Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Ezekiẹli 33:1-33

NUHE E BẸHẸN LẸ

  • Azọngban nuhọ́tọ de tọn lẹ (1-20)

  • Linlin lẹ gando aijijẹ Jelusalẹm tọn go (21, 22)

  • Owẹ̀n na mẹhe nọ nọ̀ Jelusalẹm he gbakija lẹ (23-29)

  • Gbẹtọ lẹ ma yinuwa sọgbe hẹ owẹ̀n lọ (30-33)

    • Ezekiẹli “taidi ohàn owanyi tọn” (32)

    • ‘Yẹwhegán de ko nọ yé mẹ’ (33)

33  Ohó Jehovah tọn sọ vọ́ wá dè e dọmọ:  “Visunnu gbẹtọ tọn, dọhona visunnu omẹ towe lẹ tọn+ bo dọna yé dọ, “‘Mí ni dọ dọ yẹn hẹn ohí ja aigba de ji,+ bọ mẹhe nọ nọ̀ aigba lọ ji lẹpo de dawe de taidi nuhọ́tọ yetọn,  bọ ewọ mọ ohí lọ ja aigba lọ ji bo kún opẹ̀n nado na avase mẹlọ lẹ.+  Eyin mẹde sè nudidọ opẹ̀n lọ tọn ṣigba bo ma yinuwa sọgbe hẹ avase lọ,+ bọ ohí lọ sọ wá bo yí ogbẹ̀ etọn,* ohùn etọn na tin to okọ̀ ewọ lọsu tọn.+  E sè nudidọ opẹ̀n lọ tọn, ṣigba bo ma yinuwa sọgbe hẹ avase lọ. Ohùn etọn na tin to okọ̀ ewọ lọsu tọn. Eyin e ko yinuwa sọgbe hẹ avase lọ wẹ, ogbẹ̀* etọn na ko yin whinwhlẹngán.  “‘Ṣigba, eyin nuhọ́tọ lọ mọ ohí lọ ja bo ma kún opẹ̀n+ lọ nado hẹn mẹlọ lẹ sèava, bọ ohí lọ wá bo yí ogbẹ̀* dopo to yé mẹ tọn, omẹ enẹ na kú na nuṣiwa etọn titi wutu, ṣigba yẹn na kàn ohùn etọn biọ sọn alọ nuhọ́tọ lọ tọn mẹ.’*+  “Na hiẹ tọn, visunnu gbẹtọ tọn, yẹn ko yí we do basi nuhọ́tọ de na owhé Islaeli tọn; eyin hiẹ sè ohó sọn onù ṣie mẹ, hiẹ dona na yé avase sọgbe hẹ ohó ṣie.+  Eyin yẹn dọna mẹylankan dọ, ‘Mẹylankan E, hiẹ na kú dandan!’+ ṣigba bọ hiẹ ma dọhona mẹylankan lọ nado na ẹn avase na ewọ nido diọ sọn aliho etọn ji, ewọ na kú taidi mẹylankan na nuṣiwa etọn wutu,+ ṣigba yẹn na kàn ohùn etọn biọ sọn dè we.  Ṣigba, eyin hiẹ na avase mẹylankan nado lẹkọ sọn aliho etọn ji bọ ewọ gbẹ́ nado diọ, ewọ na kú na nuṣiwa etọn wutu,+ ṣigba e họnwun dọ hiẹ na whlẹn ogbẹ̀* towe.+ 10  “Podọ hiẹ, visunnu gbẹtọ tọn, dọna owhé Islaeli tọn dọ, ‘Mì ko dọ dọ: “Atẹṣiṣi po ylando mítọn lẹ po ko pẹnagbàn mí bo to hinhẹn mí nado yọ́ kọnyinai to aigba lọ ji;+ to whelọnu lo, nawẹ mí sọgan nọgbẹ̀ gbọn?”’+ 11  Dọna yé dọ, ‘“Dile yẹn togbẹ̀,” wẹ Oklunọ Nupojipetọ Jehovah dọ, “Yẹn ma nọ mọ awuvivi depope to okú mẹylankan tọn mẹ,+ kakatimọ yẹn jlo dọ mẹylankan ni diọ sọn aliho etọn ji+ bo nọgbẹ̀.