Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn | OWE WIWE LẸ—LẸDOGBEDEVOMẸ AIHỌN YỌYỌ TỌN

Filipinu lẹ 1:1-30

NUHE E BẸHẸN LẸ

  • Nudọdomẹ lẹ (1, 2)

  • Opẹ́ na Jiwheyẹwhe; odẹ̀ Paulu tọn (3-11)

  • Wẹndagbe zindonukọn mahopọnna nuhahun (12-20)

  • Nọgbẹ̀ na Klisti, okú yin ale de (21-26)

  • Nuyiwa he jẹna wẹndagbe lọ (27-30)

1  Paulu po Timoti po, afanumẹ Klisti Jesu tọn lẹ, to wekanhlan omẹ wiwe lẹpo he to Filipi+ bo to kọndopọ mẹ hẹ Klisti Jesu, gọna nugopọntọ lẹ po devizọnwatọ lizọnyizọnwiwa tọn lẹ po:+  Na mì ni tindo nukundagbe majẹhẹ po jijọho po sọn Jiwheyẹwhe Otọ́ mítọn podọ Oklunọ Jesu Klisti dè.  Yẹn nọ dopẹna Jiwheyẹwhe ṣie to whepoponu eyin n’flin mì  to ovẹvivẹ ṣie lẹpo do ota mìmẹpo tọn mẹ. Yẹn nọ yí ayajẹ do to vẹvẹ to whelẹponu,+  na alọgọ he mì ko basi nado nọgodona wẹndagbe lọ* sọn azán tintan gbè kakajẹ ojlẹ ehe mẹ wutu.  Na yẹn tindo jidide gando ehe go, dọ mẹhe bẹ azọ́n dagbe jẹeji to mì ṣẹnṣẹn na zindonukọn to e mẹ+ kakajẹ whenue e na dotana ẹn to azán Klisti Jesu tọn gbè.+  Nuhe sọgbe taun wẹ e yin dọ yẹn ni lẹn ehe gando mìmẹpo go, na mì tin to ahun ṣie mẹ wutu, mì mẹhe yin mimátọ hẹ mi to nukundagbe majẹhẹ lọ mẹ lẹ, yèdọ to gẹdẹ ṣie lẹ mẹ+ podọ to avùnlọyiyi po wẹndagbe lọ hinhẹn lodo to osẹ́n-liho po mẹ.+  Na Jiwheyẹwhe wẹ yin kunnudetọ ṣie gando lehe ajlù mìmẹpo tọn nọ wle mi do go, na owanyi sisosiso he taidi dehe Klisti Jesu tindo lọ wutu.  Podọ ehe wẹ odẹ̀ he yẹn nọ hò to whepoponu, dọ owanyi mìtọn ni nọ to susudeji dogọ+ to pọmẹ hẹ oyọnẹn he pegan+ po wuntuntun mlẹnmlẹn po;+ 10  na mì nido mọdona nuhe yin nujọnu hugan lẹ,+ na mì nido tin matin mọdọ bo ma na nọ hẹn mẹdevo lẹ dahli+ kakajẹ azán Klisti tọn gbè; 11  podọ na mì nido sọgan gọ́ na sinsẹ́n dodo tọn, ehe yin gbọn Jesu Klisti gblamẹ,+ nado hẹn gigo po pipà po wá na Jiwheyẹwhe. 12  Todin, mẹmẹsunnu lẹ emi, yẹn jlo dọ mì ni yọnẹn dọ ninọmẹ ṣie ko dekọtọn do nukọnyiyi wẹndagbe lọ tọn mẹ na taun tọn, 13  sọmọ bọ gẹdẹ+ ṣie lẹ na Klisti tọn wutu ko yin yinyọnẹn na mẹlẹpo+ to Hihọ́tọ Sesali tọn* lẹpo ṣẹnṣẹn podọ na mẹhe pò lẹpo. 14  Todin, suhugan mẹmẹsunnu lẹ tọn to Oklunọ mẹ wẹ ko tindo jidide, na gẹdẹ ṣie lẹ wutu bosọ to adọgbigbo tindo dogọ nado dọ ohó Jiwheyẹwhe tọn madibu. 