Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn | OWE WIWE LẸ—LẸDOGBEDEVOMẸ AIHỌN YỌYỌ TỌN

Ezekiẹli 22:1-31

NUHE E BẸHẸN LẸ

  • Jelusalẹm, tòdaho hùnhọ́dutọ (1-16)

  • Islaeli taidi ayámí (17-22)

  • Yè gblewhẹdo nukọntọ po omẹ Islaeli tọn lẹ po (23-31)

22  Ohó Jehovah tọn sọ vọ́ wá dè e dọmọ:  “Na hiẹ tọn, visunnu gbẹtọ tọn, be hiẹ ko wleawu nado lá whẹdida* sọta tòdaho hùnhọ́dutọ lọ+ podọ nado hẹn osùnú etọn lẹpo zun yinyọnẹn na ẹn ya?+  Hiẹ na dọ dọ, ‘Nuhe Oklunọ Nupojipetọ Jehovah dọ die: “Hiẹ tòdaho he nọ sọ̀n ohùn dai E,+ ojlẹ towe ko sẹpọ,+ hiẹ he nọ basi boṣiọ hiọawu* lẹ nado hẹn dewe flu,+  hùnsọndai towe ko hẹn we hùwhẹ,+ boṣiọ hiọawu towe lẹ ko sọ hẹn we zun mawé.+ Hiẹ ko hẹn azán towe lẹ wá opodo po awuyiya po, podọ owhe towe lẹ ko wá opodo. Enẹwutu wẹ yẹn na hẹn we zun vlẹko de na akọta lẹ podọ aṣagbọ́nu de na aigba lẹpo.+  Mẹhe nọ nọ̀ aigba he sẹpọ we lẹ ji po mẹhe nọ nọ̀ dehe to olá na we lẹ po ji na nọ ṣàn we kò,+ yèdọ hiẹ oyín mẹhe tọn ko yin mawé podọ hiẹ he ko gọ́ na hunyanhunyan.  Pọ́n! Ahọvi Islaeli tọn dopodopo nọ yí aṣẹpipa etọn zan to ṣẹnṣẹn mìtọn nado sọ̀n ohùn dai.+  Yè nọ vlẹ otọ́ po onọ̀ po kò to hiẹ mẹ.+ Yè nọ hò mẹhe to jonọ-gbéji dù, yè sọ nọ sayana tọṣiọvi po asuṣiọsi po.”’”+  “‘Fiwiwe ṣie lẹ wẹ mì ko vlẹko, gbọjẹzan ṣie lẹ wẹ mì ko sọ hẹnflu.+  To hiẹ mẹ wẹ mẹhẹngbletọ he nọ doafọna ohùn sinsọndai lẹ tin te.+ Hiẹ mẹ wẹ yé nọ dù avọ́sannu lẹ to osó lẹ ji bosọ nọ zan walọ he gblezọn te.+ 10  To hiẹ mẹ wẹ yé nọ de yẹyi sọn adọzan otọ́ yetọn tọn go te,*+ yé sọ nọ zanhẹ yọnnu he ojlẹ lajijẹ tọn etọn hẹn zun mawé gánnugánnu.+ 11  To hiẹ mẹ, sunnu de nọ wà osùnú hẹ asi kọmẹnu etọn tọn,+ mẹdevo nọ yí walọ gblezọn do hẹn ovisi etọn flu,+ mẹdevo sọ nọ zanhẹ nọviyọnnu etọn, yèdọ viyọnnu otọ́ etọn titi tọn gánnugánnu.+ 12  To hiẹ mẹ, alọgodo-kuẹ nọ yin yíyí nado sọ̀n ohùn dai.+ Mì nọ yàn akuẹ namẹ+ bo nọ yí akuẹvi kavi ale,* mì sọ nọ hò kọmẹnu mìtọn lẹ dù.+ Mọwẹ, mì ko wọn mi pete,’ wẹ Oklunọ Nupojipetọ Jehovah dọ. 13  “‘Pọ́n! Yẹn yí alọ ṣie lẹ do hopẹ́ nado do wangbẹna ṣie hia gando ale mawadodo tọn he mì ko mọyi go, podọ gando nuyiwa hùnsọndai tọn lẹ he tin to ṣẹnṣẹn mìtọn go. 14  Be mìwlẹ na gbẹ́ yí adọgbigbo* do zindonukọn bọ alọ mìtọn lẹ na dohuhlọn to azán he gbè yẹn na yinuwa sọta mì te wẹ ya?+ Yẹn Jehovah lọsu wẹ ko dọ ẹ bo nasọ wà ẹ. 15  Yẹn na vúnvún mì pé gbọn akọta lẹ mẹ, yẹn nasọ gbà mì pé gbọn aigba lẹ ji,+ podọ yẹn na doalọtena mawé mìtọn.+ 16  Mìwlẹ na yin winyando to akọta lẹ nukọn, mì nasọ yọnẹn dọ yẹn wẹ Jehovah.’”