Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Ezekiẹli 40:1-49

NUHE E BẸHẸN LẸ

  • Ezekiẹli yì Islaeli to numimọ mẹ (1, 2)

  • Ezekiẹli mọ tẹmpli to numimọ mẹ (3, 4)

  • Awánu po họngbo lẹ po (5-47)

    • Họngbo gbonu tọn to whèzẹtẹn (6-16)

    • Awánu gbonu tọn; họngbo devo lẹ (17-26)

    • Awánu homẹ tọn po họngbo lẹ po (27-37)

    • Abò lẹ na sinsẹ̀nzọn tẹmpli mẹ tọn (38-46)

    • Agbà lọ (47)

  • Atọ̀họ̀ tẹmpli lọ tọn (48, 49)

40  To owhe 25tọ kanlinmọgbenu yìyì mítọn tọn whenu,+ to bẹjẹeji owhe lọ tọn, to azán aotọ osun lọ tọn mẹ, to owhe 14tọ aijijẹ tòdaho lọ tọn godo,+ alọ Jehovah tọn wá ji e to azán enẹ lọ gbè bọ e ze mi yì tòdaho lọ mẹ.+  Gbọn numimọ he wá sọn Jiwheyẹwhe dè gblamẹ, ewọ hẹn mi yì aigba Islaeli tọn ji bo ze mi do osó he yiaga taun de ji+ bọ ohọ̀ de he taidi tòdaho de sọ tin to e ji to hùwaji.  To whenue e hẹn mi wá finẹ, n’mọ dawe de he awusọhia etọn taidi gànvẹẹ tọn.+ Ewọ tindo sekan linlọ̀n po ofánpò nujijlẹ tọn* de po to alọ etọn mẹ,+ e sọ ṣite to họngbo lọ nù.  Dawe lọ dọna mi dọmọ: “Visunnu gbẹtọ tọn, pọ́n tlintlin bo yí sọwhiwhe do dotoai bosọ na ayidonugo* nuhe yẹn na dohia we lẹpo, na enẹ wẹ zọ́n bọ hiẹ do yin hinhẹn wáfi. Dọ nuhe hiẹ mọ lẹpo na owhé Islaeli tọn.”+  N’mọ adó de he lẹdo tẹmpli* lọ to gbonu. Ofánpò nujijlẹ tọn he dite na awagbà ṣidopo tin to alọ dawe lọ tọn mẹ (alọpahomẹ dopo sọ yin yiyidogọ awagbà dopodopo).* E sọ jẹ adó lọ jlẹ ji, podọ titli etọn yin ofánpò dopo bọ jiyiyi etọn sọ yin ofánpò dopo.  E sọ wá họngbo he pannukọn whèzẹtẹn lọ kọ̀n+ bo hẹ pèkán etọn lẹ ji. To whenue e jlẹ họntonu etọn, gbigblo etọn yin ofánpò dopo, podọ gbigblo họntonu awetọ tọn sọ yin ofánpò dopo.  Abò nuhọ́tọ tọn dopodopo dite sọ ofánpò dopo bosọ gblo na ofánpò dopo, podọ abò nuhọ́tọ tọn lọ lẹ dẹn do yede na awagbà atọ́n.+ Họntonu họngbo he to atọ̀họ̀ lọ pá tọn, he pannukọn homẹ lọ yin ofánpò dopo.  E jlẹ atọ̀họ̀ họngbo he pannukọn homẹ lọ tọn, e sọ yin ofánpò dopo.  Enẹgodo, e jlẹ atọ̀họ̀ họngbo lọ tọn, e sọ yin awagbà ṣinatọ̀n; e sọ jlẹ dòtin he to adà mẹ na ẹn lẹ, yé sọ yin awagbà awe; podọ atọ̀họ̀ họngbo lọ tọn tin to adà mẹ bo pannukọn homẹ. 10  Abò nuhọ́tọ tọn atọ̀n tin to adà họngbo whèzẹtẹn tọn dopodopo ji. Abò atọ̀n lọ lẹ sọzẹn, podọ dòtin he to adà mẹ to awà awe lọ lẹ ji sọ sọzẹn ga. 11  Podọ e jlẹ gbigblo họntonu họngbo lọ tọn, e sọ yin awagbà 10; tedidi họngbo lọ tọn sọ yin awagbà 13. 