15  Na nugbo tọn, mẹdelẹ yí nuvẹun po agbàwhinwhlẹn po do to yẹwheho Klisti tọn dọ, ṣigba mẹdevo lẹ sọ yí ojlo dagbe do to mọwà. 16  Mẹhe yí ojlo dagbe do to yẹwhehodọ lẹ to Klisti lá pé sọn owanyi mẹ, na yé yọnẹn dọ yẹn yin dide nado yiavùnlọna wẹndagbe lọ;+ 17  ṣigba mẹhe yí nuvẹun po agbàwhinwhlẹn po do to yẹwhehodọ lẹ to mọwà na wiwọ́ wutu, e ma yin na mẹwhinwhàn dagbe wutu gba, na yé to linlẹn nado fọ́n nuhahun dote na mi to gẹdẹ ṣie lẹ mẹ. 18  Etẹwẹ yin kọdetọn lọ? Nulọ poun wẹ yindọ to aliho lẹpo mẹ, vlavo to yẹdoklọmẹ mẹ kavi to nugbo mẹ, Klisti to yinyin lilá pé podọ ehe mẹ wẹ yẹn jaya te. Na nugbo tọn, yẹn na gbẹ́ to ayajẹ zọnmii, 19  na yẹn yọnẹn dọ ehe na dekọtọn do whlẹngán ṣie mẹ gbọn ovẹvivẹ+ mìtọn po alọgọ gbigbọ Jesu Klisti tọn po tọn gblamẹ.+ 20  Ehe tin to kọndopọ mẹ hẹ nukundido vẹkuvẹku po todido ṣie po dọ winyan ma na hù mi to aliho depope mẹ, ṣigba dọ to awuvivo hodidọ tọn lẹpo mẹ, Klisti na yin gigopana gbọn agbasa ṣie dali todin, dile e ko nọ saba yin do, vlavo gbọn ogbẹ̀ ṣie gblamẹ kavi gbọn okú ṣie gblamẹ.+ 21  Na yẹn tọn, eyin yẹn to ogbẹ̀, yẹn to ogbẹ̀ na Klisti,+ podọ eyin yẹn kú, ale de wẹ e yin na mi.+ 22  Todin, eyin nado nọgbẹ̀ zọnmii to agbasalan mẹ wẹ, sinsẹ́n azọ́n ṣie tọn wẹ ehe yin; ṣogan yẹn ma hẹn nuhe yẹn na wá de lọ zun yinyọnẹn gba. 23  Yẹn to bẹwlu mẹ gando onú awe ehelẹ go, na yẹn jlo nado yin tuntundote podọ nado tin hẹ Klisti,+ na nado dọ hójọhó, ehe wẹ pọnte hugan.+ 24  Ṣigba, nuhe yin nujọnu na mi hugan wẹ yindọ yẹn ni gbọṣi agbasalan mẹ na mìwlẹ tọn wutu. 25  Enẹwutu, na yẹn tindo jidide gando ehe go wutu, yẹn yọnẹn dọ yẹn na gbọṣi aimẹ bo na nọhẹ mìmẹpo na nukọnyiyi mìtọn po ayajẹ mìtọn to yise mẹ po, 26  na aglinjijẹ mìtọn nido gọfla to Klisti Jesu mẹ, na yẹn tọn wutu to whenue yẹn na tin hẹ mì whladopo dogọ. 27  Nulọ poun wẹ yindọ mì ni nọ yinuwa* to aliho he jẹna wẹndagbe lọ he gando Klisti go mẹ,+ na e nido yindọ vlavo yẹn wá bo mọ mì kavi yẹn ma tin to finẹ, yẹn nido nọ sè linlin gando mì go dọ mì to ote gligli to gbigbọ dopo mẹ, bo to vivẹnudo to kọndopọ mẹ taidi alindọn dopo*+ na yise wẹndagbe lọ tọn, 28  bo masọ yin budona to aliho depope mẹ gbọn agọjẹdomẹtọ mìtọn lẹ dali. Onú ehe yin kunnudenu vasudo tọn+ na yewlẹ, ṣigba whlẹngán tọn na mìwlẹ;+ podọ Jiwheyẹwhe dè wẹ ehe wá sọn. 29  Na mìwlẹ wẹ lẹblanulọkẹyi lọ ko yin nina na Klisti tọn wutu, e ma yin nado tindo yise to ewọ mẹ kẹdẹ gba, ṣigba nado jiya na ewọ tọn wutu ga.+ 30  Na ahididi dopolọ he mì mọ bọ yẹn pehẹ wẹ mìwlẹ to pipehẹ,+ ehe mì sè todin dọ yẹn gbẹ́ pò to pipehẹ.

Nudọnamẹ Odò Tọn

Kavi “na mahẹ he mì tindo to nukọnyiyi wẹndagbe lọ tọn mẹ.”
Pọ́n Zẹm.
Kavi “mì ni zindonukọn nado to nuyiwa di tòvi.”
Kavi “po gbekọndopọ po.”