Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Ezekiẹli 16:1-63

NUHE E BẸHẸN LẸ

  • Owanyi Jiwheyẹwhe tọn na Jelusalẹm (1-63)

    • Yin mimọ di ovi he yè gbẹkọ e go (1-7)

    • Jiwheyẹwhe doaṣọ́na ẹn bo biọ alẹnu alọwle tọn mẹ hẹ ẹ (8-14)

    • E ma yin nugbonọ ba (15-34)

    • Yin yasana di yọnnu ayọdetọ (35-43)

    • Yè yí i jlẹdo Samalia po Sodọmi po go (44-58)

    • Jiwheyẹwhe flin alẹnu etọn (59-63)

16  Ohó Jehovah tọn sọ vọ́ wá dè e dọmọ:  “Visunnu gbẹtọ tọn, hẹn osùnú Jelusalẹm tọn lẹ zun yinyọnẹn na ẹn.+  Hiẹ na dọ dọ, ‘Nuhe Oklunọ Nupojipetọ Jehovah dọhlan Jelusalẹm die: “Aigba Kenani tọn ji wẹ hiẹ wá sọn podọ finẹ wẹ a yin jiji te. Amolinu+ de wẹ otọ́ towe, onọ̀ towe sọ yin Hetinu+ de.  Na nuhe dù jiji towe, ahọnkan towe ma yin sinsán to azán he gbè a yin jiji te, yè masọ lawu na we nado klọ́we wé, podọ ojẹ̀ ma yin sisá do agbasa towe go, yè masọ bu avọ̀ do we.  Mẹdepope masọ wàlẹblanuna we sọmọ nado wà depope to onú ehelẹ mẹ na we. Mẹdepope ma vẹawu we. Kakatimọ, hiẹ yin zizedlan danji na hiẹ* yin wangbẹna sọn gbeegbe a yin jiji wutu.  “‘“To whenue yẹn juwajei, yẹn mọ we bọ a to bibli to ohùn towe titi mẹ, podọ dile hiẹ mlọnai to ohùn towe mẹ, yẹn dọmọ: ‘Nọgbẹ̀!’ Mọwẹ, yẹn dọna hiẹ he mlọnai to ohùn towe titi mẹ dọmọ: ‘Nọgbẹ̀!’  Yẹn sọ hẹn we jideji susugege, taidi atin he to wúwú to danji lẹ, hiẹ sọ whẹ́n bo vùn bo do aṣọ́donu dagbe hugan lẹ. Hiẹ sọ tọ́n anọ́ bọ oda towe lẹ sù, ṣigba hiẹ gbẹ́ pò to omẹ́ jọgbe.”’  “‘To whenue yẹn juwajei bo mọ we, yẹn mọdọ a ko whẹ́n sọ mẹhe yè na do owanyi hia. Enẹwutu, yẹn dlẹn awugbó* ṣie do ji we+ bo sú omẹ́ towe bosọ basi whiwhle de bo biọ alẹnu de mẹ hẹ we,’ wẹ Oklunọ Nupojipetọ Jehovah dọ, ‘hiẹ sọ lẹzun ṣie.  Humọ, yẹn lawu na we bo klọ́ ohùn towe sẹ̀ bosọ sá amì na we.+ 10  Enẹgodo, yẹn ze awugbó kikó de do na we bo na we afọpa ayú* tọn dagbedagbe lẹ bosọ bu we do alavọ dagbedagbe mẹ, bo ze awugbó akuẹgegenu tọn lẹ do na we. 11  Yẹn doaṣọ́na we, do alọgàn do alọ na we, bosọ ze kọnú de dokọna we. 12  Humọ, yẹn do alọkẹ de do awọntin towe go, do tómẹnu na we, bosọ ṣinyọ́n jẹgbakun whanpẹnọ de do ota towe. 13  Hiẹ zindonukọn nado to sika po fataka po yí do to aṣọ́dona dewe, awù towe lẹ sọ yin alavọ dagbedagbe tọn, núzinzan akuẹgegenu tọn po awugbó kikó de po. Linfin dagbedagbe, owín po amì po wẹ hiẹ nọ dù, podọ a whẹ́n bosọ yọnwhanpẹ taun,+ a sọ pegan nado yin ahọsi de.’”