Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Ezekiẹli 20:1-49

NUHE E BẸHẸN LẸ

  • Otàn atẹṣiṣi Islaeli tọn (1-32)

  • Opagbe hẹngọwa tọn na Islaeli (33-44)

  • Dọdai sọta hùwaji (45-49)

20  To owhe ṣinawetọ mẹ, to azán aotọ osun atọ́ntọ tọn mẹ, delẹ to mẹho Islaeli tọn lẹ mẹ wá bo sinai to nukọn ṣie nado kanhose Jehovah.  Whenẹnu wẹ ohó Jehovah tọn wá dè e dọmọ:  “Visunnu gbẹtọ tọn, dọho hẹ mẹho Islaeli tọn lẹ bo dọna yé dọ, ‘Nuhe Oklunọ Nupojipetọ Jehovah dọ die: “Be mìwlẹ jlo na wá kanhose mi wẹ? ‘Dile yẹn togbẹ̀, yẹn ma na na gblọndo na kanbiọ mìtọn lẹ,’+ wẹ Oklunọ Nupojipetọ Jehovah dọ.”’  “Be hiẹ ko wleawufo nado dawhẹna yé?* Visunnu gbẹtọ tọn, be a ko wleawufo nado dawhẹna yé ya? Hẹn osùnú he tọgbo yetọn lẹ ko wà lẹ zun yinyọnẹn na yé.+  Dọna yé dọ, ‘Nuhe Oklunọ Nupojipetọ Jehovah dọ die: “Azán he gbè yẹn de Islaeli,+ yẹn sọ whlé* na kúnkan* owhé Jakọbu tọn, podọ yẹn hẹn dee zun yinyọnẹn na yé to aigba Egipti tọn ji.+ Mọwẹ, yẹn whlé na yé bo dọ, ‘Yẹn wẹ Jehovah Jiwheyẹwhe mìtọn.’  To azán enẹ gbè, yẹn whlé nado de yé tọ́njẹgbonu sọn aigba Egipti tọn ji yì aigba he yẹn ko dindona dai* na yé de ji, yèdọ aigba he ji anọ́sin po owín po to sisà te.+ Aigba enẹ wẹ yin dagbe hugan* to aigba lẹpo mẹ.  Whenẹnu wẹ yẹn dọna yé dọ, ‘Dopodopo mìtọn dona ze osùnú he to nukọn mìtọn lẹ dlan; mì yí boṣiọ hiọawu* Egipti tọn lẹ do hẹn mìde flu blo.+ Yẹn wẹ Jehovah Jiwheyẹwhe mìtọn.’+  “‘“Ṣigba, yé ko ṣiatẹ sọta mi bo masọ jlo na dotoaina mi. Yé ma ze osùnú he to nukọn yetọn lẹ dlan, yé masọ gbẹkọ boṣiọ hiọawu Egipti tọn lẹ go.+ Enẹwutu, yẹn dopà nado kọ̀n adi ṣie jẹgbonu do yé ji podọ nado do homẹgble ṣie hia yé to gigọ́ mẹ to aigba Egipti tọn ji.  Ṣigba, yẹn yinuwa na oyín ṣie tọn wutu, na e nikaa yin hinhẹnflu to akọta he ṣẹnṣẹn yé tin te lẹ nukọn.+ Na yẹn ko hẹn dee zun yinyọnẹn na yé* to akọta ehelẹ nukọn to whenue yẹn plan yé* tọ́njẹgbonu sọn aigba Egipti tọn ji.+ 10  Yẹn sọ plan yé tọ́njẹgbonu sọn aigba Egipti tọn ji bo hẹn yé wá danfafa ji.+ 11  “‘“Yẹn sọ na yé osẹ́ndoai ṣie lẹ bo hẹn nudide whẹdida tọn ṣie lẹ zun yinyọnẹn na yé,+ na mẹhe yìn yé lẹ nido nọgbẹ̀.+ 12  Yẹn sọ na yé gbọjẹzan ṣie lẹ+ taidi ohia de to yẹn po yewlẹ po ṣẹnṣẹn,+ na yé nido yọnẹn dọ yẹn, Jehovah, wẹ to yé klandowiwe. 13  “‘“Ṣigba, owhé Islaeli tọn ṣiatẹ sọta mi to danfafa ji.+ Yé ma setonuna osẹ́ndoai ṣie lẹ, yé sọ gbẹkọ nudide whẹdida tọn ṣie lẹ go, yèdọ ehe nọ hẹn mẹhe setonuna yé lẹ dogbẹ̀. Yé hẹn gbọjẹzan ṣie lẹ flu to aliho he sẹhundaga de mẹ. Enẹwutu, yẹn dopà nado kọ̀n adi ṣie jẹgbonu do yé ji to danfafa ji nado sukúndona yé.+ 14  Yẹn yinuwa na oyín ṣie titi tọn wutu, na e nikaa yin hinhẹnflu to akọta lẹ nukọn, yèdọ akọta he nukọn yẹn plan yé* tọ́njẹgbonu sọn lẹ.+ 15  Yẹn sọ whlé na yé to danfafa ji dọ yẹn ma na plan yé yì aigba he yẹn ko na yé lọ ji+—aigba he ji anọ́sin po owín po to sisà te,+ yèdọ aigba he yin dagbe hugan* to aigba lẹpo mẹ— 16  na yé gbẹkọ nudide whẹdida tọn ṣie lẹ go bo ma setonuna osẹ́ndoai ṣie lẹ bosọ hẹn gbọjẹzan ṣie lẹ flu, na yé magbe nado hodo boṣiọ hiọawu yetọn lẹ wutu.