he tin to dè e lẹpo, to wekanhlan agun Galatia tọn lẹ:  Na nukundagbe majẹhẹ po jijọho po ni tin hẹ mì sọn Jiwheyẹwhe Otọ́ mítọn podọ Oklunọ Jesu Klisti dè.  Ewọ ze ede jo na ylando mítọn lẹ,+ na e nido sọgan whlẹn mí sọn titonu* ylankan+ ehe mẹ sọgbe hẹ ojlo Jiwheyẹwhe podọ Otọ́ mítọn tọn,+  mẹhe tọn gigo yin kakadoi podọ doidoi. Niṣẹ.*  E paṣa mi dọ mìwlẹ to Mẹlọ he yí nukundagbe majẹhẹ Klisti tọn do ylọ mì jodo po awuyiya po bo to lilẹhlan wẹndagbe wunmẹ devo kọ̀n.+  E ma yindọ devo de tin wẹ gba; ṣigba mẹdelẹ wẹ to bẹwlu hẹn biọ mì mẹ+ bo to jijlo nado sọtadona wẹndagbe lọ he gando Klisti go.  Ṣigba, eyin míwlẹ kavi angẹli de sọn olọn mẹ tlẹ lá nudevo na mì taidi wẹndagbe bọ e gbọnvona wẹndagbe he mí ko lá na mì, mì gbọ ewọ ni yin mẹhodẹ̀do.  Dile mí ko dọ do wayi, todin yẹn to vivọdọ whladopo dogọ, Mẹdepope he to nudevo lá na mì taidi wẹndagbe gbọnvona nuhe mìwlẹ ko kẹalọyi, mì gbọ ewọ ni yin mẹhodẹ̀do. 10  Na nugbo tọn, be gbẹtọ lẹ wẹ yẹn to tintẹnpọn nado diọlinlẹnna ya, kavi Jiwheyẹwhe? Kavi be gbẹtọ lẹ wẹ yẹn to tintẹnpọn nado hẹn homẹhun ya? Eyin yẹn gbẹ́ to homẹ gbẹtọ lẹ tọn hẹn hùn, yẹn ma na yin afanumẹ Klisti tọn. 11  Mẹmẹsunnu lẹ emi, yẹn jlo dọ mì ni yọnẹn dọ wẹndagbe lọ he yẹn lá na mì ma wá sọn gbẹtọ dè;+ 12  na yẹn ma mọ ẹn yí sọn gbẹtọ dè, mọ e ma yin gbẹtọ wẹ plọn ẹn mi, adavo gbọn osọhia Jesu Klisti tọn de dali. 13  Na nugbo tọn, mìwlẹ ko sè gando walọyizan ṣie dai tọn go to Sinsẹ̀n Ju lẹ tọn+ mẹ, dọ yẹn nọ dohomẹkẹn agun Jiwheyẹwhe tọn sinsinyẹn* bo nọ tẹnpọn nado sukúndona ẹn;+ 14  podọ yẹn to nukọnyi taun to Sinsẹ̀n Ju lẹ tọn mẹ hugan susu mẹhe to ohá ṣie ji to akọta ṣie mẹ lẹ tọn, na yẹn yin zohunhunnọ tlala na aṣa otọ́ ṣie lẹ tọn lẹ wutu.+ 15  Ṣigba, to whenue Jiwheyẹwhe, mẹhe hẹn mi nado yin jiji bo ylọ mi gbọn nukundagbe majẹhẹ etọn gblamẹ,+ mọdọ e yọ́n 16  nado do Visunnu etọn hia gbọn yẹn gblamẹ, na yẹn nido sọgan lá wẹndagbe lọ gando ewọ go na akọta lẹ,+ yẹn ma kàn ayinamẹ biọ mẹde* to afọdopolọji; 17  mọdopolọ, yẹn ma hẹji yì Jelusalẹm, yèdọ yì mẹhe yin apọsteli jẹnukọnna mi lẹ dè, ṣigba n’yì Alabia, enẹgodo n’lẹkọwa Damasku.+ 18  To enẹgodo, to owhe atọ̀n godo, yẹn hẹji yì Jelusalẹm+ nado dla Kefa*+ pọ́n, yẹn sọ nọ e dè na azán 15. 19  Ṣigba, n’ma mọ apọsteli devo de, adavo Jakọbu+ nọvisunnu Oklunọ tọn kẹdẹ. 20  Todin, gando nuhe yẹn to owe etọn kàn hlan mì lẹ go, yẹn jlo na hẹn mì deji to Jiwheyẹwhe nukọn dọ yẹn ma to lalodo. 21  To enẹgodo, yẹn yì agbegbe Silia po Silisia po tọn lẹ ji.+ 22  Ṣigba, agun he tin to Jude lẹ he to kọndopọ mẹ hẹ Klisti ma ko mọ mi nukun sọ nukun pọ́n. 23  Yé nọ sè poun wẹ dọ: “Dawe he nọ dohomẹkẹn mí dai+ lọ ko to wẹndagbe lọ lá todin gando yise he ewọ ko tẹnpọn nado sukúndona dai lọ go.”+ 24  Enẹwutu, yé jẹ gigopana Jiwheyẹwhe ji na yẹn tọn wutu.

Nudọnamẹ Odò Tọn

Kavi “ojlẹ.” Pọ́n Zẹm.
Kavi “Amẹn” to Glẹkigbe mẹ.
To paa mẹ, “zẹjlẹgo.”
To paa mẹ, “agbasalan po ohùn po.”
Sọ nọ yin yiylọdọ Pita.