Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Ezekiẹli 21:1-32

NUHE E BẸHẸN LẸ

  • Ohí whẹdida Jiwheyẹwhe tọn (1-17)

  • Ahọlu Babilọni tọn na yangbé Jelusalẹm tọn (18-24)

  •  Ahọvi ylankan Islaeli tọn didesẹ (25-27)

    • “De jẹgbakun lọ” (26)

    • ‘Kaka mẹhe tindo jlọjẹ nado wá’ (27)

  • Ohí sọta Amọninu lẹ (28-32)

21  Ohó Jehovah tọn sọ vọ́ wá dè e dọmọ:  “Visunnu gbẹtọ tọn, lẹ́ nukunmẹ towe pànta Jelusalẹm, bo basi nulila de sọta fiwiwe lọ lẹ bosọ dọ dọdai sọta aigba Islaeli tọn.  Dọna aigba Islaeli tọn dọ, ‘Nuhe Jehovah dọ die: “Yẹn na diọnukunsọ we, yẹn nasọ sún ohí ṣie sọn apà etọn mẹ+ bo na sán dodonọ po mẹylankan po sẹ̀ sọn hiẹ mẹ.  Na yẹn na sán dodonọ po mẹylankan po sẹ̀ sọn hiẹ mẹ wutu, ohí ṣie na yin súnsún sọn apà etọn mẹ sọta agbasalan* lẹpo sọn hùwaji yì agewaji.  Gbẹtọ lẹpo nasọ yọnẹn dọ yẹnlọsu, yèdọ Jehovah wẹ ko sún ohí ṣie sọn apà etọn mẹ. E ma nasọ gọ̀ biọ apà etọn mẹ ba.”’+  “Podọ hiẹ visunnu gbẹtọ tọn, wẹnazọ̀n dile a* to sisọsisọ, mọwẹ, wẹnazọ̀n sinsinyẹn to nukọn yetọn.+  Eyin yé sọ kanse we dọ, ‘Naegbọn hiẹ do to azọ̀nwẹn?’ hiẹ na dọ, ‘Na linlin de wutu wẹ.’ Na e họnwun dọ ehe na jọ bọ ahun lẹpo na gbàdo, alọ lẹpo na kuyẹ̀, ayiha lẹpo nasọ kúṣiọ, podọ osin na yọ̀n kligonu lẹpo.*+ ‘Pọ́n! E na jọ dandan—yèdọ e na jọ domọ,’ wẹ Oklunọ Nupojipetọ Jehovah dọ.”  Ohó Jehovah tọn sọ vọ́ wá dè e dọmọ:  “Visunnu gbẹtọ tọn, dọ dọdai bo dọ, ‘Nuhe Jehovah dọ die: “Dọna yé dọ, ‘Ohí de! Ohí de+ ko yin gingàn bọ yè ko sọ whlẹ́ ẹ. 10  E ko yin gingàn nado hù mẹsusu, yè ko sọ whlẹ́ ẹ na e nido nọ gbòdlán di abì.’”’” “Be míwlẹ ma dona jaya?” “‘Be ogánpò visunnu ṣie titi tọn wẹ e* na gbẹdai,+ dile e wà do na atin lẹpo ya? 11  “‘E ko yin zizejo na yè nido whlẹ́ ẹ podọ na e nido yin yiyizan. Yè gàn ohí ehe bosọ whlẹ́ ẹ na e nido yin zizedo alọmẹ na mẹhutọ de.+ 12  “‘Visunnu gbẹtọ tọn, dawhá bo do hùkluhú,+ na e ko wá sọta omẹ ṣie lẹ; e wá sọta ahọvi Islaeli tọn lẹpo.+ Omẹ ehelẹ na jai gbọn ohí lọ dali to pọmẹ hẹ omẹ ṣie lẹ. Enẹwutu, linú asapada towe na aluẹmẹninọ. 13  Na dodinnanu de ko yin bibasi,+ podọ etẹwẹ na jọ eyin ohí lọ gbẹ́ ogánpò lọ dai? Ewọ* ma na tin ba,’+ wẹ Oklunọ Nupojipetọ Jehovah dọ. 14  “Hiẹ visunnu gbẹtọ tọn, dọ dọdai, bo hopẹ́ bosọ vọ́ dọ ‘Ohí de!’ whla atọ̀n. Ohí he yè yí do hù gbẹtọ lẹ wẹ, yèdọ ohí he hù mẹsusu he lẹdo yé lẹ.+ 15  Ahun yetọn na gbàdo,+ mẹsusu nasọ jai to họngbo tòdaho yetọn tọn lẹ kọ̀n; yẹn na yí ohí de do hù gbẹtọ lẹ. Mọwẹ, e to gbigbòdlán di abì bọ yè sọ whlẹ́ ẹ na mẹhusudo! 16  Sánnu plaun yì adusiwhé! Juyi amiyọnwhé! Yì fidepope he onù towe yin lilẹhlan! 17  Yẹn na hopẹ́ bo nasọ yin homẹmiọnna.