+ 17  “‘“Ṣigba, onú yetọn wàlẹblanuna mi* bọ yẹn ma và yé sudo; yẹn ma sukúndona yé to danfafa ji. 18  Yẹn dọna visunnu yetọn lẹ to danfafa ji+ dọ, ‘Mì setonuna aṣẹdai tọgbo mìtọn lẹ tọn blo+ kavi hodo nudide whẹdida tọn yetọn kavi hẹn mìde flu po boṣiọ hiọawu yetọn lẹ po blo. 19  Yẹn wẹ Jehovah Jiwheyẹwhe mìtọn. Mì nọ yìn osẹ́ndoai ṣie lẹ bo nọ setonuna nudide whẹdida tọn ṣie lẹ bosọ nọ yinuwa sọgbe hẹ yé.+ 20  Mì hẹn gbọjẹzan ṣie lẹ zun wiwe,+ yé nasọ yin ohia de to yẹn po mìwlẹ po ṣẹnṣẹn, na mìwlẹ nido yọnẹn dọ yẹn wẹ Jehovah Jiwheyẹwhe mìtọn.’+ 21  “‘“Ṣigba, visunnu lọ lẹ jẹ atẹṣi sọta mi ji.+ Yé ma setonuna osẹ́ndoai ṣie lẹ, yé masọ setonuna nudide whẹdida tọn ṣie lẹ bo yinuwa sọgbe hẹ yé gba, ehe nọ hẹn mẹhe setonuna yé lẹ dogbẹ̀. Yé hẹn gbọjẹzan ṣie lẹ flu. Enẹwutu, yẹn dopà nado kọ̀n adi ṣie jẹgbonu do yé ji podọ nado do homẹgble ṣie hia yé to gigọ́ mẹ to danfafa ji.+ 22  Ṣigba, yẹn diọlinlẹn+ bo yinuwa na oyín ṣie titi tọn wutu,+ bọ e ma nado yin hinhẹnflu to akọta lẹ nukọn, yèdọ mẹhe nukunmẹ yẹn plan yé* tọ́njẹgbonu te lẹ. 23  Yẹn sọ whlé na yé to danfafa ji, dọ yẹn na vúnvún yé pé gbọn akọta lẹ ṣẹnṣẹn bo nasọ gbà yé pé gbọn aigba lẹ ji,+ 24  na yé ma setonuna nudide whẹdida tọn ṣie lẹ bo gbẹkọ osẹ́ndoai ṣie lẹ go wutu,+ yé hẹn gbọjẹzan ṣie lẹ flu bosọ hodo* boṣiọ hiọawu tọgbo yetọn lẹ tọn lẹ.+ 25  Yẹn sọ jo yé do nado hodo aṣẹdai he ma yọ́n po nudide whẹdida tọn he ma na hẹn yé dogbẹ̀ lẹ po.+ 26  Yẹn sọ dike avọ́sinsan yetọn titi lẹ ni hẹn yé flu—to whenue yé hẹn viplọnji yetọn lẹpo jugbọn miyọ́n mẹ+—nado hẹn yé jẹ agbá, na yé nido yọnẹn dọ yẹn wẹ Jehovah.”’ 27  “Enẹwutu, visunnu gbẹtọ tọn E, dọhona owhé Islaeli tọn bo dọna yé dọ, ‘Nuhe Oklunọ Nupojipetọ Jehovah dọ die: “To aliho ehe mẹ ga, tọgbo mìtọn lẹ zánnu do go e gbọn nugbonọ-mayin hlan mi dali. 28  Yẹn plan yé wá aigba he yẹn ko whlé na yé lọ ji.+ To whenuena yé mọ okọ́ta he yiaga po atin he vùn lẹpo po,+ yé jẹ avọ́sinsan yetọn lẹ basi ji bosọ jẹ avọ́nunina homẹhẹngblenamẹ tọn yetọn lẹ na ji. Yé hẹn avọ́sinsan owán gblingblinnọ* yetọn lẹ wá bosọ kọ̀n avọ́nunina nùnù yetọn lẹ jẹgbonu do finẹ. 29  Enẹwutu, yẹn kanse yé dọ, ‘Etẹwẹ ofi yiaga he mì nọ yì ehe zẹẹmẹdo? (E gbẹ́ nọ yin yiylọdọ Ofi Yiaga kakajẹ egbé.)’”’+ 30  “Todin, dọna owhé Islaeli tọn dọ, ‘Nuhe Oklunọ Nupojipetọ Jehovah dọ die: “Be mìwlẹ to mìdelẹ hẹnflu to aliho dopolọ he mẹ tọgbo mìtọn lẹ hẹn yede flu te gbọn afọdidona boṣiọ hiọawu yetọn lẹ nado lọga hẹ yé to gbigbọ-liho dali wẹ ya?+ 31  Podọ, be mìwlẹ gbẹsọ to mìde hẹnflu kakajẹ egbé gbọn avọ́sinsan hlan boṣiọ hiọawu mìtọn lẹpo dali, bosọ nọ hẹn visunnu mìtọn lẹ jugbọn miyọ́n mẹ wẹ?+ Owhé Islaeli tọn E, be to ojlẹ dopolọ mẹ mì na donukun dọ yẹn na na gblọndo na kanbiọ mìtọn lẹ wẹ?”’+ “‘Dile yẹn togbẹ̀,’ wẹ Oklunọ Nupojipetọ Jehovah dọ, ‘Yẹn ma na na gblọndo na kanbiọ mìtọn lẹ.+ 32  Podọ nuhe mì tindo to ayiha* mẹ to whenue mì nọ to didọ dọ, “Mì dike mí ni taidi akọta lẹ nkọ, taidi whẹndo he to aigba devo lẹ ji he nọ sẹ̀n* atin po zannu po lẹ,”+ ma na yinmọ gbede.’” 