Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Ezekiẹli 36:1-38

NUHE E BẸHẸN LẸ

  • Dọdai gando osó Islaeli tọn lẹ go (1-15)

  • Hẹngọwa Islaeli tọn (16-38)

    • ‘Yẹn na klan oyín ṣie do wiwe’ (23)

    • “Taidi jipa Edẹni tọn” (35)

36  “Na hiẹ tọn, visunnu gbẹtọ tọn, dọ dọdai gando osó Islaeli tọn lẹ go bo dọ, ‘Osó Islaeli tọn lẹ emi, mì sè ohó Jehovah tọn.  Nuhe Oklunọ Nupojipetọ Jehovah dọ die: “Kẹntọ ko dọ sọta mì dọ, ‘E vivi! Ofi yiaga hoho lẹ lọsu tlẹ ko lẹzun nutindo mítọn!’”’+  “Enẹwutu, dọ dọdai bo dọ, ‘Nuhe Oklunọ Nupojipetọ Jehovah dọ die: “Na yé ko hẹn mì jẹvọ́ bo ko yangbé mìtọn sọn awà lẹpo ji, na mì nido lẹzun nutindo mẹhe luntọ́n* to akọta lẹ mẹ lẹ tọn bọ gbẹtọ lẹ sọ to homọdọdo mì go bo to ohó mẹhẹngble tọn lẹ dọ do mì go wutu,+  todin, osó Islaeli tọn lẹ emi, mì sè ohó Oklunọ Nupojipetọ Jehovah tọn! Nuhe Oklunọ Nupojipetọ Jehovah dọhlan osó lẹ, okọ́ta lẹ, osinwhín lẹ po agbàdo lẹ po, podọ hlan fie gbakija bo gbọgbé lẹ+ gọna tòdaho lẹ he jẹvọ́ he mẹ ogblànnu lẹ yin bibẹ yì sọn bọ mẹhe luntọ́n to akọta he lẹdo yé mẹ lẹ to ṣinṣanko lẹ die;+  Oklunọ Nupojipetọ Jehovah dọhlan yé dọ: ‘To adi zogbe ṣie mẹ,+ yẹn na dọho sọta mẹhe luntọ́n to akọta lọ lẹ mẹ lẹ podọ sọta Edomi blebu gọna mẹhe ko yí aglinjijẹ po vlẹko* sinsinyẹn+ po do yí aigba ṣie taidi nutindo yetọn lẹ, yèdọ nado yí kanlindugbo etọn bo bẹ ogblànnu etọn lẹ yì.’”’+  “Enẹwutu, dọ dọdai gando aigba Islaeli tọn go bo dọhlan osó po okọ́ta lẹ po gọna osinwhín po agbàdo lẹ po dọ, ‘Nuhe Oklunọ Nupojipetọ Jehovah dọ die: “Mì pọ́n! Yẹn na dọho to adi po homẹgble ṣie po mẹ, na winyandomẹ akọta lẹ tọn he mì ko doakọnna wutu.”’+  “Enẹwutu, nuhe Oklunọ Nupojipetọ Jehovah dọ die: ‘Yẹnlọsu wẹ ze alọ ṣie daga bo whlé dọ akọta he lẹdo mì lẹ na duwinyan.+  Ṣigba, osó Islaeli tọn lẹ emi, atin mìtọn lẹ na vùn bo na sẹ́n na omẹ ṣie lẹ to Islaeli,+ na yé na lẹkọ to madẹnmẹ.  Na yẹn tin po mì po, yẹn nasọ lẹhlan mì, yè na pọ̀gle bo do jinukun do mì ji. 10  Yẹn na hẹn omẹ mìtọn lẹ sudeji—yèdọ owhé Islaeli tọn lẹpo pete—gbẹtọ lẹ nasọ nọ nọ̀ tòdaho lọ lẹ mẹ+ podọ fie yin gbigbakija lọ lẹ na yin vivọgbá.+ 11  Mọwẹ, yẹn na hẹn omẹ mìtọn lẹ po kanlin-yìnyìn mìtọn lẹ po sudeji;+ yé na jideji bo na yin sinsẹ́nnọ. Yẹn na hẹn gbẹtọ lẹ nado nọ nọ̀ mì ji dile e ko te do dai,+ yẹn nasọ hẹn mì nado jideji hú ojlẹ hohowhenu tọn;+ mìwlẹ nasọ yọnẹn dọ yẹn wẹ Jehovah.