Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Ezekiẹli 26:1-21

NUHE E BẸHẸN LẸ

  • Dọdai sọta Tile (1-21)

    • “Fie odọ̀-gbó lẹ nọ yin hihia do” (5, 14)

    • Yè bẹ zannu po kọ́gudu po dlan otọ̀ mẹ (12)

26  To owhe 11tọ mẹ, to azán tintan osun lọ tọn mẹ, ohó Jehovah tọn wá dè e dọmọ:  “Visunnu gbẹtọ tọn, na Tile ko dọ gando Jelusalẹm+ go dọ, ‘E vivi! Họngbo mẹlọ lẹ tọn ko yin gbigbà!+ Nulẹpo na lẹzun ṣie, yẹn nasọ lẹzun adọkunnọ, todin he e ko yin hinhẹn jẹvọ́’;  enẹwutu, nuhe Oklunọ Nupojipetọ Jehovah dọ die: ‘Hiẹ Tile E, yẹn na diọnukunsọ we bo na fọ́n akọta susu do ji we, kẹdẹdile ohù nọ mlin agbówhẹn etọn lẹ wá aga do.  Yé na và adó Tile tọn lẹ sudo bo na họ́ atọ̀họ̀ etọn lẹ liai,+ podọ yẹn na whlẹ́ aigba etọn bo nasọ hẹn ẹn zun osé he to gbangba bo to sisẹ́ de.  E na lẹzun fie odọ̀-gbó lẹ nọ yin hihia do to ohù ṣẹnṣẹn.’+ “‘Na yẹnlọsu wẹ ko dọ ẹ,’ wẹ Oklunọ Nupojipetọ Jehovah dọ, ‘e nasọ lẹzun ogblànnu de na akọta lẹ.  Mẹhe nọ nọ̀ glètoho etọn mẹ lẹ na yin hùhù gbọn ohí lọ dali, gbẹtọ lẹ nasọ yọnẹn dọ yẹn wẹ Jehovah.’  “Na nuhe Oklunọ Nupojipetọ Jehovah dọ die: ‘Yẹn na hẹn Ahọlu Nẹbukadnẹzali* Babilọni tọn wá Tile ji sọn agewaji;+ ahọlu ahọlu lẹ tọn de wẹ ewọ,+ podọ e na hẹn osọ́ lẹ,+ osọ́-kẹkẹ awhàn tọn lẹ,+ awhànfuntọ osọ́ ji tọn lẹ po awhànpa he bẹ awhànfuntọ* susu lẹ po hẹn.  E na và glètoho towe lẹ sudo gbọn ohí lọ dali, podọ e na wleawuna osla de bo na dosla lẹ lẹdo we bo nasọ ze awọ̀yinu daho de daga sọta we.  E na yí awhàn-kẹkẹ* etọn lẹ do gbà adó towe lẹ, e nasọ yí asiọvi* etọn lẹ do họ́ atọ̀họ̀ towe lẹ liai. 10  Osọ́ etọn lẹ na sù sọmọ bọ yé na yí kọ́gudu do ṣinyọ́n we, podọ nudidọ awhàn-kẹkẹ tọn lẹ, kẹkẹfọ tọn lẹ po osọ́-kẹkẹ tọn lẹ po na húnhún adó towe lẹ to whenue yé na biọ họngbo towe lẹ mẹ taidi sunnu lẹ he to tòdaho he adó etọn lẹ ko họliai mẹ biọ. 11  Osọ́ etọn lẹ na tùnafọ gbọn alihogbó towe lẹpo ji;+ e na yí ohí do hù omẹ towe lẹ, podọ dòtin blibata towe lẹ na gbà hányán. 12  Yé na fìn adọkunnu towe lẹ bo na bẹ ajọnu+ towe lẹ yì taidi ogblànnu de bo na họ́ adó towe lẹ liai bo nasọ gídí ohọ̀ dagbedagbe towe lẹ; enẹgodo, yé na bẹ zannu towe lẹ, owhlẹ towe lẹ po kọ́gudu towe lẹ po dlan otọ̀ mẹ.’ 13  “‘Yẹn na hẹn hàngbe lélé towe lẹ wá opodo podọ nudidọ ajalẹn towe lẹ tọn ma nasọ yin sisè ba.