Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Ezekiẹli 39:1-29

NUHE E BẸHẸN LẸ

  • Vasudo Gọgi po awhànpa etọn po tọn (1-10)

  • Ṣiọdidi to Agbàdo Hamọni-Gọgi tọn mẹ (11-20)

  • Hẹngọwa Islaeli tọn (21-29)

    • Yè kọ̀n gbigbọ Jiwheyẹwhe tọn do Islaeli ji (29)

39  “Podọ hiẹ, visunnu gbẹtọ tọn, dọ dọdai sọta Gọgi+ bo dọna ẹn dọ, ‘Nuhe Oklunọ Nupojipetọ Jehovah dọ die: “Yẹn na diọnukunsọ hiẹ Gọgi, yèdọ ahọvi daho Meṣẹki po Tubali po tọn.+  Yẹn na diọlinlẹnna we bo na deanana we bo nasọ hẹn we wá sọn fie to olá hugan to agewaji+ wá osó Islaeli tọn lẹ ji.  Yẹn na hò ogá towe yí sọn amiyọnlọ towe mẹ, ogába towe lẹ nasọ flẹ sọn adusilọ towe mẹ.  Osó Islaeli tọn lẹ ji wẹ hiẹ po awhànfuntọ towe lẹpo po gọna mẹhe topọ hẹ we lẹ na jai do.+ Yẹn na yí we do basi núdùdù na ohẹ̀ nuwledutọ wunmẹ lẹpo po gbekanlin danji tọn lẹ po.”’+  “‘Hiẹ na jai jẹ danfafa ji,+ na yẹnlọsu wẹ ko dọ ẹ,’ wẹ Oklunọ Nupojipetọ Jehovah dọ.  “‘Yẹn na do miyọ́n hlan Magọgi, podọ hlan mẹhe nọ nọ̀ lopo lọ lẹ ji to jijọho mẹ lẹ,+ yé nasọ yọnẹn dọ yẹn wẹ Jehovah.  Yẹn na hẹn oyín wiwe ṣie zun yinyọnẹn to omẹ ṣie Islaelivi lẹ ṣẹnṣẹn, yẹn ma nasọ dike oyín wiwe ṣie ni yin hinhẹnflu ba; akọta lẹ nasọ yọnẹn dọ yẹn wẹ Jehovah,+ Omẹ Wiwe Islaeli tọn lọ.’+  “‘Mọwẹ, e na wá podọ e na jọ domọ,’ wẹ Oklunọ Nupojipetọ Jehovah dọ. ‘Azán ehe go wẹ yẹn ko dọho gando.  Mẹhe nọ nọ̀ tòdaho Islaeli tọn mẹ lẹ na tọ́n bo na yí awhànfunnu lẹ do flọ miyọ́n—yèdọ gaglo,* awọ̀yinu, ogá, ogába, aglọpò* po owhán lẹ po. Yé na yí yé zan nado flọ miyọ́n+ na owhe ṣinawe. 10  Yé ma na tindo nuhudo nado yì dín nake sọn glemẹ kavi nado yì dín nake sọn zungbo lẹ mẹ ba, na awhànfunnu lẹ wẹ yé na nọ yí do flọ miyọ́n.’ “‘Yé na bẹ nutindo mẹhe ko hò nutindo yetọn yí lẹ tọn, yé nasọ bẹ ogblànnu sọn mẹhe ko bẹ ogblànnu yetọn lẹ si,’ wẹ Oklunọ Nupojipetọ Jehovah dọ. 11  “‘To azán enẹ gbè, yẹn na na ṣiọditẹn de Gọgi+ to Islaeli, do agbàdo mẹhe zingbejizọnlin gbọn whèzẹtẹn ohù tọn lẹ tọn mẹ, e nasọ glọnalina mẹhe juwajei gbọn finẹ lẹ. Finẹ wẹ yé na dì Gọgi po awhànpa etọn lẹpo po do, yé nasọ nọ ylọ finẹ dọ Agbàdo Hamọni-Gọgi tọn.*+ 12  Owhé Islaeli tọn na yí osun ṣinawe do dì yé na aigba lọ nido yin kiklọ́we.+ 13  Mẹhe nọ nọ̀ aigba lọ ji lẹpo wẹ na wazọ́n nado dì yé, podọ ehe na hẹn yé diyin to azán he gbè yẹn na pagigona dee te,’+ wẹ Oklunọ Nupojipetọ Jehovah dọ. 14  “‘Sunnu lẹ na yin azọ́ndena nado nọ dán gbọn aigba lọ ji whẹwhẹ bo na nọ diṣiọ he pò to aigba lọ ji lẹ nado klọ́ ẹ wé. Yé nasọ to yé dín na osun ṣinawe. 