Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Ezekiẹli 14:1-23

NUHE E BẸHẸN LẸ

  • Boṣiọ-sẹ̀ntọ lẹ yin whẹgbledo (1-11)

  • Yè ma gán dapana whẹdida sọta Jelusalẹm (12-23)

    • Noa, Daniẹli po Jobu po (14, 20)

14  Podọ delẹ to mẹho Islaeli tọn lẹ mẹ wá bo sinai to nukọn ṣie.+  Whenẹnu wẹ ohó Jehovah tọn wá dè e dọmọ:  “Visunnu gbẹtọ tọn, sunnu ehelẹ ko magbe nado hodo boṣiọ hiọawu* yetọn lẹ, yé ko sọ wleawuna zannu ahlida tọn he nọ hẹn gbẹtọ lẹ nado waylando. Be yẹn na dike yé ni kanhose mi wẹ ya?+  Todin, dọho hẹ yé bo dọna yé dọ, ‘Nuhe Oklunọ Nupojipetọ Jehovah dọ die: “Eyin Islaelivi de magbe nado hodo boṣiọ hiọawu etọn lẹ bo wleawuna zannu ahlida tọn de he na hẹn gbẹtọ lẹ nado waylando, bosọ wá yẹwhegán de dè nado kanhose, yẹn, Jehovah, na gblọnna ẹn to aliho he jẹ de mẹ sọgbe hẹ boṣiọ hiọawu susugege etọn lẹ.  Na yẹn na gbàhundona* owhé Islaeli tọn, na yemẹpo ko lẹkọ sọn godo ṣie bo ko doafọna boṣiọ hiọawu yetọn lẹ wutu.”’+  “Enẹwutu, dọna owhé Islaeli tọn dọ, ‘Nuhe Oklunọ Nupojipetọ Jehovah dọ die: “Mì lẹkọ bo tọ́n sọn boṣiọ hiọawu mìtọn lẹ godo bosọ lẹkọ sọn osùnú he wà mì te lẹ kọ̀n.+  Na eyin Islaelivi kavi mẹhe to jonọ-gbéji to Islaeli depope klan ede sọn yẹn go bo magbe nado hodo boṣiọ hiọawu etọn lẹ bosọ wleawuna zannu ahlida tọn de he nọ hẹn gbẹtọ lẹ nado waylando, podọ eyin ewọ sọ wá nado kanhose yẹwhegán ṣie,+ yẹn, Jehovah lọsu wẹ na gblọnna ẹn.  Yẹn na diọnukunsọ omẹ enẹ bo na hẹn ẹn lẹzun ohia avase tọn de po aṣagbọ́nu de po, yẹn nasọ sán ẹn sẹ̀ sọn omẹ ṣie lẹ mẹ;+ mìwlẹ nasọ yọnẹn dọ yẹn wẹ Jehovah.”’  “‘Ṣigba, eyin yẹwhegán lọ yin kiklọ bo na gblọndo de, be yẹn, Jehovah wẹ ko klọ yẹwhegán lọ.+ Yẹn nasọ dlẹnalọ ṣie jẹgbonu sọta ẹ bo na sukúndona ẹn sọn omẹ ṣie lẹ mẹ to Islaeli. 10  Yé na jiya whẹhuhu yetọn tọn; whẹhuhu mẹhe kanhose tọn na yin dopolọ po whẹhuhu yẹwhegán lọ tọn po, 11  bọ owhé Islaeli tọn ma nado zindonukọn nado to dindanbu sọn dè e bo to yede hẹnflu gbọn sẹ́nhẹngba yetọn lẹpo dali ba. Yé nasọ yin omẹ ṣie lẹ bọ yẹn nasọ yin Jiwheyẹwhe yetọn,’+ wẹ Oklunọ Nupojipetọ Jehovah dọ.” 12  Ohó Jehovah tọn sọ vọ́ wá dè e dọmọ: 13  “Visunnu gbẹtọ tọn, eyin aigba de waylando bo ma yin nugbonọ na mi, yẹn na dealọ ṣie jẹgbonu sọta ẹ bo na súali núdùdù tọn etọn,*+ yẹn nasọ hẹn huvẹ wá e ji+ bo na sán gbẹtọ po kanlin po sẹ̀ sọn e ji.”