+ 14  Yẹn nasọ hẹn we zun osé he to gbangba bo to sisẹ́ de, hiẹ nasọ lẹzun fie odọ̀-gbó lẹ nọ yin hihia do.+ Hiẹ ma nasọ yin vivọgbá gbede ba, na yẹn Jehovah lọsu wẹ ko dọ ẹ,’ wẹ Oklunọ Nupojipetọ Jehovah dọ. 15  “Nuhe Oklunọ Nupojipetọ Jehovah dọ gando Tile go die: ‘To nudidọ aijijẹ towe tọn whenu, to whenue mẹhe to yinyin hùhù* lẹ na to hunwẹn, to whenue mẹhuhu de na wá aimẹ to hiẹ mẹ, be lopo lẹ ma na sisọ na obu ya?+ 16  Ahọvi ohù tọn lẹpo na jẹte wá sọn ofìn yetọn lẹ ji bo na de awù gaa* yetọn lẹ bo nasọ de awugbó kikó yetọn lẹ, yé nasọ jẹ sisọsisọ ji.* Yé na sinai do kọmẹ bo to sisọsisọ mapote bo nasọ to pinpọn we po nupaṣamẹ po.+ 17  Podọ, yé na ké avihàn*+ de do ji we bo na dọna we dọmọ: “Hiẹ ko dọ̀n,+ hiẹ he mẹ gbẹtọ lẹ nọ wá sọn ohù lẹ ji nado wá nọ, hiẹ tòdaho gigonọ; Hiẹ po mẹhe* nọ nọ̀ hiẹ mẹ lẹ po yin huhlọnnọ to ohù ji,+ Bo nọ to budona mẹhe nọ nọ̀ aigba ji lẹpo! 18  Lopo lẹ na sisọ to azán he gbè hiẹ na jai te, Lopo ohù tọn lẹ na jẹflumẹ to whenue hiẹ na ko busẹ.”’+ 19  “Na nuhe Oklunọ Nupojipetọ Jehovah dọ die: ‘To whenue yẹn na hẹn we jẹvọ́, taidi tòdaho he gbọgbé lẹ, whenue yẹn na hẹn osin he siso nado ṣinyọ́n ji we bọ osin zingidinọ lẹ na ko gbaṣinyọ́n we godo,+ 20  yẹn na hẹn hiẹ po mẹhe jei odò* mẹ hẹ we lẹ po wá omẹ hoho tọn lẹ dè; yẹn na hẹn we nado nọ fie yìdo pete, taidi nọtẹn hoho tọn he ko yin hinhẹn jẹvọ́ lẹ, to pọmẹ hẹ mẹhe jei odò mẹ lẹ,+ na hiẹ nido gbọgbé. To whenẹnu, yẹn na doyẹyigona* aigba mẹhe togbẹ̀ lẹ tọn. 21  “‘Yẹn na hẹn nugbajẹmẹji wá ji we to ajiji mẹ, hiẹ ma nasọ tin ba.+ Yé na dín we pé, ṣigba hiẹ ma nasọ yin mimọ gbede ba,’ wẹ Oklunọ Nupojipetọ Jehovah dọ.”

Nudọnamẹ Odò Tọn

To paa mẹ, “Nẹbukadlẹzali,” wunmẹ yinkọ lọ tọn devo.
To paa mẹ, “gbẹtọ.”
Kavi “zomọ mẹgbeyinyan tọn.”
Kavi “ohí.”
To paa mẹ, “hùhù po kanyinylan po.”
Kavi “awù he ma tindo awà.”
To paa mẹ, “yí sisọsisọ ṣinyọ́n.”
Kavi “ohàn aluẹmẹninọ tọn.”
To paa mẹ, “Ewọ po mẹhe.”
Kavi “yọdò.”
Kavi “doaṣọ́na.”