Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn | OWE WIWE LẸ—LẸDOGBEDEVOMẸ AIHỌN YỌYỌ TỌN

Ezekiẹli 4:1-17

NUHE E BẸHẸN LẸ

  • Lehe yè na tọ́nawhàn Jelusalẹm do (1-17)

    • Hẹn whẹhuhu na azán 390 podọ azán kande (4-7)

4  “Podọ hiẹ visunnu gbẹtọ tọn, ze zannu de donukọnna dewe. Basi yẹdide tòdaho Jelusalẹm tọn do e go.  Yinuwa taidi mẹhe dosla lẹdo e,+ do adó de lẹdo e,+ wleawuna osla de sọta ẹ,+ bo do osla lẹ sọta ẹ bosọ yí awhàn-kẹkẹ lẹ lẹdo e.+  Ze agbánvla gànyuu tọn de bosọ ze e do hiẹ po tòdaho lọ po ṣẹnṣẹn taidi adó gànyuu tọn de. Enẹgodo, diọnukunsọ ẹ, podọ e na yin osla do lẹdo; hiẹ nasọ dosla lẹdo e. Ohia de wẹ enẹ yin na owhé Islaeli tọn.+  “Enẹgodo, hiẹ na mlọn adà amiyọn tọn towe ji bo na hẹn whẹhuhu owhé Islaeli tọn do dewe ji.*+ Hiẹ na hẹn whẹhuhu yetọn na azán sọha he hiẹ na mlọn adà towe ji na.  Podọ yẹn na hẹn azán 390 wá hiẹ ji, sọgbe hẹ owhe whẹhuhu tọn yetọn lẹ,+ hiẹ nasọ hẹn whẹhuhu owhé Islaeli tọn.  Hiẹ nasọ dotana yé. “Enẹgodo, hiẹ na mlọnai whla awetọ do adà adusi tọn towe ji, hiẹ nasọ hẹn whẹhuhu owhé Juda tọn na azán 40.+ Azán dopo nọtena owhe dopo, yèdọ azán dopo na owhe dopo wẹ yẹn ko degbe etọn na we.  Hiẹ nasọ lẹ́ pannukọn Jelusalẹm he yin osla do lẹdo lọ+ ma ṣinyọnnudo awà towe bo na dọ dọdai sọta ẹ.  “Pọ́n! yẹn na yí okàn do blá we bọ hiẹ ma na penugo nado lẹ́ sọn adà towe dopo ji jẹ awetọ ji kakajẹ whenue hiẹ na dotana azán glọ̀ndo towe tọn lẹ.  “Podọ hiẹ na yí likun, balekun, ayìví, apàkún lẹntile tọn, milẹti* po likun* wunmẹ devo po, hiẹ nasọ bẹ yé do nuyizan dopo mẹ bo yí yé do basi akla na dewe. Azán sọha he hiẹ na yí do mlọnai do adà towe ji, yèdọ azán 390, wẹ hiẹ na dù i na.+ 10  Hiẹ na nọ jlẹ núdùdù ṣekẹli 20* nado nọ dù to azán dopodopo ji. Hiẹ na nọ dù i to ojlẹ dide lẹ mẹ. 11  “Hiẹ nasọ nù osin he yin jijlẹ, yèdọ mado ṣidopotọ hini tọn.* Hiẹ na nọ nù in to ojlẹ dide lẹ mẹ. 12  “Hiẹ na dù i dile hiẹ nọ dù akla mimlin balekun tọn do; omí húhú gbẹtọ tọn wẹ hiẹ na yí do flọ miyọ́n nado sọ̀ ẹ to nukun yetọn mẹ.” 13  Jehovah yidogọ dọmọ: “Lehe Islaelivi lẹ na dù akla yetọn do niyẹn—yèdọ to aliho mawé tọn de mẹ—to akọta he ṣẹnṣẹn yẹn na gbà yé do lẹ mẹ.”+ 14  To whenẹnu, yẹn dọmọ: “A wàmọ blo, Oklunọ Nupojipetọ Jehovah! Sọn jọja whenu ṣie kakajẹ din, yẹn* ma ko yin hinhẹnflu gbọn olàn kanlin he kú difà kavi he yin tintlẹ́n de tọn dùdù dali,+ podọ yẹn ma ko dù olàn mawé* de pọ́n.”+ 15  Enẹwutu, e dọna mi dọmọ: “Eyọn, yẹn na we gbè nado yí oyìn-mí zan kakati nido yin gbẹtọ-mí, hiẹ nasọ sọ̀ akla towe to e ji.” 16  E sọ dọna mi dọmọ: “Visunnu gbẹtọ tọn, yẹn na súali núdùdù tọn do mì* to Jelusalẹm,+ podọ po tukla daho po wẹ yé na nọ dù núdùdù yetọn he yin jijlẹ,+ to awusinyẹn mẹ wẹ yé nasọ nọ nù osin yetọn he yin jijlẹ te.+ 17  Enẹ na jọ bọ yé ma na tindo akla po osin po, yé nasọ pọ́n ode awetọ po nupaṣamẹ po bo na yọ́ kọnyinai na nuṣiwa yetọn wutu.

Nudọnamẹ Odò Tọn

To paa mẹ, “do e ji,” enẹ wẹ adà amiyọnwhé Ezekiẹli tọn.
Jinukun de he okún etọn lẹ nọ whè tlala bo nọ yin yiyizan nado basi akla.
Hogbe Heblugbe tọn lọ dlẹnalọdo likun wunmẹ de he yìdo bo nọ yin dido to Egipti hohowhenu tọn.
Nudi g 230. Pọ́n Nud. B14.
Nudi L 0,6. Pọ́n Nud. B14.
Kavi “alindọn ṣie.”
Kavi “gbigble.”
To paa mẹ, “na wẹ́n opò akla tọn mìtọn.” Vlavo ehe to alọdlẹndo opò he nọ yin yiyizan nado to akla.