Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Ezekiẹli 32:1-32

NUHE E BẸHẸN LẸ

  • Avihàn do Falo po Egipti po ji (1-16)

  • Yè na dì Egipti hẹ adàmagbonọ lẹ (17-32)

32  To azán tintan osun 12tọ he yin owhe 12tọ tọn mẹ, ohó Jehovah tọn sọ vọ́ wá dè e dọmọ:  “Visunnu gbẹtọ tọn, ké avihàn* de do Falo ahọlu Egipti tọn ji bo dọna ẹn dọ, ‘Hiẹ taidi kinnikinni winyanwinyan huhlọnnọ akọta lẹ tọn de, Ṣigba, yè ko bọnùdo na we. Hiẹ taidi nudazi hùmẹ tọn+ de he nọ to zingidi ji gbọn tọ̀sisa towe lẹ mẹ, Bo nọ yí afọ towe lẹ do hẹn osin lẹ wlu bosọ nọ hẹn tọ̀sisa lẹ* gble.’   “Nuhe Oklunọ Nupojipetọ Jehovah dọ die: ‘Yẹn na gbọn pipli akọta susu lẹ tọn gblamẹ nado yìn odọ̀ ṣie ṣinyọ́n we, Yé nasọ dọ̀n we tọ́njẹgbonu to odọ̀-gbó ṣie mẹ.   Yẹn na gbẹ́ we dai to aigba lọ ji; Yẹn nasọ ze we dlan do danfafa ji. Yẹn na hẹn ohẹ̀ agahomẹ tọn lẹpo nado jẹ do ji we, Yẹn na yí we na gbekanlin aigba tọn lẹpo taidi núdùdù.+   Yẹn na dlan olàn towe do osó lẹ ji Bo na yí pipotọ towe do hẹn agbàdo lẹ gọ́.+   Yẹn na hẹn aigba lọ yọ̀n po ohùn towe he sà gọ́ osó lẹ ji po, E nasọ gọ́ osinwhín lẹ mẹ.’*   ‘Podọ to whenue yè na ko ṣimiyọ́n towe, yẹn na ṣinyọnyẹ olọn lẹ ji bo na hẹn sunwhlẹvu yetọn lẹ dózin. Yẹn na yí aslọ lẹ do ṣinyọ́n owhè, Osun ma nasọ na hinhọ́n etọn ba.+   Yẹn na hẹn asisa hinhọ́n tọn lẹpo dózin to olọn mẹ na hiẹ tọn wutu, Podọ yẹn na yí zinvlu do ṣinyọ́n aigba towe ji,’ wẹ Oklunọ Nupojipetọ Jehovah dọ.   ‘Yẹn na hẹn awubla mẹsusu to whenue yẹn na hẹn delẹ to omẹ towe lẹ mẹ yì akọta devo lẹ mẹ di kanlinmọ, Yèdọ yì aigba he hiẹ ma ko yọnẹn lẹ ji.+ 10  Yẹn na hẹn awuji akọta susu, Obu nasọ jẹ ahọlu yetọn lẹ ji na hiẹ tọn wutu to whenue yẹn na sún ohí ṣie to nukọn yetọn. Yé na to sisọsisọ mapote, mẹdopodopo na to budi na ogbẹ̀ etọn, To gbeegbe hiẹ na jai.’ 11  Na nuhe Oklunọ Nupojipetọ Jehovah dọ die: ‘Ohí ahọlu Babilọni tọn na wá ji we.+ 12  Yẹn na hẹn omẹ towe lẹ jai gbọn ohí awhànfuntọ huhlọnnọ lẹ tọn dali, Yèdọ mẹhe yin danuwatọ hugan lẹpo to akọta lẹ mẹ.+ Yé na hẹn sakla Egipti tọn wá odò bọ omẹ etọn lẹpo nasọ yin huhusudo.+ 13  Yẹn na và kanlin-yìnyìn etọn lẹpo sudo to tọ̀sisa etọn lẹ tó,+ Afọ gbẹtọ de tọn kavi ofẹ̀n kanlin de tọn ma nasọ hẹn yé wlu ba.’+ 14  ‘To ojlẹ enẹ mẹ, yẹn na hẹn osin yetọn lẹ zun wiwe, Yẹn nasọ hẹn tọ̀sisa yetọn lẹ nado to sisà taidi amì,’ wẹ Oklunọ Nupojipetọ Jehovah dọ. 15  ‘To whenue yẹn na hẹn Egipti zun aigba gbọgbé de, enẹ wẹ aigba he yin hinhẹn jẹvọ́ pete de,+ Whenue yẹn na hù mẹhe nọ nọ̀ e ji lẹpo sudo, Yé na yọnẹn dọ yẹn wẹ Jehovah.+ 16  Avihàn de wẹ ehe, gbẹtọ lẹ nasọ ji i na nugbo tọn; Viyọnnu akọta lẹ tọn na ji i. Yé na ji i do Egipti podọ do omẹ etọn lẹpo ji,’ wẹ Oklunọ Nupojipetọ Jehovah dọ.” 17  To whenẹnu, to owhe 12tọ mẹ, to azán 15tọ osun lọ tọn mẹ, ohó Jehovah tọn wá dè e dọmọ: 18  “Visunnu gbẹtọ tọn, ké avihàn de do omẹ Egipti tọn lẹ ji bo dọ̀n ẹn wá odò pete, yèdọ ewọ po viyọnnu akọta huhlọnnọ lẹ tọn po gọna mẹhe jei odò* mẹ lẹ. 19  “‘Mẹnu wẹ hiẹ yọnwhanpẹ hú? Jẹte yìdo bo mlọnai hẹ adàmagbonọ lẹ!’ 20  “‘Yé na jai jẹ mẹhe yin hùhù gbọn ohí dali lẹ mẹ.