* 14  “‘Yindidi* towe sọ jẹ gbigbà pé ji gbọn akọta lẹ ṣẹnṣẹn+ na whanpẹ towe wutu, whanpẹ pipé de wẹ, na gigo daho ṣie wẹ yẹn yí do ji we wutu,’+ wẹ Oklunọ Nupojipetọ Jehovah dọ.” 15  “‘Ṣigba, hiẹ jẹ ginganjẹ whanpẹ towe go+ ji bo lẹzun galọtọ de na yindidi towe wutu.+ A sọ hẹn galilọ towe sudeji hẹ mẹdepope he juwajei,+ whanpẹ towe sọ lẹzun etọn. 16  A yí delẹ to awugbó towe lẹ mẹ, a sọ basi ofi yiaga whanpẹnọ lẹ fie hiẹ nọ lọga te+—onú mọnkọtọn lẹ ma dona wá aimẹ, mọjanwẹ yé ma dona jọ gbede do niyẹn. 17  Hiẹ sọ yí aṣọ́donu whanpẹnọ towe he yè yí sika po fataka he yẹn na we po do basi lẹ bo yí yé do basi boṣiọ asu lẹ bosọ lọga hẹ yé.+ 18  Hiẹ sọ yí awugbó kikó towe lẹ bo ṣinyọnna yé,* a sọ yí amì po nuyọnwan ṣie po do basi avọ́nunina hlan yé.+ 19  Podọ akla he yẹn ko na we—yèdọ akla he yè yí linfin dagbedagbe, amì po owín po do basi he yẹn na we nado dù—hiẹ sọ yí i do basi avọ́nunina hlan yé taidi owán gblingblin* de.+ Nuhe jọ pẹpẹ niyẹn,’ wẹ Oklunọ Nupojipetọ Jehovah dọ.” 20  “‘Hiẹ sọ ze visunnu po viyọnnu he a ko ji na mi lẹ+ po bo yí yé do sanvọ́ hlan boṣiọ lẹ na yé nido tlẹ́n yé dù+—be galilọ towe ma ko zẹ̀pá ya? 21  A hù visunnu ṣie lẹ, bosọ yí yé do sanvọ́ gbọn hinhẹn yé jugbọn miyọ́n mẹ dali.+ 22  To whenue hiẹ doafọna osùnú po galilọ towe lẹpo po, a ma flin azán ovu whenu towe tọn lẹ, whenue hiẹ to omẹ́ jọgbe bo to bibli to ohùn towe titi mẹ. 23  To oylan he hiẹ ko wà lẹpo godo, dindọn, dindọn wẹ na we,’+ wẹ Oklunọ Nupojipetọ Jehovah dọ. 24  ‘Hiẹ basi agbà de na dewe bosọ basi ofi yiaga de na dewe to ali plitẹn lẹpo. 25  To nọtẹn he diyin hugan to alihogbó lẹpo ji wẹ hiẹ gbá ofi yiaga towe lẹ do, a sọ hẹn whanpẹ towe zun osùnú de gbọn dewe zizejo* na mẹdepope he juwajei dali,+ a sọ hẹn galilọ towe sudeji.+ 26  Hiẹ lọga hẹ visunnu Egipti tọn lẹ,+ yèdọ kọmẹnu gblezọn towe lẹ,* a sọ hẹn homẹgble mi gbọn titlọ biọ galilọ mẹ dali. 27  Todin, yẹn na dealọ ṣie sọta we bo na de núdùdù towe pò,+ yẹn na jo we do alọmẹ na yọnnu he gbẹwanna we lẹ,+ yèdọ viyọnnu Filistinu lẹ tọn he walọ gblezọn towe ko dowinyan.