Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Ezekiẹli 3:1-27

NUHE E BẸHẸN LẸ

  • Ezekiẹli na dù owe-hihá lọ (1-15)

  • Ezekiẹli na yin nuhọ́tọ de (16-27)

    • Awugbopo na hẹn hùnhọ́dudu wá (18-21)

3  E sọ dọna mi dọmọ: “Visunnu gbẹtọ tọn, dù nuhe tin to nukọn towe.* Dù owe-hihá ehe, bo yì dọhona owhé Islaeli tọn.”+  Enẹwutu, yẹn kẹ̀ onù ṣie, e sọ na mi owe-hihá ehe nado dù.  E sọ dọna mi dogọ dọmọ: “Visunnu gbẹtọ tọn, dù owe-hihá he yẹn to nina we ehe na adọ̀go towe ni gọ́.” Yẹn sọ jẹ dùdù i ji, e sọ vivi taidi owín to onù ṣie mẹ.+  E sọ dọna mi dọmọ: “Visunnu gbẹtọ tọn, yì owhé Islaeli tọn gbè bo dọ ohó ṣie lẹ na yé.  Na hiẹ ma yin didohlan akọta he nọ do ogbè he vẹawu nado mọnukunnujẹemẹ kavi ogbè he mẹde ma sè de dè gba, ṣigba owhé Islaeli tọn gbè wẹ hiẹ yin didohlan.  Hiẹ ma yin didohlan mẹsusu he nọ do ogbè he vẹawu nado mọnukunnujẹemẹ kavi ogbè he mẹde ma sè, he hiẹ ma sọgan mọnukunnujẹ hogbe etọn lẹ mẹ lẹ dè gba. Eyin yewlẹ dè wẹ yẹn do we hlan, yé na dotoaina we.+  Ṣigba, owhé Islaeli tọn na gbẹ́ nado dotoaina we, na yé ma jlo na dotoaina mi wutu.+ Mẹhe tin to owhé Islaeli tọn gbè lẹpo wẹ yin tasinyẹntọ podọ kanylantọ.+  Pọ́n! Yẹn ko hẹn nukunmẹ towe sinyẹn pẹpẹ taidi nukunmẹ yetọn lẹ podọ nukọn towe taidi nukọn yetọn lẹ.+  Yẹn ko hẹn nukọn towe tin taidi zannu diamọndi tọn he sinyẹn hú osé.+ A dibuna yé blo kavi a dike nukunmẹ yetọn lẹ dobuna we blo,+ na owhé atẹṣitọ de wẹ yé yin.” 10  E sọ dọna mi dogọ dọmọ: “Visunnu gbẹtọ tọn, dotoai bo sè ohó he yẹn na dọna we lẹpo. 11  Yì omẹ towe he tin to kanlinmọgbenu* lẹ dè,+ bo dọho hẹ yé. Dọna yé dọ, ‘Nuhe Oklunọ Nupojipetọ Jehovah dọ die,’ vlavo yé dotoai kavi gbẹ́ nado dotoai.”+ 12  Whenẹnu wẹ gbigbọ de plan mi+ bọ yẹn sọ sè nudidọ hùnhlún daho de tọn sọn godo dọmọ: “Na Jehovah ni yin gigopana sọn otẹn etọn mẹ.” 13  Awà mẹdida lọ lẹ tọn to núdọ dile yé to hihò do yede go,+ podọ kẹkẹfọ lọ lẹ to núdọ to apá na yé,+ hùnhlún daho de sọ to yinyin sisè ga. 14  Gbigbọ lọ sọ plan mi bọ yẹn yì to homẹgble po adi po mẹ, alọ Jehovah tọn sọ gbọṣi ji e sinsinyẹn. 15  Enẹwutu yẹn yì akọta he tin to kanlinmọgbenu lọ dè to Tẹli-abibi, he tin to tọ̀sisa Kẹbali tọn kọ̀n,+ yẹn sọ gbọṣi fihe yé te lọ; po flumẹjijẹ po+ wẹ yẹn gbọṣi ṣẹnṣẹn yetọn na azán ṣinawe. 