33  “‘Dile yẹn togbẹ̀,’ wẹ Oklunọ Nupojipetọ Jehovah dọ, ‘Yẹn na duahọlu do mì ji po alọ gángán de po, po awà huhlọnnọ de po, podọ po adi sinsinyẹn de po.+ 34  Yẹn na hẹn mì jẹgbonu sọn gbẹtọ lẹ ṣẹnṣẹn bo na ṣinyan mì pli sọn aigba he ji yè yí alọ gángán de po awà huhlọnnọ de po gọna adi sinsinyẹn de do vúnvún mì pé gbọn lẹ.+ 35  Yẹn na plan mì wá danfafa he ji gbẹtọ lẹ te bo na dawhẹna mì to finẹ nukun sọ nukun.+ 36  “‘Kẹdẹdile yẹn dawhẹna tọgbo mìtọn lẹ to danfafa he to aigba Egipti tọn ji do, mọ wẹ yẹn na dawhẹna mì do niyẹn,’ wẹ Oklunọ Nupojipetọ Jehovah dọ. 37  ‘Yẹn na hẹn mì gbọn aglọpò lẹngbọhọtọ tọn lọ glọ+ bo nasọ hẹn mì gánnugánnu* nado setonuna alẹnu lọ. 38  Yẹn nasọ de atẹṣitọ lẹ po mẹhe to afọtùn osẹ́n ṣie ji lẹ po sẹ̀ sọn ṣẹnṣẹn mìtọn.+ Yẹn na de yé sọn jonọ-gbéji, ṣigba yé ma na yì aigba Islaeli tọn ji;+ mìwlẹ nasọ yọnẹn dọ yẹn wẹ Jehovah.’ 39  “Na hiẹ tọn, owhé Islaeli tọn E, nuhe Oklunọ Nupojipetọ Jehovah dọ die: ‘Dopodopo mìtọn ni yì bo sẹ̀n boṣiọ hiọawu etọn lẹ.+ Ṣigba, eyin mì ma dotoaina mi, yẹn na gbẹ́ mì dai. Podọ, mìwlẹ ma nasọ yí avọ́sinsan mìtọn lẹ po boṣiọ hiọawu mìtọn lẹ po do hẹn oyín wiwe ṣie flu ba.’+ 40  “‘Na to osó wiwe ṣie ji, yèdọ osó he yiaga de ji to Islaeli,’+ wẹ Oklunọ Nupojipetọ Jehovah dọ, ‘finẹ wẹ owhé Islaeli tọn blebu na nọ wà sinsẹ̀nzọn hlan mi te to aigba lọ ji.+ Yẹn na hùnhomẹ do yé go to finẹ, yẹn nasọ biọ nunina mìtọn lẹ po avọ́nunina sinsẹ́n tintan mìtọn tọn lẹ po, yèdọ onú wiwe mìtọn lẹpo.+ 41  Na owán gblingblin* lọ wutu, yẹn na hùnhomẹ do mì go, to whenue yẹn na plan mì tọ́n sọn gbẹtọ lẹ ṣẹnṣẹn bo nasọ ṣinyan mì pli sọn aigba he ji yè ko vúnvún mì pé gbọn lẹ;+ yẹn nasọ yin kinklandowiwe to ṣẹnṣẹn mìtọn to nukun akọta lẹ tọn mẹ.’+ 42  “‘Mìwlẹ nasọ yọnẹn dọ yẹn wẹ Jehovah,+ whenue yẹn na plan mì yì aigba Islaeli tọn ji,+ yèdọ aigba he yẹn whlé nado na tọgbo mìtọn lẹ. 43  Podọ to finẹ, mìwlẹ na flin walọ mìtọn po nuyiwa mìtọn he mì yí do hẹn mìde flu lẹpo po,+ mì nasọ gbẹwanna mìde* na nuylankan he mì ko wà lẹpo wutu.+ 44  Whenẹnu wẹ mìwlẹ na yọnẹn dọ yẹn wẹ Jehovah, to whenue yẹn na yinuwa hẹ mì na oyín ṣie tọn wutu,+ e ma yin sọgbe hẹ walọ ylankan mìtọn kavi walọ gblezọn mìtọn lẹ wutu gba, mì owhé Islaeli tọn E,’ wẹ Oklunọ Nupojipetọ Jehovah dọ.” 45  Ohó Jehovah tọn sọ vọ́ wá dè e dọmọ: 46  “Visunnu gbẹtọ tọn, lẹ́ nukunmẹ towe hlan hùwaji bo basi nulila hlan finẹ, bosọ dọ dọdai hlan zungbo hùwaji tọn. 47  Dọna zungbo hùwaji tọn dọ, ‘Sè ohó Jehovah tọn. Nuhe Oklunọ Nupojipetọ Jehovah dọ die: “Yẹn na do miyọ́n de hlan we,+ e nasọ fiọ atin-mú po atin húhú he tin to hiẹ mẹ lẹpo po. Miyọ́n he to jiji lọ ma na yin ṣíṣí,+ nukunmẹ lẹpo wẹ e nasọ hẹn wló sọn hùwaji yì agewaji. 48  Agbasalan* lẹpo nasọ mọdọ yẹn, Jehovah, wẹ ko domiyọ́n ẹn bọ e ma nasọ yin ṣíṣí.”’”+ 49  N’sọ dọmọ: “Ṣo, Oklunọ Nupojipetọ Jehovah E! Yé to didọ gando go e dọ, ‘Be e ma yin ajlú do* wẹ ewọ te poun ya?’”