15  Eyin mẹhe to aigba lọ ji dán gbọn lẹ mọ ohú gbẹtọ de tọn, yé na nọ ze ohia de do apá na ẹn. Enẹgodo, mẹhe yin azọ́ndena nado dì yé lẹ na nọ dì i do Agbàdo Hamọni-Gọgi tọn mẹ.+ 16  Tòdaho de nasọ tin to finẹ he na nọ yin yiylọdọ Hamọna.* Yé nasọ gbọnmọ dali klọ́ aigba lọ wé.’+ 17  “Na hiẹ tọn, visunnu gbẹtọ tọn, nuhe Oklunọ Nupojipetọ Jehovah dọ die: ‘Dọhlan ohẹ̀ wunmẹ lẹpo po gbekanlin danji tọn lẹpo po dọmọ, “Mì bẹ mìde pli bo wá. Mì bẹ mìde pli lẹdo avọ́sinsan ṣie he yẹn to awú etọn wle dai na mì, yèdọ avọ́sinsan daho de to osó Islaeli tọn lẹ ji.+ Mì na dù olàn bo nasọ nù ohùn.+ 18  Mì na dù agbasalan omẹ huhlọnnọ lẹ tọn bo na nù ohùn ahọvi aigba ji tọn lẹ tọn—enẹ wẹ agbò, lẹngbọvu, gbọgbọẹ, oyìnsú—yèdọ kanlin he dojó to Baṣani lẹpo. 19  Mì na dù ojó gọ́ho bo nasọ nù ohùn kakajẹ whenue mì na nùmú sọn avọ́sinsan he yẹn wleawu etọn dai na mì lọ mẹ.”’ 20  “‘Mì na dùnú gọ́ho to tafo ṣie ji he gọ́ na osọ́ po osọ́-kẹkẹ kùntọ lẹ po, gọna omẹ huhlọnnọ lẹ po awhànfuntọ wunmẹ lẹpo po,’+ wẹ Oklunọ Nupojipetọ Jehovah dọ. 21  “‘Yẹn na do gigo ṣie hia to akọta lẹ mẹ, akọta lẹpo nasọ mọ whẹdida he yẹn hẹnṣẹ lọ po huhlọn* he yẹn ko yizan to ṣẹnṣẹn yetọn po.+ 22  Bẹsọn azán enẹ gbè, owhé Islaeli tọn nasọ yọnẹn dọ yẹn wẹ Jehovah Jiwheyẹwhe yetọn. 23  Akọta lẹ nasọ yọnẹn dọ owhé Islaeli tọn yì kanlinmọgbenu na nuṣiwa yetọn titi wutu, na yé ma yin nugbonọ hlan mi wutu.+ Enẹwutu wẹ yẹn whlá nukunmẹ ṣie do yé+ bo jo yé hlan kẹntọ yetọn lẹ,+ yemẹpo sọ jai gbọn ohí dali. 24  Yẹn yinuwa hẹ yé sọgbe hẹ mawé po sẹ́nhẹngba yetọn lẹ po, yẹn sọ whlá nukunmẹ ṣie do yé.’ 25  “Enẹwutu, nuhe Oklunọ Nupojipetọ Jehovah dọ die: ‘Yẹn na gọ̀ kanlinmọ Jakọbu tọn lẹ+ wá bo na do lẹblanu hia owhé Islaeli tọn blebu;+ yẹn nasọ yí zohunhun do yiavùnlọna* oyín wiwe ṣie.+ 26  To whenue yé na ko duwinyan na nugbonọ-mayin yetọn lẹpo hlan mi godo,+ yé na nọ jijọho mẹ to aigba yetọn ji, bọ mẹde ma na nọ dobuna yé.+ 27  To whenue yẹn na hẹn yé lẹkọ sọn akọta lẹ mẹ bo na ṣinyan yé pli sọn aigba kẹntọ yetọn lẹ tọn ji,+ yẹn na klan dee do wiwe to ṣẹnṣẹn yetọn to nukun akọta susu tọn mẹ.’+ 28  “‘Yé nasọ yọnẹn dọ yẹn wẹ Jehovah Jiwheyẹwhe yetọn to whenue yẹn na hẹn yé yì kanlinmọgbenu to akọta lẹ mẹ bo nasọ bẹ yé pli gọwá aigba yetọn ji, bọ mẹdepope to yé mẹ ma na yin jijodai.+ 29  Yẹn ma nasọ whlá nukunmẹ ṣie do yé ba,+ na yẹn na kọ̀n gbigbọ ṣie jẹgbonu do owhé Islaeli tọn ji,’+ wẹ Oklunọ Nupojipetọ Jehovah dọ.”

Nudọnamẹ Odò Tọn

Awọ̀yinu pẹvi de he ogádetọ lẹ nọ saba hẹn.
Kavi vlavo, “ogànpò tlọ́ntlọ́n,” adánwanu he tindo onù tlọ́ntlọ́n.
Kavi “Agbàdo Awhànpa Gọgi tọn.”
Zẹẹmẹdo “Awhànpa.”
To paa mẹ, “alọ.”
To paa mẹ, “do mẹdezejo mlẹnmlẹn hia na.”