+ Mì lẹkọ, mì lẹkọ sọn aliho ylankan mìtọn lẹ ji,+ na naegbọn mì nado kú, mì owhé Islaeli tọn E?”’+ 12  “Podọ hiẹ, visunnu gbẹtọ tọn, dọna visunnu omẹ towe lẹ tọn lẹ dọ, ‘Dodowiwa dodonọ tọn ma na whlẹn ẹn to whenue ewọ na ṣiatẹ;+ mọjanwẹ ylanwiwa mẹylankan tọn ma na hẹn ẹn dahli eyin ewọ lẹkọ sọn ylanwiwa etọn mẹ;+ mọjanwẹ dodonọ depope ma na penugo nado nọgbẹ̀ na dodowiwa etọn wutu eyin e wá jọ bọ ewọ waylando.+ 13  To whenue yẹn dọna dodonọ dọ: “E họnwun dọ hiẹ na nọgbẹ̀,” bọ ewọ dejido dodowiwa etọn go bo wà oylan,*+ azọ́n dodo tọn etọn depope ma na yin finflin, ṣigba ewọ na kú na oylan he e ko wà wutu.+ 14  “‘Podọ to whenue yẹn dọna mẹylankan dọ: “Hiẹ na kú dandan,” bọ ewọ diọ sọn ylando etọn mẹ bo wà nuhe sọgbe po dodo po,+ 15  bọ mẹylankan lọ sọ gọ̀ afàsúnú lọ jo+ bo gọ̀ nuhe yin finfin jo+ bosọ setonuna osẹ́ndoai he nọ hẹnmẹ dogbẹ̀ lẹ bo doalọtena ylanwiwa, e họnwun dọ ewọ na nọgbẹ̀.+ E ma na kú. 16  Ylando depope he e ko wà ma na yin hihia* dokọna ẹn.+ Na e wà nuhe sọgbe po dodo po wutu, e họnwun dọ ewọ na nọgbẹ̀.’+ 17  “Ṣigba, omẹ towe lẹ ko dọ dọ, ‘Aliho Jehovah tọn yin mawadodo tọn,’ to whenuena e yindọ na nugbo tọn, aliho yewlẹ tọn wẹ yin mawadodo tọn. 18  “Eyin dodonọ de gbẹkọ dodowiwa etọn go bo wà oylan, e dona kú na nuhe e wà wutu.+ 19  Ṣigba, eyin mẹylankan de lẹkọ sọn ylanwiwa etọn mẹ bo wà nuhe sọgbe po dodo po, ewọ na nọgbẹ̀ na mọwiwà wutu.+ 20  “Ṣigba, mìwlẹ ko dọ dọ, ‘Aliho Jehovah tọn yin mawadodo tọn.’+ Owhé Islaeli tọn E, yẹn na dawhẹna mẹdopodopo sọgbe hẹ aliho etọn.” 21  To ojlẹ de godo, to osun aotọ owhe 12tọ tọn mẹ, to azán atọ́ntọ osun kanlinmọgbenu yìyì mítọn tọn mẹ, dawe de he họ̀ngán sọn Jelusalẹm wá dè e+ bo dọmọ: “Tòdaho lọ ko yin hihọliai!”+ 22  Todin, to whèjai he jẹnukọnna whenue dawe he họ̀ngán lọ wá dè e, alọ Jehovah tọn ko wá ji e bọ ewọ ko hùn onù ṣie whẹpo dawe lọ do wá dè e to afọnnu. Enẹwutu, onù ṣie ko yin hùnhùn bọ yẹn masọ yin unbọpẹnnọ ba.+ 23  Whenẹnu wẹ ohó Jehovah tọn wá dè e dọmọ: 24  “Visunnu gbẹtọ tọn, mẹhe nọ nọ̀ gbakija ehelẹ+ ṣẹnṣẹn to didọ gando aigba Islaeli tọn go dọ, ‘Sunnu dopo poun janwẹ Ablaham yin, ṣogan ewọ yí aigba lọ.