Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Ezekiẹli 47:1-23

NUHE E BẸHẸN LẸ

  • Osin he to sisà sọn tẹmpli lọ mẹ (1-12)

    • Osin lọ to sisosiso vudevude (2-5)

    • Osin Ohù Kúkú tọn yin azọ̀nhẹngbọna (8-10)

    • Fihe obọ́ te lẹ ma yin azọ̀nhẹngbọna (11)

    • Atin lẹ na dùdù po azọ̀nhẹngbọ po (12)

  • Dogbó aigba lọ tọn lẹ (13-23)

47  Enẹgodo, e hẹn mi gọwá họntonu tẹmpli lọ tọn,+ podọ to finẹ, n’mọ bọ osin to sisà pànta whèzẹtẹn-waji sọn họntonu tẹmpli lọ tọn glọ,+ na whèzẹtẹn wẹ tẹmpli lọ pànta wutu. Osin lọ to sisà sọn oglọ to adusiwhé tẹmpli lọ tọn, enẹ wẹ hùwaji agbà lọ tọn.  E sọ plan mi tọ́nyi gbọn họngbo he to agewaji+ nù bo hẹn mi tọ́njẹgbonu bosọ lilẹ́ yì họngbo gbonu tọn he pannukọn whèzẹtẹn lọ kọ̀n,+ n’sọ mọ bọ osin to víví sọn adusiwhé lọ.  To whenue dawe lọ tọ́n bo pànta whèzẹtẹn po nujlẹnu de po to alọ etọn mẹ,+ e jlẹ awagbà* 1 000 bosọ hẹn mi jugbọn osin lọ mẹ; osin lọ sọ jẹ afọgómẹ.  E sọ jlẹ awagbà 1 000 devo bo hẹn mi jugbọn osin lọ mẹ, e sọ jẹ kligonu. E sọ jlẹ awagbà 1 000 devo bo hẹn mi jugbọn e mẹ, osin lọ sọ jẹ alinkàn.  To whenue e jlẹ awagbà 1 000 devo, e sọ yin tọ̀sisa de he n’ma sọgan zinzọnlin dasá, na osin lọ siso sọmọ bọ yè dona lìnsin gbọn e mẹ wẹ, yèdọ tọ̀sisa de he yè ma sọgan zọ̀n afọ dasá.  E sọ kanse mi dọmọ: “Visunnu gbẹtọ tọn, be hiẹ mọ ehe ya?” E sọ hẹn mi lẹkọwa asisa osin tọn lọ tó.  To whenue n’lẹkọ, n’mọdọ atin lẹ sù taun to awà awe asisa osin lọ tọn lẹ tó.+  Whenẹnu wẹ e dọna mi dọmọ: “Osin ehe to sisà yì whèzẹtẹn-waji bo zindonukọn kaka yì jẹ Alaba*+ podọ biọ hùmẹ. Eyin e sà biọ hùmẹ,+ osin he to finẹ na yin azọ̀nhẹngbọna.  Nutogbẹ̀* susugege lẹ na penugo nado nọgbẹ̀ to fidepope he osin* lọ lẹ sà jẹ. Whèvi susugege na tin, na osin ehe na sà jẹ finẹ wutu. Ohù-sin na yin azọ̀nhẹngbọna, podọ nulẹpo nasọ nọgbẹ̀ to fidepope he asisa osin tọn lọ sà jẹ. 10  “Whèhutọ lẹ na ṣite to otó etọn sọn Ẹn-gẹdi+ jẹ Ẹn-eglaimi, fie odọ̀-gbó hia-tẹn de na tin te. Whèvi susugege wunmẹ voovo lẹ nasọ tin to finẹ, taidi whèvi Ohù Daho* lọ tọn lẹ.+ 11  “E na tindo fie obọ́ tin te podọ fie ogbọ̀n tin te, finẹ lẹ ma nasọ yin azọ̀nhẹngbọna. Yé na yin jijodo na ojẹ̀.+ 12  “Atin wunmẹ he yọ́n na núdùdù lẹpo na wú do awà awe asisa osin tọn lọ tọn lẹ tó. Amà yetọn lẹ ma na fiọ; mọjanwẹ yé ma na nọma de sinsẹ́n tọ́n. Yé na nọ sẹ́n sinsẹ́n yọyọ lẹ to sunmẹsunmẹ, na fiwiwe lọ mẹ wẹ osin yetọn nọ sà sọn wutu.