+ 28  “‘Na hiẹ ma tindo pekọ wutu, a yì lọga hẹ visunnu Asilia tọn lẹ,+ ṣigba whenue a ko lọga hẹ yé godo, a masọ mọ pekọ. 29  Enẹwutu, a sọ dlẹnkanna galilọ towe jẹ aigba ajọwatọ lẹ tọn* ji podọ hẹ Kaldeanu lẹ,+ ṣigba enẹ lọsu ma tlẹ hẹn pekọ wá na we. 30  Ahun towe to azọ̀njẹ* sinsinyẹn,’* wẹ Oklunọ Nupojipetọ Jehovah dọ, ‘to whenue hiẹ to onú ehe lẹpo wà bo to nuyiwa taidi galọtọ tasinyẹntọ he gblezọn de!+ 31  Ṣigba, to whenue hiẹ basi agbà towe do nọtẹn he diyin hugan to alihogbó lẹ ji bosọ basi ofi yiaga towe do ali plitẹn lẹpo, hiẹ ma yinuwa taidi galọtọ de, na a ma kẹalọyi ahọsumẹ depope. 32  Yọnnu ayọdetọ de wẹ hiẹ, yèdọ mẹhe nọ kẹalọyi jonọ lẹ kakati nido yin asu etọn titi!+ 33  Galọtọ lẹpo wẹ nọ mọ nunina yí sọn gbẹtọ lẹ si,+ ṣigba hiẹ wẹ nọ na nunina mẹhe túnwán hodo we lẹpo+ podọ hiẹ wẹ nọ yí alọgodo-kuẹ do basi oylọna yé sọn awà lẹpo ji nado wá lọga hẹ we.+ 34  Hiẹ gbọnvona yọnnu galọtọ he pò lẹ. Mẹdepope ma nọ lọga dile hiẹ nọ wà do! Hiẹ nọ suahọ mẹdevo lẹ kakati yewlẹ nido suahọ we. A gbọnvona mẹhe pò lẹ.’ 35  “Enẹwutu, hiẹ galọtọ E,+ sè ohó Jehovah tọn. 36  Nuhe Oklunọ Nupojipetọ Jehovah dọ die: ‘Na wantuntun towe ko jẹ gbangba bọ omẹ́ towe ko jẹ klòlò na galilọ towe hẹ mẹyiwanna towe lẹ wutu podọ na boṣiọ hiọawu* he yin osùnú+ he hiẹ ko yí ohùn visunnu towe lẹ tọn do sanvọ́ hlan lẹpo wutu,+ 37  enẹwutu, yẹn na bẹ mẹyiwanna he hiẹ ko hẹn awuvivi wá na lẹpo pli, mẹhe hiẹ yiwanna po mẹhe hiẹ gbẹwanna lẹpo po. Yẹn na bẹ yé pli sọta we sọn awà lẹpo ji, yẹn nasọ do omẹ́ towe hia yé bọ yé nasọ mọ we to omẹ́ jọgbe.+ 38  “‘Yẹn nasọ dawhẹna we sọgbe hẹ nuhe yọnnu ayọdetọ lẹ+ po yọnnu he nọ sọ̀n ohùn dai lẹ+ po jẹna, ohùn towe nasọ yin sinsọndai to adi po awuwhàn po mẹ.+ 39  Yẹn na jo we do alọ yetọn mẹ, yé nasọ gídí agbà towe lẹ bo na họ́ ofi yiaga towe lẹ liai;+ podọ yé na vún awugbó towe lẹ sọn gowe+ bo na hò aṣọ́donu whanpẹnọ towe lẹ yí+ bo nasọ jo we do omẹ́ jọgbe. 40  Yé na fọ́n gbẹtọgun lẹ do ji we+ bo na dlan zannu do we+ bo nasọ yí ohí yetọn lẹ do hù we.