+ Ṣigba, míwlẹ sù; e họnwun dọ aigba lọ ko yin nina mí taidi nutindo.’ 25  “Enẹwutu, dọna yé dọ, ‘Nuhe Oklunọ Nupojipetọ Jehovah dọ die: “Mìwlẹ to núdùdù he mẹ ohùn tin te dù,+ mì sọ nọ ze nukun mìtọn lẹ daga hlan boṣiọ hiọawu* mìtọn lẹ, podọ mìwlẹ nọ to hùnsọndai mapote.+ Enẹwutu, naegbọn aigba lọ nado yin nutindo mìtọn? 26  Mì ko dejido ohí mìtọn go,+ mì sọ zindonukọn to osùnú lẹ mẹ, podọ dopodopo mìtọn ko hẹn asi kọmẹnu etọn tọn flu.+ Enẹwutu, naegbọn aigba lọ nado yin nutindo mìtọn?”’+ 27  “Nuhe hiẹ na dọna yé die, ‘Nuhe Oklunọ Nupojipetọ Jehovah dọ die: “Dile yẹn togbẹ̀, mẹhe nọ nọ̀ gbakija lẹ ṣẹnṣẹn na jai gbọn ohí dali; yẹn nasọ yí mẹhe to danfafa ji lẹ na gbekanlin lẹ taidi núdùdù; podọ azọ̀n na hù mẹhe tin to figángán po oslò po mẹ lẹ.+ 28  Yẹn na hẹn aigba lọ jẹvọ́ bọ e na gbọgbé mlẹnmlẹn,+ sakla etọn na yin hinhẹnwa opodo, osó Islaeli tọn lẹ nasọ gbọgbé,+ podọ mẹdepope ma na jugbọn finẹ wayi ba. 29  Yé nasọ yọnẹn dọ yẹn wẹ Jehovah to whenue yẹn na hẹn aigba lọ jẹvọ́ bọ e na gbọgbé mlẹnmlẹn,+ na osùnú he yé ko wà lẹpo wutu.”’+ 30  “Na hiẹ tọn visunnu gbẹtọ tọn, omẹ towe lẹ to ohó towe dọ to yede ṣẹnṣẹn, to adó lẹ go podọ to ohọ̀n lẹ nù.+ Yé to didọna ode awetọ dọ, yèdọ mẹdopodopo hlan nọvisunnu etọn dọ, ‘Wá, bo dike mí ni sè ohó he wá sọn Jehovah dè.’ 31  Yé na bẹ yede pli bo sinai do nukọn towe taidi omẹ ṣie lẹ; yé nasọ sè ohó towe lẹ, ṣigba yé ma na yinuwa sọgbe hẹ yé.+ Na yé nọ yí onù yetọn do pà we to aliho oklọ tọn mẹ,* ṣigba ahun yetọn gọ́ na nukunkẹn na ale mawadodo tọn. 32  Pọ́n! Hiẹ taidi ohàn owanyi tọn de na yé, taidi mẹhe yí ogbè milomilo de do to hànji bo yí azọ́nyinyọnẹn do to núhò to hànjinu de ji. Yé na sè ohó towe lẹ, ṣigba depope to yé mẹ ma na yinuwa sọgbe hẹ yé. 33  To whenue e na mọ hẹndi—podọ e na mọ hẹndi janwẹ—yé na yọnẹn dọ yẹwhegán de ko nọ ṣẹnṣẹn yetọn pọ́n.”+

Nudọnamẹ Odò Tọn

To paa mẹ, “bo de e sẹ̀.”
Kavi “alindọn.”
Kavi “alindọn.”
Kavi “yẹn na yiahọsu ohùn etọn tọn to nuhọ́tọ lọ go.”
Kavi “alindọn.”
Kavi “bo ma wà dodo.”
To paa mẹ, “finflin.”
Hogbe Heblugbe tọn lọ sọgan tindo kanṣiṣa hẹ hogbe he nọ dlẹnalọdo “omí” podọ e nọ yin yiyizan taidi hogbe vlẹko tọn.
Kavi “yé nọ yí hogbe wantuntun tọn lẹ zan.”