+ Ewọ ko yin jijo hlan ohí lọ; dọ̀n ẹn sọyi po omẹ etọn lẹpo po. 21  “‘Sọn fie siso taun to Yọdò* mẹ, awhànfuntọ hlọnhlọnnọ lẹ na dọhona ewọ po alọgọtọ etọn lẹ po. Na nugbo tọn, yé na yì odò mẹ bo na mlọnai to finẹ taidi adàmagbonọ he yin hùhù gbọn ohí dali lẹ. 22  Asilia to finẹ po mẹhe e bẹpli lẹpo po. Podọ yọdò mẹhe yin hùhù gbọn ohí dali lẹpo tọn sọ lẹdo e pé.+ 23  Fie siso hugan to odò* glọ wẹ yọdò etọn tin te, mẹhe e bẹpli lẹpo sọ lẹdo yọdò etọn pé, yemẹpo wẹ sọ yin hùhù gbọn ohí dali, na yé ko dobuna mẹhe togbẹ̀ lẹ wutu. 24  “‘Elami+ to finẹ po omẹ etọn lẹpo po lẹdo yọdò etọn pé, yèdọ mẹhe yin hùhù gbọn ohí dali lẹpo. Yé ko yì odò glọ ma gboadà, yèdọ mẹhe nọ dobuna mẹhe togbẹ̀ lẹ. Todin, yé na jiya winyan yetọn tọn to pọmẹ hẹ mẹhe jei odò* mẹ lẹ. 25  Yé ko do adọzan ewọ po omẹ etọn lẹpo po tọn lẹdo yọdò etọn pé, to mẹhe yin hùhù lẹ ṣẹnṣẹn. Yemẹpo wẹ yin adàmagbonọ bo yin hùhù gbọn ohí dali, na yé ko dobuna mẹhe togbẹ̀ lẹ wutu; yé nasọ jiya winyan yetọn tọn to pọmẹ hẹ mẹhe jei odò* mẹ lẹ. Ewọ ko yin zizedo mẹhe yin hùhù lẹ ṣẹnṣẹn. 26  “‘Finẹ wẹ Meṣẹki po Tubali po+ gọna omẹ yetọn* lẹpo tin te. Yọdò etọn lẹ sọ lẹdo e pé. Yemẹpo wẹ yin adàmagbonọ, yè sọ sọ́ ohí yé luntọ́n, na yé ko dobuna mẹhe togbẹ̀ lẹ wutu. 27  Be yé ma na mlọnai hẹ awhànfuntọ huhlọnnọ adàmagbonọ he ko jai bo ko yì Yọdò* mẹ po awhànfunnu yetọn lẹ po ya? Yé nasọ yí ohí yetọn lẹ do basi kọ̀donu,* ylando yetọn nasọ tin to ohú yetọn lẹ ji, na awhànfuntọ huhlọnnọ ehelẹ ko bianukunna mẹhe togbẹ̀ lẹ wutu. 28  Ṣigba na hiẹ tọn, yè na gídí we to adàmagbonọ lẹ mẹ, hiẹ nasọ mlọnai hẹ mẹhe yin hùhù gbọn ohí dali lẹ. 29  “‘Finẹ wẹ Edomi+ tin te, podọ finẹ wẹ ahọlu etọn lẹ po ahọvi etọn lẹpo po yin hùhù gbọn ohí dali te mahopọnna hlọnhlọn yetọn; yelọsu nasọ mlọnai hẹ adàmagbonọ+ lẹ po mẹhe jei odò* mẹ lẹ po. 30  “‘Finẹ wẹ ahọvi* agewaji tọn lẹpo tin te to pọmẹ hẹ Sidoninu+ lẹ he ko duwinyan po mẹhe yin hùhù lẹ po, mahopọnna obu he hlọnhlọnnọ-yinyin yetọn nọ hẹnwa. Yé na mlọnai ma gboadà hẹ mẹhe yin hùhù gbọn ohí dali lẹ, yé nasọ jiya winyan yetọn tọn to pọmẹ hẹ mẹhe jei odò* mẹ lẹ. 31  “‘Falo na mọ onú ehe lẹpo, ewọ nasọ yin homẹmiọnna na nuhe jọ do omẹ etọn lẹ go lọ wutu;+ Falo po awhànpa etọn lẹpo po na yin hùhù gbọn ohí dali,’ wẹ Oklunọ Nupojipetọ Jehovah dọ. 32  “‘Na Falo dobuna mẹhe togbẹ̀ lẹ wutu, ewọ po omẹ etọn lẹpo po na yin hinhẹn nado mlọnai hẹ adàmagbonọ he yin hùhù gbọn ohí dali lẹ,’ wẹ Oklunọ Nupojipetọ Jehovah dọ.”

Nudọnamẹ Odò Tọn

Kavi “ohàn aluẹmẹninọ tọn.”
To paa mẹ, “yetọn.”
To paa mẹ, “Osinwhín lẹ nasọ yin hinhẹn gọ́ gbọn hiẹ dali.”
Kavi “yọdò.”
Kavi “Ṣeol,” enẹ wẹ, yọdò paa gbẹtọvi lẹ tọn. Pọ́n Zẹm.
Kavi “yọdò.”
Kavi “yọdò.”
Kavi “yọdò.”
To paa mẹ, “etọn.”
Kavi “Ṣeol,” enẹ wẹ, yọdò paa gbẹtọvi lẹ tọn. Pọ́n Zẹm.
Vlavo to alọdlẹndo awhànfuntọ he yin dìdì po awhànfunnu yetọn lẹ po, gọna yẹyi awhànfunfun tọn.
Kavi “yọdò.”
Kavi “nukọntọ.”
Kavi “yọdò.”