Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Ezekiẹli 8:1-18

NUHE E BẸHẸN LẸ

  • Ezekiẹli yì Jelusalẹm to numimọ mẹ (1-4)

  • Osùnú lẹ yin mimọ to tẹmpli mẹ (5-18)

    • Yọnnu lẹ to avivi na Tamuzi (14)

    • Sunnu lẹ to owhè sẹ̀n (16)

8  To owhe ṣidopotọ mẹ, to azán atọ́ntọ osun ṣidopotọ tọn mẹ, to whenue yẹn sinai to ohọ̀ ṣie mẹ bọ mẹho Juda tọn lẹ sinai to nukọn ṣie, alọ Oklunọ Nupojipetọ Jehovah tọn wá ji e to finẹ.  Dile yẹn to pinpọn, yẹn mọ nude he taidi miyọ́n; miyọ́n sọ tin to odò na nuhe taidi alinkàn etọn,+ podọ sọn alinkàn etọn dedo aga to sisẹ́, taidi sisẹ́ ogàn* de tọn.+  Whenẹnu wẹ e dlẹn nuhe taidi alọ de jẹgbonu bo wle oda ṣie, gbigbọ de sọ ze mi yì jiwhé bo hẹn mi wá Jelusalẹm gbọn numimọ he Jiwheyẹwhe na mi lẹ dali, wá họngbo homẹ tọn+ he pannukọn agewaji lọ kọ̀n, fie boṣiọ* awuwhàn tọn he nọ fọ́n awuwhàn dote lọ tin te.+  Podọ pọ́n! gigo Jiwheyẹwhe Islaeli tọn tin to finẹ,+ he taidi nuhe yẹn mọ to dankló lọ ji.+  Whenẹnu wẹ e dọna mi dọmọ: “Visunnu gbẹtọ tọn, jaale ze nukun towe lẹ daga bo pọ́n agewaji hlan.” Yẹn sọ ze nukun ṣie lẹ daga bo pọ́n agewaji, podọ to agewaji họngbo agbà lọ tọn nù wẹ boṣiọ* awuwhàn tọn lọ tin te.  E sọ dọna mi dọmọ: “Visunnu gbẹtọ tọn, be hiẹ mọ nuylankan, yèdọ osùnú he owhé Islaeli tọn to wiwà tofi lẹ,+ he zọ́n bọ yẹn do nọla na fiwiwe ṣie ya?+ Ṣigba, hiẹ nasọ mọ osùnú he tlẹ sọ ylanhu enẹlẹ.”  E sọ plan mi yì họntonu awánu lọ tọn, podọ to whenue yẹn pọ́n, yẹn mọ nùvo de to adó mẹ.  E sọ dọna mi dọmọ: “Visunnu gbẹtọ tọn, jaale hẹn nùvo adó lọ tọn gblodeji.” Yẹn sọ hẹn nùvo lọ gblo dogọ bo mọ họntonu de.  Whenẹnu wẹ e dọna mi dọmọ: “Biọ e mẹ bo pọ́n oylan, yèdọ osùnú he yé to wiwà to finẹ lẹ.” 10  Enẹwutu, yẹn biọ e mẹ bo pọ́n, yẹn sọ mọ yẹdide wunmẹwunmẹ nuhe nọ lìn po gbekanlin hiọawu lẹ po tọn,+ gọna boṣiọ hiọawu* owhé Islaeli tọn lẹ tọn;+ yé yin dide do adó lọ go lẹdo pé. 11  Podọ 70 to mẹho owhé Islaeli tọn lẹ tọn mẹ ṣite to nukọnna yé, Jaazania visunnu Ṣafani+ tọn sọ ṣite to ṣẹnṣẹn yetọn. Dopodopo yetọn tindo nuwhẹ́nwan-gbán etọn to alọmẹ, podọ azọ̀ owán gblingblinnọ nuyọnwan lọ tọn to tìtì yiaga.+ 12  E sọ dọna mi dọmọ: “Visunnu gbẹtọ tọn, be hiẹ mọ nuhe mẹho owhé Islaeli tọn lẹ tọn to wiwà to zinvlu mẹ, bọ dopodopo yetọn tin to abò he mẹ boṣiọ yetọn lẹ tin te* lẹ mẹ ya? Na yé to didọ dọ, ‘Jehovah ma to mí mọ. Jehovah ko jo aigba lọ do.’”+ 13  E sọ dọna mi dogọ dọmọ: “Hiẹ na mọ osùnú he tlẹ sọ ylanhu, he yé to wiwà lẹ.” 14  Enẹwutu, e plan mi yì họngbo he to agewaji na ohọ̀ Jehovah tọn lọ nù, yẹn sọ mọ yọnnu he sinai bo to avivi na yẹwhe Tamuzi tọn wutu lẹ to finẹ. 15  E sọ dọna mi dọmọ: “Visunnu gbẹtọ tọn E, be hiẹ mọ ehe ya? Hiẹ na mọ osùnú he tlẹ sọ ylan taun hú enẹlẹ.”+ 16  E sọ plan mi yì awánu homẹ tọn ohọ̀ Jehovah tọn lọ tọn.+ To họntonu ohọ̀ Jehovah tọn lọ tọn, to atọ̀họ̀ lọ po agbà lọ po ṣẹnṣẹn wẹ nudi sunnu 25 dogodo tẹmpli Jehovah tọn bo pannukọn whèzẹtẹn; yé to taliaina owhè to whèzẹtẹn.+ 17  E sọ dọna mi dọmọ: “Visunnu gbẹtọ tọn, be hiẹ mọ ehe ya? Be onú vlẹkẹsẹ de poun wẹ e yin na owhé Juda tọn nado wà osùnú ehelẹ bo hẹn aigba lọ gọ́ na danuwiwa+ bosọ to homẹhẹngblena mi mapote ya? Pọ́n, yé to atinlà* sọ́ awọntin ṣie. 18  Enẹwutu, yẹn na do adi ṣie hia. Nukun ṣie ma na wàlẹblanuna yé; mọjanwẹ yẹn ma na vẹawu yé.+ Eyin yé tlẹ yí ogbè lélé do dawhá hlan mi, yẹn ma na sè.”+

Nudọnamẹ Odò Tọn

Núzinzan sisẹ́ de he yè yí sika po fataka po do basi.
Kavi “yẹdide.”
Kavi “yẹdide.”
Hogbe Heblugbe tọn lọ sọgan tindo kanṣiṣa hẹ hogbe he nọ dlẹnalọdo “omí” podọ e nọ yin yiyizan taidi hogbe vlẹko tọn.
Kavi “abò he mẹ e nọ tẹ́ onú etọn lẹ do.”
Ehe na ko to alọdlẹndo atinlà he nọ yin yiyizan to boṣiọ-sinsẹ̀n mẹ.