+ 12  Yẹn na hẹn gbẹtọ lẹ—yèdọ omẹ ṣie he yin Islaelivi lẹ—nado zinzọnlin gbọn mì ji podọ yé na yí mìwlẹ taidi nutindo.+ Mìwlẹ na lẹzun ogú yetọn, mì ma nasọ hẹn yé gbọagba ovi yetọn lẹ tọn gbede ba.’”+ 13  “Nuhe Oklunọ Nupojipetọ Jehovah dọ die: ‘Na yé to didọna mì dọ, “Mì yin akọta de he nọ tlẹ́n gbẹtọ lẹ dù bo nọ hẹn akọta mìtọn lẹ gbọagba ovi yetọn lẹ tọn” wutu,’ 14  ‘enẹwutu, mì ma nasọ tlẹ́n gbẹtọ lẹ dù kavi hẹn akọta lẹ nado gbọagba ovi yetọn lẹ tọn ba,’ wẹ Oklunọ Nupojipetọ Jehovah dọ. 15  ‘Yẹn ma nasọ hẹn mì zun vlẹko de na akọta lẹ ba kavi dike mì ni doakọnna mẹṣanko gbẹtọ lẹ tọn,+ podọ mì ma na hẹn akọta mìtọn lẹ nado dahli ba,’ wẹ Oklunọ Nupojipetọ Jehovah dọ.” 16  Ohó Jehovah tọn sọ vọ́ wá dè e dọmọ: 17  “Visunnu gbẹtọ tọn, to whenue owhé Islaeli tọn tin to aigba yetọn ji, yé hẹn ẹn zun mawé gbọn aliho po nuyiwa yetọn lẹ po dali.+ Aliho yetọn lẹ taidi mawé lajijẹ tọn na mi.+ 18  Enẹwutu, yẹn kọ̀n adi ṣie jẹgbonu do yé ji na ohùn he yé ko sọndai to aigba lọ ji wutu,+ podọ na yé ko yí boṣiọ hiọawu* yetọn lẹ do hẹn aigba lọ zun mawé wutu.+ 19  Enẹwutu, yẹn vúnvún yé pé gbọn akọta lẹ mẹ bo gbà yé pé gbọn aigba lẹ ji.+ Yẹn dawhẹna yé sọgbe hẹ aliho yetọn po nuyiwa yetọn lẹ po. 20  Ṣigba, to whenue yé jẹ akọta enẹlẹ mẹ, gbẹtọ lẹ kọnmasin do oyín wiwe ṣie go+ gbọn didọ gando yé go dali dọ, ‘Omẹ Jehovah tọn lẹ die, ṣigba yé to dandannu glọ nado tọ́n sọn aigba etọn ji.’ 21  Enẹwutu, yẹn na hò oyín wiwe ṣie pọ́n, yèdọ oyín he go owhé Islaeli tọn ko kọnmasin do to akọta he mẹ yé ko yì lẹ.”+ 22  “Enẹwutu, dọna owhé Islaeli tọn dọ, ‘Nuhe Oklunọ Nupojipetọ Jehovah dọ die: “Owhé Islaeli tọn E, e ma yin mìwlẹ wẹ zọ́n bọ yẹn do yinuwa gba, ṣigba na oyín wiwe ṣie he go mìwlẹ ko kọnmasin do to akọta he mẹ mì yì lẹ mẹ wutu.”’+ 23  ‘Na nugbo tọn, yẹn na klan oyín daho ṣie he go+ mìwlẹ ko kọnmasin do to akọta lẹ mẹ do wiwe; akọta lẹ nasọ yọnẹn dọ yẹn wẹ Jehovah,’+ wẹ Oklunọ Nupojipetọ Jehovah dọ, ‘to whenue yẹn na yin kinklandowiwe to ṣẹnṣẹn mìtọn to nukun yetọn lẹ mẹ. 24  Yẹn na hẹn mì tọ́njẹgbonu sọn akọta lẹ mẹ bo nasọ bẹ mì pli sọn aigba lẹpo ji bo na hẹn mì wá aigba mìtọn ji.+ 25  Yẹn na húnhún osin wiwe do mì ji, mì nasọ lẹzun wiwe;+ yẹn na klọ́ mì wé sọn mawé+ po boṣiọ hiọawu mìtọn lẹpo po mẹ.+ 26  Yẹn na na mì ahun yọyọ de+ bo na yí gbigbọ yọyọ de do ohò mìtọn mẹ.