+ 41  Yé na fiọ ohọ̀ towe lẹ+ bo na dawhẹna we to yọnnu susu lẹ nukunmẹ; yẹn nasọ hẹn galilọ towe wá opodo,+ bọ hiẹ ma nasọ suahọ mẹdevo lẹ ba. 42  Yẹn ma nasọ duadi gando gowe ba,+ homẹgble ṣie nasọ lẹ́ sọn ji we;+ homẹ ṣie na fá podọ yẹn ma nasọ gblehomẹ ba.’ 43  “‘Na hiẹ ma flin azán ovu whenu towe tọn lẹ wutu+ bo ko hẹn homẹgble mi gbọn onú ehe lẹpo wiwà dali, todin yẹn na hẹn kọdetọn ylankan aliho towe lẹ tọn wá ota towe titi ji,’ wẹ Oklunọ Nupojipetọ Jehovah dọ, ‘hiẹ ma nasọ zindonukọn to walọ gblezọn towe po osùnú towe lẹpo po mẹ ba. 44  “‘Pọ́n! Gbẹtọ lẹ na nọ yí aṣagbe ehe zan gando gowe dọmọ: “Onọ̀ etọn wẹ viyọnnu lọ yí do di!”+ 45  Onọ̀ towe wẹ a yí do di, yèdọ mẹhe gbẹwanna asu etọn po ovi etọn lẹ po. Podọ nọviyọnnu towe lẹ wẹ a sọ yí do di, mẹhe gbẹwanna asu yetọn po ovi yetọn lẹ po. Hetinu de wẹ onọ̀ towe, otọ́ towe sọ yin Amolinu de.’”+ 46  “‘Samalia wẹ mẹdaho towe yọnnu,+ yèdọ mẹhe nọ nọ̀ agewaji* po viyọnnu etọn lẹ po,*+ podọ nọviyọnnu towe pẹvi he nọ nọ̀ hùwaji* po viyọnnu etọn lẹ po+ wẹ Sodọmi.+ 47  E ma yindọ hiẹ zinzọnlin to aliho yetọn lẹ mẹ bo wà osùnú yetọn lẹ kẹdẹ wẹ gba, ṣigba to ojlẹ kleun de gblamẹ, hiẹ tlẹ sọ ylan hugan yé to walọ gblezọn towe lẹpo mẹ.+ 48  Dile yẹn togbẹ̀,’ wẹ Oklunọ Nupojipetọ Jehovah dọ, ‘Sodọmi nọviyọnnu towe po viyọnnu etọn lẹ po ma wà nuhe hiẹ po viyọnnu towe lẹ po ko wà. 49  Pọ́n! Nuṣiwa nọviyọnnu towe Sodọmi tọn die: Ewọ po viyọnnu etọn lẹ po+ yigo,+ yé sọ tindo núdùdù susugege+ bo nọ nọ̀ fẹẹmẹ;+ ṣogan yé ma gọalọna mẹhe yè to yasana lẹ po agbátọnọ lẹ po gba.+ 50  Yé zindonukọn to sakla mẹ+ bosọ to osùnú lẹ wà to nukọn ṣie,+ enẹwutu yẹn mọdọ dandannu wẹ e yin nado de yé sẹ̀.+ 51  “‘Samalia lọsu+ ma tlẹ wà odaa ylando he hiẹ ko wà lẹ tọn. Hiẹ zindonukọn bo to osùnú towe lẹ hẹn sudeji, ehe zọ́n bọ nọviyọnnu towe lẹ tlẹ sọ sọawuhia di dodonọ na osùnú he hiẹ ko wà lẹpo wutu.+ 52  Todin, hiẹ dona doakọnna winyan towe na a ko suwhẹna* nuyiwa nọviyọnnu towe lẹ tọn wutu. Na ylando towe ko ylanhu yetọn wutu, yé yin dodonọ hú we. Enẹwutu todin, winyan ni hù we na a nisọ doakọnna winyan lọ dọ a ko hẹn nọviyọnnu towe lẹ sọawuhia di dodonọ wutu.’ 53  “‘Yẹn nasọ bẹ kanlinmọ yetọn lẹ pli, yèdọ kanlinmọ Sodọmi po viyọnnu etọn lẹ po tọn, podọ kanlinmọ Samalia po viyọnnu etọn lẹ po tọn; yẹn nasọ bẹ kanlinmọ towe lẹ pli dopọ hẹ yé,+ 54  na hiẹ nido doakọnna winyan towe; winyan nasọ hù we na nuhe a ko wà gbọn homẹmimiọnna yé dali wutu. 55  Nọviyọnnu towe titi lẹ, yèdọ Sodọmi po viyọnnu etọn lẹ po, na gọjẹ lehe yé ko te do dai, Samalia po viyọnnu etọn lẹ po nasọ gọjẹ lehe yé ko te do dai, podọ hiẹ po viyọnnu towe lẹ po na gọjẹ lehe mì ko te do dai.+ 56  Hiẹ ma jẹ nado ylọ yinkọ Sodọmi nọviyọnnu towe tọn to azán goyiyi towe tọn gbè, 57  whẹpo kanyinylan towe titi yin didegbà.+ Todin, viyọnnu Silia tọn lẹ po kọmẹnu etọn lẹ po ṣàn we kò, podọ viyọnnu Filistinu lẹ tọn,+ yèdọ yé he tin to lẹdo towe mẹ lẹ gbẹwanna we. 58  Hiẹ na jiya kọdetọn ylankan walọ gblezọn po osùnú towe lẹ po tọn,’ wẹ Jehovah dọ.” 59  “Na nuhe Oklunọ Nupojipetọ Jehovah dọ die: ‘Todin, yẹn na yinuwa hẹ we kẹdẹdile hiẹ ko yinuwa do,+ na hiẹ gbẹkọ whiwhle lọ go gbọn alẹnu ṣie gbigbà dali.+ 60  Ṣigba, yẹn na flin alẹnu he yẹn basi hẹ we to azán ovu whenu towe tọn lẹ gbè, yẹn nasọ basi alẹnu tẹgbẹ tọn de hẹ we.+ 61  Hiẹ na flin walọyizan towe bọ winyan na hù we+ to whenue hiẹ na kẹalọyi nọviyọnnu towe lẹ, yèdọ mẹhe hú mẹho we lẹ po mẹhe whè hú we to owhe mẹ lẹ po, yẹn nasọ yí yé na we taidi viyọnnu lẹ, ṣigba e ma na yin na alẹnu towe tọn wutu.’ 62  “‘Podọ yẹnlọsu wẹ na hẹn alẹnu he yẹn na basi hẹ we lodo; hiẹ nasọ yọnẹn dọ yẹn wẹ Jehovah. 63  Whenẹnu wẹ hiẹ na flin bọ winyan nasọ hù we tlala sọmọ bọ a ma na penugo nado kẹnù na winyan towe tọn wutu,+ to whenue yẹn na basi ovẹsè do ota towe mẹ, mahopọnna nuhe hiẹ ko wà lẹpo,’+ wẹ Oklunọ Nupojipetọ Jehovah dọ.”

Nudọnamẹ Odò Tọn

Kavi “alindọn towe.”
Kavi “yẹli.”
Kavi “kanlin-yú.”
Kavi “a sọ jẹna otẹn yẹyinọ.”
To paa mẹ, “Oyín.”
Enẹ wẹ, boṣiọ asu lọ lẹ.
Kavi “owán dagbe; owán he yọ́nsè.” To paa mẹ, “owán vivi.”
To paa mẹ, “afọ towe lẹ dindlẹn.”
To paa mẹ, “kọmẹnu towe he tindo agbasalan daho lẹ.”
To paa mẹ, “aigba Kenani tọn.”
Kavi “ko gbọjọ.”
Kavi vlavo, “Homẹ ṣie gọ́ na adi sinsinyẹn sọta we.”
Hogbe Heblugbe tọn lọ sọgan tindo kanṣiṣa hẹ hogbe he nọ dlẹnalọdo “omí” podọ e nọ yin yiyizan taidi hogbe vlẹko tọn.
To paa mẹ, “amiyọnwhé towe.”
Vlavo to alọdlẹndo tòpẹvi he to oglọ etọn lẹ.
To paa mẹ, “adusiwhé towe.”
Kavi “ko yiavùnlọna.”