12  Fihe yin mimá to abò nuhọ́tọ tọn lọ lẹ nukọn yin awagbà dopo to awà awe lẹ ji. Abò nuhọ́tọ tọn dopodopo he tin to awà awe lẹ ji lẹ sọ yin awagbà ṣidopo. 13  E sọ jlẹ họngbo lọ sọn họta* abò nuhọ́tọ dopo tọn jẹ họta awetọ tọn, bọ gbigblo etọn sọ yin awagbà 25; nùvo de sọ to ṣẹnṣẹn na họntonu awe lẹ.+ 14  Enẹgodo, e jlẹ dòtin he to adà mẹ lẹ, yé sọ yiji na awagbà 60, podọ jiyiyi dopolọ wẹ dòtin he to adà mẹ na họngbo he lẹdo awánu lọ lẹdo pé lẹ tindo. 15  Sọn họntonu họngbo lọ tọn nukọn jẹ atọ̀họ̀ họngbo homẹ tọn lọ tọn nukọn yin awagbà 50. 16  Fleṣe he gblo to homẹ bo bó+ to gbonu lẹ tin to abò nuhọ́tọ tọn lẹ po atọ̀họ̀ he to adà mẹ na yé to họngbo lọ mẹ to awà dopodopo ji lẹ po go. Atọ̀họ̀ lọ lẹ lọsu tindo fleṣe to homẹ to awà dopodopo ji, podọ yẹdide odétin tọn lẹ+ tin to dòtin he to adà mẹ lọ lẹ go. 17  E sọ hẹn mi wá awánu gbonu tọn lọ mẹ bọ n’mọ abò núdùdù tọn+ lẹ, podọ lẹdo awánu lọ tọn sọ yin titlẹ́. Abò núdùdù tọn 30 wẹ tin to fie yin titlẹ́ lọ. 18  Fie yin titlẹ́ to họngbo lọ lẹ pá sọzẹn hẹ tedidi họngbo lọ lẹ tọn—ehe wẹ ofi titlẹ́ he to odò lọ. 19  E sọ jlẹ sọn* họngbo he to odò lọ nukọn yì awánu homẹ tọn lọ blebu kọ̀n. E sọ yin awagbà 100 to whèzẹtẹn podọ to agewaji. 20  Awánu gbonu tọn lọ tindo họngbo de pannukọn agewaji, e sọ jlẹ tedidi etọn po gbigblo etọn po. 21  Abò nuhọ́tọ tọn atọ̀n wẹ tin to awà dopodopo ji. Dòtin he to adà mẹ na ẹn lẹ po atọ̀họ̀ lọ po yin ojlẹ dopolọ taidi họngbo tintan lọ. E dite na awagbà 50 bo gblo na awagbà 25. 22  Fleṣe etọn lẹ, atọ̀họ̀ etọn po yẹdide odétin tọn etọn lẹ+ po sọzẹn taidi dehe to họngbo whèzẹtẹn tọn lọ go lẹ. Gbẹtọ lẹ sọgan yì e kọ̀n gbọn pèkán ṣinawe hihẹ dali, podọ atọ̀họ̀ etọn tin to nukọnna yé. 23  Họngbo de tin to awánu homẹ tọn lọ nù pannukọn họngbo agewaji tọn podọ devo pannukọn họngbo whèzẹtẹn tọn. E jlẹ tedidi lọ sọn họngbo de kọ̀n jẹ devo kọ̀n, e sọ yin awagbà 100. 24  Enẹgodo, e plan mi wá hùwaji, n’sọ mọ họngbo de to hùwaji.+ E sọ jlẹ dòtin he to adà mẹ na ẹn lẹ po atọ̀họ̀ etọn po, yé sọ sọzẹn taidi dehe jẹnukọn lẹ. 25  Fleṣe lẹ tin to awà etọn dopodopo ji podọ to atọ̀họ̀ etọn go taidi fleṣe he jẹnukọn lẹ. E dite na awagbà 50 bo gblo na awagbà 25. 