+ 14  “‘Eyin omẹ atọ̀n ehelẹ tlẹ tin to e ji, yèdọ Noa,+ Daniẹli+ po Jobu+ po, yede* kẹdẹ wẹ yé na whlẹn na dodowiwa yetọn wutu,’+ wẹ Oklunọ Nupojipetọ Jehovah dọ.” 15  “‘Kavi mí ni dọ dọ yẹn hẹn gbekanlin ylankan lẹ nado jugbọn aigba lọ ji bọ yé và mẹhe to e ji lẹ sudo* bosọ hẹn ẹn jẹvọ́ bọ mẹdepope ma sọgan gbọn e ji na gbekanlin lọ lẹ wutu.+ 16  Dile yẹn togbẹ̀,’ wẹ Oklunọ Nupojipetọ Jehovah dọ, ‘eyin omẹ atọ̀n ehelẹ tlẹ tin to e ji, yé ma na whlẹn visunnu kavi viyọnnu yetọn lẹ; yede kẹdẹ wẹ yé na whlẹn, aigba lọ nasọ jẹvọ́.’” 17  “‘Kavi mí ni dọ dọ yẹn hẹn ohí de wá aigba enẹ ji+ bo dọ dọ: “Ohí de ni jugbọn aigba lọ ji,” bo sán gbẹtọ po kanlin po sẹ̀ sọn e ji,+ 18  eyin omẹ atọ̀n ehelẹ tlẹ tin to e ji, dile yẹn togbẹ̀,’ wẹ Oklunọ Nupojipetọ Jehovah dọ, ‘yé ma sọgan whlẹn visunnu kavi viyọnnu yetọn lẹ; yede kẹdẹ wẹ yé na whlẹn.’” 19  “‘Kavi mí ni dọ dọ yẹn do azọ̀nylankan de hlan aigba enẹ ji+ bo kọ̀n adi ṣie jẹgbonu do e ji nado sọ̀n ohùn dai gbọn gbẹtọ po kanlin po sinsánsẹ sọn e ji dali, 20  eyin Noa,+ Daniẹli+ po Jobu+ po tlẹ tin to e ji, dile yẹn togbẹ̀,’ wẹ Oklunọ Nupojipetọ Jehovah dọ, ‘yé ma sọgan whlẹn visunnu kavi viyọnnu yetọn lẹ; yede* kẹdẹ wẹ yé na whlẹn na dodowiwa yetọn wutu.’”+ 21  “Na nuhe Oklunọ Nupojipetọ Jehovah dọ die: ‘Nuhe na jọ niyẹn eyin yẹn do yasanamẹ ṣie ẹnẹ*+ lẹ hlan—yèdọ ohí, huvẹ, gbekanlin ylankan po azọ̀nylankan po+—sọta Jelusalẹm nado sán gbẹtọ po kanlin po sẹ̀ sọn e mẹ.+ 22  Ṣigba, mẹhe pò to e mẹ lẹ na họ̀ngán bo na yin hinhẹn tọ́njẹgbonu sọn finẹ,+ yèdọ visunnu lẹ po viyọnnu lẹ po. Yé nasọ wá dè we, podọ eyin hiẹ mọ aliho po walọ yetọn lẹ po, nugbajẹmẹji he yẹn hẹnwa Jelusalẹm ji na miọnhomẹna we, yèdọ nuhe yẹn ko wà hẹ ẹ lẹpo.’” 23  “‘Yé na miọnhomẹna we eyin hiẹ mọ aliho po walọ yetọn lẹ po, hiẹ nasọ yọnẹn dọ e ma yin tata wẹ yẹn ko wà nuhe yẹn dona wà hẹ ẹ lọ lẹ,’+ wẹ Oklunọ Nupojipetọ Jehovah dọ.”

Nudọnamẹ Odò Tọn

Hogbe Heblugbe tọn lọ sọgan tindo kanṣiṣa hẹ hogbe he nọ dlẹnalọdo “omí” podọ e nọ yin yiyizan taidi hogbe vlẹko tọn.
To paa mẹ, “yẹn na wle ahun.”
To paa mẹ, “na wẹ́n opò akla tọn etọn.” Vlavo to alọdlẹndo, opò he nọ yin yiyizan nado to akla.
Kavi “alindọn yetọn.”
Kavi “bọ yé hù ovi he to e ji lẹ.”
Kavi “alindọn yetọn.”
Kavi “whẹdida mẹhusudo tọn ṣie ẹnẹ.”