+ Yẹn na de ahun mìtọn he taidi zannu lọ sẹ̀+ sọn ohò mìtọn mẹ bo na na mì ahun agbasalan tọn de.* 27  Yẹn na yí gbigbọ ṣie do mì mẹ, yẹn nasọ hẹn mì nado yìn aṣẹdai ṣie lẹ,+ podọ mì na nọ hodo nudide whẹdida tọn ṣie lẹ bo nasọ nọ setonuna yé. 28  Whenẹnu wẹ mì na nọ nọ̀ aigba he yẹn na tọgbo mìtọn lẹ ji, mì nasọ yin omẹ ṣie lẹ bọ yẹn na yin Jiwheyẹwhe mìtọn.’+ 29  “‘Yẹn na whlẹn mì sọn mawé mìtọn lẹpo mẹ bo na degbe bọ okún lẹ na sudeji, yẹn ma nasọ hẹn huvẹ wá mì ji.+ 30  Yẹn na hẹn sinsẹ́n atin lẹ tọn po jinukun glemẹ tọn lẹ po sudeji, sọmọ bọ mì ma nasọ duwinyan na huvẹ wutu to akọta lẹ mẹ gbede ba.+ 31  Mì nasọ nọ flin aliho ylankan po nuyiwa he ma sọgbe mìtọn lẹ po, podọ mì na gbẹwanna mìde na whẹhuhu mìtọn po osùnú he mì ko wà lẹ po wutu.+ 32  Ṣigba, mì ni yọ́n ehe dọ: Yẹn ma na wà ehe na mìtọn wutu,’+ wẹ Oklunọ Nupojipetọ Jehovah dọ. ‘Kakatimọ, winyan ni hù mì podọ mì ni blawu na aliho mìtọn lẹ wutu, mì owhé Islaeli tọn emi.’ 33  “Nuhe Oklunọ Nupojipetọ Jehovah dọ die: ‘To gbeegbe yẹn na klọ́ mì wé sọn whẹhuhu mìtọn lẹpo mẹ, yẹn na hẹn gbẹtọ lẹ nado nọ nọ̀ tòdaho lọ lẹ mẹ,+ podọ fie yin gbigbakija lọ lẹ nado yin vivọgbá.+ 34  Aigba he gbọgbé lọ, he mẹhe nọ juwajei lẹpo nọ mọ taidi nuhe gbọgbé de, na yin pipọ̀. 35  Gbẹtọ lẹ nasọ dọ dọ: “Aigba he gbọgbé lọ ko sọ lẹzun fie taidi jipa Edẹni tọn,+ podọ tòdaho he gbakija bo gbọgbé bosọ yin hihọliai lọ lẹ ko lẹzun figángán he mẹ gbẹtọ lẹ nọ nọ̀.”+ 36  Akọta he yin jijodo lẹdo we pé lẹ nasọ yọnẹn dọ yẹn Jehovah lọsu wẹ ko vọ́ nuhe yin hihọliai lọ gbá, bosọ do jinukun do fie gbọgbé lọ. Yẹn Jehovah lọsu wẹ ko dọ ẹ bosọ wà ẹ.’+ 37  “Nuhe Oklunọ Nupojipetọ Jehovah dọ die: ‘Yẹn nasọ hẹn owhé Islaeli tọn nado biọ to asi e nado wà ehe na yé: Yẹn na hẹn omẹ yetọn lẹ jideji taidi lẹngbọpa de. 38  Taidi lẹngbọpa omẹ wiwe lẹ tọn, yèdọ taidi lẹngbọpa lẹ to Jelusalẹm* to hùnwhẹ etọn lẹ whenu,+ tòdaho he ko yin gbigbakija lọ lẹ nasọ gọ́ na lẹngbọpa he bẹ gbẹtọ susu lẹ hẹn;+ yé nasọ yọnẹn dọ yẹn wẹ Jehovah.’”

Nudọnamẹ Odò Tọn

To paa mẹ, “mẹhe yin pipotọ; mẹhe pò.”
Kavi “mẹṣanko to alindọn mẹ.”
Hogbe Heblugbe tọn lọ sọgan tindo kanṣiṣa hẹ hogbe he nọ dlẹnalọdo “omí” podọ e nọ yin yiyizan taidi hogbe vlẹko tọn.
Enẹ wẹ, dehe nọ joawuna anademẹ Jiwheyẹwhe tọn.
Vlavo “Taidi apó he bẹ lẹngbọ he nọ yin yíyí do sanvọ́ to Jelusalẹm hẹn lẹ.”