26  Pèkán ṣinawe wẹ hẹji yì e kọ̀n,+ atọ̀họ̀ etọn sọ tin to nukọnna yé. E sọ tindo yẹdide odétin lẹ tọn to dòtin he to adà mẹ na ẹn lẹ go, yèdọ odétin dopodopo to awà dopodopo ji. 27  Awánu homẹ tọn lọ tindo họngbo de pannukọn hùwaji; e sọ jlẹ pànta hùwaji sọn họngbo de kọ̀n jẹ devo kọ̀n bọ tedidi etọn yin awagbà 100. 28  Enẹgodo, e hẹn mi wá awánu homẹ tọn lọ mẹ gbọn họngbo hùwaji tọn lọ nù; podọ to whenue e jlẹ họngbo hùwaji tọn lọ, e yin ojlẹ dopolọ taidi dehe jẹnukọn lẹ. 29  Abò nuhọ́tọ tọn etọn lẹ, dòtin he to adà mẹ na ẹn lẹ po atọ̀họ̀ etọn po yin ojlẹ dopolọ taidi dehe jẹnukọn lẹ. Fleṣe lẹ sọ tin to awà etọn dopodopo ji podọ to atọ̀họ̀ etọn go. E dite na awagbà 50 bo gblo na awagbà 25.+ 30  Atọ̀họ̀ lẹ tin lẹdo e pé; yé dite na awagbà 25 bo gblo na awagbà 5. 31  Atọ̀họ̀ etọn pannukọn awánu gbonu tọn lọ, yẹdide odétin tọn lẹ sọ tin to dòtin he to adà mẹ na ẹn lẹ+ go, podọ pèkán ṣinatọ̀n wẹ hẹji yì e kọ̀n.+ 32  To whenue e plan mi sọn whèzẹtẹn wá awánu homẹ tọn lọ mẹ, e jlẹ họngbo lọ, e sọ yin ojlẹ dopolọ taidi dehe jẹnukọn lẹ. 33  Abò nuhọ́tọ tọn etọn lẹ, dòtin he to adà mẹ na ẹn lẹ po atọ̀họ̀ etọn po sọzẹn taidi dehe jẹnukọn lẹ, fleṣe lẹ sọ tin to awà etọn dopodopo ji podọ to atọ̀họ̀ etọn go. E dite na awagbà 50 bo gblo na awagbà 25. 34  Atọ̀họ̀ etọn pannukọn awánu gbonu tọn lọ, yẹdide odétin tọn lẹ sọ tin to dòtin awe he to adà mẹ na ẹn lẹ go, podọ pèkán ṣinatọ̀n wẹ hẹji yì e kọ̀n. 35  E sọ plan mi wá họngbo agewaji tọn+ lọ kọ̀n, podọ e jlẹ ẹ; e sọ yin ojlẹ dopolọ taidi dehe jẹnukọn lẹ. 36  Abò nuhọ́tọ tọn etọn lẹ, dòtin he to adà mẹ na ẹn lẹ po atọ̀họ̀ etọn po yin nudopolọ taidi dehe jẹnukọn lẹ. E tindo fleṣe to awà dopodopo ji. E dite na awagbà 50 bo gblo na awagbà 25. 37  Dòtin he to adà mẹ na ẹn lẹ pannukọn awánu gbonu tọn lọ, yẹdide odétin tọn lẹ sọ tin to dòtin he to adà mẹ na ẹn lẹ go to awà awe lẹ ji, podọ pèkán ṣinatọ̀n wẹ hẹji yì e kọ̀n. 38  Abò núdùdù tọn de po họntonu etọn po sẹpọ dòtin he to adà mẹ na họngbo lọ lẹ, yèdọ fie avọ́nunina mimẹ̀ blebu lẹ nọ yin kiklọ́ te.