+ 17  Ohó Jehovah tọn sọ vọ́ wá dè e dọmọ: 18  “Visunnu gbẹtọ tọn, owhé Islaeli tọn ko lẹzun ayámí tata de na mi. Yemẹpo wẹ yin gànvẹẹ, panu, gànyuu, po sunmí po to adò mẹ. Yé ko lẹzun ayámí fataka tọn.+ 19  “Enẹwutu, nuhe Oklunọ Nupojipetọ Jehovah dọ die: ‘Na mìmẹpo ko lẹzun ayámí tata de wutu,+ yẹn na bẹ mì pli dopọ do Jelusalẹm mẹ. 20  Kẹdẹdile yè nọ bẹ fataka, gànvẹẹ, gànyuu, sunmí po panu po pli do adò de mẹ do nado flọ miyọ́n do yé ji bosọ yọ́ yé, mọ wẹ yẹn na bẹ mì pli dopọ to homẹgble po adi ṣie po mẹ do niyẹn, yẹn nasọ flọ miyọ́n do mì ji bo na hẹn mì yọ́.+ 21  Yẹn na bẹ mì pli dopọ bo na flọ miyọ́n do mì ji to adi sinsinyẹn ṣie mẹ,+ mì nasọ yọ́ to e mẹ.+ 22  Kẹdẹdile fataka nọ yọ́ to adò mẹ do, mọ wẹ mì na yin hinhẹn yọ́ to e mẹ do niyẹn; mìwlẹ nasọ yọnẹn dọ yẹn Jehovah lọsu wẹ ko kọ̀n adi ṣie jẹgbonu do mì ji.’” 23  Ohó Jehovah tọn sọ vọ́ wá dè e dọmọ: 24  “Visunnu gbẹtọ tọn, dọna ẹn dọ, ‘Aigba de wẹ hiẹ he ma na yin kiklọ́we kavi he ji jikun ma na ja do to azán homẹgble tọn gbè. 25  Yẹwhegán etọn lẹ ko blasé to e mẹ,+ taidi kinnikinni he to lìlì bo to nuhe e wle tlẹndu.+ Yé to gbẹtọ* lẹ tlẹndu. Yé to adọkunnu po nuhọakuẹ lẹ po hòyí. Yé ko hẹn mẹsusu zun asuṣiọsi to e mẹ. 26  Yẹwhenọ etọn lẹ ko gbàsẹ́n ṣie,+ yé sọ to fiwiwe ṣie lẹ hẹnflu mapote.+ Yé ma nọ do vogbingbọn hia to nuhe yin wiwe po onú paa lẹ po ṣẹnṣẹn,+ yé ko sọ gboawupo nado do nuhe yin mawé po onú wiwe po hia,+ podọ yé gbẹ́ nado yìn gbọjẹzan ṣie lẹ, yé sọ kọnmasin do go e. 27  Ahọvi he to e mẹ lẹ taidi ohla nuwledutọ lẹ; yé nọ sọ̀n ohún dai bo nọ hù gbẹtọ* lẹ nado mọ ale mawadodo tọn yí.+ 28  Ṣigba, yẹwhegán etọn lẹ ko sá onú wewe do walọ yetọn lẹ ji. Yé nọ mọ numimọ oklọ tọn lẹ bo nọ dọ dọṣẹ lalo tọn lẹ,+ yé sọ nọ dọ dọ: “Nuhe Oklunọ Nupojipetọ Jehovah dọ die,” dile etlẹ yindọ Jehovah lọsu ma dọho de. 29  Omẹ aigba lọ tọn lẹ ko hòmẹdu bo jẹajo,+ yé ko sayana agbátọnọ po wamọnọ po, yé ko sọ hò mẹhe to jonọ-gbéji lẹ dù bo ma nọ dawhẹ dodo na yé.’ 30  “‘Yẹn donukun dọ mẹde na tọ́n sọn ṣẹnṣẹn yetọn bo na jla adó zannu tọn lọ do kavi nọte to nukọn ṣie to nùvo lọ nù do ota aigba lọ tọn mẹ bọ e ma nado yin vivasudo,+ ṣigba yẹn ma mọ mẹdepope. 31  Enẹwutu, yẹn na kọ̀n homẹgble ṣie do yé ji, yẹn nasọ yí miyọ́n adi sinsinyẹn ṣie tọn do sukúndona yé. Yẹn na hẹn kọdetọn ylankan aliho yetọn lẹ tọn wá ota yetọn titi ji,’ wẹ Oklunọ Nupojipetọ Jehovah dọ.”

Nudọnamẹ Odò Tọn

To paa mẹ, “be hiẹ na dawhẹ, be hiẹ na dawhẹ.”
Hogbe Heblugbe tọn lọ sọgan tindo kanṣiṣa hẹ hogbe he nọ dlẹnalọdo “omí” podọ e nọ yin yiyizan taidi hogbe vlẹko tọn.
To paa mẹ, “yé nọ de otọ́ yetọn jẹmẹ́ te.”
Kavi “afàsúnú.”
To paa mẹ, “ahun.”
Kavi “alindọn.”
Kavi “alindọn.”