16  To vivọnu azán ṣinawe lọ lẹ tọn, ohó Jehovah tọn wá dè e dọmọ: 17  “Visunnu gbẹtọ tọn, yẹn ko yí we do basi nuhọ́tọ de na owhé Islaeli tọn;+ eyin hiẹ sè ohó sọn onù ṣie mẹ, hiẹ dona na yé avase sọgbe hẹ ohó ṣie.+ 18  Eyin yẹn dọna mẹylankan dọ, ‘Hiẹ na kú dandan,’ ṣigba bọ hiẹ ma na ẹn avase, yèdọ hiẹ gboawupo nado dọho hẹ mẹylankan lọ bo na ẹn avase nado lẹkọ sọn aliho ylankan etọn ji na e nido nọgbẹ̀,+ ewọ na kú na nuṣiwa etọn wutu,+ na mẹylankan wẹ ewọ, ṣigba yẹn na kàn ohùn etọn biọ sọn dè we.*+ 19  Ṣigba, eyin hiẹ na avase mẹylankan bọ ewọ ma lẹkọ sọn ylanwiwa etọn mẹ podọ sọn aliho ylankan etọn ji, ewọ na kú na nuṣiwa etọn wutu, ṣigba e họnwun dọ hiẹ na whlẹn ogbẹ̀* towe.+ 20  Ṣigba, eyin dodonọ de gbẹkọ dodowiwa etọn go bo wà oylan,* yẹn na ze zannu ahlida tọn de donukọnna ẹn podọ e na kú.+ Eyin hiẹ ma na ẹn avase, ewọ na kú na ylando etọn wutu podọ azọ́n dodo tọn etọn lẹ ma nasọ yin finflin, ṣigba yẹn na kàn ohùn etọn biọ sọn dè we.*+ 21  Ṣigba, eyin hiẹ ko na avase dodonọ lọ ma nado waylando bọ ewọ masọ waylando, e họnwun dọ ewọ na nọgbẹ̀ na e ko yin avase na wutu,+ podọ hiẹ ko whlẹn ogbẹ̀* towe.” 22  Alọ Jehovah tọn wá ji e to finẹ, bọ ewọ sọ dọna mi dọmọ: “Fọnṣite bo yì dankló lọ ji, yẹn nasọ dọho hẹ we to finẹ.” 23  Enẹwutu, yẹn fọ́n bo yì dankló lọ ji podọ pọ́n! gigo Jehovah tọn tin to finẹ,+ taidi gigo he yẹn mọ to tọ̀sisa Kẹbali tọn kọ̀n,+ yẹn sọ ṣinyọ́n nukunmẹ ai. 24  Whenẹnu wẹ gbigbọ biọ ohò ṣie mẹ bo hẹn mi ṣite do afọ ṣie lẹ ji,+ e sọ dọho hẹ mi dọmọ: “Yì bo suhọ̀n do dewe to ohọ̀ towe mẹ. 25  Na hiẹ tọn, visunnu gbẹtọ tọn, yé na yí okàn lẹ do blá we na hiẹ nikaa tọ́n yì ṣẹnṣẹn yetọn. 26  Yẹn nasọ hẹn odẹ́ towe nado tẹdo bẹ̀homẹ to onù towe mẹ,* hiẹ nasọ lẹzun unbọpẹnnọ, bo ma na penugo nado wọhẹ yé, na owhé atẹṣitọ de wẹ yé yin. 27  Ṣigba, whenue yẹn na dọho hẹ we, yẹn na hùn onù towe bọ hiẹ nasọ dọna yé+ dọ, ‘Nuhe Oklunọ Nupojipetọ Jehovah dọ die.’ Na mẹhe jlo na dotoai ni dotoai,+ podọ na mẹhe jlo na gbẹ́ ni gbẹ́, na owhé atẹṣitọ tọn de wẹ yé.+

Nudọnamẹ Odò Tọn

To paa mẹ, “dù nuhe a mọ.”
To paa mẹ, “Yì visunnu omẹ towe lẹ tọn.”
Kavi “yẹn na yiahọsu ohùn etọn tọn to gowe.”
Kavi “alindọn.”
Kavi “bo ma wà dodo.”
Kavi “yẹn na yiahọsu ohùn etọn tọn to gowe.”
To paa mẹ, “alindọn.”
Kavi “tẹdo nùmẹ to aga.”