+ 39  Tafo awe awe tin to awà dopodopo atọ̀họ̀ họngbo lọ tọn lẹ tọn ji, he ji yè nọ hù avọ́nunina mimẹ̀ blebu lẹ,+ avọ́nunina ylando tọn+ lẹ po avọ́nunina whẹhuhu tọn+ lẹ po te. 40  To aliho he yì họngbo agewaji tọn lọ kọ̀n, tafo awe tin to họntonu lọ nukọn. Tafo awe devo lẹ sọ tin to homẹ, yèdọ to atọ̀họ̀ họngbo lọ tọn mẹ. 41  Tafo ẹnẹ tin to awà họngbo lọ tọn dopodopo ji—tafo lọ lẹpo yin ṣinatọ̀n—yèdọ ehe ji yè nọ hù avọ́sannu lẹ te. 42  Tafo ẹnẹ avọ́nunina mimẹ̀ blebu tọn lọ lẹ yin bibasi po zannu pipà lẹ po. Yé dite na awagbà dopo daa bo gblo na awagbà dopo daa bosọ yiji na awagbà dopo. Yé ji wẹ yè nọ bẹ nuyizan he yè nọ yí do hù avọ́nunina mimẹ̀ lẹ po avọ́sannu lẹ po do. 43  Nuhe mẹ yè nọ bẹ núdo he gblo sọ alọpahomẹ dopo lẹ yin zizedo adó homẹ tọn lọ lẹ go pé; podọ olàn avọ́nunina tọn lọ lẹ nọ yin bibẹdo tafo lọ lẹ ji. 44  Abò núdùdù tọn hànjitọ lẹ tọn lẹ sọ tin to gbonu họngbo homẹ tọn lọ tọn;+ yé tin to awánu homẹ tọn lọ mẹ sẹpọ họngbo agewaji tọn bo pannukọn hùwaji. Abò núdùdù tọn devo sọ sẹpọ họngbo whèzẹtẹn tọn lọ bo pannukọn agewaji. 45  Ewọ sọ dọna mi dọmọ: “Abò núdùdù tọn ehe, he pannukọn hùwaji, yin yẹwhenọ he nọ wà sinsẹ̀nzọn to tẹmpli mẹ lẹ tọn.+ 46  Abò núdùdù tọn he pannukọn agewaji yin yẹwhenọ he nọ wà sinsẹ̀nzọn to agbà lọ kọ̀n lẹ tọn.+ Yewlẹ wẹ visunnu Zadọki tọn lẹ,+ he yin Levinu he yin azọ́ndena nado nọ wá Jehovah nukọn nado yilizọn na ẹn lẹ.”+ 47  E sọ jlẹ awánu homẹ tọn lọ. E dite na awagbà 100 bo gblo na awagbà 100 bosọ sọzẹn to adà ẹnẹ lẹpo ji. Agbà lọ tin to tẹmpli lọ nukọn. 48  E sọ plan mi wá atọ̀họ̀ tẹmpli lọ tọn+ mẹ bo jlẹ dòtin he to adà mẹ na atọ̀họ̀ lọ, e sọ yin awagbà atọ́n to awà dopo ji podọ awagbà atọ́n to awà awetọ ji. Họngbo lọ gblo na awagbà atọ̀n to awà dopo ji podọ awagbà atọ̀n to awà awetọ ji. 49  Atọ̀họ̀ lọ dite na awagbà 20 bo gblo na awagbà 11.* Gbẹtọ lẹ nọ hẹji yì e kọ̀n gbọn pèkán lẹ hihẹ dali. Dòtin lẹ sọ tin to adà etọn lẹ mẹ, yèdọ dòtin dopodopo to awà dopodopo ji.+

Nudọnamẹ Odò Tọn

Pọ́n Nud. B14.
To paa mẹ, “ze ahun towe do.”
To paa mẹ, “ohọ̀.” Yin lilẹdogbedevomẹ to aliho ehe mẹ to weta 40-48 mẹ whenue “ohọ̀” dlẹnalọdo lẹdo tẹmpli lọ tọn kavi ohọ̀ tẹmpli lọ tọn jọnun.
To paa mẹ, “ofánpò nujijlẹ tọn awagbà ṣidopo tọn de, awagbà dopo po alọpahomẹ dopo po.” Ehe to alọdlẹndo awagbà he dite. Pọ́n Nud. B14.
Vlavo to alọdlẹndo aga pete adó abò nuhọ́tọ lọ tọn.
To paa mẹ, “gbigblo.”
Kavi vlavo, “12.”