+ Sinsẹ́n yetọn lẹ na tin na núdùdù, podọ amà yetọn lẹ na tin na azọ̀nhẹngbọ.”+ 13  Nuhe Oklunọ Nupojipetọ Jehovah dọ die: “Lẹdo ehe wẹ mìwlẹ na má taidi ogú-yigba de na hẹnnu 12 Islaeli tọn lẹ, podọ Josẹfu na tindo mimá awe.+ 14  Mìwlẹ na dugu etọn, mẹdopodopo nasọ mọ mimá he sọzẹn yí.* Yẹn ko whlé nado na aigba ehe tọgbo mìtọn lẹ,+ e ko sọ yin mimá* na mì taidi ogú de todin. 15  “Dogbó aigba lọ tọn na adà he to agewaji lọ die: E bẹsọn Ohù Daho lọ kọ̀n gbọn aliho he yì Hẹtlọni+ pànta Zedadi,+ 16  Hamati,+ Bẹlota+ po Siblaimi po, he tin to lẹdo Damasku tọn po lẹdo Hamati tọn po ṣẹnṣẹn, to Hazeli-hatikọni, he tin to dogbó Haulani tọn pá.+ 17  Enẹwutu, dogbó lọ na bẹsọn ohù lọ kọ̀n yì Hazali-enọni,+ yèdọ gbọn dogbó Damasku tọn ji yì agewaji, gọna dogbó Hamati+ tọn. Enẹ wẹ dogbó agewaji tọn. 18  “Podọ whèzẹtẹn-waji lọ bẹsọn Haulani po Damasku po ṣẹnṣẹn gbọn Jọdani to Giliadi+ po aigba Islaeli tọn po ṣẹnṣẹn. Hiẹ na jlẹ sọn dogbó lọ ji yì ohù* he to whèzẹtẹn-waji lọ kọ̀n. Enẹ wẹ dogbó whèzẹtẹn-waji tọn. 19  “Dogbó hùwaji tọn* na bẹsọn Tamali yì osin Mẹlibati-kadẹṣi+ tọn lẹ kọ̀n kaka yì jẹ Agbàdo Tọ̀sisa tọn* lọ kọ̀n podọ yì Ohù Daho lọ kọ̀n.+ Enẹ wẹ dogbó hùwaji tọn.* 20  “To whèyihọ-waji wẹ Ohù Daho lọ te, sọn dogbó lọ kọ̀n yì fie pannukọn Lebo-hamati.*+ Enẹ wẹ dogbó whèyihọ-waji tọn.” 21  “Mì na má aigba ehe to mìde ṣẹnṣẹn, yèdọ to hẹnnu 12 Islaeli tọn lẹ ṣẹnṣẹn. 22  Mì na má ẹn taidi ogú de to mìde ṣẹnṣẹn podọ na jonọ he nọ nọ̀ mì dè lẹ bo ko tindo ovi lẹ to whenue yé to ṣẹnṣẹn mìtọn; yé nasọ taidi Islaelivi jọnun lẹ na mì. Yé na mọ ogú de yí to hẹnnu Islaeli tọn lẹ mẹ dile mì mọyi do. 23  Mì dona na ogú de mẹhe to jonọ-gbéji lọ sọn aigba hẹnnu he mẹ e wá sawhé do lọ tọn mẹ,” wẹ Oklunọ Nupojipetọ Jehovah dọ.

Nudọnamẹ Odò Tọn

Ehe to alọdlẹndo awagbà he dite. Pọ́n Nud. B14.
Kavi “dankló ji.”
Kavi “Alindọn.”
To paa mẹ, “osinwhín awe.”
Enẹ wẹ, Ohù Meditelane tọn.
To paa mẹ, “na dugu etọn, mẹdopodopo taidi nọvisunnu etọn tọn.”
To paa mẹ, “e ko jẹ alọmẹ.”
Enẹ wẹ, Ohù Kúkú.
To paa mẹ, “adà hùwaji tọn pànta hùwaji.”
Enẹ wẹ, Agbàdo Tọ̀sisa tọn Egipti tọn.
To paa mẹ, “adà hùwaji tọn pànta hùwaji.”
Kavi “họntonu Hamati tọn.”