Nudọnamẹ Odò Tọn

Kavi “nado lá whẹdida do yé ji ya?”
To paa mẹ, “yẹn ze alọ ṣie daga.”
To paa mẹ, “okún.”
Kavi “ko bẹ̀ pọ́n.”
Kavi “aṣọ́donu.”
Hogbe Heblugbe tọn lọ sọgan tindo kanṣiṣa hẹ hogbe he nọ dlẹnalọdo “omí” podọ e nọ yin yiyizan taidi hogbe vlẹko tọn.
Enẹ wẹ, Islaeli.
Enẹ wẹ, Islaeli.
Enẹ wẹ, Islaeli.
Kavi “aṣọ́donu.”
To paa mẹ, “nukun ṣie.”
Enẹ wẹ, Islaeli.
To paa mẹ, “bọ nukun yetọn lẹ hodo.”
Kavi “owán dagbe; owán he yọ́nsè.” To paa mẹ, “owán vivi.”
To paa mẹ, “gbigbọ.”
Kavi “yilizọn na; wadevizọn na.”
To paa mẹ, “do gẹdẹ mì.”
Kavi “owán dagbe; owán he yọ́nsè.” To paa mẹ, “owán vivi.”
To paa mẹ, “nukun mìtọn lẹ.”
Kavi “Gbẹtọ.”
Kavi “yin ohó milomilo dọ.”