+ Yẹn Jehovah lọsu, wẹ ko dọ ẹ.” 18  Ohó Jehovah tọn sọ vọ́ wá dè e dọmọ: 19  “Na hiẹ tọn, visunnu gbẹtọ tọn, deali awe he ohí ahọlu Babilọni tọn na gbọn. Ali awe lọ lẹ na tọ́n sọn otò dopolọ mẹ, podọ ohia* de dona yin zizedo fie ali gbọn biọ tòdaho awe lọ lẹ mẹ. 20  Hiẹ na deali dopo na ohí he na wá sọta Laba+ Amọninu lẹ tọn, podọ deali awetọ sọta Jelusalẹm he yè do adó lẹdo+ to Juda. 21  Na ahọlu Babilọni tọn nọte nado dọ dọṣẹ to aliklantẹn lọ, yèdọ fie ali awe lẹ klan te. E mimí ogá lẹ. E kannubiọ boṣiọ* etọn lẹ; e sọ dindona otù.* 22  Nuyizan dọṣẹdidọ tọn he to adusilọ etọn mẹ yin dindlẹn hlan Jelusalẹm nado wleawuna awhàn-kẹkẹ lẹ, nado degbena mẹhuhu, na awhágbe awhàn tọn nido yin sisè, nado yí awhàn-kẹkẹ lẹ do họngbo lọ lẹ nù, nado wleawuna osla de bosọ dosla lẹ lẹdo e.+ 23  Ṣigba, e na taidi dọṣẹdidọ lalo tọn to nukun mẹhe* ko whlé na yé lẹ tọn mẹ.+ Amọ́, ewọ ko flin whẹhuhu yetọn, e nasọ wle yé di awhàn-kanlinmọ.+ 24  “Enẹwutu, nuhe Oklunọ Nupojipetọ Jehovah dọ die: ‘Mì ko dike bọ yè flin whẹhuhu mìtọn gbọn sẹ́nhẹngba po ylando mìtọn lẹ po didegbà to nuyiwa mìtọn lẹpo mẹ dali. Todin he yè ko flinnu jẹ mì ji, mì na yin wiwle gánnugánnu.’* 25  “Ṣigba, azán towe ko pé, hiẹ ahọvi ylankan Islaeli tọn he ko yin awugblena sinsinyẹn,+ yèdọ ojlẹ yasanamẹ godo tọn towe. 26  Nuhe Oklunọ Nupojipetọ Jehovah dọ die: ‘De tabla lọ sẹ̀ bosọ de jẹgbakun lọ.+ Ehe ma na yin nudopolọ.+ Ze mẹhe yìdo lọ daga+ bosọ zín mẹhe to aga lọ do odò.+ 27  Gbakija de, gbakija de, gbakija de wẹ yẹn na hẹn ẹn zun. E ma nasọ yin mẹde tọn ba kakajẹ whenue mẹhe tindo jlọjẹ sọgbe hẹ osẹ́n lọ na wá,+ yẹn nasọ yí i na ẹn.’+ 28  “Hiẹ visunnu gbẹtọ tọn, dọ dọdai bo dọ, ‘Ehe wẹ Oklunọ Nupojipetọ Jehovah dọ gando Amọninu lẹ po vlẹko yetọn po go.’ Dọna yé dọ, ‘Ohí de! Ohí de ko yin súnsún na mẹhuhu; yè ko sọ whlẹ́ ẹ nado husudo podọ nado gbòdlán di abì. 29  Mahopọnna numimọ oklọ tọn po dọṣẹdidọ lalo tọn he gando mì go lẹ po, mì na yin bibẹ dlan mẹhe ko yin hùhù lẹ ji,* yèdọ mẹylankan he azán yetọn ko pé lẹ, mẹhe ojlẹ yasanamẹ godo tọn yetọn ko wá lẹ. 30  Gọ̀ ohí lọ do apà etọn mẹ. Yẹn na dawhẹna mì to fie mì wá sọn,* yèdọ to otò mìtọn titi mẹ. 31  Yẹn na kọ̀n homẹgble ṣie jẹgbonu do mì ji. Yẹn na do adi zogbe ṣie hia mì, yẹn nasọ ze mì jo na sunnu kanylantọ lẹ, yèdọ mẹvasudotọ azọ́nyọnẹntọ lẹ.+ 32  Mì na lẹzun miyọ́n-flọnú;+ ohùn mìtọn nasọ yin sinsọndai to aigba lọ ji, podọ yè ma nasọ flin mì ba, na yẹn Jehovah lọsu wẹ ko dọ ẹ.’”

Nudọnamẹ Odò Tọn

Kavi “gbẹtọ.”
To paa mẹ, “alinkàn towe.”
Enẹ wẹ, adọ́, na obu wutu.
Enẹ wẹ, ohí Jehovah tọn.
Kavi “Ogánpò lọ.”
To paa mẹ, “alọ.”
To paa mẹ, “tẹlafimi.”
Wunmẹ dọṣẹdidọ tọn de.
Enẹ wẹ, mẹhe nọ nọ̀ Jelusalẹm lẹ.
To paa mẹ, “gbọn alọ dali.”
To paa mẹ, “dlan okọ̀ mẹhe yin hùhù lẹ tọn ji.”
To paa mẹ, “mì yin didá te.”